Ovuẹ nọ U No Ebaibol Ze—Ẹruore Rọkẹ Ahwo nọ A Dhẹ Ohrẹ Ẹmo!

Kukpe kukpe, ahwo nọ a be dhẹ no ẹwho rai fiki ẹmo gbe ozighi a bu wumuo ho. Kọ o via kẹ owhẹ no? O tẹ rrọ ere, jọ ozọ u mu owhẹ hẹ. Ọghẹnẹ ọ ta nọ eware i ti woma evaọ obaro. Whọ sae jọ Ebaibol na wuhrẹ kpahe obọdẹ ẹruore nọ Ọghẹnẹ ọ kẹ omai.

“Ahwo nọ a dhẹ ohrẹ ẹmo gbe amọfa kpobi nọ a dhẹ no ẹwho rai fiki ebẹbẹ,a o gwọlọ nọ ma re fiobọhọ kẹ ae kpata kpata, o tẹ jẹ gwọlọ nọ . . . a re wo ẹruore inọ eware i ti woma evaọ obaro.” Ọzae jọ nọ a re se Christos Stylianides, nọ ọ rrọ ohwo ologbo evaọ European Unionb ọye ọ ta ẹme nana. Eva e rẹ were ahwo nọ a wo ẹruore keme a riẹ nọ eware i ti woma evaọ obaro. U te no ẹruore no, ahwo nọ a dhẹ ohrẹ ẹmo a gwọlọ oware nọ o rẹ sasa ae oma re a sai thihakọ eware nọ e via kẹ ae na.

“Nọ mẹ dhẹ no orẹwho mẹ, mẹ dhẹ siọ ahwo uviuwou mẹ kpobi ba. Oware na o kẹ omẹ uye te epanọ me je ro roro nọ omẹ u re no. Ozọ u je mu omẹ gaga, eva e jẹ were omẹ hẹ, yọ mẹ jọ awawa.”—Emmanuel nọ ọ dhẹ no Haiti.

Kọ oware nọ o via kẹ Emmanuel na o via kẹ owhẹ no ẹdẹ jọ? Otẹrọnọ whọ dhẹ no ẹwho ra, whọ gwọlọ oware nọ o rẹ sasa owhẹ oma obọnana gbe oware nọ o rẹ kẹ owhẹ ẹruore inọ eware i ti woma. Ebaibol na ọ sai fiobọhọ kẹ owhẹ. Evaọ oghẹrẹ vẹ?

Ebaibol na ọ rẹ sasa ohwo oma

Ebaibol na ọ ta nọ: “Jihovac . . . o you ọrara nọ ọ be rria udevie rai.”—Iziewariẹ 10:17, 18.

Ebaibol na ọ ta nọ: “Jihova ọ kẹle enọ i bi bo sei kpobi.”—Olezi 145:18.

Ebaibol na ọ ta nọ: “Ọghẹnẹ uzẹme na ọ rẹ sai ru oware umuomu vievie he . . . Erumeru na ọ rẹ vẹ ẹdhọ tu hu.”—Job 34:10, 12.

Onana u dhesẹ nọ orọnikọ Ọghẹnẹ ọ so riẹ nọ whọ be rọ ruẹ uye he. Orọnikọ ọ be kẹ owhẹ uye fiki eware iyoma nọ who ru hu, yọ orọnikọ ọ be rọ ebẹbẹ dawo owhẹ sọ whọ te sai dikihẹ ga ha.

Ebaibol na ọ ta nọ eware i ti woma

Ebaibol na ọ vuẹ omai eware nọ Ọghẹnẹ o ti ru kẹ omai evaọ obaro. Joma ta kpahe epanọ ẹruore nana o bi ro fiobọhọ kẹ ahwo nọ a dhẹ no iwou rai.

Ebaibol na ọ ta nọ: “[Ọghẹnẹ] o ti ririe irui-oviẹ kpobi no aro rai, uwhu o gbẹ te jọ ofa ha, yọ uweri hayo oviẹ hayo edada e gbẹ te jọ ofa ha.”—Eviavia 21:4.

Onana u dhesẹ nọ uye-oruẹ u ti kuhọ. Ọghẹnẹ ọ ya eyaa nọ ebẹbẹ kpobi nọ i bi ru akpọ bẹ omai nẹnẹ, o ti ku ai họ.

