Nthimo
12 Ũla wendete kũlũngwa endete ũmanyi,
Ĩndĩ ũla ũmenete ũkany’o ndasũanĩaa.*
2 Mũndũ mũĩ nĩwĩtĩkĩlawa nĩ Yeova,
Ĩndĩ Ngai nũsilĩlaa mũndũ ũla wĩkaa mĩvango mĩthũku.
3 Vai mũndũ wĩthĩawa e mũsũvĩĩku nũndũ wa kwĩka ũthũku,
Ĩndĩ ala alũngalu maikakũwa nongi.
4 Mũndũ mũka mwaĩlu nĩ ngovia ya ũsumbĩ mũtwenĩ wa mũũme,
Ĩndĩ mũndũ mũka ũla wĩkaa maũndũ me nthoni ethĩawa ailye ta wou mavĩndĩnĩ make.
5 Mosũanĩo ma ala alũngalu methĩawa mosanĩte na sila wa katĩ,
Ĩndĩ ũtao wa ala athũku wĩthĩawa wa ũkengani.
6 Ndeto sya ala athũku nĩ mũmaitha woveesye oae,*
Ĩndĩ kanywʼa wa ala alũngalu nũmatangĩĩaa.
7 Ala athũku mangʼuthũlwa, mayĩthĩawa vo ĩngĩ,
Ĩndĩ nyũmba ya ala alũngalu ĩkaendeea kũũngama.
8 Mũndũ nũkathawa nũndũ wa ndeto sya ũĩ ila ũneenaa,
Ĩndĩ ũla wĩ ngoo nthyoeku akavũthwʼa.
9 Nĩ kavaa kũnengwa ndaĩa o vanini na kwĩthĩwa na mũthũkũmi
Kwĩ kwĩkumya na kwaĩwa nĩ lĩu.*
10 Ũla mũlũngalu nũsũvĩaa nyamũ syake sya mũsyĩ,*
Ĩndĩ o na tei wa ũla mũthũku wĩthĩawa ũngʼendu.
11 Ũla ũĩmaa mũũnda wake akeanĩwa nĩ lĩu,
Ĩndĩ ũla ũsembanasya na maũndũ matatethya nde kĩlĩko.*
12 Mũndũũme mũthũku ewʼĩaa kĩwĩu kyai kĩla aũme angĩ athũku makwatĩtye,
Ĩndĩ mwĩi wa alũngalu nũsyaaa ũsyao.
13 Mũndũ mũthũku nũkwataw’a nĩ ũneeni wake mũthũku,
Ĩndĩ ũla mũlũngalu nũvonokaa akauma thĩnanĩ.
14 Mũndũ nĩwĩanĩawa nĩ ũseo nũndũ wa ũsyao wa ũneeni* wake,
Na wĩa wa moko make ũkamũtuva.
15 Nzĩa ya ũla mũtumanu yĩthĩawa yaĩlĩte methonĩ make mwene,
Ĩndĩ ũla mũĩ nĩwĩtĩkĩlaa ũtao.
16 Mũndũ mũtumanu onanasya ũndũ wathatwʼa o ndatĩkanĩ ĩsu,*
Ĩndĩ mũndũ mũĩ aumwa ndatindanĩaa na* ũndũ ũsu.
17 Ũla wumasya ũkũsĩ e mũĩkĩĩku akaneena ũwʼo,*
Ĩndĩ ngũsĩ ya ũvũngũ nĩkenganaa.
18 Ndeto itasũanĩĩtwe nesa itonyangaa ta ũvyũ,
Ĩndĩ ũĩmĩ wa ũla mũĩ nũvoasya.
19 Ilomo ila ineenaa ũwʼo ikekala tene na tene,
Ĩndĩ ũĩmĩ ũla ũkenganaa ũkekala o kavinda kakuvĩ.
20 Ũvũngũ wĩthĩawa ngoonĩ ya ala mavangaa maũndũ ma kũũmĩsya,
Ĩndĩ ala matumaa kwĩthĩwa na mũuo* methĩawa na ũtanu.
21 Vai ũndũ wa kũũmĩsya ũkakwata mũndũ mũlũngalu,
Ĩndĩ ala athũku makakwatwa nĩ mĩisyo mĩthũku mũno.
22 Ilomo ila ikenganaa nimũthatasya Yeova,
Ĩndĩ ala mekaa maũndũ mekwonanyʼa nĩ aĩkĩĩku nĩmamũtanĩthasya.
23 Mũndũ mũĩ nũvithaa kĩla wĩsĩ,
Ĩndĩ ngoo ya ũla mũtumanu ĩneenaa ũtumanu wake ĩteũkũlya.
24 Moko ma ũla wĩ kĩthito makasumbĩka,
Ĩndĩ moko matulu makathũkũmĩthwʼa wĩa wa kũlasimĩthwʼa.
25 Kĩũũyũ ngoonĩ ya mũndũ nĩkĩtumaa ĩitavĩwa,*
Ĩndĩ ndeto nzeo nĩmĩthangaasya.
26 Mũndũ mũlũngalu nũmanthaa isesi syake nesa,
Ĩndĩ nzĩa ya ala athũku yĩkaa kũmasya.
27 Ala atulu maisembanasya nzyĩma,
Ĩndĩ kĩthito nĩ ũthwii wa vata wa mũndũ.
28 Kasĩla ka ũlũngalu katongoeasya thayũnĩ;
Kasĩlanĩ kau vayĩthĩawa na kĩkwʼũ.