ENỌ AHWO NỌ A SE EBE

Evọ ivẹ vẹ Pọl ukọ na ọ ta ẹme te evaọ obe Ahwo Galesha 4:24?

Pọl ukọ na ọ ta kpahe aye Abraham nọ a re se Sera gbe odibo-ọmọtẹ rai nọ a re se Hega. Nọ ọ ta kpahe ae no, ọ tẹ ta nọ: “Eware nana i wo otofa ẹwoho; keme eyae ivẹ nana i dikihẹ kẹ evọ ivẹ.” (Gal. 4:22-24) Vẹre vẹre ma jẹ ta nọ evọ ivẹ nọ Pọl ọ ta ẹme te na họ ọvọ Uzi na gbe ọvọ ọkpokpọ na. Rekọ nọ ma wariẹ kiẹ ẹme na ziezi, ma tẹ ruẹ nọ o wọhọ nọ oware nọ a be ta na ọye he. Ma ruẹ nọ ẹme nọ Pọl ọ jọ etẹe ta na, orọnikọ ọvọ ọkpokpọ na ọ be ta kpahe na ha, rekọ o wọhọ nọ ọvọ nọ Ọghẹnẹ ọ re kugbe Abraham. Fikieme ma rọ ta ere?a

Pọl ọ ta nọ Hega o dikihẹ kẹ ugbehru Saena. (Gal. 4:25) Fikiere Hega o dikihẹ kẹ ọvọ Uzi nọ Jihova ọ re kugbe ahwo Izrẹl evaọ ugbehru Saena, evaọ ukpe 1513 B.C.E. (Ọny. 19:5, 6) Fikinọ ohwo-akpọ ọ gba ha, ahwo Ju a jẹ sai koko izi na ziezi hi. Onana u ru nọ a rọ riẹ nọ a rrọ igbo uzioraha nọ Adamu avọ Ivi a fi omai họ na. Ọvọ uzi na o hae sae lẹliẹ ahwo Izrẹl vuhu Mesaya na. Ọye ọvo họ ohwo nọ ọ rẹ sai koko izi na gbagba. Nọ Mesaya na o whu kẹ omai no, ma te wo ẹruore inọ ma ti no igbo uzioraha gbe uwhu nọ ma reuku riẹ na. (Gal. 3:19, 24, 25) Nọ Jesu o whu no, uwhu riẹ u te si ọvọ na notọ no, o gbẹ gwọlọ nọ a re koko izi ọvọ na ha.—Rom 10:4.

Pọl ọ ta nọ Sera o wo ohẹriẹ no Hega. Ọ ta nọ Sera “aye ọmuyẹ na” ọye o yẹ ọmọ nọ a ya “eyaa” riẹ na. (Gal. 4:23) Eyaa yena họ ọvọ nọ Jihova ọ re kugbe Abraham. (Gal. 3:29; 4:28, 30) Who te rri obe Emuhọ 22:18, Jihova ọ ta kpahe ọvọ na. Ọ ta kẹ Abraham nọ: “Ẹkwoma ọmọ ra erẹwho otọakpọ na kpobi a ti wo oghale kẹ omarai fikinọ whọ gaviezọ kẹ urru mẹ.”

Ọvọ nana nọ Jihova ọ re kugbe Abraham na, u ru omai riẹ eware efa kpahe eyaa nọ Jihova ọ ya evaọ ọgbọ Idẹn. (Emu. 3:15) Ọvọ na o lẹliẹ omai riẹ nọ “ọmọ” nọ Jihova ọ ta nọ ọ te whọlọ uzou Ẹdhọ no na, uyẹ Abraham o ti no ze. Pọl ọ ta nọ Jesu Kristi họ uzedhe “ọmọ” nọ Jihova ọ ta ẹme riẹ na. Rekọ enọ e “rrọ erọ Kristi,” koyehọ enọ a rọ ẹzi wholo nọ i bu te idu udhuhrẹ-gbene (144,000) na a rrọ usu na re. Ahwo nana a ti lele Jesu su evaọ Uvie riẹ. (Gal. 3:16, 29; Evia. 14:1-3) Nọ eyaa nana nọ Jihova ọ ya kẹ Abraham na i te rugba no, ahwo kpobi nọ a fi ẹrọwọ họ Jesu je ru oware nọ ọ ta a ti wo eghale buobu.

Kinọ o rrọ ere na, eme họ “otofa” ẹme nọ Pọl ọ ta kpahe Sera avọ Hega na? Otọ ẹme riẹ na họ, otẹrọnọ ahwo Ju evaọ oke riẹ na, a te gbe bi tilẹmu izi Mosis na, yọ a wọhọ Hega nọ ọ jọ ọrigbo. Rekọ otẹrọnọ a te fi ẹrọwọ họ Jesu Kristi nọ ọ rrọ uzedhe “ọmọ” Abraham na, yọ a wọhọ Sera nọ ọ jọ aye Abraham dẹẹ. Yọ ẹsiẹe a ti ro no igbo uzioraha gbe uwhu. (Jọn 8:32-34) Otẹrọnọ ahwo Ju oke yena a gbe fi ẹrọwọ họ Jesu hu, u dhesẹ nọ a riẹ uzedhe ẹjiroro nọ Jihova ọ rọ re ọvọ uzi na kugbe ai hi. Ẹjiroro ọvọ uzi na họ re u fiobọhọ kẹ ahwo Izrẹl ruẹ nọ a ginẹ gwọlọ Kristi na, nọ ọ jẹ nyaze, a vẹ sai fi ẹrọwọ họ iẹe.

Ileleikristi obọ Galesha buobu nọ Pọl o je kere ileta riẹ se na, orọnikọ yọ ahwo Ju hu, fikiere u du gwọlọ nọ a re koko izi Mosis hi. Rekọ ahwo Ju jọ nọ e jọ ukoko na a je si ikẹ nọ Ileleikristi nọ e jọ ahwo Ju hu a gbe koko izi Mosis na ha oja na. Uzi utioye na jọ họ, ọzae kpobi ọ rẹ yawo. Rekọ Pọl ọ ta nọ Ileleikristi yena a wo “ufuoma” nọ ohwo o re wo no nọ ọ tẹ rọwo Jesu. Fikiere o te jọ oware ugheghẹ re a zihe ruọ “erigbo” rọkẹ izi Mosis.—Gal. 5:1, 10-14.