Kọ Whọ Gbẹ be Daoma Riẹ Jihova Ziezi?

1. Ma te roro kpahe epanọ Jihova o wo areghẹ te, epanọ eriariẹ riẹ i bu te, gbe eware nọ o ru no, ẹvẹ ma re rri omamai?

KỌ WHO roro kpahe epanọ eware nọ Jihova ọ riẹ i bu te no ẹdẹ jọ, epanọ areghẹ riẹ o kodo te, gbe epanọ eware nọ o ru no i bu te je gbunu te? Ma te gine roro kpahe epanọ Ọghẹnẹ nọ ọ ma omai na ọ rro te, ma re rri omamai nọ kpakọ ma riẹ oware ovo ho. Pọl ukọ na o kere ẹme jọ kpahe oware nana, inọ: “O, rri epanọ efe Ọghẹnẹ avọ areghẹ gbe eriariẹ riẹ i kodo te! A rẹ sae kiẹ otọ iziẹibro riẹ via ha, yọ a rẹ sae gwọlọ idhere riẹ via ha.”—Rom 11:33, 34.

2. Eme o dhesẹ nọ ma rẹ sae riẹ Jihova?

² Ma sae riẹ Jihova re he. Rekọ ma sae daoma riẹ oghẹrẹ ohwo nọ ọ rrọ. Devidi ovie na ọ ta kẹ Solomọn ọmọ riẹ nọ: “Riẹ Ọghẹnẹ ọsẹ ra re whọ rọ udu ra kpobi gbe uzuazọ evawere gọe . . . Otẹrọnọ whọ kiẹ gwọlọ iẹe, o ti ru re whọ ruẹ e riẹ.” (1 Irv. 28:9) Nọ ikpe buobu e vrẹ no, Jọn ukọ na o te kere se Ileleikristi oke riẹ inọ Ọmọ Ọghẹnẹ “ọ kẹ omai otoriẹ udidi re ma sai wo eriariẹ Ọghẹnẹ uzẹme na.” (1 Jọn 5:20) Yọ Jesu ọ ta nọ “ohwo kpobi nọ u je Ọmọ na nọ o re dhesẹ Ọsẹ na kẹ” ọ rẹ sae riẹ Ọsẹ na, koyehọ Jihova.—Mat. 11:27.

3. Eme ma te ta kpahe evaọ uzoẹme nana?

³ Ahwo kpobi nọ a rọ uzuazọ rai kẹ Jihova no inọ a rẹ gọe, a wuhrẹ eware buobu kpahe iẹe no. Rekọ eware buobu e riẹ nọ ma rẹ gbẹ “riẹ” kpahe Jihova keme ma sae riẹe re he. (Jọn 17:3, ẹme-obotọ) Ma te gbe bi wuhrẹ kpahe Jihova, ma te gbẹ riẹ eware efa nọ ma re ru nọ e rẹ were iẹe, gbe eware nọ e rẹ lẹliẹ omai fievahọ iẹe vi epaọ anwẹdẹ. Fikiere ma te jọ uzoẹme nana kẹ iyo enọ esa jọ nọ u fo nọ ma re roro kpahe o tẹ make rọnọ ma gọ Jihova kri no. Eye họ: Eme u dhesẹ re a riẹ Jihova? Fikieme u je fo re ma gbẹ riẹ Jihova ziezi? Oghẹrẹ vẹ ma sae gbẹ rọ riẹe vi epaọ anwẹdẹ?

EME U DHESẸ RE A RIẸ JIHOVA?

