Yovu
35 Eliũ aendeeie kũsũngĩa ayasya:
2 “We ũĩkĩĩe vyũ kana ndwĩ mavĩtyo nginya ũkethĩa wĩasya,
‘Nyie nĩ mũlũngalu kwĩ Ngai’?
3 Nũndũ wĩasya, ‘Ũndũ ũsu ũũkonetye ata?*
Yo nĩendeee nesa kwĩ ũndũ nĩthĩwa nĩendeee keka nĩnavĩtisye?’
4 Nĩngũũsũngĩa we
O vamwe na anyanyau ala me naku.
5 Ngʼelela ĩtunĩ wone,
Sisya matu, ala me ĩũlũ waku vyũ.
6 Weeka naĩ, ũmũũmĩasya ata?
Mavĩtyo maku mongeleka, we akwatawa nĩ kyaũ?
7 Weethĩwa mũlũngalu, ũmũnengae kyaũ;
Na nĩ kyaũ ũkwataa kuma kwaku?
8 Ũthũku waku ũũmĩasya o mũndũ taku,
Na ũlũngalu waku, mwana wa mũndũ.
9 Andũ maĩaa na wasya mũnene yĩla meũnyamawʼa mũno;
Maĩaa mathũmũwʼe kuma ũsumbĩnĩ wa* ala me ũtonyi.
10 Ĩndĩ vai ũmwe ũkũlasya, ‘E va Ngai, Mũmbi wakwa Mũnene,
Ũla ũtumaa mbathi sinwa ũtukũ?’
11 Atũmanyĩasya mũnango kwĩ nyamũ sya nthĩ,
Na atumaa twĩthĩwa oĩ kwĩ nyũnyi sya matunĩ.
12 Andũ maĩaa na wasya mũnene, ĩndĩ ndasũngĩaa,
Nũndũ wa ngathĩĩo sya ala athũku.
13 Nĩ wʼo ki kana Ngai ndethukĩĩasya kĩĩo kya mana;*
Mwene Vinya Wʼonthe ndaũnganaa nakyo.
14 Nata ĩndĩ, yĩla we ũũnyungunyĩsya kana ndũmwene!
Ĩkoani yaku yĩ mbee wake, kwoou waĩlĩte kũmweteela na mea.
15 Nĩkwĩthĩwa ndanenda wumye ũtalo athatĩte;
O na ndanatindanĩa na maũndũ ala ũũweta ũtasũanĩĩte o na vanini.
16 Yovu athamasya kanywʼa wake vyũ o mana;
Aingĩvasya ndeto ate na ũmanyi.”