Udhedhẹ O te Jọ Akpọ na Soso

Ohwo kpobi ọ gwọlọ nọ udhedhẹ o rẹ jọ akpọ na. No otọ avọ otọ ze, isu akpọ na a rẹ gwọlọ oghẹrẹ kpobi nọ a re ro ku ẹmo họ evaọ eria nọ a be jọ fi ẹmo re udhedhẹ o sae jariẹ. Ẹsejọ, ẹmo na o re gine kuhọ evaọ omoke jọ. Rekọ who je ri rri hi na, ẹmo na ọ vẹ wariẹ muhọ. Kọ udhedhẹ o te ginẹ jọ akpọ na ẹdẹ jọ? Uyo na họ, Ee! Re ma ruẹ epanọ o te rọ via, joma ta kpahe eware nọ Jesu o ti ru gbe eware nọ o wuhrẹ.

Eware nọ Jesu o ti ru

A jọ Ebaibol na ta kpahe eware nọ Jesu o ti ru kẹle na re udhedhẹ o jọ otọakpọ na soso.

• “A re ti se [Jesu] . . . Osu Udhedhẹ. Isuẹsu riẹ e te kẹre thabọ yọ udhedhẹ u ti wo oba ha.” (Aizaya 9:6, 7) Jesu nọ ọ rrọ Osu Uvie Ọghẹnẹ na o ti ru nọ udhedhẹ o te rọ jọ akpọ na soso bẹdẹ bẹdẹ.

• “O ti siwi oyogbe nọ o bi bo kẹ obufihọ na . . . avọ ohwo kpobi nọ o wo ofiobọhọ họ.” (Olezi 72:12-14) Jesu ọ te rọ udu nọ Jihova ọ kẹ riẹ si okienyẹ notọ, yọ ẹmo, ozighi, gbe uye-oruẹ e gbẹ te jọ ofa ha.

• “Orẹwho o gbẹ te kpare ọgbọdọ rọsuọ orẹwho ho, yọ a ti gbe wuhrẹ ẹmo-ofio ofa ha.” (Aizaya 2:4) Evaọ oke nọ Jesu o ti su, ahwo kpobi a ti wuhrẹ epanọ a rẹ rọ rria dhedhẹ kugbe amọfa viukpenọ a re wuhrẹ epanọ a re fi ẹmo.

Re who gbe wuhrẹ kpahe epanọ Jesu ọ te rọ wha udhedhẹ ziọ akpọ na gbe epanọ whọ sae rọ rria akpọ na evaọ oke yena, rri ividio ọkpẹkpẹe nana Eme Họ Uvie Ọghẹnẹ?

Eware nọ Jesu o wuhrẹ

Makọ evaọ oke mai na, eware nọ Jesu o wuhrẹ i bi fiobọhọ kẹ ahwo buobu rria dhedhẹ kugbe ohwohwo. Jesu ọ jọ ovuẹ obọ ugbehru nọ ahwo a riẹ gaga na kẹ ehrẹ nọ e rẹ sai fiobọhọ kẹ ahwo rria kugbe dhedhẹ. Joma ta kpahe ehrẹ nana jọ.

• “Eva e were enọ i re ru udhedhẹ.” (Matiu 5:9) Jesu ọ ta kẹ ilele riẹ nọ a kẹnoma kẹ ẹwhọ, re a je ru udhedhẹ.

• “Kake ruẹrẹhọ kugbe oniọvo ra, kẹsena who ve zihe ze te kẹ okẹ ra.” (Matiu 5:23, 24) Jesu ọ ta kẹ ahwo nọ o je wuhrẹ inọ a te wo ẹwhọ, jọ a ku ẹwhọ na họ ababọ oke oraha. O wuhrẹ nọ ma tẹ gwọlọ wo emamọ usu kugbe Ọghẹnẹ, o gbahọ nọ ma rẹ rria dhedhẹ kugbe amọfa.

• “Wha siọ ahwo ẹdhọ ba egu, re a gbẹ rọ owhai guẹdhọ gbe he.” (Matiu 7:1) Jesu ọ vẹvẹ omai unu nọ ma gu ahwo ẹdhọ hayo mu fuọ ahwo ho. Uruemu utioye na o sae wha ẹwhọ hayo ohọre ze. Jesu o wuhrẹ omai nọ ukpenọ ma rẹ hai gu ahwo ẹdhọ, u fo re ma “hae rọvrẹ” ahwo nọ a ru omai thọ.—Luk 6:37.

Ahwo buobu evaọ akpọ na a bi ru epanọ Jesu o wuhrẹ omai na. Makọ evaọ eria nọ ahwo a be jọ ru ozighi gaga hayo whọ kuoma, ahwo buobu a be daoma rria dhedhẹ kugbe amọfa, ku ẹwhọ họ dhedhẹ, rọvrẹ, je dhesẹ uyoyou kẹ ahwo nọ a ru rai thọ dede.

Re whọ ruẹ epanọ eware nọ Jesu o wuhrẹ i bi ro ru udu te ahwo jọ otọ, se uzoẹme na “Udu O Sai Te Owhẹ Otọ Ghelọ Ẹmo gbe Ozighi.”