AZIE 28–AKPE 4, 2026
OLE AVỌ 79 Wuhrẹ Ai re A Dikihẹ Ga
Fiobọhọ kẹ Amọfa re A Riẹ Jihova
“Re a wo uzuazọ ebẹdẹ bẹdẹ, o gwọlọ nọ a rẹ riẹ owhẹ, Ọghẹnẹ uzẹme ọvo na.”—JỌN 17:3.
OWARE NỌ A JARIẸ TA KPAHE
Epanọ ma sai ro ru re ahwo nọ ma bi wuhrẹ Ebaibol a riẹ Jihova, re a riẹ uruemu nọ o wo, eware nọ e rẹ were iẹe gbe enọ e rẹ dhae eva.
1. Ohwo nọ who bi wuhrẹ Ebaibol o te mu Jihova họ ẹgọ, ẹvẹ eva ra e rẹ jọ?
OTẸRỌNỌ ohwo nọ who bi wuhrẹ Ebaibol ọ ziọ ewuhrẹ evaọ ẹdẹ ọsosuọ, eva e rẹ were owhẹ? Kọ otẹrọnọ o mu iyo họ ẹkẹ no, o mu usi uwoma họ no, u te ti te epanọ ọ rọ họ-ame no dede, ẹvẹ obeva ra o rẹ jọ oke yena? Eva ọvo e rẹ were owhẹ. Ma re yere Jihova gaga keme o gbẹ rrọ ọye he, ohwo nọ ma bi wuhrẹ ọ sai kurẹriẹ hẹ.—1 Kọr. 3:5-9; 3 Jọn 3, 4.
2. Eme họ oreva Jihova kpahe ahwo nọ ma bi wuhrẹ Ebaibol? (1 Timoti 2:3, 4)
2 Oreva Jihova họ re “oghẹrẹ ahwo kpobi a wo esiwo je wo eriariẹ egbagba uzẹme na.” (Se 1 Timoti 2:3, 4.) Jihova ọ gwọlọ nọ ahwo kpobi a riẹe ziezi, a vẹ jẹ riẹ eware nọ o ru no gbe enọ o ti ru. (Jeri. 9:24) Eware yena nọ a rẹ riẹ họ eriariẹ egbagba na. Ẹme nọ a fa “eriariẹ egbagba” na, orọnikọ u dhesẹ eware jọ nọ ohwo ọ rẹ riẹ fihọ uzou ọvo ho. Ọzae jọ nọ o wuhrẹ kpahe eme Ebaibol gaga ọ ta nọ ẹme na o dhesẹ nọ eware nọ ohwo na ọ riẹ na “i re nwene uzuazọ riẹ.” Nọ ohwo nọ ma bi wuhrẹ Ebaibol ọ tẹ riẹ Jihova, eware nọ ọ riẹ na i re nwene uzuazọ riẹ. O vẹ te whae ze nọ o re ro wo ẹruore “uzuazọ ebẹdẹ bẹdẹ.”—Jọn 17:3.
3. Eme ma te ta kpahe evaọ uzoẹme nana?
3 Uvẹ nọ Jihova ọ kẹ omai nọ ma wuhrẹ ahwo re a riẹe na o rro kẹhẹ! Ma te jọ uzoẹme nana kẹ iyo enọ nana: Fikieme u je wuzou re ahwo nọ ma bi wuhrẹ Ebaibol a riẹ Jihova ziezi? Ẹvẹ ma sai ro wuhrẹ ai re a riẹ oghẹrẹ ohwo nọ Jihova ọ rrọ? Ẹvẹ ma sai ro fiobọhọ kẹ ae re a rehọ eware nọ a riẹ kpahe Jihova no ro yeri uzuazọ rai?
