Nthimo

11 Ithimi ite sya wʼo* nimũthatasya Yeova,

Ĩndĩ kĩthimo kya wʼo nĩkĩmũtanĩthasya.*

 2 Yĩla mĩtũlyo yooka, kĩvũthya nĩkĩatĩĩaa,

Ĩndĩ ũĩ wĩthĩawa na ala me wĩnyivyo.*

 3 Wĩanĩu wa ala alũngalu nĩwʼo ũmatongoeasya,

Ĩndĩ ũseleke wa nzeleke ũkasyananga.

 4 Ũthwii ndũkatethya* o na vanini mũthenyanĩ wa ũthilĩku,

Ĩndĩ ũlũngalu nĩwʼo ũkavonokya mũndũ kuma kĩkw’ũnĩ.

 5 Ũlũngalu wa ũla ũtaweteka ũthũku nũlũngalasya kasĩla kake,

Ĩndĩ ũla mũthũku akavalũkwʼa nĩ ũthũku wake mwene.

 6 Ũlũngalu wa ala alũngalu ũkamavonokya,

Ĩndĩ nzeleke ikakwatwʼa nĩ mawendi masyo.

 7 Mũndũ mũthũku akw’a, wĩkwatyo wake nũthelaa;

Na maũndũ ala wĩkwatĩtye nũndũ wa ũtonyi wake o namo nĩmathelaa.

 8 Ũla mũlũngalu nũvonokawʼa kuma thĩnanĩ,

Na ũla mũthũku aikwatwa nĩ ũ thĩna.

 9 Mũkaĩi wa mũĩkĩĩo* nũeteae mũtũi wake wanangĩko na kanyw’a wake,

Ĩndĩ ũmanyi nũvonokasya ala alũngalu.

10 Ũseo wa ala alũngalu nũtanĩthasya ndũa,

Na athũku mathela, andũ nĩmasĩlĩlaa.

11 Ũathimo wa ala alũngalu nũtumaa ndũa ĩnenevwʼa,

Ĩndĩ kanywʼa wa ala athũku nũmĩomboaa.

12 Mũndũ o na wĩva ũte kĩlĩko* nũvũthasya* mũtũi wake,

Ĩndĩ mũndũ ũla wĩsĩ kũvathũkanyʼa maũndũ nesa ekalaa avindĩtye.

13 Mwilĩanĩli aendaa kũũ na kũũ avuanĩtye maũndũ maneeniwe kĩmbithĩnĩ,

Ĩndĩ mũndũ wa kũĩkĩĩka* nĩwĩkalasya ũndũ wĩ kĩmbithĩ.*

14 Yĩla vate ũtongoi wĩ na ũtũĩka,* andũ nĩmavalũkaa,

Ĩndĩ atai aingĩ matumaa maũndũ maĩla.*

15 Mũndũ o na wĩva ũũngamĩaa kĩla mũeni wakovethwʼa,* vate ndĩi maũndũ make makathi naĩ,

Ĩndĩ mũndũ o na wĩva wĩsiĩĩaa ndakakethanyʼe* nĩ kana ewʼane ũndũnĩ ta ũsu akeethĩwa e mũsũvĩĩku.

16 Mũndũ mũka mũseo* nũkumawʼa,

Ĩndĩ andũ mate tei nĩmeyoseaa ũthwii.

17 Mũndũ wĩkaa angĩ nesa* nĩwĩtethasya we mwene,*

Ĩndĩ mũndũ mũngʼendu eyĩeteae mathĩna* we mwene.

18 Ũla mũthũku akwataa ndĩvi ya ũkengani,

Ĩndĩ ũla ũvuĩaa ũlũngalu anengawe ĩtuvi ya wʼo.

19 Ũla ũũngamaa alũmĩte ũlũngalunĩ akakwata thayũ,

Ĩndĩ ũla ũsembanasya ũthũku akakwʼa.

20 Ala athyoeku ngoonĩ nĩmamũthatasya Yeova,

Ĩndĩ ala nzĩa yoo ĩtaweteka ũthũku nĩmamũtanĩthasya.

21 Manya ũndũ ũũ nesa:* Ũla mũthũku ndakaema kũsilĩlwa,

Ĩndĩ syana sya ũla mũlũngalu ikavonoka.

22 O ta mbete ya thaavu ĩnyiũũnĩ ya ngũlũe

Nowʼo mũndũ mũka mwanake ũla ũleaa kwĩthĩwa na kĩlĩko wĩthĩawa ailye.

23 Wendi wa ala alũngalu ũtongoeasya moseonĩ,

Ĩndĩ kĩla ala athũku mekwatasya kĩtongoeasya ũthilĩkunĩ.

24 Mũndũ ũmwe anenganae kwa ũlau* na aikwata mbingangĩ;

Nake ũngĩ aleaa kũnengane kĩla waĩlĩte kũnengane, ĩndĩ aitwʼĩka ngya.

25 Mũndũ* ũla mũlau akaaĩla,*

Na mũndũ o na wĩva ũla ũvuũkasya angĩ,* we mwene akavuũkwʼa.

26 Andũ makaumanĩa ũla ũleaa na lĩu wa mbaa ngetha,

Ĩndĩ makaathima ũla ũũthooasya.

27 Ũla wĩkĩaa kĩthito eke ũseo amanthaa kwonwʼa ũseo,

Ĩndĩ ũla ũmanthaa ũthũku, vate ndĩi, kĩu nokyo kĩkamũkĩa.

28 Ũla wĩkwatasya ũthwii wake akavalũka,

Ĩndĩ ala alũngalu makeana ta matũ.

29 Mũndũ o na wĩva ũla ũeteae mũsyĩ wake thĩna* akatiĩwa kĩseve,

Na ndia ĩkeethĩwa mũthũkũmi wa ũla mũĩ ngoonĩ.

30 Ũsyao wa ũla mũlũngalu nĩ mũtĩ wa thayũ,

Na ũla ũsindaa mathayũ* nĩ mũĩ.

31 Ethĩwa, vate ndĩi, ũla mũlũngalu ĩũlũ wa nthĩ nũtuvawa,

Wĩona ũla mũthũku na mwĩki wa naĩ ta ũkekwa ũu mũno wĩana ata!