Nthimo

15 Ũsũngĩo mũuu* nũminaa ũthilĩku,

Ĩndĩ ndeto mbai* nĩyũkĩlasya ũthatu.

 2 Ũĩmĩ wa ũla mũĩ nũtũmĩaa ũmanyi nesa,

Ĩndĩ kanywʼa wa ndia ũneenaa maũndũ ma ũtumanu ũteũkũlya.

 3 Metho ma Yeova me kĩla vandũ,

Maisyaĩĩsya ũthũku na ũseo.

 4 Ũĩmĩ mũuu* nĩ mũtĩ wa thayũ,

Ĩndĩ ũneeni mũthyoeku nũtũlaa mũndũ ngoo.*

 5 Mũndũ mũtumanu ndanengae ũkany’o wa ĩthe ndaĩa,

Ĩndĩ mũndũ mũĩ nĩwĩtĩkĩlaa kũlũngwa.*

 6 Nyũmbanĩ ya ũla mũlũngalu vethĩawa na ũthwii mwingĩ,

Ĩndĩ ũsyao wa ũla mũthũku ũmũeteae* thĩna.

 7 Ilomo sya ala oĩ inyaĩĩkasya ũmanyi,

Ĩndĩ ngoo ya ndia ndyĩkaa ũu.

 8 Nthembo ya ala athũku nĩmũthatasya Yeova,

Ĩndĩ mboya ya ala alũngalu nĩmũtanĩthasya Ngai.

 9 Yeova nũmenete nzĩa ya ũla mũthũku,

Ĩndĩ nĩwendete ũla ũatĩĩaa ũlũngalu.

10 Ũla waĩtye nzĩa onaa kũlũngwa kwĩ kũthũku,*

Ĩndĩ mũndũ o na wĩva ũmenaa kũkanwʼa akakwʼa.

13 Ngoo ndanu ĩtumaa mũndũ oneka e mũsanzamũku,

Ĩndĩ woo wa ngoo nũminaa veva.

14 Ngoo ĩeleawa maũndũ nĩmanthaa ũmanyi,

Ĩndĩ kanywʼa wa ndia ũĩsaa* ũtumanu.

15 Mĩthenya yonthe ya mũndũ ũkũthĩna yĩthĩawa yĩ mĩthũku,

Ĩndĩ ũla wĩ ngoo nzanzamũku* ethĩawa na mboka ĩteũthela.

16 Nĩ kavaa kwĩthĩwa na syĩndũ o nini ũimũkĩa Yeova,

Kwĩ kwĩthĩwa na ũthwii mwingĩ vamwe na kĩũũyũ.*

17 Nĩ kavaa kũya nyũnyi wĩ vandũ ve wendo

Kwĩ kũya nzaũ ĩĩthĩtwʼe ĩkanoa* wĩ vandũ ve kĩmena.

18 Mũndũ ũthataa mũno okĩlasya kĩthokoo,

Ĩndĩ ũla ũtathataa mĩtũkĩ nũvoovasya ĩteta.

19 Nzĩa ya ũla mũtulu yĩthĩawa ĩilye wiio wa mĩwʼa,

Ĩndĩ kasĩla ka ala alũngalu kethĩawa kailye ta lelũ mũtindimalu.

20 Mwana mũĩ nũtanĩthasya ĩthe,

Ĩndĩ ndia nĩvũthasya inyia.

21 Ũtumanu nũtanĩthasya ũla ũte kĩlĩko,*

Ĩndĩ mũndũ wĩsĩ kũvathũkanyʼa maũndũ aendaa mbee ĩmwe kwa ĩmwe.

22 Mĩvango ndyaĩlaa yĩla andũ maema kũkũlanyʼa ũtao,*

Ĩndĩ atai aingĩ matumaa maũndũ mathi nesa.

23 Mũndũ nũtanĩaa kũnengane ũsũngĩo ũla waĩlĩte,*

Na ndeto yaneenwa ĩvindanĩ yĩla yaĩlĩte yĩthĩawa yĩ nzeo ta kĩ!

24 Kasĩla ka thayũ kambataa vala ve ũla wĩ ũmanyi mũliku,

Nĩ kana kamũsũvĩe ndakatheee Mbũanĩ.*

25 Yeova akaomboa nyũmba ya ala me mĩngʼathĩlĩĩlyo,

Ĩndĩ akasũvĩa mũvaka wa mũndũ mũka ndiwa.

26 Yeova nũmenete mĩvango ya ũla mũthũku,

Ĩndĩ ndeto sya kwendeesya syĩthĩawa syĩ ntheu methonĩ ma Ngai.

27 Mũndũ ũla ũseũvasya vaita na nzĩa itaĩlĩte aeteae mũsyĩ wake mwene thĩna,*

Ĩndĩ ũla ũmenete ĩvaki akaendeea kwĩkala thayũ.

28 Ngoo ya ũla mũlũngalu nĩvindĩĩasya ĩtanasũngĩa,*

Ĩndĩ kanyw’a wa ala athũku ũneenaa maũndũ mathũku ũteũkũlya.

29 Yeova ethĩawa vaasa vyũ na ala athũku,

Ĩndĩ nĩwĩwʼaa mboya ya ala alũngalu.

30 Metho makenu nĩmatumaa* ngoo ĩtana;

Ũvoo mũseo nĩwĩkĩaa mavĩndĩ vinya.*

31 Ũla wĩthukĩĩasya ũkany’o ũla ũnenganae thayũ

E vala ve ala oĩ, ewʼaa ta wĩ o mũsyĩ.

32 Ũla ũleaa kũlũngwa avũthasya thayũ wake,

Ĩndĩ mũndũ o na wĩva wĩthukĩĩasya aikanwʼa nũkwataa ũtonyi wa kũelewa maũndũ.*

33 Kũmũkĩa Yeova kũmanyĩasya mũndũ kwĩthĩwa na ũĩ,

Na mbee wa ũkumyo vethĩawa na wĩnyivyo.