Yovu
16 Yovu asũngĩie asya:
2 “Nĩnĩwʼĩte maũndũ maingĩ ta asu.
Inywʼonthe mwĩ akiakisya ma kũthĩnyʼa!
3 Yo ve mũthya wa ndeto sya mana?*
Nĩ kyaũ kĩũmwĩkĩa vinya mũnzũngĩe ũu?
4 O nakwa no nĩneene o tenyu.
Keka mũkwatĩtwe nĩ maũndũ ala mangwatĩte,*
No nĩneene maũndũ ma kũĩkĩĩka nĩleane nenyu
Na ndimũthingithĩsya mũtwe.
5 Ĩndĩ vandũ va ũu, nĩka kũmwĩkĩa vinya na ndeto sya kanywʼa wakwa,
Na ũkiakisyo wa ilomo syakwa no ũmũetee ũthũmũo.
6 Naneena, woo wakwa ũikũoleka,
Na naema kũneena, woo wakwa wĩoleka mũno wĩana ata?
7 Ĩndĩ yu nũtumĩte nĩnoa;
Nĩwanangĩte mũsyĩ wakwa wʼonthe.*
8 O naku nũngwete ũkandũmya, na ũndũ ũsu nũtwʼĩkĩte ũkũsĩ,
Nginya kĩmosa kyakwa nĩkingĩvĩte na kĩumya ũkũsĩ mbee wakwa.
9 Ũthatu wake nũndembũangĩte tũlungu, na we nũmenete mũno.
Ambevetanĩasya maeo make.
Mũmaitha wakwa andonyaa na metho make.
10 Mambathamĩsye makanywʼa moo vyũ,
Na mamalĩkĩtye matau na kĩvũthya;
Mambũkĩlĩĩle me aingĩ mũno.
11 Ngai anenganae mokonĩ ma ivĩsĩ,
Na ambĩkasya mokonĩ ma ala athũku na vinya.
12 Naĩ na mũuo, ĩndĩ andilanganyʼa;
Ambutĩile ĩkoti na andumbatumba;
Na ĩndĩ andwʼĩkĩthya vandũ vala waĩle kũthima aathe.
13 Ndũĩka syake sya kũatha na maangi ninthyũlũlũkĩte;
Nũtonyaa mbio syakwa na ndambĩwʼĩaa ĩnee;
Onoasya nyongo yakwa nthĩ.
14 Ambatũangaa na mwatũka ĩtina wa mwatũka;
Anthaanyũkĩaa ta ngũmbaũ ya kaũ.
15 Nĩtumanĩtye ngũa sya makunia nĩvwʼĩke kĩkonde kyakwa,
Na nĩthikĩte ndaĩa yakwa* kĩtoonĩ.
16 Ũthyũ wakwa ũtunĩvĩtwʼe nĩ kũĩa,
Na ngovenĩ syakwa ve kĩvindu kya ngokomi,*
17 O na kau moko makwa mayĩkĩte ũndũ o na ũmwe wa ũngʼendu
Na mboya yakwa nĩ ntheu.
18 We nthĩ, ndũkavwʼĩke nthakame yakwa!
Na nthĩnĩ waku, kĩĩo kyakwa kĩikethĩwe na vandũ kĩthũmũĩla!
19 O na yu tũĩ, ngũsĩ yakwa yĩ matunĩ;
Ũla ũtonya kumya ũkũsĩ ĩũlũ wakwa e ĩũlũ.
20 Anyanyawa nĩmeũmbũthya
Yĩla metho makwa meũmũĩĩa Ngai.*
21 Eka mũndũ ewʼanĩthye mũndũ ũngĩ na Ngai,
O ũndũ mũndũ ũtonya kwĩwʼanĩthya mũndũ na mũtũi wake.
22 Nĩkwĩthĩwa myaka ĩla yũkĩte nĩ mĩvũthũ,
Na ngathi na kasĩla kala katasyokelawa.