4. Eme u dhesẹ re a riẹ Jihova?

⁴ Ma te rri ẹme jọ nọ Jihova ọ ta kpahe ahwo Ju, ma rẹ riẹ oware nọ u dhesẹ re a riẹ Jihova. Ọ ta nọ: “Mẹ te kẹ ae udu nọ a rẹ rọ riẹ omẹ, inọ mẹ họ Jihova.” (Jeri. 24:7) Ahwo Ju nọ a ti no igbo Babilọn ze Jihova ọ ta ẹme yena kpahe. Yọ a riẹ eware jọ kpahe Ọghẹnẹ no. Rekọ u fo nọ ẹriẹ nọ a riẹ Jihova na u re no obọ udu rai gbe iroro rai ze. Obe jọ o ta ẹme kpahe oware nọ u dhesẹ re a riẹ Ọghẹnẹ. O ta nọ: “Re a riẹ kpahe Ọghẹnẹ avọ re a riẹ Ọghẹnẹ, epọvo na ha. O wọhọ ohwo nọ o bi se kpahe oghẹrẹ nọ ọmọzae avọ ọmọtẹ a rẹ rọ dhẹ ruọ ohwohwo oma. Ohwo nọ o bi se kpahe iẹe ọvo na, ọ rẹ riẹ oghẹrẹ nọ o rrọ te ohwo nọ o mu usu na họ no ho.” Ẹme na họ, ma tẹ riẹ nọ Ọghẹnẹ ọ rrọ no, ma jẹ riẹ odẹ riẹ no, o jọ etẹe kuhọ họ. Ma rẹ jẹ daoma riẹ oghẹrẹ ohwo nọ ọ ginẹ rrọ.

5. Ma te rri iku Josaya, eme o re dhesẹ nọ ohwo ọ riẹ Jihova?

⁵ Nọ ma be riẹ Jihova na, ma te riẹ oware nọ o rẹ were iẹe gbe oware nọ o rẹ dhae eva. Josaya ovie na yọ ohwo jọ nọ ọ riẹ oware nọ o rẹ were Jihova. Ebaibol ọ vuẹ omai nọ: “Evaọ ukpe avọ eree esuo riẹ, nọ ọ gbẹ jọ ọmọzae, o te mu Ọghẹnẹ Devidi ọsẹ-esẹ riẹ họ ẹkiẹ gwọlọ.” (2 Irv. 34:3) Josaya o wuhrẹ kpahe Jihova gaga. Rekọ orọnọ o wuhrẹ no, ọ tẹ kpairoro vrẹ hẹ. O je ru lele eware nọ o wuhrẹ na. Jihova ọ rehọ Jerimaya ọruẹaro na ta nọ Josaya “o bru uvioziẹ je ru oware nọ u kiẹrẹe.” Yọ ọ jẹ thothọ enọ e jẹ reoja gbe iyogbe na. Kẹsena Jihova ọ tẹ ta nọ: “Kọ ogbẹrọnọ oware nọ u dhesẹ nọ ohwo ọ riẹ omẹ oye?”—Jeri. 22:15, 16.

6. Ma te rri Olezi 9:10, eme u ti noi ze nọ ma tẹ riẹ Jihova gaga?

⁶ Se Olezi 9:10. Epanọ ma riẹ Jihova te, ere ma ti fievahọ iẹe te. Yọ ere o jọ kẹ Pọl ukọ na. Evaọ orọ urere nọ a ro fi Pọl họ uwou-odi taure o te ti whu, ọ ta nọ: “Oma o be vuọ omẹ hẹ. Keme mẹ riẹ Ọnọ me fievahọ.” (2 Tim. 1:12) Eva nọ Pọl o fihọ Jihova i je dhe ẹgẹga keme o wuhrẹ kpahe Jihova, yọ ọ ruẹ epanọ Jihova o je ro fiobọhọ kẹe. Fikiere u mu rie ẹro inọ Jihova ọ te kareghẹhọ iruo nọ o ru kẹe no, ọ vẹ te kpare iẹe ze.

FIKIEME U JE FO RE MA GBẸ RIẸ JIHOVA ZIEZI?