WUHRẸ IẸE OGHẸRẸ NỌ Ọ RẸ RỌ RIẸ JIHOVA ZIEZI
4. Ma te rri Mak 12:30, eme o rẹ mae jọ omai oja nọ ma te bi wuhrẹ ohwo Ebaibol?
4 Jesu ọ ta nọ uzi nọ o mae rro họ re ohwo ọ rehọ udu riẹ kpobi gbe uzuazọ riẹ kpobi gbe iroro riẹ kpobi gbe ẹgba riẹ kpobi you Jihova. (Se Mak 12:30.) Ohwo nọ ma bi wuhrẹ Ebaibol ọ gbẹ riẹ oghẹrẹ ohwo nọ Jihova ọ rrọ họ, ọ sai you rie he. Ma gwọlọ nọ ohwo nọ ma bi wuhrẹ Ebaibol ọ rehọ uzuazọ riẹ kẹ Jihova fikinọ o you rie, orọnọ fikinọ ọ gwọlọ ru eva were omai hi. Yọ ma gwọlọ nọ o kurẹriẹ ze fikinọ ukoko na hayo eware nọ o bi wuhrẹ e were riẹ ọvo ho. Fikiere oware nọ ma rẹ thuẹhọ nọ ma te bi wuhrẹ ohwo họ, epanọ ohwo na ọ rẹ rọ riẹ Jihova je you rie.
5. Nọ ohwo nọ who bi wuhrẹ o te you Jihova, eme ọ te gwọlọ nọ o re ru?
5 Ohwo o te you ohwo, ọ rẹ gwọlọ ru oware nọ ohwo na ọ ta. Nọ ohwo nọ who bi wuhrẹ ọ tẹ riẹ Jihova je you rie, ọ te gwọlọ ru oware nọ ọ ta. Jesu ọ ta nọ: “Re akpọ na ọ riẹ nọ me you Ọsẹ na, me bi ru epanọ Ọsẹ na o jie uzi kẹ omẹ nọ me ru dẹẹ.” (Jọn 14:31) Oware nọ o rẹ mae lẹliẹ ohwo ru oware nọ Jihova ọ ta jẹ gọe ghelọ ebẹbẹ nọ i bi tei họ, nọ o te you Jihova.—1 Jọn 5:3.
6. Eme ohwo nọ ma bi wuhrẹ o re ru re ọ sae riẹ Jihova ziezi, kinọ ọ tẹ riẹe ziezi no, eme ọ te gwọlọ ru? Kẹ oriruo.
6 Re ohwo nọ ma bi wuhrẹ ọ sae riẹ Jihova ziezi, o re ru eware nọ o bi wuhrẹ na. O te bi ru ere, ẹsiẹe ọ te mai jiroro nọ i kiehọ. Joma kẹ oriruo jọ. Nọ ohwo nọ o bi wuhrẹ omoto, ọ tẹ jọ obe se kpahe epanọ a rẹ dhẹ omoto, nọ o je kere ẹdawọ no ọvo, kọ ọ rẹ riẹ epanọ a rẹ dhẹ omoto? Ijo. Ọ rẹ hae ruọ eva omoto na, jẹ rehọ euwa buobu dhẹe. Ẹdhẹdhẹ na, yọ ọ be riẹ oghẹrẹ nọ omoto na o re ru nọ ọ tẹ kpọe oghẹrẹ jọ, hayo nọ edhere na ọ tẹ rrọ oghẹrẹ jọ. Ere re, nọ ma te bi wuhrẹ ohwo Ebaibol, ọ rẹ riẹ eware jọ kpahe Jihova. Rekọ nọ ohwo na o te bi ru eware nọ o bi wuhrẹ na, ọ jẹ be ruẹ ewoma nọ o bi noi ze, ọ rẹ riẹ Jihova viere. Yọ nọ ọ be riẹ eware efa kpahe Jihova, jẹ ruẹ oghẹrẹ nọ Ọsẹ obọ odhiwu riẹ o bi ro fiobọhọ kẹe na, ọ vẹ te gwọlọ nọ oware nọ o rẹ were Jihova ọvo o re ru.
7. Fikinọ Josẹf ọ riẹ Jihova ziezi, eme o ru?
7 Fikinọ Josẹf ọ riẹ Jihova ziezi, okenọ aye Pọtifa ọ jẹ lẹliẹe, o kie kẹe he. O wọhọ nọ okenọ Josẹf ọ jọ ọmaha, a gbiku Adamu avọ Ivi gbe Abraham avọ Sera kẹe. (Emu. 2:24; 20:3, 6) U te ru nọ ọ rọ riẹ nọ ọzae-avọ-aye ọvo Jihova ọ kuvẹ nọ a rẹ wezẹ kugbe. Fikinọ Josẹf ọ riẹ Jihova gaga no, okenọ aye Pọtifa ọ jẹ lẹliẹe, ọ ta kẹe nọ: “Ẹvẹ me re ro ru oware uyoma ulogbo nana re mẹ ginẹ raha uzi Ọghẹnẹ?” (Emu. 39:7-9) Ẹme nọ ọ ta na o dhesẹ nọ ọ riẹ oware nọ o rẹ were Jihova gbe oware nọ o rẹ dhae eva. O tẹ so ẹe ze nọ o ro ru oware nọ ọ riẹ nọ o te were Jihova. Oriruo riẹ u wuhrẹ omai nọ ma te wuhrẹ ohwo re ọ riẹ Jihova ziezi, ọ te gwọlọ ru oware nọ o rẹ were Jihova.
