Yovu
11 Nzovali, ũla waĩ Mũnaamathi, asũngĩie asya:
2 “Syo ndeto ii syonthe nikũema kũsũngĩwa,
Kana kũneena kwingĩ nĩkũũtuma mũndũ ethĩwa* ate na mavĩtyo?
3 Syo ndeto syaku sya mana niũvindĩthya andũ?
Yo vai mũndũ wĩũkanyʼa nũndũ wa ndeto syaku sya kĩvũthya?
4 Nĩkwĩthĩwa wĩasya, ‘Momanyĩsyo makwa nĩ matheu,
Na nĩ mũtheu methonĩ maku.’
5 Ĩndĩ kethĩwa Ngai no aneene
Na aikũtumũĩsya ilomo syake!
6 Nĩvo ĩndĩ ũkũvuanĩsya syĩmbithĩ sya ũĩ,
Nĩkwĩthĩwa ũĩ wa kwĩka maũndũ ũkonetye maũndũ maingĩ.
Nĩvo ĩndĩ ũmanya kana Ngai nĩwĩtĩkĩlasya mavĩtyo amwe maku mole.
7 We no ũmanye maũndũ maliku ma Ngai
Kana no ũmanye kĩla ũndũ ĩũlũ wa* Mwene Vinya Wʼonthe?
8 Ũĩ wake wĩ ĩũlũ kwĩ ĩtu. We nĩ kyaũ ũtonya kwĩanĩsya?
Nĩ mũliku kwĩ Mbũa.* We nĩ kyaũ ũtonya kũmanya?
9 Nĩ mũasa kwĩ nthĩ
Na nĩ mũthanthau kwĩ ũkanga.
10 Avĩtĩla vandũ na akwata mũndũ na ĩndĩ ayĩta koti,
Nũũ ũtonya kũmũsiĩĩa?
11 Nĩkwĩthĩwa nũmanyaa yĩla andũ meũkengana.
We oona ũthũku, ndakamanya?
12 Ĩndĩ mũndũ mũtumanu akaelewa
O yĩla ĩngʼoi ya kĩthekanĩ yĩkethĩwa yĩtonya kũsyaa mũndũ.*
13 Keka no ũmbanyʼe ngoo yaku
Na ũimũtambũũkĩsya moko maku.
14 Ethĩwa kwʼoko kwaku kwĩĩka ũthũku, kũtwae vaasa vyũ,
Na ndũkaeke ũndũ ũte wa ũlũngalu wĩkale maeemanĩ maku.
15 Nĩkwĩthĩwa nĩvo ĩndĩ ũkethĩwa ũtonya kũũngamya ũthyũ waku ũte na ĩvĩtyo;
Ũtonya kũũngama wĩ mũlũmu, ũte na wia.
16 Nĩkwĩthĩwa nĩvo ĩndĩ wĩũlwa nĩ thĩna waku;
Ndũkaũlilikana o ta kĩwʼũ kĩminĩte kũũvĩta.
17 Thayũ waku ũkeethĩwa na kyeni kwĩ mũthenya katĩ;
O na kĩvindu kyawʼo kĩkeethĩwa kĩilye ta kwakya.
18 Ũkeethĩwa na ũkũmbaũ nũndũ ve wĩkwatyo,
Na ũkasisya kĩla vandũ kũũthyũlũlũka na ũikoma ũteũkĩa mũisyo.
19 Ũkakoma, vate mũndũ o na ũmwe ũkũtuma ũkĩa,
Na andũ aingĩ makenda ũmonyʼe ũseo.
20 Ĩndĩ metho ma ala athũku makaa vinya;
Na maikakwata vandũ va kũkĩĩa,
Na kĩkwʼũ kĩ kyoka nĩkyo kĩkethĩwa* wĩkwatyo woo.”