7. Nọ ma riẹ Jihova te oria jọ no na, ma gbẹ riẹ ru hu, eme o rẹ sae via?

⁷ Nọ ma je kurẹriẹ ze obọ, ma jẹ daoma wuhrẹ eware buobu kpahe Jihova. Rekọ nọ oke o be nya na, ma gbe rri otọ mu hu, ma gbẹ te nwani wuhrẹ kpahe Jihova tere he. Fikieme ma rọ ta ere? Keme nọ ma te bi se Ebaibol kẹ omamai hayo nọ a te bi sei evaọ obọ ewuhrẹ, oware nọ ma rẹ kaki roro kpahe họ, epanọ ma sai ro fi ẹme na họ iruo, hayo epanọ ma rẹ rọ rehọ iẹe fiobọhọ kẹ amọfa. U gine woma ere, Ebaibol ọ tubẹ ta nọ ma ru ere. (2 Tim. 3:16, 17) Rekọ uzẹme riẹ họ, ma sae jọ Ebaibol na riẹ eware buobu kpahe Jihova. (Ol. 25:8-10) Fikiere orọnọ epanọ ma sai ro wuhrẹ eware jọ no Ebaibol ze nọ ma re ru lele, hayo epanọ ma sae rọ rehọ ae fiobọhọ kẹ amọfa o rẹ mae jọ omai oja ha. Rekọ ma rẹ nọ omamai nọ, ‘Eme mẹ jọ oria Ebaibol nana wuhrẹ kpahe Jihova?’a

8. Ma tẹ be gbẹ riẹ eware efa kpahe Jihova, eme u ti noi ze? (Olezi 73:24-28)

⁸ Epanọ ma riẹ Jihova te, ere usu mai avọ iẹe o te kpekpe te. Who te se oria Ebaibol jọ kẹ omara, nọ who te rri JW Broadcasting^® no, hayo nọ who te no ewuhrẹ hayo okokohọ ze obọ, ẹvẹ o be hae jọ? Kọ eware nọ who wuhrẹ na e be hai si owhẹ kẹle Ọsẹ obọ odhiwu ra vi epaọ anwẹdẹ? Ere o be hae jọ na. Kọ eme o rẹ whae ze na? Keme ma riẹ eware efa kpahe Jihova no. Yọ o rẹ so ẹe ze nọ ma re ro yere iei je jiri ei, nwane wọhọ epanọ ọso-ilezi jọ o ru. Nọ o roro kpahe eware nọ Jihova o ru kẹe no, ọ tẹ ta nọ: “Ọghẹnẹ họ ọnọ o bi ru udu mẹ ga, ọye họ ẹkẹ mẹ bẹdẹ bẹdẹ.” (Se Olezi 73:24-28.) Ma tẹ be daoma riẹ Jihova ziezi, ma te kẹle iẹe gaga, yọ ma te gwọlọ nọ oware ovo o raha usu mai avọ iẹe hẹ.

9. Ma tẹ be “kareghẹhọ” Jihova evaọ oware kpobi, eme ma ti ru? Kẹ oriruo jọ.

⁹ U fo nọ ma rẹ “kareghẹhọ” Jihova evaọ oware kpobi. (Itẹ 3:5, 6) Re ma kareghẹhọ iẹe, ma re roro kpahe eware nọ ma wuhrẹ kpahe iẹe no nọ ma tẹ gwọlọ ru oware jọ. Ma ve roro sọ oware na o te were iẹe. Kọ ere ma ti ro ru oware nọ o rẹ were iẹe. Joma rọ oriruo jọ dhesẹ iẹe. Inievo buobu a re fi uwoho ọzae hayo aye rai họ oria nọ a bi jo ru iruo, epọso hayo ewhọlẹte rai. Ejọ i re fi ei họ oria nọ a rẹ jọ kake ruẹ e riẹ evaọ ifonu rai. O rẹ so ẹe ze nọ a re ro roro kpahe ọzae rai hayo aye rai ẹsikpobi. Yọ o rẹ whae ze nọ a gbẹ rọ gwọlọ ru oware ovo nọ o te kẹ ọzae hayo aye rai uye he. Ere ọvona re, ma te bi roro kpahe Jihova kẹse kẹse, ma te gwọlọ ru oware nọ o rẹ kẹe uye he.—Ol. 19:13, 14.

