Eme nọ E Rrọ Obe Aizaya E rẹ Sasa Ohwo Oma

1-2. Eme Jihova o re ru nọ eva e gbẹ be were omai hi?

DAE rehọ iẹe nọ ọmọ jọ ọ be viẹ whrowhrowhro fiki oware jọ. Ẹsejọhọ oware nọ u bi fou rie oviẹ na họ ọye avọ ọsẹgboni riẹ a be kwa kpohọ oria ofa siọ egbẹnyusu riẹ ba no. Hayo ẹsejọhọ o ru oware jọ nọ o da riẹ gaga. Kọ eme oni ọmọ na o re ru nọ o te gine you ọmọ na? Ọ rẹ nabe wọ ọmọ na, ọ vẹ nọe oware nọ o be kẹe uye jẹ gaviezọ kẹe, ọ vẹ ta ẹme nọ u re ru udu ọmọ na dhẹ re ọ riẹ nọ oni riẹ o you rie.

² Jihova ọ jọ Ebaibol ta nọ ọyomariẹ ọ wọhọ oni nọ o you ọmọ riẹ nọ ọ rẹ ta ẹme nọ ọ rẹ sasa iẹe oma kẹe. Jihova ọ ta nọ: “Wọhọ epanọ oni ọ rẹ sasa ọmọzae riẹ oma na, ere mẹ te gbẹ sasa owhai oma.” (Aiz. 66:13) Oghẹrẹ nọ Jihova o you omai te, ọsẹ hayo oni ọvuọvo nọ ọ rẹ sai you ọmọ riẹ te ere, ọ riẹ hẹ. (Aiz. 49:15) Ma tẹ rrọ ọkọkora hayo ma te wo ẹbẹbẹ ọfa jọ, Jihova ọ rẹ rọ eme nọ e rrọ Ebaibol na sasa omai oma, ma ve wo ẹgba.—Rom 15:4.

3. Eme ma te ta kpahe evaọ uzoẹme nana?

³ Who te se obe Aizaya, whọ rẹ ruẹ emamọ eme buobu nọ e rẹ sasa omai oma nọ Jihova ọ ta. (Aiz. 40:1) Okenọ a ro kere obe Aizaya na, eware e tahaku evaọ ofẹ Izrẹl nọ a re se Juda. Fikiere Jihova Ọsẹ oyoyou mai na o te ru nọ a ro kere obe Aizaya na re ọ rehọ eme riẹ sasa ahwo riẹ nọ e jẹ rria ofẹ yena oma. Nẹnẹ na ma gwọlọ eme itieye na nọ i re kru omai udu ga re keme ma be rria “oke obẹbẹ nọ o rẹ bẹ ẹria.” (2 Tim. 3:1) Fikiere ma te jọ uzoẹme nana wuhrẹ epanọ eme jọ nọ e rrọ obe Aizaya e sai ro kru omai udu ga nọ eware i te nwene kẹ omai idudhe, nọ udu u te bi brukpe omai vrẹta, gbe okenọ ohwo o te whu ku omai.

NỌ EWARE I TE NWENE KẸ OMAI IDUDHE

4. Eme ọ rẹ via nọ eware i te nwene idudhe?

⁴ Eware nọ ma rẹro rai hi e sae via kẹ omai idudhe. (Ọtausi. 9:11; 1 Kọr. 7:31) Ẹyao ọ sai kru ohwo, ohwo nọ ugho o jọ obọ vẹre ọ sai zihe ruọ oyogbe, oria nọ ma be rria o sai duwuku fiki ẹme isuẹsu, hayo a sai mi omai iruo nọ ma bi ru evaọ ukoko na. Eware e tẹ nya ere kẹ omai, o sae lẹliẹ omai jọ awawa. Ẹsejọ ma rẹ gbẹ tubẹ riẹ oware nọ ma re ru dede he. O rẹ via ere. Nọ oniọvo-ọmọzae jọ nọ a re se Joseph ọ jọ Ebẹtẹle ru iruo te enwenọ ikpe ikpegbihrẹ (17) no, a tẹ vuẹe nọ o kpo. Ọ ta nọ: “Mẹ gbẹ riẹ oware nọ me re ru hu. Me kri Ebẹtẹle no, fikiere mẹ jẹ ruawa epanọ mẹ te sae rọ wariẹ mu akpọ họ evaọ obọ otafe.” Kinọ eware i te nwene kẹ omai idudhe ere, eme vẹ e rrọ obe Aizaya nọ i dhesẹ nọ Jihova ọ te siọ omai ba ha?

