Ẹvẹ U Fo nọ Uzuazọ Oleleikristi O rẹ Jọ?—Eme Ebaibol na Ọ Ta?

Evaọ akpọ na nẹnẹ, ahwo buobu a re se omarai Ileleikristi, rekọ a re ru akpọ bẹ amọfa. Ahwo nana jọ a re si kẹ ẹkpa rai ọvo, a re fi iwhayo, yọ a rẹ re ohrọ ahwo ho. Amọfa jọ a re gbe-ọfariẹ, makọ enọ e rọo no. Onana o wha riẹ ze nọ ahwo jọ a rẹ rọ nọ inọ: ‘Ẹvẹ u fo nọ uzuazọ Oleleikristi o rẹ jọ?’

Oghẹrẹ nọ u gine fo nọ uzuazọ Oleleikristi o rẹ jọ

Orọnikọ ohwo o te se omariẹ Oleleikristi yọ u re no ho. O re ru eware nọ i dhesẹ nọ Oleleikristi ọ ginẹ rrọ. Ebaibol na o dhesẹ nọ Oleleikristi yọ ohwo nọ ọ rrọ olele Jesu Kristi. (Iruẹru Ikọ 11:26) Jesu omariẹ ọ ta nọ: “Otẹrọnọ wha te bi koko ẹme mẹ ẹsikpobi, whai ginọ ilele mẹ.” (Jọn 8:31) Uzẹme o ginẹ rrọ inọ fikinọ ma gba ha, ma sae nwani ru oware kpobi nọ Jesu ọ ta gbagba ha. O make rrọ ere na, Oleleikristi ọ rẹ daoma kpobi re o fi eware nọ Jesu ọ ta họ iruo yọ ọ rẹ rọ oghẹrẹ nọ o bi yeri uzuazọ riẹ kẹdẹ kẹdẹ dhesẹ iẹe via. Joma ta kpahe eware jọ.

Ileleikristi a re you amọfa no eva rai kpobi ze

Ẹme nọ Jesu ọ ta: “Mẹ be kẹ owhai ujaje okpokpọ inọ wha you ohwohwo; nwane wọhọ epanọ me you owhai na, wha you ohwohwo re. Ẹkwoma onana ahwo kpobi a te rọ riẹ nọ whai yọ ilele mẹ, otẹrọnọ wha te wo uyoyou evaọ udevie rai.”—Jọn 13:34, 35.

Oware nọ Jesu o ru: Jesu o you ahwo kpobi, te edafe te iyogbe, te ahwo nọ a riẹ odẹ te enọ amọfa a rẹ sai rri vo. O siwi enọ e jẹ mọ, ọ ko enọ ohọo u je kpe, yọ o whu rọkẹ ahwo-akpọ.—Matiu 14:14-21; 20:28.

Oghẹrẹ nọ u fo nọ Ileleikristi a re ru: Ileleikristi a re dhesẹ nọ a you amọfa nọ a te wo uruemu ọghoruo, nọ a tẹ be hae rọvrẹ amọfa, je dede ahwo rehọ ghelọ oria nọ a no ze hayo oghẹrẹ nọ eware e rrọ kẹ ae kẹhẹ. A re fiobọhọ kẹ ahwo nọ eware e ga kẹ, je gbobọnẹ eware obọrai jọ re a sai fiobọhọ kẹ amọfa.—1 Jọn 3:16.

Ileleikristi a rẹ ta uzẹme

Ẹme nọ Jesu ọ ta: “Mẹ họ . . . uzẹme na.”—Jọn 14:6.

Oware nọ Jesu o ru: Jesu ọ jọ ohwo uzẹme. O je ru ahwo ẹghẹ hẹ yọ ọ jẹ ta eme eviẹhọ gbe he. A riẹ riẹ fihọ ohwo nọ ọ rẹ ta uzẹme, o tẹ make rọnọ onana u ti ru nọ ahwo a te rọ wọso ẹe.—Matiu 22:16; 26:63-67.

Oghẹrẹ nọ u fo nọ Ileleikristi a re ru: Ileleikristi a rẹ ta ọrue he. A rẹ hwa osa-uzou rai, a re tho uji hi, yọ ohwo ọ tẹ rehọ ae iruo, a rẹ rọ oke iruo na ru eware efa ha. (Ahwo Rom 13:5-7; Ahwo Ẹfisọs 4:28) A rẹ wha ahwo re he, a re rri tho ho evaọ ẹdawọ, yọ nọ a te bi fi obe họ kẹ iruo hayo eware efa, a re gu ọrue he evaọ eware nọ a kere fihọ obe na.—Ahwo Hibru 13:18.

Ileleikristi a rẹ jọ wowou

Ẹme nọ Jesu ọ ta: “Wha nyabru omẹ ze, whai kpobi nọ e be ruẹ uye, nọ ewha egbẹgbẹdẹ e rrọ uzou, mẹ te sasa owhai oma. Wha rehọ owhowha mẹ je wuhrẹ mi omẹ, keme mẹ rrọ wowolẹ je wo omaurokpotọ, wha re ti wo omosasọ kẹ omarai. Keme owhowha mẹ o rẹ nyaoma ha, yọ owha mẹ o rrọ vovori.”—Matiu 11:28-30.

Oware nọ Jesu o ru: Jesu ọ jọ wowou yọ ọ jọ ohwo nọ ahwo kpobi a rẹ sae nyabru lọlọhọ. Jesu o je se emaha na gboma, ọ jẹ sa-sa ahwo nọ a rrọ uweri oma, yọ o je bru ọghọ họ ahwo oma.—Mak 10:13-15; Luk 9:11.

Oghẹrẹ nọ u fo nọ Ileleikristi a re ru: Ẹme nọ o bi no Ileleikristi unu ze ọ rẹ jọ wolẹ. A rẹ kpahe eme egaga hayo wọviẹ amọfa ha. (Ahwo Ẹfisọs 4:29, 31, 32) A re roro kẹ amọfa jẹ gwọlọ edhere kpobi nọ a re ro fiobọhọ kẹ ae.—Ahwo Galesha 6:10.

Ileleikristi a rẹ talamu ọzae hayo aye rai

Ẹme nọ Jesu ọ ta: “Fikiere, onọ Ọghẹnẹ o kugbe no, ajọ ohwo ọvo ọ hẹriẹ iẹe he.”—Mak 10:9.

Oware nọ Jesu o ru: Dede nọ Jesu ọ rọo ho, ọ tuduhọ ahwo nọ a rọo no awọ re a talamu ọzae hayo aye rai. (Matiu 19:9) O wuhrẹ ahwo inọ jọ a kẹnoma kẹ eware nọ e rẹ sae lẹliẹ ae bruẹnwae keme onana o sae fa orọo.—Matiu 5:28.

Oghẹrẹ nọ u fo nọ Ileleikristi a re ru: Ileleikristi a rẹ kẹnoma kẹ oware kpobi nọ u re si ọghọ no ọzae hayo aye rai oma. (Ahwo Hibru 13:4) U fo nọ ọzae-avọ-aye a re ru eware nọ i dhesẹ nọ a you ohwohwo jẹ be rọ adhẹẹ kẹ ohwohwo.—Ahwo Ẹfisọs 5:28, 33.