Yovu
34 Kwoou Eliũ nĩwaendeeie kũsũngĩa ayasya:
2 “Ĩthukĩĩsyei ndeto syakwa, inywʼĩ andũ oĩ;
Mbĩthukĩĩsyei, inywʼĩ ala mwĩsĩ maũndũ maingĩ mũno.
3 Nĩkwĩthĩwa kũtũ kũtataa ndeto
O ũndũ ũĩmĩ* ũsamaa lĩu.
4 Ekai twĩthianĩe ithyĩ ene kĩla kyaĩlĩte;
Ekai tũtwʼe katĩ witũ kĩla kĩseo.
5 Nĩkwĩthĩwa Yovu asya, ‘Nyie ndi na ĩvĩtyo,
Ĩndĩ Ngai nũmbatĩte ũsili wa katĩ.
6 Yo no nĩkengane ĩũlũ wa sila ũla naĩle kũtwʼĩĩwa?
Kĩtau kyakwa kĩyĩsa kũvoa, o na kau ndi na ĩvĩtyo.’
7 Nĩ mũndũ ũngĩ wĩva ũilye ta Yovu,
Ũla ũnyusaa kĩvũthya ta kĩwʼũ?
8 We atindanasya na eki ma naĩ
Na e ngwatanĩo na andũ athũku.
9 Nĩkwĩthĩwa aĩtye, ‘Mũndũ ndatethekaa
Nũndũ wa kũtata kũmwendeesya Ngai.ʼ
10 Kwoou mbĩthukĩĩsyei, inywʼĩ aũme mũeleawa maũndũ:*
Ngai ũla wa w’o ndamba kũsũanĩa kwĩka ũthũku;
Mwene Vinya Wʼonthe ndamba kũsũanĩa kũvĩtya!
11 Nĩkwĩthĩwa akatuva mũndũ kwosana na meko make
Na aimũetee mosyao mathũku ma nzĩa syake.
12 Nĩ wʼo ki kana, Ngai ndekaa ũthũku;
Mwene Vinya Wʼonthe ndelelũkasya ũsili wa katĩ.
13 Nũũ wamwiie aũngamĩe nthĩ,
Na nũũ wamũnyuvie aũngamĩe nthĩ yonthe?*
14 Akatwʼĩka nũmaketeea,*
Akatwʼĩka nũkwĩyũmbanĩsya veva woo na mĩthũmũ yoo,
15 Andũ onthe mathela* vamwe,
Na andũ masyoka kĩtoonĩ.
16 Kwoou ethĩwa wĩ na ũtonyi wa kũelewa maũndũ, tea kũtũ wĩwʼe ũndũ ũũ;
Ĩthukĩĩsye nesa kĩla ngũweta.
17 Yo mũndũ ũmenete ũsili wa katĩ nĩwaĩlĩte kũtongoesya,
Kana no wasye mũndũ wĩ ũtonyi na mũlũngalu e mavĩtyo?
18 We no wĩe mũsumbĩ, ‘We ndũtethya,’
Kana andũ ma ndaĩa, ‘Mwĩ athũkuʼ?
19 Ve ũmwe Ũla ũtonasya anene me mbee ũsumbĩnĩ kyende
Na ũla ũtendeeasya ala athwii mbee wa ngya,*
Nĩkwĩthĩwa onthe nĩ wĩa wa moko make.
20 No makwʼe matataĩĩe, ũtukũ katĩ;
Mathingithaa mũno na maikw’a;
O na ala me ũtonyi nĩmavetawa, ĩndĩ ti na moko ma andũ.
21 Nĩkwĩthĩwa metho ma Ngai methĩawa ĩũlũ wa nzĩa sya mũndũ,
Na nĩwonaa matambya make onthe.
22 Vai kĩvindu kana kyuu kingĩ
Vala eki ma naĩ matonya kwĩvitha.
23 Nĩkwĩthĩwa Ngai ndaiĩe mũndũ o na wĩva ĩvinda yĩnyuvĩtwe
Nĩ kana athi mbee wake atwʼĩĩwe sila.
24 Atũlaa ala me na ũtonyi o na ate na vata wa kũmakunĩkĩla nesa
Na ayia angĩ vandũnĩ voo.
25 Nĩkwĩthĩwa ethĩawa esĩ kĩla maendeee kwĩka;
Nũmangʼuthũlaa ũtukũ, na maitumbatumbwa.
26 Amakũnaa nũndũ wa ũthũku woo,
Vandũnĩ andũ onthe matonya kwona,
27 Nũndũ nĩmavĩndũkĩte makaeka kũmũatĩĩa
Na mayĩũnganaa na nzĩa o na ĩmwe katĩ wa nzĩa syake;
28 Matumaa ngya imũĩĩa na wasya mũnene,
Na kĩu kĩtumaa ewʼa kĩĩo kya athĩni.
29 Yĩla Ngai wavindya, nũũ ũtonya kwasya e na mavĩtyo?
Yĩla wavitha ũthyũ wake, nũũ ũtonya kũmwona?
Akekana ũu na mbaĩ kana mũndũ, maũndũ methĩwa o ũndũ ũmwe,
30 Nĩ kana mũndũ ũtamũkĩaa Ngai* ndakasumbĩke
Kana aiĩe andũ itei.
31 Nĩkwĩthĩwa ve mũndũ o na ũmwe wĩa Ngai,
‘Nĩnakanwʼa, o na kau ndyĩkĩte ĩvĩtyo;
32 Manyĩsye kĩla nĩemete kwona;
Ethĩwa ve ĩvĩtyo o na yĩmwe nĩkĩte, ndikayĩka ĩngĩ’?
33 We aĩle kũũtuva kwosana na ũndũ we ũkwenda na nũleanĩte na sila wake?
Nue waĩle kũtwʼa, ti inyie.
Kwoou ndavye kĩla wĩsĩ nesa vyũ.
34 Andũ me na ũtonyi wa kũelewa maũndũ* makambĩa,
Mũndũ o na wĩva mũĩ ũla wambĩwʼa,
35 ‘Yovu aneenaa ate na ũwʼo wʼonthe,
Na ndeto syake iyĩthĩawa na ũmanyi mũliku.ʼ
36 Eka Yovu atatwe* vyũ
Nũndũ mosũngĩo make mailye ta ma andũ athũku!
37 Eongela ũlei naĩnĩ yake;
Ekũnangĩa moko make mbee witũ e na kĩvũthya
Na eneenea Ngai ũla wa w’o ndeto mbingĩ e mũthatu!”