5. Eme Jihova ọ ta nọ o ti ru kẹ omai evaọ obe Aizaya 42:16? (Rri uwoho na re.)

⁵ Se Aizaya 42:16. Jihova ọ jọ oria Ebaibol yena ta nọ, ahwo nọ a wọhọ ahwo nọ i tuaro, o ti su ai nya idhere nọ a riẹ kpahe he. Yọ ọ ta nọ o ti zihe ebi ruọ elo. Kọ who muẹrohọ eme jọ evaọ oria Ebaibol yena? Eme wọhọ “ituaro,” “idhere nọ a riẹ kpahe he,” “ebi,” “otọ nọ o rrọ kothi kothi.” Eme yena e sai dhesẹ oghẹrẹ nọ ma re rri eware na kpobi nọ eware i te nwene idudhe kẹ omai. O rẹ wọhọ ẹsenọ ma be nya igbrẹwọ jọ vrẹ, yọ ma riẹ oghẹrẹ nọ edhere nọ ma be nya na ọ rrọ evaọ obaro ho. Rekọ Jihova ọ be vuẹ omai nọ oghẹrẹ kpobi nọ eware e rrọ kẹhẹ, o ti dhesẹ edhere kẹ omai, yọ ọ te siọ omai ba ha. O tẹ make wọhọ ẹsenọ ma rrọ ebi, o ti ru nọ elo ọ te rọ jọ edhere mai, o ve ti kru omai obọ nya. Yọ eware e tẹ ga kẹ omai wọhọ ẹsenọ ma be nya edhere nọ ọ rrọ kothi kothi, Jihova o ti ru edhere na fihọ riẹriẹriẹ. Kọ oghẹrẹ vẹ Jihova o re ro ru eware nana kẹ omai? Ọ rẹ rọ Ebaibol gbe ukoko riẹ vuẹ omai oware nọ u fo nọ ma re ru. (Ol. 119:105; Aiz. 30:21) Ọ rẹ jẹ rọ inievo mai gbe amọfa fiobọhọ kẹ omai. Fikiere nọ eware i te nwene kẹ omai, nọ ma tẹ be ruawa oghẹrẹ nọ eware e te jọ, joma rẹroso Jihova inọ o ti dhesẹ edhere kẹ omai. Ọ riẹ epanọ eware e rrọ kẹ omai yọ o you omai.—Aiz. 41:10; 1 Pita 5:6, 7.

6. Eme ma riẹ nọ Jihova o ti ru hu nọ eware i te nwene kẹ omai idudhe?

⁶ Joseph nọ ma fodẹ ẹsejọ na ọ ta ẹme te oghẹrẹ nọ Jihova o ro fiobọhọ kẹe avọ aye riẹ okenọ a no Ebẹtẹle kpo. Ọ ta nọ: “Jihova o gine fiobọhọ kẹ omai gaga oke yena. Ọ rọ inievo mai fiobọhọ kẹ omai. O ru nọ ma ro wo eware nọ ma sae rọ rẹrote omamai, ọ tẹ jẹ rọ inievo na tuduhọ omai awọ. Yọ rite inẹnẹ na, ọ re siọ omai ba ha.” Eware i te nwene idudhe kẹ owhẹ, rẹroso Jihova inọ ọ te siọ owhẹ ba ha. Ọ te kẹ owhẹ ẹgba gbe areghẹ nọ whọ sai ro yeri uzuazọ ra vrẹ. (Aiz. 54:10; 58:11) Brọda Joseph ọ ta nọ eme ole JW Broadcasting^® mai jọ i fiobọhọ kẹe re. Eme ole na e ta nọ: “Mẹ riẹ epanọ odẹ o rẹ te jọ họ. Ghele na mẹ riẹ nọ mẹ ọvo ọ rrọ họ.”a Oniọvo na ọ ta nọ: “Eme ole nana i dhesẹ nọ eware e gbẹ make nya oghẹrẹ nọ ma roro ho, Jihova ọ te nyasiọ omai ba vievie he.”