WUHRẸ IẸE OGHẸRẸ OHWO NỌ JIHOVA Ọ RRỌ
8. Oghẹrẹ vẹ whọ rẹ rọ rehọ obe Reawere Uzuazọ Bẹdẹ Bẹdẹ! na wuhrẹ ohwo re ọ riẹ Jihova?
8 Ẹvẹ whọ sai ro wuhrẹ ohwo re ọ riẹ oghẹrẹ ohwo nọ Jihova ọ rrọ? Jihova ọ nọ Job enọ nọ i bu vrẹ udhuvẹ-gbikpe (50) soso nọ i fiobọhọ kẹe riẹ eware jọ nọ ọ riẹ kpahe Jihova vẹre he. (Job 38:1–41:34) Ere u fo nọ ma rẹ nọ ahwo nọ ma bi wuhrẹ enọ re. Enọ buobu e rrọ obe Reawere Uzuazọ Bẹdẹ Bẹdẹ! na. Yọ i re fiobọhọ kẹ ohwo nọ ma bi wuhrẹ riẹ oghẹrẹ ohwo nọ Jihova ọ rrọ ẹmẹrera. (Rri ẹkpẹti na “Enọ nọ A rẹ Nọ Ohwo nọ A bi Wuhrẹ.”) Fikiere rehọ ae fiobọhọ kẹ ohwo na riẹ Jihova ziezi.
9-10. (a) Eme ahwo nọ ma bi wuhrẹ Ebaibol a re ru re a sai wo erere no isase Ebaibol rai ze ziezi? (Jemis 5:11) (b) Rehọ iku Ebaibol jọ kẹ oriruo epanọ oria nọ ma bi se o sai ro fiobọhọ kẹ omai riẹ oware nọ o rẹ were Jihova gbe oware nọ o rẹ dhae eva.
9 Nọ ma tẹ nwani mu ohwo họ ewuhrẹ no, joma ta kẹe nọ ọ hai se Ebaibol kẹ omariẹ kẹdẹ kẹdẹ.a Eme ma rẹ vuẹe inọ o ru re ọ sai wo erere no isase na ze ziezi? Ma sae vuẹe nọ o te bi se oria jọ evaọ Ebaibol, jọ ọ hae nọ omariẹ nọ, ‘Emejabọ Jihova o ro kere oware nana fihọ Ebaibol, kọ eme u wuhrẹ omẹ kpahe oghẹrẹ ohwo nọ Jihova ọ rrọ?’ Nọ Jemis olele Jesu ọ jẹ ta kpahe iku Job, o dhesẹ oware nọ ma rẹ sai wuhrẹ no iku na ze. Ọ ta nọ Job o thihakọ. Yọ emamọ oware jọ nọ ma rẹ sai wuhrẹ mi ei. Rekọ ọ jọ etẹe kuhọ họ, ọ ta nọ iku Job i wuhrẹ omai nọ Jihova ọ rrọ yoyou gaga, o te je wo ohrọ-oriọ.—Se Jemis 5:11.
10 Joma fiobọhọ kẹ ahwo nọ ma bi wuhrẹ riẹ oghẹrẹ nọ a sae rọ jọ oria Ebaibol kpobi nọ a bi se wuhrẹ oware nọ o rẹ were Jihova gbe oware nọ o rẹ dhae eva. Ma rehọ iẹe nọ ohwo nọ ma bi wuhrẹ ọ vuẹ omai nọ o rri oria nọ uzoẹme riẹ o ta nọ “Mu Ebaibol na Họ Ese” nọ o rrọ obe Reawere Uzuazọ Bẹdẹ Bẹdẹ! na. Ọ tẹ ta nọ o re se iku epanọ a ro gbolo Daniẹl fihọ ọgọdọ ikpohrokpo. Ma sae vuẹe nọ, nọ o ti se na, jọ ọ hai roro kpahe enọ wọhọ: ‘Fikieme Jihova o ro siwi Daniẹl? Kọ eme mẹ jọ iku na ruẹ inọ ohwo o re ru nọ o rẹ were Jihova?’ (Dan. 6:10, 22) Ọ sae jẹ nọ omariẹ nọ: ‘Eme ọ via kẹ ahwo nọ a gba ẹgwae omuomu kpahe Daniẹl na? Kọ eme oware nọ Jihova o ru rai u dhesẹ kpahe eware nọ e rẹ dhae eva?’ (Dan. 6:4, 5, 24) U te no eware nana no, ọ sai gbe rri iku na ziezi re o wuhrẹ eware efa kpahe Jihova.—Dan. 6:26, 27.
