Yovu
28 “Ve vandũ va kwĩnza vetha
Na vandũ va thaavu ũla matheasya;
2 Kyũma* kyumawʼa mũthanganĩ,
Na ũthuku ũtwekethawʼa* kuma mavianĩ.
3 Mũndũ nũkĩlasya kĩvindu vinya;
Amanthaa na kĩthito kĩla vandũ ũtukunĩ na kĩvindunĩ,
Aimantha syũma sya vata.*
4 Enzaa ĩima yĩkalika nthĩ vyũ kũasa na kũla andũ mekalaa,
Kũndũnĩ kũla kwoolile, kũasa na kũla andũ mesĩlaa;
Aũme amwe matheeaa na maisũa masũnzũũlĩte.
5 Lĩu ũmeaa ĩũlũ wa nthĩ;
Ĩndĩ ungu, vethĩawa na kĩthokoanyʼo ta kya mwaki.*
6 Mavianĩ asu vethĩawa na savili,
Nakyo kĩtoo kĩthĩawa na thaavu.
7 Vai nyũnyi ĩĩsaa nyama yĩsĩ kasĩla ka kũthi vo;
Itho ya mbolosya nziũ yĩyaavona.
8 Vai nyamũ nene sya kĩthekanĩ syaakinyĩla vo;
Mũnyambũ wa mũika ũyaatembeela vo.
9 Mũndũ akũnaa ĩvia yũmũ na kwʼoko kwake;
Angʼuthũlĩlaa iĩma mĩsinginĩ yasyo.
10 Atemaa mĩtaũ ya kĩwʼũ ĩvianĩ;
Metho make monaa syĩndũ syonthe sya thooa mũnene.
11 Alindaa kũla mbũsĩ syumĩte
Na ayĩete kĩla kĩvithe kyeninĩ.
12 Ĩndĩ wʼo ũĩ, ũtonya kwoneka va,
Na mwambĩlĩĩlyo wa ũtonyi wa kũelewa maũndũ wĩ va?
13 Vai mũndũ wĩsĩ lato wawʼo,
Na ũitonya kwoneka nthĩ ya ala me thayũ.
14 Kĩwʼũ kĩliku kyaasya, ‘Ũi nthĩnĩ wakwa!’
Nawʼo ũkanga ũyasya, ‘Nyie ndi nawʼo!’
15 Ndũthoowa na thaavu mũtheu;
O na mũndũ ndathimĩwa vetha akũanĩwʼe nawʼo.
16 Ndũthoowa na thaavu wa Ovilu
O na ndũthoowa na mavia me mũo ma soamu na savili.
17 Thaavu na kĩoo iyĩelekanwʼa nawʼo;
O na mũio wa thaavu mũseo* ndũkũanwʼa nawʼo.
18 Maliani na tũindo tũũkengakenga* iyĩsa kũthengeanĩa nawʼo,
Nĩkwĩthĩwa mũvuko wusĩe ũĩ nĩ wa vata mũno kwĩ mũvuko wusĩe lũlũ.
19 Tovasi wa Kusi ndwĩsa kũelekanwʼa nawʼo;
O na thaavu mũtheu ũyĩsa kũtũmĩwa kũũthooa.
20 Ĩndĩ wʼo ũĩ wumaa va,
Na mwambĩlĩĩlyo wa ũtonyi wa kũelewa maũndũ wĩ va?
21 Nũvithĩtwe ndũkoneke nĩ kĩla kĩndũ kĩ thayũ
Na ũkavithwa nyũnyi sya matunĩ.
22 Wanangĩko na kĩkwʼũ syaasya,
‘Matũ maitũ mekaa kwĩwʼa o ũiwetwa.’
23 Ngai nũeleawa nzĩa ya kũũkwata;
No we e weka wĩsĩ vala wĩkalaa,
24 Nĩkwĩthĩwa asiasya nginya itulu sya* nthĩ,
Na nĩwonaa kĩla kĩndũ ungu wa matu.
25 Yĩla wanengie kĩseve vinya*
Na athima kĩwʼũ,
26 Yĩla weekĩĩie mbua mwolooto
Na aseũvya kasĩla kwondũ wa matu ma kĩuutani meũtunduma,
27 Nĩvo ĩndĩ woonie ũĩ na aũelesya;
Aũlũlũmĩĩlya na aũtata.
28 Na eea mũndũ atĩĩ:
‘Sisya! Kũmũkĩa Yeova, nĩkwʼo ũĩ,
Na kwĩthyũũa ũtie ũthũku nĩkwʼo kũelewa maũndũ.’”