Yovu
27 Yovu aendeeie kũneena* ayasya:
2 “Vate nzika, o tondũ Ngai wĩ thayũ, ũla ũmbatĩte sila wa katĩ,
O tondũ Mwene Vinya Wʼonthe wĩ thayũ, ũla ũtumĩte nĩwʼa* ũũ,
3 Ĩvinda yĩla mĩthũmũ yakwa yĩ nthĩnĩ wakwa
Na veva wa Ngai wĩ manyiũũnĩ makwa,
4 Ilomo syakwa iikaneena maũndũ mate ma ũlũngalu;
O na ũĩmĩ wakwa ũikaneena ũvũngũ!
5 Ndyamba kũsũanĩa kũmũtalĩla ũlũngalu inywʼĩ aũme aa!
Nginya nĩkwʼe, ndikakaĩa* wĩanĩu wakwa!
6 Nĩendeea kũlũmya ũlũngalu wakwa na ndikesa kũũlekya;
7 Mũmaitha wakwa nĩethĩwe ailye ta ala athũku,
Ala mambũmĩasya nĩmethĩwe mailye ta ala mate alũngalu.
8 Nĩkwĩthĩwa mũndũ ũla ũtakĩaa Ngai* ethĩawa na wĩkwatyo mwaũ yĩla waanangwa,
Yĩla Ngai wavetanga thayũ wake?
9 We Ngai akeewʼa kĩĩo kyake
Yĩla mathĩna makamũkwata?
10 Kana akeetanyʼa nthĩnĩ wa Mwene Vinya Wʼonthe?
Akeekaĩlaa Ngai mavinda onthe?
11 Nĩngũmũmanyĩsya ĩũlũ wa ũtonyi wa* Ngai;
Ndimũvitha ũndũ o na ũmwe ĩũlũ wa Mwene Vinya Wʼonthe.
12 Sisyai! Ethĩwa inywʼonthe nĩmwonete mawoni,
Nĩkĩ ndeto syenyu itatethya o na vanini?
13 Kĩĩ nĩkyo kĩanda kĩla Ngai ũnengete mũndũ mũthũku,
Ũtiĩwa ũla athĩnyʼa makwataa kuma vala ve Mwene Vinya Wʼonthe.
14 Ana make maingĩva, makooawa na ũvyũ,
Na nzyawa syake iikethĩwa na lĩu ũtoetye.
15 Ala makavonoka makathikwa nĩ ũkũno,
Na iveti syoo ndiwa iikamaĩĩa.
16 O na ethĩwa akoombanyʼa vetha mwingĩ ta kĩtoo
Na ayũmbanyʼa ngũa nzeo mbingĩ ta yũmba,
17 O na kau no asyũmbanyʼe,
Mũndũ mũlũngalu nĩwe ũkasyĩkĩa,
Na ũla ũte na ĩvĩtyo akaaanyʼa vetha wake.
18 Nyũmba ĩla wakaa yĩthĩawa ĩte ndũmu ta kasũmba ka lungulu,*
Ta kĩvanda kĩseũvĩtwʼe nĩ mũsyaĩĩsya.
19 Akathi kũkoma e mũthwii, ĩndĩ ndakombanyʼa kĩndũ o na kĩmwe;
Asalukya, ndakavethĩa kĩndũ o na kĩmwe.
20 Wia mwingĩ nũmũkĩlasya vinya ta kĩwʼũ kingĩ;
Kĩuutani kĩmũvulasya ũtukũ.
21 Kĩseve kya wumĩlonĩ wa sua kĩkamũkua, na ndakoneka ĩngĩ;
Kĩmũtutaa kĩkamumya vandũnĩ vake.
22 Kĩkamũuutanĩa kĩte kũmwĩwʼĩa tei
Aendeee kũtata vyũ evonokye kuma vinyanĩ wakyo.
23 Kĩmũkũnanganĩasya moko
Na kĩimũuĩsya mũũi kĩ vandũnĩ vakyo.*