Yovu
14 “Mũndũ, ũla ũsyaĩtwe nĩ mũndũ mũka,
Ethĩawa na thayũ mũkuvĩ na wusĩe thĩna.*
2 Alaũkaa ta ĩlaa na ĩndĩ aivoova;*
Asembaa ta kyuu na ayaa.
3 Ĩĩ, ũmũketeeaa nesa,
Na ũimũete* vala ũĩ ũmũsilĩle.
4 Nũũ ũtonya kumya mũndũ ũte mũvuku kuma mũndũnĩ mũvuku?
Vai ũmwe ũtonya!
5 Ethĩwa mĩthenya yake nĩtwʼĩtwe,
Nĩwĩsĩ ũtalo wa myei ĩla wĩ nayo;
Nũmwĩkĩĩe mĩvaka nĩ kana ndakamĩvĩtũke.
6 Eka kũmũsisya mũno nĩ kana athũmũe,
Nginya amine mũthenya wake, o ta mũthũkũmi mũandĩke.
7 Nĩkwĩthĩwa o na mũtĩ nĩwĩthĩawa na wĩkwatyo.
Ethĩwa nĩwatemwa, ũkathongooa ĩngĩ,
Na mbonge syawʼo ikaendeea kwĩana.
8 Ethĩwa mĩi yawʼo nĩyakũĩa mũthanganĩ
Na kĩtina kyawʼo kyakwʼĩĩa mũthanganĩ,
9 Weewʼa mũuke wa kĩwʼũ ũkathongooa;
Na ũkaumya mbonge ta mũmea mweũ.
10 Ĩndĩ mũndũ nũkusaa na aikoma ate na ũtonyi;
We mũndũ akwʼa, ethĩawa va?
11 Kĩwʼũ nĩkĩthelaa ũkanganĩ,
Na kĩwʼũ kya ũsĩ nĩkĩolekaa na kĩkangʼala.
12 O nake mũndũ nũkomaa na ayĩema kũamũka.
Nginya ĩtu yĩthĩwe yĩte vo ĩngĩ, maikaamũka,
O na maikokĩlwʼa kuma toonĩ woo.
Keka nũmbitha nginya ũthatu waku ũvĩtũke,
Keka nũndwʼĩĩa ĩvinda ĩna na ũindilikana!
14 Ethĩwa mũndũ nĩwakwʼa, no ethĩwe thayũ ĩngĩ?
Ngeeteela mĩthenya yonthe ya wĩa wakwa wa kũlasimĩthwʼa
Nginya ũthũmũo wakwa wũke.
15 Ũkeetana, nakwa ngakwĩtĩka.
Ũkeethĩwa na mea ma* wĩa wa moko maku.
16 Ĩndĩ yu, ũendeeaa kũtala kĩla ĩtambya yakwa;
Ũsiasya o naĩ yakwa.
17 Ĩvĩtyo yakwa yĩvingĩwe mũvukonĩ,
Na wovaa naĩ yakwa na ngamu.
18 O ũndũ kĩĩma kĩvalũkaa na kĩivalaanĩka
Na ĩvia yĩkũkaa yĩkauma vandũnĩ vayo,
19 O ũndũ kĩwʼũ kĩĩsaa mavia
Na kĩwʼũ kingĩ kĩkuaa mũthanga wa nthĩ,
Nowʼo wanangĩte wĩkwatyo wa mũndũ ũla ũtonya kũkwʼa.
20 Ũendeeaa kũmũkĩlya vinya nginya akathela;
Nũvĩndũaa ũndũ ũilye, na ũimũlũngya.
21 Ana make nĩmanengawe ndaĩa, ĩndĩ we ndamanyaa kĩu;
Nĩmavũthawʼa, ĩndĩ we ndesaa kũmanya kĩu.
22 Ewʼaa woo o yĩla wĩ thayũ;
Ametaa* o yĩla wĩ thayũ.”