10. Ma tẹ be gbẹ daoma wuhrẹ kpahe uruemu Jihova, eme u ti noi ze?

¹⁰ Uwoho Jihova a rọ ma omai. Fikiere ma rẹ sai wo uruemu nọ o wo. (Emu. 1:26) Yọ ma tẹ be daoma wuhrẹ kpahe uruemu Jihova, ma te riẹ epanọ ma sae rọ rehọ aro kele iei. Jesu ọ ta nọ ahwo Farisi gbe ikere-obe na a je ru oware nọ Jihova ọ gwọlọ họ, keme a wo ọkpọ uruemu Ọghẹnẹ hẹ. Eware nọ i te oware ovo ho evaọ Uzi Mosis na, eye a je si kekeke. Rekọ Jesu ọ ta nọ a “gbabọkẹ eware nọ e mai wuzou evaọ Uzi na no, koyehọ, uvioziẹ gbe ohrọ gbe ọtẹruo.” (Mat. 23:23) Ma gwọlọ jọ wọhọ ahwo yena ha. Ma te bi roro kpahe izi Ọghẹnẹ gbe ehrẹ riẹ, ma rẹ daoma muẹrohọ oghẹrẹ uruemu nọ Jihova o wo nọ o lẹliẹ e riẹ kẹ izi hayo ehrẹ yena. Ma te bi ru ere, ma te daoma wo uruemu utioye na re.—1 Jọn 4:8, 11.

ẸVẸ MA SAE GBẸ RỌ RIẸ JIHOVA VI EPAỌ ANWẸDẸ?

11. Ono o wuhrẹ owhẹ kpahe Jihova?

¹¹ Ono o wuhrẹ owhẹ kpahe Jihova? Ẹsejọhọ ọsẹgboni ra ae a wuhrẹ owhẹ kpahe Jihova. Ẹsejọhọ a jẹ hai gbiku Ebaibol kẹ owhẹ. Yọ whọ jẹ jọ iku na wuhrẹ kpahe uruemu nọ Jihova o wo. O sae jẹ jọ nọ a je dhesẹ eware nọ Ọghẹnẹ ọ ma kẹ owhẹ. Yọ a jẹ rọ eware nọ ọ ma wuhrẹ owhẹ kpahe oghẹrẹ ohwo nọ Ọghẹnẹ ọ rrọ. O sae jẹ jọ nọ Osẹri Jihova jọ ọ ta usi uwoma kẹ owhẹ, whọ tẹ rọwo nọ o wuhrẹ owhẹ Ebaibol. Ẹsejọhọ obe Reawere Uzuazọ Bẹdẹ Bẹdẹ! na o je ro wuhrẹ owhẹ. Ọ jẹ rọ obe na hẹhẹ eme Ebaibol kẹ owhẹ yọ ẹsejọ wha jẹ ta kpahe eware nọ Ọghẹnẹ ọ ma. Enana kpobi i te fiobọhọ kẹ owhẹ riẹ oghẹrẹ nọ Jihova ọ rrọ.b (Neh. 8:8; Iruẹru 14:17) Obọnana ma te ta ẹme kpahe epanọ ma sae gbẹ rọ riẹ eware efa kpahe Jihova.

12-13. Ma te bi se Ebaibol jẹ romatotọ wuhrẹ iẹe, eme ma te riẹ? Kẹ oriruo oria Ebaibol jọ. (Jerimaya 39:15-18) (Rri uwoho nọ o rrọ uke Uwou-Eroro na re.)

¹² Oware ọsosuọ nọ u re fiobọhọ kẹ omai gbẹ riẹ Jihova họ, ma re se Ebaibol jẹ romatotọ wuhrẹ iẹe. Eria Ebaibol jọ e rẹ nwane fodẹ uruemu nọ Jihova o wo. (Ọny. 34:6, 7) Rekọ ẹsibuobu a rẹ jọ Ebaibol gbiku eware nọ ahwo jọ a ru. Ma te se iku yena je roro didi kpahe ae, o rẹ lẹliẹ omai riẹ eware jọ kpahe Jihova.