11. Eme whọ rẹ ta kẹ ohwo nọ who bi wuhrẹ Ebaibol re ọ riẹ uzedhe ohwo nọ o wo eme nọ who bi wuhrẹ iẹe na?
11 Nọ ohwo nọ ma bi wuhrẹ ọ tẹ ta nọ eware nọ ma jọ Ebaibol wuhrẹ iẹe e were riẹ gaga, eva e rẹ were omai. Rekọ ma rẹ kareghẹhọ iẹe nọ Jihova Ọghẹnẹ nọ ọ rrọ Owuhrẹ Ologbo Oride na, ọye o bi wuhrẹ iẹe eware na kpobi na. (Aiz. 30:20, 21) Ẹsejọhọ ohwo na o ti yere omai rọkẹ epanọ ma bi ro wuhrẹ iẹe eware itieye na. Ọ sai jiri omai nọ ma ginẹ riẹ epanọ a re wuhrẹ ohwo. Ma riẹ nọ o thọ họ re o yere omai. Rekọ ma re ru re ọ riẹ nọ Jihova u fo nọ ma re jiri.
WUHRẸ IẸE RE O RU LELE EWARE NỌ Ọ RIẸ KPAHE JIHOVA NO
12-13. Nọ ohwo nọ ma bi wuhrẹ o te se iku Ebaibol jọ nọ i gbe rie unu, fikieme u je fo re ọ kareghẹhọ eware nọ ọ riẹ kpahe Jihova no vẹre? (Rri uwoho na re.)
12 Nọ ohwo nọ ma bi wuhrẹ o te wo eriariẹ egbagba no ọvo, u te he. O re je ru lele eware nọ ọ riẹ no na. Kọ ẹvẹ ma sai ro fiobọhọ kẹe re o ru lele ai? Orọ ọsosuọ, ma rẹ vuẹe nọ o te se iku Ebaibol jọ nọ i gbe rie unu, jọ ọ kareghẹhọ eware nọ ọ riẹ kpahe Jihova no. Ma rehọ iẹe nọ o se kpahe ahwo nọ Jihova o kpe. O te bi roro nọ, ‘Fikieme Jihova o ro kpe ahwo nana kpakiyọ ọ kẹ ahwo otiọnana uvẹ?’ Ẹvẹ whọ sai ro fiobọhọ kẹe re o roro ẹme na te?
13 Whọ sae ta kẹe nọ jọ o roro kpahe eware nọ ọ riẹ kpahe Jihova no vẹre. Kọ Jihova o rri uzuazọ ohwo-akpọ kuẹku? (2 Pita 3:9) Kọ Ọmọvo riẹ nọ o vi ze ti whu kẹ omai erahaizi na u gbe dhesẹ nọ uzuazọ ohwo-akpọ o ghare riẹ obọ gaga? (Ẹf. 2:4, 5) Kọ Jihova o re mu ahwo kpe? Kọ ohwo nọ u gine fo nọ o re whu, ọ rẹ nyase iẹe ba? (Ọny. 34:6, 7) Ẹsejọ whọ rẹ nwane jọ oria Ebaibol nọ who se na ruẹ oware nọ o wha riẹ ze nọ Jihova o ro ru oware nọ o ru na ha. Yọ u du gwọlọ nọ Jihova ọ rẹ vuẹ omai eware na kpobi taure ma tẹ te riẹ nọ ọ riẹ ru hu. Ma riẹ nọ Ọghẹnẹ mai na o re ru thọ họ.
