Yovu
7 “Wʼo thayũ wa mũndũ ũla ũtonya kũkwʼa ĩũlũ wa nthĩ ũyĩilye ta wĩa wa kũlasimĩthwʼa,
Na mĩthenya yake ĩyĩilye ya mũthũkũmi mũandĩke?
2 O ta ngombo, ethĩawa na mea maingĩ ma kwona kyuu,
Na ta mũthũkũmi mũandĩke, nĩweteelaa ĩtuvi yake.
3 Kwoou nĩnengetwe myei ya mana
Na nĩtalĩlwe motukũ ma thĩna.
4 Nakoma ngũlasya, ‘Ngaamũka ĩndĩĩ?’
Ĩndĩ o ũndũ ũtukũ ũendeee kwĩkusya, nilitaa nde na ũthũmũo nginya kũkakya.*
5 Mwĩĩ wakwa wusũĩte iinyũ na makwaũ ma kĩko;
Kĩkonde kyakwa kyusĩe ngũsĩ na mavia.
6 Mĩthenya yakwa ĩendaa na mĩtũkĩ mũno kwĩ kĩlinga kya mũtumi,
Na ĩthelaa vate na wĩkwatyo.
7 Lilikana kana thayũ wakwa nĩ kĩseve,
Kana itho yakwa yĩikesa kwona ũtanu* ĩngĩ.
8 Itho yĩla yĩmbene oyu yĩikambona ĩngĩ;
Metho menyu makamantha, ĩndĩ ndikethĩwa vo.
9 O ta ĩtu yĩla yĩthelaa na yĩyaa,
Ũla ũtheeaa Mbũanĩ* ndambataa ĩngĩ.
10 Ndakasyoka nyũmba kwake ĩngĩ,
Na vandũ vake vaikamũmanya ĩngĩ.
11 Kwoou, ndisiĩĩa kanywʼa wakwa.
Nĩngũneena woonĩ mwingĩ wa veva wakwa;
Nĩngũnyungunyĩsya ũũnĩ wa thĩna wakwa!*
12 Nyie nĩ ũkanga kana nyamũ nene ya ũkanganĩ,*
Nĩ kana ũmanthĩe mũsungi?
13 Yĩla nasya, ‘Ũkomo wakwa nũũngiakisya;
Kĩtanda kyakwa nĩkĩkũolanga mathĩna makwa,’
14 Nĩvo ĩndĩ ũndelemasya na ndoto
Na ũindĩsya na mawoni,
15 Nginya ngenda* kũthita,
Ĩĩ, kĩkwʼũ vandũ va mwĩĩ ũũ wakwa.*
16 Nĩnĩmenete thayũ wakwa vyũ; ndikwenda kũendeea kwĩkala thayũ.
Ekana nakwa, nĩkwĩthĩwa mĩthenya yakwa yĩilye o mĩthũmũ.
17 We mũndũ ũtonya kũkwʼa nĩ kyaũ nĩ kana ũũngane nake
Na ũisũanĩa mũno* ĩũlũ wake?
18 Nĩkĩ ũmũthianaa kĩla kwakya
Na ũimũtata kĩla ĩvinda?
19 Ndwĩeka kũnzisya
Na ũyĩekana nakwa ngwate kavinda ka kũmelya mata?
20 Ethĩwa nĩnĩkĩte naĩ, ndonya ũkũũmĩsya ata, we Mũsyaĩĩsya wa andũ?
Nĩkĩ ũndwʼĩkĩthĩtye vandũ waĩle kũthima ũathe?
Ko ngũtwʼĩkĩe mũio?
21 Wĩema kũmbekea ĩvĩtyo yakwa
Na ũyĩekana na naĩ yakwa nĩkĩ?
Nũndũ o mĩtũkĩ nĩngũkoma kĩtoonĩ,
Na ũkamantha, ĩndĩ ndikethĩwa vo.”