Nthimo

14 Mũndũ mũka ũla kwa wʼo mũĩ nĩwakaa nyũmba yake,

Ĩndĩ ũla mũtumanu nũmĩomboaa na moko make mwene.

 2 Ũla ũendaa ũlũngalunĩ wake nũmũkĩaa Yeova,

Ĩndĩ ũla nzĩa syake syĩthĩawa na ũseleke* nũmũvũthasya Ngai.

 3 Ndata ya mĩng’athĩlĩĩlyo yĩthĩawa kanyw’anĩ wa ala atumanu,

Ĩndĩ ilomo sya ala oĩ ikamasũvĩa.

 4 Vala vate ng’ombe, mũvalatĩ wĩthĩawa wĩ mũtheu,

Ĩndĩ vinya wa nzaũ nũetae ngetha mbingĩ.

 5 Ngũsĩ ndĩkĩĩku ndĩkakengana,

Ĩndĩ ngũsĩ ya ũvũngũ ĩkenganaa na mĩthũmũ yayo yonthe.

 6 Mũndũ wĩ kĩvũthya amanthaa ũĩ na ndakwataa o na ũmwe,

Ĩndĩ ũmanyi ũkĩaa na mĩtũkĩ mũndũ wĩ ũtonyi wa kũelewa maũndũ.

 7 Ĩkala vaasa na mũndũ mũtumanu,

Nũndũ ndũkona ũmanyi ilomonĩ syake.

 8 Nũndũ wa ũĩ, mũndũ mũĩ nũeleawa nzĩa ĩla ũendete nayo,

Ĩndĩ ndia ikengawa nĩ* ũtumanu wasyo.

 9 Andũ atumanu nĩmavũthĩĩasya ĩvĩtyo,*

Ĩndĩ andũnĩ alũngalu, vethĩawa na wendi wa kwĩwʼana.*

10 Ngoo nĩyo yĩthĩawa yĩsĩ ũũ wayo neyo,*

Na vai mũeni ũtonya kũtana nayo.

11 Nyũmba ya ala athũku ĩkaanangwa,

Ĩndĩ ĩeema ya ala alũngalu yĩkaendeea nesa.

12 Ve nzĩa yonekaa ta yaĩlĩte methonĩ ma mũndũ,

Ĩndĩ mũthya ĩtongoeasya kĩkw’ũnĩ.

13 O na mũndũ aitheka ngoo no yĩthĩwe na woo,

Na kũtana no kũthelele kyevanĩ.

14 Mũndũ ũla ngoo yake yaĩtye nzĩa akaketha mosyao ma nzĩa syake,

Ĩndĩ mũndũ mũseo akethaa ĩtuvi ya meko make.

15 Mũndũ mũtũndũu* aĩkĩĩaa kĩla ndeto,

Ĩndĩ mũndũ mũĩ avindĩĩasya mũno kĩla ĩtambya.

16 Ũla mũĩ ethĩawa e metho na nĩwĩthyũũaa aume ũthũkunĩ,

Ĩndĩ ndia ndĩkũlasya* na yĩthĩawa yĩyĩĩkĩĩe mũno.

17 Mũndũ ũla ũthataa mĩtũkĩ ekaa maũndũ ma ũtumanu,

Ĩndĩ mũndũ ũla ũsũanĩaa maũndũ nesa* nũmenawa.

18 Andũ atũndũu* makatiĩwa ũtumanu,

Ĩndĩ ala oĩ mekĩawa ngovia ya ũsumbĩ ya ũmanyi.

19 Andũ athũku makalasimĩka kũkumanĩa ala aseo,

Na ala mekaa maũndũ mathũku makakumana mĩvĩanĩ ya ala alũngalu.

20 Mũndũ ngya nũmenawa o na nĩ atũi make,

Ĩndĩ mũndũ mũthwii ethĩawa na anyanya aingĩ.

21 Ũla ũvũthasya mũtũi wake nĩwĩkaa naĩ,

Ĩndĩ mũndũ o na wĩva wonasya mũthĩni ĩnee ethĩawa e mũtanu.

23 Kĩla mũthemba wa wĩa mũito nũtethasya mũndũ,

Ĩndĩ ndeto syoka itumaa mũndũ aĩwa.

24 Ngovia ya ũsumbĩ ya ala oĩ nĩ ũthwii woo;

Ĩndĩ ũtumanu wa ndia no ũtumanu.

25 Ngũsĩ ya wʼo nĩtangĩĩaa mathayũ,

Ĩndĩ mũkengani akenganaa na mĩthũmũ yake yonthe.

26 Mũndũ ũla ũmũkĩaa Yeova ethĩawa na wĩkwatyo mũlũmu,

Na kũmũkĩa kũu kũkeethĩwa wĩvitho wa syana syake.

27 Kũmũkĩa Yeova nĩ mbuluti ya* thayũ,

Nĩkumasya mũndũ iteinĩ sya kĩkwʼũ.

28 Wingĩ wa andũ nĩ ũnene wa mũsumbĩ,

Ĩndĩ mũtongoi ũte na andũ ũsumbĩkĩte nũvalũkaa.

29 Ũla ũtathataa mĩtũkĩ ethĩawa na ũmanyi mwingĩ,

Ĩndĩ ũla ũte wũmĩĩsyo onanasya ũtumanu wake.

30 Ngoo ĩuĩtye nĩnengae mwĩĩ thayũ,*

Ĩndĩ kĩwĩu kyoasya mavĩndĩ.

31 Ũla ũkengaa mũthĩni na aimũvena aumaa Mũmbi wake,

Ĩndĩ mũndũ o na wĩva wonasya ngya ĩnee nũmũkumasya Ngai.

32 Ũla mũthũku akavalũkw’a nĩ ũthũku wake mwene,

Ĩndĩ ũla mũlũngalu akakwata wĩvitho wĩanĩunĩ wake.

33 Ũĩ wĩkalaa ũuĩtye ngoonĩ ya mũndũ ũla ũeleawa maũndũ,

Ĩndĩ no nginya wĩyonany’e vala ve ndia.

34 Ũlũngalu nũnenevasya mbaĩ,

Ĩndĩ naĩ nĩmĩkĩĩthasya nthoni.

35 Mũsumbĩ nũtanĩthawʼa nĩ mũthũkũmi ũla wĩkaa maũndũ na ũmanyi mũliku,

Ĩndĩ nũthilĩkĩlaa mũndũ ũla wĩkaa maũndũ me nthoni.