Vuẹ ohwo nọ who bi wuhrẹ Ebaibol re ọ hae kareghẹhọ oware nọ ọ riẹ kpahe Jihova no, nọ o te se iku jọ evaọ Ebaibol na nọ i gbe rie unu (Rri edhe-ẹme avọ 12-13)
14. Otẹrọnọ ohwo nọ ma bi wuhrẹ ọ ta nọ oghẹrẹ nọ oniọvo jọ o bi ru o were riẹ hẹ, ẹvẹ whọ sai ro fiobọhọ kẹe?
14 Joma ta kpahe oghẹrẹ ofa nọ ma re ro fiobọhọ kẹ ohwo nọ ma bi wuhrẹ re o ru lele eware nọ o bi wuhrẹ na. Otẹrọnọ o mu ewuhrẹ họ ẹnyaze no, rekọ ọ be ta nọ oghẹrẹ nọ oniọvo jọ o bi ru o were riẹ hẹ, ẹvẹ whọ sai ro fiobọhọ kẹe? O sae jọ nọ oniọvo na o ru rie oware jọ nọ o kẹ riẹ uye. Vuẹe nọ jọ o roro kpahe oghẹrẹ nọ Jihova o rri inievo na. Whọ sae nọe nọ, ‘Eme Jihova o siobọno nọ u dhesẹ nọ o you inievo na gaga? (Jọn 3:16) Kọ who gbe roro nọ o riẹe oja gaga re ma riẹ yeri kugbe ohwohwo evaọ ukoko na? (Ol. 133:1) Ẹvẹ Jihova o re rri omai nọ ma tẹ be daoma riẹ yeri kugbe inievo na?’ (2 Kọr. 13:11) Fiobọhọ kẹ ohwo nọ who bi wuhrẹ na riẹ nọ eva e rẹ were Jihova gaga nọ ma te bi rri eware iwoma nọ inievo na a bi ru, jẹ be kpairoro vrẹ iruthọ rai.
15-16. (a) Otẹrọnọ ohwo nọ ma bi wuhrẹ ọ gwọlọ ru oware jọ, yọ iroro na e be bẹe ẹjẹ, ẹvẹ ọ sae rọ rehọ aro kele Jesu? (Jọn 8:29) (b) Ẹvẹ Sista Marianne o ro fiobọhọ kẹ ohwo nọ o bi wuhrẹ riẹ oware nọ u fo nọ o re ru? (Rri uwoho na re.)
15 Edhere ọfa nọ whọ sai ro fiobọhọ kẹ ohwo nọ who bi wuhrẹ re o ru lele oware nọ ọ riẹ kpahe Jihova no họ, ọ tẹ gwọlọ ru oware jọ, vuẹe nọ jọ o roro kpahe oware nọ o te were Jihova. Whọ sai dhesẹ uwuhrẹ avọ 35 evaọ obe Reawere Uzuazọ Bẹdẹ Bẹdẹ! na kẹe. Uzoẹme riẹ họ “Epanọ Ma Sae rọ Jẹ Emamọ Iroro.” Kọ otẹrọnọ ohwo na ọ lẹ kpahe ẹme na no, yọ ọ jọ Ebaibol gbe ebe ukoko na kiẹ kpahe iẹe no, rekọ ọ riẹ oware nọ o re ru ghele he, eme whọ rẹ ta kẹe? Ẹsejọhọ ọ ruẹ ehrẹ Ebaibol buobu nọ i kiekpahe oware na, yọ ọ riẹ onọ o re lele he. Whọ sae ta kẹe nọ jọ o roro kpahe Jesu. Eme o jẹ hae jọ Jesu oja evaọ oware kpobi nọ o bi ru? Jesu ọ ta nọ: “Ẹsikpobi me bi ru eware nọ e rẹ were [Ọsẹ mẹ].” (Se Jọn 8:29.) Ta kẹe nọ jọ ọ nọ omariẹ nọ, ‘Me te rri eware nọ mẹ kiẹ ku na kpobi gbe eware nọ mẹ riẹ kpahe Jihova no, eme mẹ riẹ nọ o te were Jihova evaọ ẹme nana?’ Ọ tẹ sai ru oware nọ o rẹ were Jihova, koyehọ ọ riẹ iroro na jẹ.
