Yovu
15 Elivasi, ũla waĩ Mũtemani, asũngĩie asya:
2 “We mũndũ mũĩ no asũngĩe atũmĩĩte ndeto sya mana,*
Kana we no ausũsye ĩvu yake kĩseve kya wumĩlonĩ wa sua?
3 Kũkanyʼa o na ndeto syoka nĩ kwa mana,
Na kũneena kwʼoka kũitethya.
4 Nĩkwĩthĩwa ũtumaa andũ matamũkĩa Ngai,
Na ũtumaa matasũanĩa ĩũlũ wa Ngai o na vanini.
5 Nũndũ ĩvĩtyo yaku nĩyo yĩtumaa ũneena ũndũ ũũneena,*
Na ũnyuvaa kũtũmĩa ndeto sya ũseleke.
6 Kanywʼa waku mwene nĩwʼo ũũkũsilĩla, ĩndĩ ti inyie;
Ilomo syaku mwene nikumya ũkũsĩ ĩũlũ waku.
7 We nue waĩ mũndũ wa mbee kũsyawa,
Kana we wasyaiwe mbee wa iĩma?
8 We nĩwĩthukĩĩasya ndeto sya kĩmbithĩ sya Ngai,
Kana no uwe wĩ weka wĩthĩawa na ũĩ?
9 Nĩ kyaũ wĩsĩ ithyĩ tũtesĩ?
Nĩ kyaũ ũeleetwe ithyĩ tũtaeleetwe?
10 Katĩ witũ ve aũme me na mbuĩ na akũũ,
Aũme akũũ kwĩ ĩthe waku.
11 Mo mokiakisyo ma Ngai maikwĩanĩe,
Kana ndeto ila ũtavĩtwʼe na ũuu?
12 Nĩkĩ ngoo yaku ĩkũkuĩte ĩũtwaĩte kũasa,
Na nĩkĩ metho maku makanĩtwʼe nĩ ũthatu?
13 Nĩkwĩthĩwa wĩtuma veva waku ũmũngʼendea Ngai,
Na ũyĩtĩkĩlya ndeto iilye ũu syume kanywʼanĩ waku mwene.
14 We mũndũ ũtonya kũkwʼa nĩ kyaũ nĩ kana ethĩwe e mũtheu,
Kana mũndũ o na wĩva ũsyaĩtwe nĩ mũndũ mũka nĩ kana ethĩwe e mũlũngalu?
15 Sisya! Ndaĩkĩĩaa atheu make,
Na o na matu ti matheu methonĩ make.
16 We wĩona ta wĩkanaa ata na mũndũ ũla wĩkaa maũndũ ma kũthatya na mathũku,
Mũndũ ũla ũnyusaa maũndũ mate ma ũlũngalu o ta kĩwʼũ!
17 Nĩngũũtavya; mbĩthukĩĩsye!
Nĩngũelesya maũndũ ala nĩyoneete,
18 Maũndũ ala andũ oĩ maeleisye kuma kwa aa-ĩthe moo,
Maũndũ ala mataavitha.
19 Nĩmo me oka manengiwe ĩ nthĩ,
Na vai mũeni waaĩsĩla katĩ woo.
20 Mũndũ mũthũku anyamaaa mĩthenya yake yonthe,
Myaka yonthe ĩla yiĩwe mũthĩnyʼa.
21 Mawasya ma kũtelemya methĩawa matũnĩ make;
Ĩvindanĩ ya mũuo, avithũkĩawa nĩ nguthu sya avenani.
22 Ndaĩkĩĩaa kana akavonoka aume kĩvindunĩ;
Ethĩawa aiĩwe ũvyũ.
23 Angangaa aimantha lĩu* na aasya: ‘Wĩ va?’
Ethĩawa esĩ nesa kana mũthenya wa kĩvindu wĩ vakuvĩ.
24 Mathĩna na woo mwingĩ iendeeaa kũmũtelemya;
Imũkĩlasya vinya ta mũsumbĩ wĩyũmbanĩtye kũvithũkĩa.
25 Nĩkwĩthĩwa okĩlasya kwʼoko kwake avĩnge Ngai mwene
Na atataa kũleana na* Mwene Vinya Wʼonthe;
26 Asembaa omĩtye ngoo aleane na Ngai,
E na ngao yake nthanthau na ndũmu;*
27 Ũthyũ wake usĩe mauta,
Na inyunyu syake ikaimbwʼa nĩ mauta;
28 Ekalaa ndũanĩ ila ikanangwa,
Nyũmbanĩ ila itakekalwa nĩ mũndũ o na ũmwe,
Ila ikatwʼĩka ivumbu sya mavia.
29 Ndakethĩwa mũthwii, na malĩ yake ndĩkaingĩva,
O na syĩndũ syake iikanyaĩĩka nthĩ.
30 Ndakavonoka aume kĩvindunĩ;
Ũmũĩ wa mwaki ũkoomya ũvonge wake,*
Na akooawa nĩ mũlivũko wa kanywʼa wa Ngai.*
31 Ndaĩlĩte kwelelũka na aiĩkĩĩa maũndũ ma mana,
Nĩkwĩthĩwa kĩla ũkakũanĩwʼa nakyo kĩkeethĩwa kya mana;
32 Ũndũ ũsu ũkeethĩwa mũthenya wake ũtanamba kũvika,
Na mbonge syake iikesa kwĩana syĩ nzanzamũku.
33 Akeethĩwa ailye ta mũsavivũ ũla wĩtaa nzavivũ syawʼo ite mbĩu,
Na ailye ta mũthata ũla wĩtaa malaa mawʼo.
34 Nĩkwĩthĩwa ũmbano wa ala matamũkĩaa Ngai* ndwĩthĩawa na ũsyao,
Na mwaki ũkavĩvya maeema ma ĩvaki.
35 Maitavaa thĩna na maisyaa kĩla kĩthũku,
Na ĩvu yoo yĩsyaaa ũvũngũ.”