Iriri nọ A jẹ Hai ro Kpe Iyei Evaọ Oke Anwae

Whọ rẹ jọ Ebaibol na ruẹ nọ ilele Jesu jọ a jọ ikuori. (Mak 1:16-20) Iriri a jẹ hai ro kpe iyei evaọ abade Galili.

Ilulu a jẹ hai ro zuo iriri na. Oghẹrẹ ẹbe jọ a re ro ru ilulu na. Iriri na nọ a jẹ hai zuo na, i wo esese gbe ilogbo. Yọ ejọ i re wo ighogho esese, efa kọ ighogho ilogbo. Oghẹrẹ iyei nọ okuori ọ gwọlọ kpe, eye o re rri rọ riẹ oghẹrẹ ẹriri nọ o re wo. A re thuru elẹde hayo ibitho fihọ obotọ iriri esese na re i si iriri na diwi kpohọ obotọ ame. Rekọ ilogbo na, a re thuru eware nọ e gbẹdẹ gaga fihọ obotọ rai re e sai si ai kpohọ obotọ ame. A ve thuru iflota hayo imire nọ i re vori fihọ obehru ẹriri na.

Iriri na e jọ ghaghae. Itho nọ e rrọ abade e jẹ hae bẹre iriri na. Yọ otẹrọnọ ẹriri na o te mu iyei nọ i bu gaga, o rẹ bẹre iẹe re. (Luk 5:6) Ebaibol dede ọ ta nọ Jemis avọ Jọn a jẹ “ruẹrẹ iriri rai.” (Mat. 4:21) Koyehọ ẹsejọhọ ẹguede avọ olulu a je ro ko eria nọ e bẹre na. O sae jọ re nọ, a jẹ hae ruẹrẹ iriri na oke kpobi nọ a te no obọ ame ze no. Luk omariẹ ọ ta re nọ ikuori a jẹ hae “wozẹ iriri rai” re a si erara hayo iluhu no ae. (Luk 5:2) Nọ a tẹ wozẹ ae no, a ve fi ae họ uvo re e ya. Ẹsejọhọ a re ru ere re iriri na e gbẹ lẹ hẹ.—Izik. 47:10.

Jesu o se ezae nọ e jẹ kọ okọ iyei-ikpe re a jọ “ikuori ahwo.”