¹³ Joma ta ẹme kpahe oria Ebaibol jọ. Oye họ Jerimaya 38:6-13. A jọ etẹe gbiku ohwo Ẹtiopia jọ nọ a re se Ibẹd-mẹlẹk. Ọzae nana o siwi Jerimaya ọruẹaro na oke jọ. Who te se iku na, ẹsejọhọ obonọ iroro ra e te kaki kpohọ họ epanọ whọ sae rọ rehọ aro kele Ibẹd-mẹlẹk gudu, you inievo ukoko na je fiobọhọ kẹ ae. Rekọ who te rri iku na ziezi, whọ sae jariẹ muẹrohọ uruemu nọ Jihova o wo. (Se Jerimaya 39:15-18.) Who te rri oria Ebaibol yena, whọ rẹ ruẹ eme nọ i dhesẹ nọ Jihova o re muẹrohọ oware uwoma kpobi nọ ma bi ru, ọ rẹ raha ahwo owoma kugbe ahwo oyoma ha, yọ o re kienyẹ ohwo ho fiki ẹwho nọ o no ze. Eware efa e riẹ nọ whọ sae gbẹ jọ iku yena wuhrẹ kpahe uruemu Jihova. Oria Ebaibol kpobi nọ ma se, joma jariẹ muẹrohọ eware jọ nọ i dhesẹ uruemu nọ Jihova o wo. Ma ve yere iei je jiri ei fiki uruemu riẹ yena.

14. Re ma sae jọ eware nọ Ọghẹnẹ ọ ma wuhrẹ oware jọ, eme ma re ru?

¹⁴ Oware avọ ivẹ nọ u re fiobọhọ kẹ omai gbẹ riẹ Jihova họ, ma re roro didi kpahe eware nọ ọ ma. (Ol. 145:9, 10) Ma te bi rri eware nọ Ọghẹnẹ ọ ma ọvo, o rẹ lẹliẹ omai riẹe he. Ahwo jọ a rọ ikpe buobu wuhrẹ kpahe eware nọ Ọghẹnẹ ọ ma. Rekọ a jariẹ wuhrẹ oware ovo kpahe oghẹrẹ ohwo nọ Ọghẹnẹ ọ rrọ họ. Ejọ e rẹ tubẹ ta nọ Ọghẹnẹ ọ rrọ họ. Pọl ukọ na o kere nọ “dede nọ a rẹ ruẹ Ọghẹnẹ hẹ, no anwọ okenọ ọ rọ ma akpọ na ze ahwo a be sai wo otoriẹ oghẹrẹ nọ ọ rrọ, a be jọ eware nọ ọ ma ruẹ onana.” (Rom 1:20) A jọ Ebaibol jọ fa oria nana inọ a rẹ jọ eware nọ Ọghẹnẹ ọ ma ruẹ oghẹrẹ nọ ọ rrọ keme “ohwo nọ o re roro oware ọ rẹ ruẹ e riẹ.” Onana u dhesẹ nọ ma te rri eware nọ Ọghẹnẹ ọ ma no, ma re je roro kpahe ae. Ma vẹ te riẹ oghẹrẹ ohwo nọ Ọghẹnẹ ọ rrọ.

15. Eme Patrick o ru nọ u fiobọhọ kẹe wuhrẹ oware jọ kpahe Jihova, kọ eme whẹ omara whọ rẹ sai ru re? (Rri uwoho na re.)

¹⁵ Ewho nọ i rovie aro gaga mai ahwo buobu ma be rria. A bọ eria kpobi di no. Whọ rẹ kake ruẹ eware nọ Ọghẹnẹ ọ ma ha. Whọ tẹ be rria oria utioye, eme who re ru re whọ ruẹ eware nọ Ọghẹnẹ ọ ma je wuhrẹ no ae ze? Oniọvo jọ nọ a re se Patrick ọ be rria okpẹwho jọ nọ a re se Brazzaville evaọ obọ Republic of the Congo. Oniọvo na ọ ta nọ: “Mẹ rẹ jọ ogebara mẹ muẹrohọ eware nọ Ọghẹnẹ ọ ma. Ẹsibuobu mẹ rẹ ruẹ emera esese hayo emevra nọ e be gwọlọ oware nọ a rẹ re hayo nọ e be bọ uwou. Ẹdẹ jọ me je rri emevra jọ nọ e be bọ uwou. Oria mai na a jo si eware nọ a rọ bọ uwou na. A nabe bọe kẹtiẹ ziezi nọ a rẹ sa emọ fihọ.” Oniọvo na o te roro didi kpahe Jihova Ọghẹnẹ nọ ọ ma emevra na. Ọ ta nọ: “Eware nọ mẹ ruẹ na e lẹliẹ omẹ riẹ nọ Jihova ọ rẹ rẹrote eware nọ ọ ma kpobi, makọ emevra hayo emera nọ e kawo gaga. Onana o lẹliẹ omẹ ruẹ nọ Jihova o bi muẹrohọ omẹ re, yọ o ti fiobọhọ kẹ omẹ wo emu gbe eware efa nọ mẹ gwọlọ.”

