Yovu
40 Yeova aendeeie kũsũngĩa Yovu aimwĩa:
2 “Yo mũndũ ũla ũtindĩaa kũmanthĩa angĩ mavĩtyo akakĩlanyʼa vinya na Mwene Vinya Wʼonthe?
Eka ũla ũkwenda kũkanyʼa Ngai asũngĩe.”
3 Yovu asũngĩie Yeova amwĩa:
4 “Sisya! Nyie nĩ vathei.
Ndonya kũũsũngĩa kyaũ?
Nĩnakunĩka kanywʼa wakwa na kwʼoko kwakwa.
5 Nĩneenie o yĩmwe, ĩndĩ ndisũngĩa ĩngĩ;
Kelĩ, ĩndĩ vai kĩndũ kĩngĩ ngũweta.”
6 Na ĩndĩ Yeova asũngĩa Yovu kuma kĩuutaninĩ amwĩa:
7 “Mwa, ĩyũmbanyʼe ta mũndũũme;
Nĩngũũkũlya makũlyo, naku ũinzũngĩa.
8 We no wasye ndisilaa katĩ?*
We no wasye nĩ mavĩtyo nĩ kana woneke nue wĩkaa kĩla kyaĩlĩte?
9 We wĩ kwʼoko kwĩ ũtonyi ta kwa Ngai ũla wa wʼo,
Kana wasya waku no ũtundume ta wake?
10 Mwa, ĩyanakavye na ũkumyo na ũnene;
Ĩvwʼĩke ndaĩa na ũseo mwingĩ.
11 Lekya ũthatu waku wakanĩte;
Sisya kĩla mũndũ wĩ mĩngʼathĩlĩĩlyo, na ũimũtheesya.
12 Sisya kĩla mũndũ wĩ mĩng’athĩlĩĩlyo, na ũimũnyivya,
Na kinyangĩa nthĩ andũ athũku me vala maũngamaa.
13 Mavithe onthe kĩtoonĩ;
Move* vandũnĩ vavithe,
14 Nĩvo ĩndĩ o nakwa nĩtĩkĩla*
Kana kwʼoko kwaku kwa aũme no kũũtangĩĩe.
15 Yu, vaa ve Mbeemothi,* ĩla noombie o ũndũ nakũmbie.
Ĩĩsaa nyeki ta nzaũ.
16 Sisya vinya ũla wĩthĩawa inyunyunĩ syayo
Na vinya ũla wĩthĩawa malangũnĩ ma ĩvu yayo!
17 Yũmasya kĩsithe kyayo kĩkoma ta mũtalakwe;*
Tũliilii twa ndambĩ syayo tũtumanĩtwʼe vamwe.
18 Mavĩndĩ mayo nĩ mĩvaivo ya ũthuku;
Maaũ mayo mailye ta ndata sya kyũma* kĩvũe.
19 Nĩyo ya mbee* katĩ wa mawĩa ma Ngai;
No Mũmbi wayo e weka ũtonya kũmĩthengeea na ũvyũ wake.
20 Nĩkwĩthĩwa iĩma isyaaa lĩu kwondũ wayo,
Kũla nyamũ syonthe sya kĩthekanĩ ithaũkĩaa.
21 Ĩkomaa ungu wa ikuthu,*
Kyuunĩ kya mĩangi yĩ maianĩ.
23 O na ethĩwa ũsĩ wĩ na itulumo, ndĩtelemaa.
Yĩthĩawa na ũkũmbaũ, o na kĩwʼũ kya Yolotani kyasemba na vinya kyusũe kanywʼanĩ wayo.
24 Ve mũndũ ũtonya kũmĩkwata ĩsyaĩĩsye,
Kana akatonya ĩnyiũũ yayo na ngolya?*