Yovu
41 “We no ũkwatye Leviathani* na ndoano
Kana no wove ũĩmĩ wayo na ĩkanda?
3 Yo ĩkakwĩsũva ũmĩwʼĩe tei,
Kana ĩkaneena naku na ũuu?
4 Yo ĩkatianĩa ũtianĩo naku,
Nĩ kana ũmĩtwʼĩkĩthye ngombo yaku tene na tene?
5 We ũkathaũka nayo o ũndũ ũtonya kũthaũka na nyũnyi
Kana ũkamyova na kakanda kwondũ wa twĩlĩtu twaku?
6 Akũni ma viasala makaneenea thooa wayo?
Makamĩaanyʼa katĩ wa atandĩthya?
7 Ũkausũsya kĩthuma kyayo na tũtumo
Kana mũtwe wayo na matumo ma kũtea makũyũ?
8 Tata kũmĩkwata na kwʼoko kwaku;
Ũkalilikanaa ũ kaũ na ndũkesa kwĩka ũu ĩngĩ!
9 Wĩkwatyo o na ũmwe wa kũmĩkĩlya vinya no wa mana.
Kũmyona kwĩ kwʼoka no kũtume wĩwʼa wia mwingĩ.*
10 Vai mũndũ wĩsa kũtata kũmĩthea.
Kwoou nũũ ũtonya kũũngama asindane nakwa?
11 Nũũ wambie kũnenga kĩndũ nĩ kana nĩmũĩve?
Kĩndũ o na kĩva kĩ ungu wa matu nĩ kyakwa.
12 Ndivindya nĩeme kũneena ĩũlũ wa maaũ mayo,
Na ĩũlũ wa vinya wayo na ũndũ mwĩĩ wayo wũmbĩtwe nesa.
13 Nũũ wumĩtye ngũa yayo ya ĩũlũ?
Nũũ ũkalika ngambunĩ syayo mbingũe?
14 Nũũ ũtonya kwathamũkanyʼa ngambu syayo* na vinya?
Maeo mayo onthe nĩ ma kũtĩsya.
15 Mũongo wayo wĩ lainĩ sya makwaũ*
Makwatanĩtwʼe vamwe vyũ.
16 Kĩla ĩkwaũ yĩlikanaa na yĩla yĩngĩ vyũ
Ũkethĩa vai nzeve yĩsĩla katĩ wamo.
17 Kĩla yĩmwe yĩthĩawa yĩkwatanĩte na yĩla yĩngĩ;
Methĩawa makwatanĩte vamwe vyũ na maitonya kũtaananwʼa.
18 Kũtiva kwayo kumasya kyeni,
Na metho mayo mailye ta kyeni kya kũikya.
19 Kyeni kya ũtisi kyumaa kanywʼanĩ wayo;
Ngala sya mwaki nitalĩkaa.
20 Syũki nĩyumaa manyiũũnĩ mayo,
Ta ĩiko ĩnene yakene mwaki wa nyeki.
21 Mĩthũmũ yayo yakanasya makaa,
Na ũlĩlĩnzĩ wa mwaki wumaa na mĩtũkĩ kanywʼanĩ wayo.
22 Vethĩawa na vinya mwingĩ ngingonĩ yayo,
Na onthe ala makomana nayo nĩmausũawa nĩ wia.
23 Mĩtũlo ya nyama yayo yĩthĩawa ĩkwatanĩtwʼe vamwe ĩkalũma vyũ;
Yĩthĩawa ndũmu, na ĩtathingĩthĩka ta ĩseũvĩtwʼe na kyũma kĩtwekethye.
24 Ngoo yayo yĩthĩawa yĩ mbũmũ ta ĩvia,
Ĩĩ, yĩ mbũmũ ta ĩvia ya nthĩ ya kũthia.
25 Yĩla yookĩla, o na ala me ũtonyi nĩmakĩaa;
Kũsisya o ũndũ ĩendete kĩwʼũnĩ kũtumaa mũndũ asengʼa mũno.
26 Vai ũvyũ o na ũmwe ũmĩvikĩaa ũtonya kũmĩsinda;
O na ĩtumo, ĩangi, kana mũthya wa ĩangi.
27 Yonaa kyũma* ta nyeki,
Ũthuku ta ũvwaũ mwou.
28 Ĩangi yĩitumaa ĩsemba ĩkĩĩte;
O ta mavuthĩ,* mavia ma kĩkũtha maimĩwʼĩthya ũndũ.
29 Yonaa nzũma ta ĩvuthĩ,*
Na nĩthekeeaa kũuuma kwa mũsenge.
30 Ungu wayo, yĩthĩawa ĩilye ta ilĩo mbũĩ sya syĩndũ sya yũmba;
Yĩtandaasya ndakanĩ ta kĩvũi.
31 Ĩtumaa kũndũ kũliku kũtheũka ta mbisũ;
Yulũaa ũkanga ta mbisũ ya manukato.
32 Ĩendete ĩtiaa kasĩla kayo kaitisatisa.
Mũndũ no one kũndũ kũla kũliku ta kwĩ na mbuĩ.
33 Vai kĩndũ kĩilye tayo ĩũlũ wa nthĩ,
Kyũmbe kyũmbĩtwe kĩikethĩwe na wia.
34 Ĩketeeaa syĩndũ syonthe syĩ mĩngʼathĩlĩĩlyo ĩte kũikĩa.
Nĩyo mũsumbĩ ĩũlũ wa nyamũ syonthe syĩ vinya sya kĩthekanĩ.”