16. Eme Meri oni Jesu o ru nọ u fiobọhọ kẹe riẹ Jihova vi epaọ ọsosuọ, kọ ẹvẹ ma sae rọ rehọ aro kele iei? (Rri uwoho na re.)

¹⁶ Oware avọ esa nọ u re fiobọhọ kẹ omai gbẹ riẹ Jihova họ, ma te bi roro kpahe eware nọ Jihova o ru kẹ omai no. Meri oni Jesu ọ jẹ hai ru ere. Meri yọ ohwo nọ ọ riẹ Jihova ziezi no vẹre, o te je “wo aruoriwo evaọ aro Ọghẹnẹ.” (Luk 1:30) Jihova ọ kẹ Meri iruo jọ nọ i wuzou gaga. Ọ vuẹ riẹ nọ ọye o bi ti yẹ Ọmọ riẹ. Jihova o ru nọ ukọ-odhiwu nọ a re se Gebriẹl gbe omoni Meri nọ a re se Ẹlizabẹt a rọ tuduhọ Meri awọ. Nọ Meri o roro kpahe eware nana kpobi, ọ tẹ ruẹ nọ Jihova o wo ogaga ulogbo, o wo ohrọ-oriọ, o re kienyẹ ohwo ọvo ho, yọ o re muẹrohọ ahwo nọ a rri vo. (Luk 1:46-55) Oware nọ Jihova o ru kẹ Meri o da riẹ ẹro fia. Mai omamai, nọ Jihova o te ru oware jọ kẹ omai “evaọ ẹruoke,” o rẹ were omai gaga. (Hib. 4:16) Fikiere nọ Jihova o te ru oware jọ kẹ owhẹ, nọ omara nọ: ‘Eme oware nana nọ u te omẹ obọ na u dhesẹ kpahe oghẹrẹ ohwo nọ Jihova ọ rrọ?’

MA TI WUHRẸ KPAHE JIHOVA BẸDẸ BẸDẸ

17-18. Fikieme ma rọ ta nọ ma sae riẹ eware kpobi kpahe Jihova ha?

¹⁷ Ma tẹ ruọ akpọ ọkpokpọ na no, ma te gbẹ riẹ eware buobu kpahe Jihova. Oke yena a te kẹ omai iko-ebe ekpokpọ nọ a ti ro wuhrẹ omai eware nọ Ọghẹnẹ ọ gwọlọ nọ ma ru. (Evia. 20:12) Oke yena ma te sai go kẹle eware nọ Ọghẹnẹ ọ ma ziezi je wuhrẹ eware buobu no ai ze. (Aiz. 11:6-9) Eware efa nọ e te via e te lẹliẹ omai riẹ Ọsẹ obọ odhiwu mai na ziezi. Eware wọhọ ahwo mai nọ a te kpare ze, gbe oghẹrẹ nọ uzioraha u ti ro no omai oma kẹdẹ kẹdẹ bẹsenọ ma re zihe ruọ ahwo ọgbagba no.

¹⁸ Ma te sae riẹ eware kpobi kpahe Jihova ha. A rẹ sai kele ikpe nọ ọ rria no ho, fikiere “otoriẹ riẹ u diwi thesiwa.” (Ol. 90:2; 147:5) Ma “rẹ sae kiẹ iruo nọ Ọghẹnẹ uzẹme na o ru no emuhọ te ekuhọ via vievie he.” (Ọtausi. 3:11) Fikiere o tẹ make rọnọ ma rrọ ukoko na kri no, joma gbẹ daoma riẹ eware efa kpahe Ọsẹ oyoyou mai na, Jihova.