Nthimo
2 Mwanawa, weetĩkĩla ndeto syakwa
Na waia mĩao yakwa ta ũthwii,
2 Kwa kũtea kũtũ kwaku wĩwʼe ũĩ
Na kwelekelya ngoo yaku ũtonyinĩ wa kũvathũkanyʼa maũndũ;
3 O na ĩngĩ, weeta ũtonyi wa kũelewa maũndũ na wasya mũnene
Na wookĩlĩlya ũtonyi wa kũvathũkanyʼa maũndũ wasya waku;
4 Waendeea kũũmantha ta vetha,
Na waendeea kũũmantha ta ũthwii mũvithe;
5 Nĩvo ĩndĩ ũkaelewa kũkĩa Yeova,
Na ũkakwata ũmanyi wa Ngai.
6 Nĩkwĩthĩwa Yeova mwene nũnenganae ũĩ;
Kanyw’anĩ wake vaumaa ũmanyi na ũtonyi wa kũvathũkanyʼa maũndũ.
7 Nĩwiaa ũĩ wa kwĩka maũndũ kwondũ wa ala alũngalu;
Nĩ ngao kwa ala makinyĩlaa wĩanĩunĩ.
8 Nũsyaĩĩasya tũsĩla twa sila wa katĩ,
Na akasũvĩa nzĩa ya ala malũmanasya nake.
9 Nĩvo ĩndĩ wĩelewa kĩla kĩlũngalu, kĩla kyosanĩte na ũsili wa katĩ na kĩla kĩseo,
Nzĩa yonthe ya maũndũ ala maseo.
10 Yĩla ũĩ walika ngoonĩ yaku
Na ũmanyi wendeesya thayũ* waku,
11 Ũtonyi wa kũsũanĩa ũkaũsyaĩĩasya,
Na ũtonyi wa kũvathũkanyʼa maũndũ ũkaũsũvĩaa,
12 Nĩ kana ũũtangĩĩe kuma nzĩanĩ nthũku,
Kuma mũndũnĩ ũla ũneenaa maũndũ mavuku,
13 Kuma andũnĩ ala matiaa tũsĩla twa ũlũngalu
Nĩ kana maendele nzĩanĩ sya kĩvindu,
14 Kuma andũnĩ ala matanĩaa kwĩka naĩ,
Ala mewʼĩthawʼa mũyo nĩ kwĩka maũndũ mavuku mũno,
15 Ala tũsĩla twoo twĩthĩawa twĩ tũthyoeku
Na ala maũndũ moo onthe methĩawa ma ũseleke.
16 Ũkaũtangĩĩa kuma vala ve mũndũ mũka mwau,*
Kuma ndetonĩ sya kũsesenga* sya mũndũ mũka kĩlaalai,*
17 Ũla ũtiaa mũnyanya ũla maĩ ndũũ mũno e wa mũika*
Na ayũlwa nĩ ũtianĩo wa Ngai wake;
18 Nĩkwĩthĩwa nyũmba yake ĩvotaa kĩkw’ũnĩ,
Na tũsĩla twake tũtongoeasya* andũ kwa ala makwie na mate na ũtonyi o na ũmwe.
19 Vai ũmwe katĩ wa ala mamanyanaa kĩ-mwĩĩ nake* ũkasyoka,
O na maikasyoka ĩngĩ tũsĩlanĩ twa thayũ.
20 Kwoou, atĩĩa nzĩa ya andũ aseo
Na ũyĩkala tũsĩlanĩ twa ala alũngalu,
21 Nĩkwĩthĩwa no ala alũngalu me oka makekala ĩũlũ wa nthĩ,
Na ala mataweteka ũthũku* nĩmo makatiwa vo.
22 Ĩndĩ ala athũku, makavetangwa kuma ĩ nthĩ,
Na nzeleke ikakũwa syumwʼe nthĩnĩ wayo.