A Sae rọ Ozighi Ku Ẹbẹbẹ Họ Họ

Ahwo buobu nẹnẹ a roro nọ ẹbẹbẹ hayo ẹwhọ ọ tẹ rrọ otọ, ohọre hayo ozighi a re ro ku ei họ. Rekọ eware nọ Jesu o wuhrẹ gbe oghẹrẹ nọ o yeri uzuazọ riẹ u dhesẹ nọ o roro ere vievie he. Joma ta kpahe eware jọ nọ o wuhrẹ gbe eware jọ nọ o ru.

Eware nọ Jesu o wuhrẹ

Oke nọ Jesu ọ jẹ kẹ ovuẹ obọ ugbehru nọ ahwo a riẹ gaga na, o wuhrẹ nọ ofu, ẹwhọ, gbe ozighi i re ku ẹbẹbẹ họ họ. Joma ta kpahe eme jọ nọ ọ ta.

• “Eware kpobi nọ wha gwọlọ nọ ahwo a ru kẹ owhai, o gba owhai họ nọ eye wha re ru kẹ ae re.” (Matiu 7:12; Luk 6:31) Jesu ọ be jọ etenẹ na vuẹ omai oghẹrẹ nọ u fo nọ ma re lele amọfa yeri,a inọ oghẹrẹ uruemu nọ ma gwọlọ nọ ahwo a re dhesẹ kẹ omai oye ma re dhesẹ kẹ ai re. Ohwo ọvo nọ ọ gwọlọ nọ amọfa a rẹ họre iẹe ọ rrọ họ. Kọ u gbe ti woma re ma rọ adhẹẹ gbe uwowou lele ahwo kpobi yeri re, o tẹ make rọnọ ẹbẹbẹ ọ riẹ?

• “Ohwo kpobi nọ ọ tehe agba obọze ra, rehọ abọdekọ kẹe re.” (Matiu 5:38, 39; Luk 6:29) Orọnikọ Jesu ọ be ta nọ ma rẹ vuẹ ahwo re a hae tehe omai hi. Ukpoye, ọ gwọlọ kpọ iroro ethọthọ nọ ahwo a wo vi. Ahwo a roro nọ orukele yọ emamọ oware. Yọ o wọhọ nọ isu egagọ na jọ evaọ oke yena a je tube wuhrẹ ewuhrẹ ọthọthọ yena. Jesu ọ be ta kẹ ilele riẹ nọ a re ru kele he, rekọ a rẹ jọ wowolẹ o tẹ make rọnọ ahwo a be gwọlọ ae ẹme.b

• “Wha gbẹ hai you ewegrẹ rai.” (Matiu 5:43, 44; Luk 6:27) Jesu o wuhrẹ omai nọ ma re ru eware iwoma kẹ ahwo nọ a mukpahe omai hayo enọ e be riẹ omai ru hu. Orọnikọ ọ be ta nọ eware iyoma nọ a bi ru omai e rẹ were omai hi.c Rekọ ma te bi ru ewoma kẹ ahwo nọ a mukpahe omai, o sae lẹliẹ udu rai lọhọ omojọ, hayo tube ru nọ a re ro mu ewoma họ eru kẹ omai re.

Eware nọ Jesu o ru gbe enọ o ti ru kẹle na

Jesu o wuhrẹ nọ ozighi ọ rẹ sai ku ẹbẹbẹ họ họ, yọ uzuazọ nọ o yeri u dhesẹ nọ ọ rọwo eware nọ o wuhrẹ na. Evaọ aso ẹdẹ nọ a ro mu ei na, olele riẹ jọ ọ rọ ọgbọdọ nawo ohwo jọ re ọ rọ ere thọ Jesu. Rekọ Jesu ọ tẹ ta kẹe nọ: “Zihe ọgbọdọ ra fihọ oria riẹ, keme enọ e tọlọ ọgbọdọ kpobi i ti whu uwhu ọgbọdọ.” (Matiu 26:52) Jesu o dhesẹ vevẹ nọ o you ewegrẹ riẹ keme ọ rọvrẹ ahwo nọ a je gboja kẹe, yọ ọ tubẹ lẹ roro ai dede!—Luk 23:33, 34; 1 Pita 2:23.

Ọghẹnẹ ọ jọ Ebaibol na ya eyaa nọ kẹle na, Jesu nọ ọ rrọ Osu Udhedhẹ na o ti si ozighi no otọakpọ na riẹriẹriẹ. (Aizaya 9:6, 7) Re who gbe wuhrẹ kpahe obọdẹ eghale nana nọ i ti te omai evaọ obaro na, se uzoẹme na “Oghẹrẹ nọ Ẹmo gbe Ozighi I ti ro Kuhọ.”