Yovu
42 Nĩvo ĩndĩ Yovu wasũngĩie Yeova amwĩa atĩĩ:
2 “Yu nĩnĩsĩ nũtonya kwĩka maũndũ onthe
Na vai kĩndũ o na kĩmwe ũsũanĩĩte kwĩka kĩtonya ũkũema.
3 Waisye, ‘We nũũ ũũ ũkwelelũkya ũtao wakwa ate na ũmanyi?’
Kwoou naneena, ĩndĩ ndekũelewa maũndũ
Ĩũlũ wa maũndũ ma kũsengyʼa mũno kwakwa ala ndesĩ.
4 Waisye, ‘Mwa ĩthukĩĩsye, nakwa nĩngũneena.
Nĩngũũkũlya makũlyo, naku ũinzũngĩa.’
5 Matũ makwa nĩmewʼĩte ĩũlũ waku,
Ĩndĩ yu nĩngwene na metho makwa.
6 Nĩkyo kĩtumi ngũtũnga* kĩla nĩnawetie,
Na nĩngwĩlilĩla kĩtoonĩ na mũunĩ.”
7 Yeova amina kũtavya Yovu ndeto isu, Yeova eeie Elivasi, ũla waĩ Mũtemani, atĩĩ:
“Ũthatu wakwa nũkwakanĩe we na anyanyau elĩ, nĩkwĩthĩwa mũinaneena ũwʼo ĩũlũ wakwa ta mũthũkũmi wakwa Yovu. 8 Yu osai nzaũ mũonza na ndũũme mũonza na mũithi vala ve mũthũkũmi wakwa Yovu, na mũyĩyumĩsya nthembo sya kũvĩvwʼa. Na mũthũkũmi wakwa Yovu nũkũmũvoyea. Vate nzika, nĩngwĩtĩkĩla wĩsũvano wake* nĩ kana ndikamwĩke kwosana na ũtumanu wenyu, nũndũ mũinaneena ũwʼo ĩũlũ wakwa ta mũthũkũmi wakwa Yovu.”
9 Kwoou, Elivasi ũla waĩ Mũtemani, Mbilitati ũla waĩ Mũsuua, na Nzovali ũla waĩ Mũnaamathi nĩmaendie na meeka kĩla Yeova wamatavĩtye meke. Na Yeova eetĩkĩla mboya ya Yovu.
10 Yovu amina kũvoyea anyanyae, Yeova nĩwavetangie mathĩna ma Yovu na amũtũngĩa malĩ yake.* Yeova nĩwamũnengie syĩndũ ila waĩ nasyo mbeenĩ kũndũ kwĩlĩ. 11 Ana-a-ĩthe na eĩtu-a-inyia onthe na anyanyae onthe ma tene nĩmookie vala ũĩ na maĩsanĩa lĩu nake nyũmba kwake. Nĩmamwĩwʼĩie tei na mamũkiakisya nũndũ wa mĩisyo yonthe ĩla Yeova weetĩkĩlĩtye ĩmũkwate. Kĩla ũmwe nĩwamũeteie mũthĩnzĩo wa mbesa na mbete ya thaavu.
12 Kwoou Yeova nĩwaathimie mĩthenya ya mũthya ya thayũ wa Yovu kwĩ mĩthenya yake ya mbee, na Yovu eethĩwa na malondu 14,000, ngamĩle 6,000, syove 1,000 sya ngʼombe, na mangʼoi maka 1,000. 13 O na ĩngĩ, nĩweethĩiwe na ana angĩ mũonza na eĩtu angĩ atatũ. 14 Eetie mwĩĩtu wa mbee Yemima, wa kelĩ Kesia, na wa katatũ Keleni-avuki. 15 Nthĩ yonthe vayaĩ aka angĩ maĩ anake ta eĩtu ma Yovu, na ĩthe woo nĩwamanengie ũtiĩwa vamwe na ana-a-inyia moo.
16 Ĩtina wa ũu, Yovu ekalile thayũ myaka 140, na oona syana syake na esũkũũe; oonie nzyawa inya. 17 Mũthya Yovu nĩwakwie, ĩtina wa kwĩkala thayũ myaka mingĩ e mwĩanĩe.*