“Kẹle na Ọghẹnẹ o ti si okienyẹ gbe eware iyoma nọ e be via evaọ akpọ na notọ. Ẹruore nana o bi fiobọhọ kẹ omẹ rẹro oke nọ uye-oruẹ kpobi u ti ro kuhọ.”—Karla nọ ọ dhẹ no El Salvador.

Ebaibol na ọ ta nọ: “A gbẹ te kareghẹhọ eware anwae na ha, yọ e te gbẹ ruọ udu na gbe he.”—Aizaya 65:17.

Onana u dhesẹ nọ eware iyoma nọ e via kẹ omai no e te gbẹ kẹ omai uye he. Ọghẹnẹ o ti fiobọhọ kẹ owhẹ re eware iyoma nọ e via kẹ owhẹ no e gbẹ ziọ owhẹ iroro ofa ha.

“Ọghẹnẹ ọ jọ Ebaibol na ya eyaa nọ ma te gbẹ tubẹ kareghẹhọ eware nọ e jẹ kẹ omai uye gbe eware nọ i vru mi omai hi. Ẹruore nana o bi fiobọhọ kẹ omẹ thihakọ ebẹbẹ nọ i bi te omẹ avọ ahwo uviuwou mẹ keme mẹ riẹ nọ eware i ti woma kẹle.”—Natalia nọ ọ dhẹ no Ukraine.

Ebaibol na ọ ta nọ: “Ọghẹnẹ obọ odhiwu ọ te rehọ uvie jọ mu, onọ . . . o te guọghọ jẹ rehọ ivie nana kpobi te oba.”—Daniẹl 2:44.

Onana u dhesẹ nọ egọmeti nọ Ọghẹnẹ o ro mu no evaọ obọ odhiwu o ti su otọakpọ na. Kẹle na, Ọghẹnẹ ọ te raha egọmeti ahwo-akpọ no, ọ vẹ te rehọ egọmeti riẹ nwene ẹta rai. Egọmeti nana ọ te wha udhedhẹ gbe ufuoma ze. O ti si okienyẹ notọ, je ru akpọ lọhọ kẹ ahwo kpobi.—Maeka 4:3, 4.

“Eva e be were omẹ gaga nọ mẹ rọ riẹ nọ ebẹbẹ wọhọ okienyẹ, oma-ogbẹre, iviẹro, gbe omukpahe fiki uyẹ i ti kuhọ—Uvie Ọghẹnẹ u ti si ebẹbẹ nana kpobi notọ kẹle.”—Mustafa nọ ọ dhẹ no Middle East.

Ehrẹ Ebaibol nọ e rẹ kẹ ohwo areghẹ

Eme areghẹ nọ e rrọ Ebaibol na e sai fiobọhọ kẹ owhẹ thihakọ eware nọ e via kẹ owhẹ no. E sai je ru udu te owhẹ otọ dede nọ eware buobu i nwene no evaọ uzuazọ ra, eware nọ who je ro yeri uzuazọ i te je vru. Joma ta kpahe ehrẹ Ebaibol jọ nọ i bi fiobọhọ kẹ ahwo nọ a dhẹ no ẹwho rai:

Ebaibol na ọ ta nọ: “Ohwo ọ tẹ maki wo eware buobu, eware na e rẹ kẹe uzuazọ họ.”—Luk 12:15.

Oghẹrẹ nọ ohrẹ Ebaibol nana o sai ro fiobọhọ kẹ owhẹ thihakọ: Ma riẹ nọ oware nọ o via na o kẹ owhẹ uye gaga yọ eware ra nọ whọ dhẹ seba na e be da owhẹ. Rekọ nọ whọ tẹ kareghẹhọ nọ uzuazọ ra họ oware nọ o mae rro, eware ra nọ i vru na e gbẹ te kẹ owhẹ uye tere he.

“Uzuazọ o ghare vi eware nọ ohwo o wo. Evaọ ẹsejọ, eware hayo ugho nọ ohwo o wo e sai fiobọhọ kẹ ohwo ho.”—Natalia nọ ọ dhẹ no Ukraine.

Ebaibol na ọ ta nọ: “Whọ ta ha inọ, ‘Fikieme edẹ nọ e vrẹ no i ro woma vi enana?’”—Ọtausiuwoma Na 7:10.

Oghẹrẹ nọ ohrẹ Ebaibol nana o sai ro fiobọhọ kẹ owhẹ thihakọ: O sae jọ nọ eware e rrọ gaga kẹ owhẹ obọnana. Rekọ who du rọ epanọ eware e rrọ kẹ owhẹ enẹna wawo epanọ eware e jọ vẹre he, keme o sae lẹliẹ eva hae dha owhẹ ẹsikpobi.

