Yovu
29 Yovu aendeeie kũneena* ayasya:
2 “Ta keka nĩilye o ũndũ nailye myeinĩ mĩvĩtu,
Mĩthenyanĩ ĩla Ngai wanzũvĩaa,
3 Yĩla watumaa taa wake ũkenea mũtwe wakwa,
Yĩla nesĩlaa kĩvindunĩ nĩmulĩkĩlwe nĩ kyeni kyake,
4 Yĩla naĩ wa mũika* na naĩ na vinya vyũ,
Yĩla ũnyanya wakwa na Ngai weewʼĩkaa ĩeemanĩ yakwa,
5 Yĩla Mwene Vinya Wʼonthe waĩ o vamwe nakwa,
Yĩla syana syakwa syonthe syanthyũlũlũkĩte,*
6 Yĩla matambya makwa mavwʼĩkĩtwe nĩ mauta ma ĩia,*
Na mavia mandulũĩlaa tũlũsĩ twa mauta.
7 Yĩla nakothaa kũthi mũvĩanĩ wa ndũa
Na ndyĩkala kĩwanzanĩ kya ndũa,
8 Anake mambonaa na mayĩũngama ũtee,*
Na o na atumĩa nĩmaũngamaa na mayĩkala maũngye.
9 Anene meesiĩĩaa maikaneene;
Makunĩkaa makanywʼa moo na moko moo.
10 Mawasya ma aũme me nguma nĩmavindĩthawʼa;
Ũĩmĩ woo walũmaa kaakaanĩ wa makanywʼa moo.
11 Mũndũ o na wĩva ũla wambĩwʼa nĩwaneenaa nesa ĩũlũ wakwa,
Na onthe ala mambona nĩmandeteaa.
12 Nĩkwĩthĩwa nĩnavonokasya ngya ĩla ĩkũĩĩa ũtethyo,
O vamwe na mwana ũte ĩthe na mũndũ o na wĩva ũtaĩ na mũndũ wa kũmũtethya.
13 Mũndũ ũla wĩ vakuvĩ kũthela nĩwambathimaa,
Na nĩnatumaa ngoo ya mũndũ mũka ndiwa ĩtana.
14 Nĩneekĩaa ũlũngalu ta ngũa yakwa;
Ũsili wakwa wa katĩ ta kanzũ* na kĩlemba.
15 Nĩnatwʼĩkie metho kwa ilalinda
Na maaũ kwa ala onzu maaũ.
16 Naĩ ĩthe wa ngya;
Nĩnakunĩkĩlaa nesa ĩkoani ya andũ ala ndesĩ.
17 Nĩnatũlangaa ngambu sya mwĩki wa naĩ
Na ndivulya nzyĩma kuma maeonĩ make.
18 Nakothaa kwasya, ‘Ngakwʼĩĩa mũsyĩ kwakwa,*
Na mĩthenya yakwa ĩkeethĩwa yĩ mingĩ mũno ta kĩthangathĩ.
19 Mĩi yakwa ĩkanyaĩĩka mũno nginya kĩw’ũnĩ,
Na ĩmwe yĩkekala mbongenĩ syakwa ũtukũ wʼonthe.
20 Ũkumyo wakwa weũvawʼa kĩla ĩvinda,
Na ũta ũla wĩ kwʼokonĩ kwakwa ũkaendeea kũatha.’
21 Andũ nĩmambĩthukĩĩasya na mea,
Meteele ũtao wakwa mavindĩtye.
22 Namina kũneena, mayeethĩawa na ũndũ ũngĩ wa kwasya;
Ndeto syakwa syavalũkaa matũnĩ moo na ũuu.*
23 Mambeteelaa o ũndũ meteelaa mbua;
Maathamasya makanywʼa moo vyũ ta meteele mbua ya uũa.
24 Yĩla moona ũtanu wa ũthyũ wakwa, mayaĩkĩĩaa ũndũ ũsu;
Kyeni kya ũthyũ wakwa nĩkyamanengae wĩkwatyo.*
25 Nĩnamatavasya kĩla mekwĩka ta mũtongoi woo,
Na nekalaa ta mũsumbĩ wĩ katĩ wa ita syake sya asikalĩ,
Ta mũndũ ũla ũkiakiasya ala meũmeta.