Yovu
32 Kwoou aũme asu atatũ nĩmaekie kũtata kũsũngĩa Yovu, nũndũ nĩwaĩkĩĩe kana nĩ mũlũngalu.* 2 Ĩndĩ Eliũ mwana wa Mbalakeli, ũla waĩ Mũmbusi wa mũsyĩ wa Lamu, aĩ athatie mũno. Ũthatu wake nĩwakanĩie Yovu nũndũ wa kũtata kũĩkĩĩthya kana we mwene* nĩ mũlũngalu vandũ va Ngai. 3 O na ĩngĩ, nĩwathatĩie mũno anyanya atatũ ma Yovu nũndũ mayaĩ na ũsũngĩo mũseo matonya kũmũnenga, ĩndĩ maisye kana Ngai nĩ mũthũku. 4 Eliũ ekalile eteelete nĩ kana asũngĩe Yovu, nũndũ maĩ akũũ kwĩ we. 5 Yĩla Eliũ woonie kana aũme asu atatũ mayaĩ na ũndũ matonya kũweta mamũsũngĩe, ũthatu wake nĩwakanie. 6 Kwoou Eliũ mwana wa Mbalakeli, ũla waĩ Mũmbusi, ambĩĩa kũneena, ayasya:
“Nyie nĩ wa mũika*
Nenyu mwĩ akũũ.
Kwoou nũndũ wa kũmũnenga ndaĩa nĩnĩnesiĩĩie,
Na ndinaatata kũmũtavya kĩla nĩsĩ.
7 Neetavisye, ‘Myaka* nĩneene,
Na myaka mingĩ nĩtangaase ũĩ.’
8 Ĩndĩ nĩ veva ũla wĩ nthĩnĩ wa andũ,
Mĩthũmũ ya Mwene Vinya Wʼonthe, ĩla ĩmanengae ũtonyi wa kũelewa maũndũ.
9 Myaka* yoka ndĩtumaa mũndũ ethĩwa e mũĩ,
O na ti ala akũũ me oka maeleawa kĩla kyaĩlĩte.
10 Kwoou nĩmwĩa, ‘Mbĩthukĩĩsyei,
Na o nakwa nĩngũmũtavya kĩla nĩsĩ.’
11 Sisyai! Nĩneteelile ndeto syenyu;
Nĩkalile nĩthukĩĩsye mosũanĩo menyu
Yĩla mũũmanthaa maũndũ ma kũweta.
12 Nĩĩmwĩthukĩĩsye nesa,
Ĩndĩ vai ũmwe wenyu ũnavota kũĩkĩĩthya Yovu kana e mavĩtyo*
Kana kũleana na kĩla ũwetie.
13 Kwoou mũikasye, ‘Nĩtwonete ũĩ;
Ngai nĩwe ũkũleana nake, ĩndĩ ti mũndũ.’
14 Nyie ti inyie ũkũtavasya ndeto ila ũneenie,
Kwoou ndimũsũngĩa na maũndũ ala mũwetete.
15 Nasaanĩsye, mai na mosũngĩo angĩ;
Mai na ũndũ ũngĩ matiele nawʼo matonya kũweta.
16 Nĩneteele maneene, ĩndĩ maikũendeea kũneena;
Maũngamĩte o vau, mate na ũndũ ũngĩ wa kũsũngĩa.
17 Kwoou o nakwa nĩngũsũngĩa;
O nakwa nĩngũweta kĩla nĩsĩ,
18 Nĩkwĩthĩwa nyie nusĩe ndeto;
Veva ũla wĩ nthĩnĩ wakwa nũũnthingʼĩĩsya.
19 Ĩvu yakwa yĩilye ta mbinyu ĩte na vandũ va kumĩla,
Ta sũva nzaũ sya mbinyu sya kĩthuma ikilyĩ kũtembũka.
20 Ekai nĩneene nĩ kana nĩusye!
Nĩvingũa ilomo syakwa na ndisũngĩa.
21 Ndionyʼa mũndũ o na ũmwe kyende;
O na ndikathĩĩa mũndũ o na wĩva mana,*
22 Nĩkwĩthĩwa ndyĩsĩ kũkathĩĩa mana;
Ngeka ũu, Mũmbi wakwa ambananga na mĩtũkĩ.