16 Oniọvo-ọmọtẹ mai jọ nọ a re se Marianne o je wuhrẹ aye jọ Ebaibol evaọ obọ Chile. Aye na o wo ẹbẹbẹ jọ. Aye na ọ jẹ gwọlọ iruo. Ọ tẹ ruẹ iruo jọ nọ a te jọ hwae osa pẹhẹ. Rekọ iruo na e te kẹe uvẹ kpohọ ewuhrẹ ziezi hi. Imoni riẹ a tẹ be ta kẹe nọ jọ ọ rehọ iruo na. Sista Marianne ọ ta nọ: “Mẹ ta kẹe nọ jọ o roro kpahe oware nọ o te were Jihova. Kọ ọ tẹ rehọ iruo na o te were Jihova? Mẹ ta kẹe re nọ jọ ọ lẹ kpahe ẹme na, re o je muẹrohọ oghẹrẹ nọ Jihova o ti ro yo olẹ na. Ukuhọ riẹ ọ gbẹ rehọ iruo na ha. U kri hi, ọ tẹ ruẹ iruo efa nọ e te kẹe uvẹ kpohọ ewuhrẹ ziezi.” Muẹrohọ oware nọ Marianne o ru na. Ọ vuẹ aye na oware nọ o re ru hu. Ọ vuẹe ọvo nọ jọ o roro kpahe oware nọ o te were Jihova. Oware na u ru nọ aye na ọ rọ kẹle Marianne gaga, yọ maero na, u ru nọ usu riẹ avọ Jihova o rọ ga vi epaọ anwẹdẹ. Sista Marianne ọ ta nọ: “Aye na ọ ruẹ nọ ohwo ọ tẹ rọ egagọ Jihova karo no, Jihova o re fi ei hotọ họ.”
Fiobọhọ kẹ ohwo nọ who bi wuhrẹ Ebaibol riẹ epanọ ọ sai ro ru oware nọ o rẹ were Jihova (Rri edhe-ẹme avọ 15-16)b
IRERE NỌ I RE TE ENỌ E RIẸ JIHOVA ZIEZI
17. U te no eware nọ i wuzou nọ ma re wuhrẹ ohwo no, eme ọfa ma re ru?
17 Ma te bi wuhrẹ ahwo Ebaibol, o rẹ lẹliẹ ae riẹ eware buobu nọ i wuzou. Eware wọhọ oghẹrẹ nọ ahwo nọ a whu no a rrọ, ẹtanigbo na, gbe Uvie Ọghẹnẹ. A rẹ jẹ riẹ oghẹrẹ nọ ma re ru ewuhrẹ, iruo nọ ekpako na gbe Utu Ẹruorote na a bi ru, gbe eware efa evaọ ukoko na. Rekọ orọnọ a tẹ riẹ eware itieye na no yọ u re no ho. Ma re fiobọhọ kẹ ae re a riẹ Jihova ziezi.
18. Irere vẹ i ti te ahwo nọ a riẹ Jihova?
18 Ọghọ riẹ ọ rro kẹhẹ nọ Jihova ọ rọ kẹ omai uvẹ inọ ma wuhrẹ ahwo re a riẹ ọyomariẹ! Ma be ta ẹme na, eva e be were ahwo nọ a riẹ Jihova jẹ be gọe fikinọ a bi yeri emamọ uzuazọ. (Ol. 25:12-15) Evaọ obaro, ahwo kpobi nọ a wo “eriariẹ Ọghẹnẹ uzẹme na” a te rria bẹdẹ bẹdẹ. (1 Jọn 5:20) O jọ etẹe kuhọ họ, Ebaibol ọ ta nọ ahwo nọ a riẹ Jihova je you rie, Jihova ‘ọ riẹ rai re.’ (1 Kọr. 8:3) Onana u dhesẹ nọ Jihova Ọghẹnẹ nọ ọ mai kpehru na ọ riẹ omai kpobi na ọvuọvo, yọ ọ rehọ omai wọhọ egbẹnyusu riẹ. Oghale riẹ o rro kẹhẹ re a riẹ Ọghẹnẹ uzẹme na!
OLE AVỌ 84 Fiobọhọ Evaọ Oria nọ Ẹgwọlọ Ọ Mae Rrọ
a Utee nọ a ta nọ ohwo nọ a bi wuhrẹ na o fihọ evaọ uwuhrẹ avọ 05 evaọ obe Reawere Uzuazọ Bẹdẹ Bẹdẹ! na họ: “Mu Ebaibol na họ ese kẹse kẹse, hai rri echate ‘Mu Ebaibol na Họ Ese ro ru ei.’”
b UWOHO NA: Uwoho nọ a bi ro dhesẹ epanọ ohwo nọ Sista Marianne o je wuhrẹ Ebaibol ọ rọ siọ iruo nọ a je fi ei họ.