Yovu
33 “Ĩndĩ yu, mwa Yovu, ĩthukĩĩsye ndeto syakwa;
Ĩthukĩĩsye maũndũ onthe ala ngũweta.
2 Mwa, sisya! No nginya nathamye kanywʼa wakwa;
No nginya ũĩmĩ wakwa* ũneene.
3 Ndeto syakwa itavanasya ũlũngalu wa ngoo yakwa,
Na ilomo syakwa itavanasya kuma ngoonĩ kĩla nĩsĩ.
4 Veva wa Ngai mwene nĩwʼo wambũmbie,
Na mĩthũmũ ya Mwene Vinya Wʼonthe nĩyo yatumie nĩthĩwa thayũ.
5 Nzũngĩe ethĩwa nũtonya;
Ete maũndũ ala ũkwenda kũweta mbee wakwa; ĩyũmbanyʼe kwĩtetea.
6 Sisya! Nyie nĩilye o taku mbee wa Ngai ũla wa wʼo;
O nakwa noombaũmbiwe o na yũmba.
7 Kwoou ndyaĩlĩte kũtuma ũtelema,
Na kĩla ngũũtavya kĩyĩĩthĩwa kĩ kĩito mũno kwaku.
8 Ĩndĩ ũwetie ũũ ndyĩwʼa,
Ĩĩ, nĩtindĩie kwĩwʼa ndeto ii,
9 ‘Nyie nĩ mũtheu, ndi na naĩ;
Nyie nĩ mũtheu, ndi na ĩvĩtyo.
10 Ĩndĩ Ngai amanthaa itumi sya kũmbĩnga;
Onaa nĩ mũmaitha wake.
11 Ekĩaa maaũ makwa mbwaũnĩ sya kwoveea mũndũ;
Athianaa tũsĩla twakwa twʼonthe nesa.’
12 Ĩndĩ nũvĩtĩtye kwasya ũu, kwoou nĩũsũngĩa atĩĩ:
Ngai nĩ mũnene mũno kwĩ mũndũ ũla ũtonya kũkwʼa.
13 Nĩkĩ ũũmũnyungunyĩĩsya?
Wĩĩka ũu nũndũ ndanasũngĩa ndeto syaku syonthe?
14 Nĩkwĩthĩwa Ngai aneenaa ĩvinda yĩmwe na ya kelĩ,
Ĩndĩ vai ũmwe ũmwĩthukĩĩasya nesa,
15 Ekaa ũu ndotonĩ, woninĩ wa ũtukũ,
Yĩla too mwingĩ wakwata andũ
Makomete itandanĩ syoo.
16 Na ĩndĩ nũvingũaa matũ moo
Na aikindĩlĩĩla* momanyĩsyo make kũla maĩ,
17 Nĩ kana atume mũndũ ateka ũthũku
Na aisiĩĩa mũndũ ndakethĩwe na ngathĩĩo.
19 O na ĩngĩ, mũndũ nũkanawʼa nĩ woo e kĩtandanĩ kyake
Na kyalya kĩteũthela kya mavĩndĩ make,
20 Nginya thayũ wake ũimena mũkate vyũ,
Na ailea* o na lĩu ũla mũseo.
21 Nyama sya mwĩĩ wake ithelaa nginya ikaeka kwoneka,
Na yu mavĩndĩ make ala meĩ mavithe mayumĩla.*
22 Thayũ wake ũthengeeaa ĩimanĩ;*
Thayũ wake ũithengeea ala maetae kĩkwʼũ.
23 Ethĩwa ve mũtũmwa* kwondũ wake,
Mũndũ ũmwe katĩ wa andũ ngili wa kũmũtetea,
Nĩ kana atavye mũndũ maũndũ ala malũngalu,
24 Nĩvo ĩndĩ Ngai ũmwonasya ũseo na ayasya,
‘Mũsũvĩei ndakatheee ĩimanĩ!*
Nĩnakwata wovosyo!
25 Mwĩĩ wake nĩwĩthĩwe mwololo* kwĩ ũndũ wailye yĩla waĩ wa mũika;
Nĩ asyoke mĩthenyanĩ ya vinya wa ũika.’
26 Akamwĩsũva Ngai, nake akamwĩtĩkĩla,
Na akoona ũthyũ wa Ngai na wasya mũnene wa ũtanu,
Na Ngai akatũngĩĩa ũlũngalu wake vala ve mũndũ ũtonya kũkwʼa.
27 Mũndũ ũsu akatavya* andũ,
‘Nĩnĩvĩtĩtye na ngathyoekya kĩla kyaĩlĩte,
Ĩndĩ ndineekwata kĩla kĩmbaĩle.*
28 Nĩwovoetye thayũ wakwa ndũkatheee ĩimanĩ,*
Na thayũ wakwa ũkoona kyeni.’
29 Kwa wʼo, Ngai ekaa maũndũ asu onthe
Kelĩ, katatũ, kwondũ wa mũndũ,
Na nũndũ wa ũu ũyĩthĩa no akenũkwʼe nĩ kyeni kya thayũ.
31 Tea kũtũ, we Yovu! Mbĩthukĩĩsye!
Vindya, nakwa nĩngũendeea kũneena.
32 Ethĩwa wĩ na ũndũ wa kũweta, nzũngĩe.
Neena, nĩkwĩthĩwa nĩenda kũĩkĩĩthya kana ndwĩ na ĩvĩtyo.
33 Ethĩwa ndwĩ na ũndũ wa kũweta, waĩlĩte kũmbĩthukĩĩsya;
Vindya, nakwa nĩngũũmanyĩsya ũĩ.”