Yovu
8 Nĩvo ĩndĩ Mbilitati, ũla waĩ Mũsuua, wasũngĩie asya atĩĩ:
2 “Wĩendeea kũneena ũu nginya ĩndĩĩ?
Ndeto sya kanywʼa waku no kĩseve kĩ vinya!
3 We Ngai akeelelũkya ũsili wa katĩ,
Kana we Mwene Vinya Wʼonthe akeelelũkya ũlũngalu?
4 Ethĩwa ana maku nĩmanamũvĩtĩisye,
Nũnaekie masilĩlwe nũndũ wa ũlei woo;*
5 Ĩndĩ keka no ũmanthe Ngai
Na ũimwĩsũva Mwene Vinya Wʼonthe akwonyʼe ũseo,
6 Na keka kwa wʼo wĩ mũtheu na wĩ mũlũngalu,
No akwĩthukĩĩsye*
Na aikũtũnga vala waĩlĩte kwĩthĩwa.
7 Na o na kau mwambĩĩo waku waĩ mũnini,
Ĩvinda yaku yũkĩte yĩthĩwa yĩ ĩseo mũno.
8 Mwa kũlya, nzyawa ya ĩvinda ĩvĩtu,
Na ũyĩthukĩĩsya nesa maũndũ ala aa-ĩthe meemanyĩisye.
9 Nĩkwĩthĩwa tũnasyaiwe o ĩyoo, na tũyĩsĩ kĩndũ,
Nũndũ mĩthenya yitũ ĩũlũ wa nthĩ no kyuu.
10 Mo maikaũmanyĩsya
Na maikũtavya kĩla mesĩ?*
11 Yo ĩkangaa no yĩanĩe vandũ vate ĩia?
Wʼo mũangi no wĩanĩe vandũ vate kĩwʼũ?
12 Itambĩte kũvalĩka, itambĩte kũtilwa,
Ikooma mbee wa mũtĩ ũngĩ o na wĩva.
13 Ũu nĩwʼo kwĩthĩawa kwa* onthe ala molawa nĩ Ngai,
Nĩkwĩthĩwa wĩkwatyo wa ala matakĩaa Ngai* ũkathela,
14 Ala maĩkĩĩaa syĩndũ sya mana
Na ala wĩkwatyo woo wĩthĩawa wĩ mũvũthũ ta ũlũalũĩ wa* mbũambũĩ.
15 Akaaĩĩa nyũmba yake, ĩndĩ ndĩkaendeea kũũngama;
Akatata kũmĩkwatĩĩa, ĩndĩ ndĩkekala ĩvinda yĩasa.
16 We nĩ mũtĩ mũthithu kyeninĩ kya sua,
Na nthongooo syake itambaa mũũndanĩ.
17 Mĩi yake nĩlikanĩaa kĩvumbunĩ kya mavia;
Amanthaa nyũmba mavianĩ.*
18 Ĩndĩ yĩla wakũwa* aumwʼa vandũnĩ vake,
Vandũ vau vakamũkaĩa na vayasya, ‘Nyie ndyaakwona.’
19 Ĩĩ, ũu nĩwʼo ũkaa;*
Na ĩndĩ angĩ mayumĩla kĩtoonĩ.
20 Nĩ wʼo ki kana Ngai ndakalea ala malũmasya wĩanĩu woo;*
O na ndakatwʼĩĩka* andũ athũku,
21 Nĩkwĩthĩwa no ũkausũsya kanywʼa waku ĩtheka
Na ilomo syaku wasya mũnene wa ũtanu.
22 Ala maũmenaa makeekĩĩthwʼa nthoni,
Na ĩeema ya ala athũku yĩikethĩwa vo ĩngĩ.”