Yovu
12 Nĩvo ĩndĩ Yovu wasũngĩie asya:
2 “Vate nzika, inywʼĩ ninywʼĩ andũ ala mesĩ,*
Na ũĩ ũkakwʼa nenyu!
3 Ĩndĩ o nakwa nĩ na ũtonyi wa kũelewa maũndũ.*
Nyie nĩanene o nenyu.
Nũũ ũtesĩ maũndũ aa?
4 Ndwʼĩkĩte kĩndũ kya kũthekeewa nĩ anyanyawa,
Ũla wĩkaĩlaa Ngai nĩ kana asũngĩwe.
Yu mũndũ mũlũngalu na ũtaweteka ũthũku nĩ kĩndũ kya kũthekeewa.
5 Mũndũ ũtamakaa nũvũthasya mũisyo,
Asũanĩaa nĩ wa andũ o ala maaũ moo mate na vinya.*
6 Maeema ma avenani me na mũuo,
Na ala mathatasya Ngai nĩ asũvĩĩku,
Ala makuaa ngai yoo na moko moo.
7 Ĩndĩ mwa, kũlya nyamũ, na ikaũmanyĩsya;
O na nyũnyi sya matunĩ, na ikaũtavya.
8 Kana ũsũanĩe ĩũlũ wa* nthĩ, na ĩkaũmanyĩsya;
Na makũyũ ma ũkanganĩ makaũtavya.
9 Nĩ yĩva katĩ wa isu syonthe ĩtesĩ
Kana kwʼoko kwa Yeova nĩkwʼo kwĩkĩte maũndũ asu?
11 Kwʼo kũtũ kũitataa ndeto
O ũndũ ũĩmĩ* ũsamaa lĩu?
12 Wʼo ũĩ ndwĩthĩawa katĩ wa ala akũũ,
Na ũtonyi wa kũelewa maũndũ ũyũkanasya na kwĩkala thayũ ĩvinda yĩasa?
13 We ethĩawa na ũĩ na ũtonyi;
Ethĩawa na ũtao na ũtonyi wa kũelewa maũndũ.
14 Yĩla waomboa kĩndũ, kĩyĩthĩawa kĩtonya kwakwa ĩngĩ;
Kĩla wavinga, vai mũndũ ũtonya kũkĩvingũa.
15 Yĩla wasiĩĩa kĩwʼũ, syĩndũ syonthe nĩsyũmaa;
Yĩla wakĩlekya, nĩkĩkĩlasya nthĩ vinya.
16 We ethĩawa na vinya na ũĩ wa kwĩka maũndũ;
Mũndũ ũla welelũkaa na ũla welelũkasya ala angĩ, onthe methĩawa me make;
17 Atumaa atai mathi maaũ mathei,*
Na atumaa asili moneka me ndia.
18 Nũleelasya nyololo ila ilasimĩthĩtwʼe nĩ asumbĩ,
Na aimova mĩsivi inyunyunĩ syoo.
19 Nũtumaa athembi mathi maaũ mathei,
Na nũngʼuthũlaa ala me na ũkũmũ mũlũlũmĩĩlye vyũ;
20 Nũvindĩthasya atai ma kũĩkĩĩka
Na aivena aũme akũũ* ũmanyi;
21 Nĩwonoeasya andũ ma ndaĩa kĩvũthya,
Na nĩwonzasya ala me ũtonyi;*
22 Nũvuanasya maũndũ maliku kuma kĩvindunĩ,
Na ayĩete kĩvindu kingĩ kyeninĩ;
23 Nũtumaa mbaĩ imesya vinya nĩ kana asyanange;
Nũthanthaasya mbaĩ, nĩ kana aitave.
24 Nũvenaa atongoi ma andũ ũtonyi wa kũelewa maũndũ*
Na aituma manganga yalatanĩ yĩte nzĩa.
25 Mavavataa kĩvindunĩ, vandũ vate kyeni;
Atumaa malũa ta athengi.