“Mẹ ta kẹ omamẹ nọ eware i nwene no, fikiere oghẹrẹ kpobi nọ eware e rrọ kẹhẹ, me re yeri akpọ mẹ vrẹ.”—Eli nọ ọ dhẹ no Rwanda.

Ebaibol na ọ ta nọ: “Ma te wo emuore gbe iwu, eware nana e rẹ da omai ẹro.”—1 Timoti 6:8.

Oghẹrẹ nọ ohrẹ Ebaibol nana o sai ro fiobọhọ kẹ owhẹ thihakọ: Jọ umutho nọ who wo o da owhẹ ẹro. Nọ emeware nọ who wo e tẹ da owhẹ ẹro, whọ gbẹ te jọ awawa ha.

“Ebaibol na o bi fiobọhọ kẹ omẹ rri eware oghẹrẹ nọ u fo, me gbe bi roro kpahe eware nọ ma dhẹ seba ha. Eva e be were omẹ avọ aye mẹ inọ ma rrọ uzuazọ yọ oma u dhẹ omai.”—Ivan nọ ọ dhẹ no Ukraine.

Ebaibol na ọ ta nọ: “Eware kpobi nọ wha gwọlọ nọ ahwo a ru kẹ owhai, o gba owhai họ nọ eye wha re ru kẹ ae re.”—Matiu 7:12.

Oghẹrẹ nọ ohrẹ Ebaibol nana o sai ro fiobọhọ kẹ owhẹ thihakọ: Who te wo odiri jẹ rrọ wowou, u ti ru nọ whọ te rọ rria kugbe amọfa dhedhẹ. Onana o sae je ru nọ amọfa nọ wha gbẹ rrọ oria a rẹ rọ jẹ owhẹ rehọ re.

“Eva e rẹ were ahwo buobu nọ a tẹ ruẹ nọ whọ be kẹ ae adhẹẹ je dhesẹ uwowou gbe uyoyou kẹ ae. Onana u re ru nọ whọ rẹ rọ riẹ yeri kugbe ahwo nọ a be rria oria nọ whọ dhẹ kpohọ na.”—Angelo nọ ọ dhẹ no Sri Lanka.

Ebaibol na ọ ta nọ: ‘Ta ayare ra via kẹ Ọghẹnẹ; udhedhẹ Ọghẹnẹ o vẹ te sẹro udu ra gbe ogaga iroro ra.’—Ahwo Filipai 4:6, 7.

Oghẹrẹ nọ ohrẹ Ebaibol nana o sai ro fiobọhọ kẹ owhẹ thihakọ: Lẹ se Ọghẹnẹ kpahe eware nọ e be kẹ owhẹ uye, eware nọ whọ gwọlọ, eware nọ e be lẹliẹ ozọ mu owhẹ, gbe eware nọ e be lẹliẹ owhẹ ruawa. Whọ tẹ be lẹ se Ọghẹnẹ kpahe eware itienana, u re ru nọ whọ gbẹ te rọ ruawa tere he.

“Oke kpobi nọ me te wo ẹbẹbẹ, mẹ rẹ lẹ se Ọghẹnẹ, yọ o re yo olẹ mẹ. Eware nọ me wuhrẹ evaọ Ebaibol na i bi ru udu te omẹ otọ.”—Yol nọ ọ dhẹ no South Sudan.

“Ehrẹ nọ e rrọ Ebaibol na i bi ru udu te omẹ otọ, ere mẹ be sai ro thihakọ ẹbẹbẹ nana.”—Valentina nọ ọ dhẹ no Ukraine.

“Eva e be were omẹ nọ Jihova Ọghẹnẹ ọ ya eyaa inọ eware i ti woma evaọ obaro.”—Emmanuel nọ ọ dhẹ no Haiti

Kọ whọ gwọlọ gbe wuhrẹ kpahe eware nọ Ọghẹnẹ ọ ya eyaa rai evaọ Ebaibol na nọ e rẹ sasa ohwo oma jẹ kẹ ẹruore? Kọ whọ gwọlọ riẹ oware nọ u ro mu omai ẹro nọ eyaa Ọghẹnẹ i ti rugba? Ivie ta kẹ Isẹri Jihova re a nyaziọ obọ uwou ra ti wuhrẹ owhẹ Ebaibol na. O te were ae re a fiobọhọ kẹ owhẹ.