Yovu
39 “Yo nĩwĩsĩ ĩvinda yĩla mbũi sya kĩĩmanĩ isyaaa?
We waaĩloela ndaatai iisyaa tũtena twasyo?
2 Nũtalaa myei ĩla syaĩlĩte kũmina?
Nĩwĩsĩ ĩvinda yĩla isyaaa?
3 Nimandĩkaa iisyaa tũtena twasyo,
Na woo wa kwaũnya ũithela.
4 Tũtena twasyo nĩtũmeasya vinya na tũyĩanĩa kĩthekanĩ;
Nĩtumaalũkaa na tũisyokaa ĩngĩ kũla kwĩ aa-inyia.
5 Nũũ wathaisye ĩngʼoi ya kĩthekanĩ,*
Na nũũ wathaisye makanda ma ĩngʼoi ya kĩthekanĩ?
6 Nĩnĩtwʼĩte yalata ĩtindimalu mũsyĩ wayo
Na nthĩ yĩ mũnyũ wĩkalo wayo.
7 Nĩyĩvũthasya kĩthokoo kya ndũa;
Yĩyĩwʼaa wasya wa ũla ũyĩingĩte.
8 Yangangaa iĩmanĩ yĩimantha ũĩthyo,
Yĩimantha kĩla mũmea mwĩũ.
9 Yo nzaũ ya kĩthekanĩ nĩyĩyũmbanĩtye kũũthũkũma?
No ĩkome kĩtũũnĩ kyaku* ũtukũ?
10 We no wove nzaũ ya kĩthekanĩ na ĩkanda ũteme mĩkao nayo,
Kana yo no ĩkũatĩĩe ũĩme* nayo mwandanĩ?
11 We ũkeekwatya vinya wayo mwingĩ
Na ũimĩeka ĩtethye wĩa waku mũito?
12 We ũkamĩkwatya ĩkũetee ngetha* yaku,
Na ĩkamyũmbanĩsya kĩvũĩonĩ kyaku?
13 Nthwau sya nyaa ikũnanganaa na ũtanu,
Ĩndĩ syo nthwau syayo na mawʼĩa mayo no maelekanwʼe na ma ĩsaũ?
14 Nũndũ yo ĩtiaa matumbĩ mayo mũthanganĩ,
Na ĩmakwatĩasya muutĩa kĩtoonĩ.
15 Nĩyũlawa kana no makinywe makavevenzwa
Kana nyamũ ya kĩthekanĩ no ĩmakinyange.
16 Ĩkuaa tũswii twayo naĩ, ta tũte twayo;
Ndĩkĩaa kana wĩa wayo no wĩthĩwe wĩ wa mana.
17 Nĩkwĩthĩwa Ngai nũmĩimĩte* ũĩ
Na ndamĩaĩĩte ũtonyi wa kũelewa maũndũ.
18 Ĩndĩ yĩla yookĩla na yakũnanganyʼa nthwau syayo,
Nĩthekeeaa mbalasi na mũtwai wayo.
19 We nue ũnengae mbalasi vinya wayo?
Nue ũvwʼĩkaa ngingo yayo na wʼĩa mũasa ũũthingithanga?
20 We no ũtume ĩthaanyũka ta ngie?
Kũtiva kwayo kũnene nĩkũtelemasya.
21 Ĩkulasya nthĩ mwandanĩ na mavũngũ mayo na ĩitana mũno;
Ĩsembaa mũno ĩkalika kaũnĩ.*
22 Ĩthekeeaa wia na ndĩkĩaa kĩndũ.
Ndĩsyokaa na ĩtina nũndũ wa ũvyũ.
23 Thyaka nũmĩkayĩaa,
Ĩtumo na mũsenge nitisatisaa.
25 Yĩla ũvya wavuvwa, yaasya, ‘Tũkũthi!’
Nĩyĩwʼaa kaũ ũinyunga yĩ o vaasa
Na nĩyĩwʼaa wasya mũnene wa aũngamĩi ma ita na wasya wa kaũ.
26 Wʼo ũtonyi waku wa kũelewa maũndũ nĩwʼo ũtumaa kĩlũĩ kĩũlũka,
Kĩtambũũkĩtye nthwau syakyo syelekele ngalĩko ya ĩtheo?
27 Kana nue wĩaĩaa ndiũ ĩũlũke yambatĩte
Na ĩyaka ndala yayo ĩũlũ vyũ,
28 Ĩikoma ũtukũ ũvainĩ,
Ĩyĩkala ngomenĩ yayo ĩvianĩ yĩ ngũka?*
29 Ĩmanthaa lĩu yĩ o vau;
Metho mayo monaa vaasa vyũ.
30 Tũswii twayo tũnyusaa nthakame;
Na vandũ o na va ve simba nĩ vo yĩthĩawa.”