NỌ UDU U TE BI BRUKPE OMAI GAGA

7. Eme ahwo jọ a gbe bi roro fiki eware nọ e thọ rai obọ okejọ?

⁷ Ma tẹ raha uzi ulogbo jọ, nọ ma jẹ vuẹ ekpako na, ekpako na a re fiobọhọ kẹ omai. Yọ, nọ a te fiobọhọ kẹ omai no, ma vẹ te daoma gaga re ma gbẹ wariẹ ru oware yena ha. (Itẹ 28:13; Jem. 5:14-16; 1 Jọn 1:9) Rekọ dede nọ Jihova ọ rọvrẹ omai no, udu o sai gbe brukpe omai. Ẹsejọhọ ma ti roro nọ, ‘Oware nana nọ me ru na u yoma vi oware nọ Jihova ọ sae rọvrẹ omẹ.’ (2 Kọr. 2:7) Ma sai gine roro ere, keme ohwo ọ tẹ raha uzi, o rẹ dae gaga, yọ oware na o rẹ kaki noi iroro ho. Devidi ovie na o kere nọ: “Igbenwa mẹ i wo udhedhẹ ovuovo ho fiki uzioraha mẹ.” O te je kere nọ: “Oma mẹ u whu fihọ kpimẹ jẹ guọghọ fihọ otọ no.” (Ol. 38:3, 8) Udu u te gbe bi brukpe owhẹ fiki izi nọ whọ raha okejọ, eme nọ e rrọ obe Aizaya na i ti fiobọhọ kẹ owhẹ.

8-9. Ma te rri ẹme nọ ọ rrọ obe Aizaya 1:18, oghẹrẹ vẹ erọvrẹ Jihova o rrọ?

⁸ Se Aizaya 1:18. Oghẹrẹ nọ Jihova o dhesẹ erọvrẹ riẹ evaọ oria Ebaibol nana u dhesẹ nọ ọ tẹ rọvrẹ ohwo no, yọ ọ rọvrẹ riẹ no. Ọ ta nọ izieraha mai e tẹ make rrọ “wawae” o ti ru ai jọ “fuafo wọhọ ekpalekpa-ame.” Oware nọ o rrọ wawae u te mu oware, o rẹ kaki no ho. Rekọ Jihova ọ be vuẹ omai nọ, ọ tẹ rọvrẹ omai no, o wọhọ ẹsenọ o voro uzioraha na no tẹtẹtẹ. Ọ rẹ gbẹ ruẹ oware nọ ma ruthọ na ha.

⁹ Nwanọ ere o jọ nọ Jihova ọ rọvrẹ Devidi ovie na no. Dede nọ Devidi o bruẹnwae o te je kpe ohwo, Jihova ọ rọvrẹ riẹ. Uwhremu na Jihova ọ ta nọ ọ jọ ohwo okiẹrẹe. (2 Sam. 11:3, 4, 14, 15; 12:13; 1 Iv. 9:4, 5) Jihova o gbe je rri Devidi wọhọ ohwo nọ o bruẹnwae okejọ hayo nọ o kpe ohwo okejọ họ. Eware iwoma nọ Devidi o ru o je rri. Epọvo na o rrọ nẹnẹ re, ma te kurẹriẹ no, nọ Jihova ọ jẹ rọvrẹ omai no, o re fiobọhọ kẹ omai re udu u gbe brukpe omai hi. Kọ eme ọfa obe Aizaya ọ ta nọ o sai fiobọhọ kẹ omai nọ udu u te gbe bi brukpe omai?

10. Eme Aizaya 38:17 o ta nọ o rẹ lẹliẹ udu te omai otọ?

¹⁰ Se Aizaya 38:17 gbe ẹme-obotọ. Ẹme na “who gbolo izieraha mẹ kpobi fihọ obemu ra no,” a sae jẹ fae nọ, who “si izieraha mẹ kpobi no aro ra no.” Onana u dhesẹ nọ ohwo o te kurẹriẹ no, o rẹ wọhọ ẹsenọ Jihova ọ tọlọ izieraha ohwo na o te gbolo ai fihọ emu riẹ re ọ gbẹ ruẹ e rai hayo roro kpahe ae he. Obe jọ o ta nọ a sae jẹ fa ẹme na nọ: “Who ru nọ o rọ wọhọ ẹsenọ mẹ raha uzi ọvo ho.” Ẹme na o dhesẹ nọ Jihova ọ tẹ rọvrẹ omai no, o wọhọ ẹsenọ ma ru oware na ẹdẹvo ho. Nọ Jihova ọ tẹ rọvrẹ omai no, o re gbe vi ẹme na no otọ ze re ọ jẹ rehọ fiki riẹ ru omai oware jọ họ. Ọ rẹ kpairoro vrẹ uzioraha na tẹtẹtẹ. Ọ ta nọ: “Mẹ te kareghẹhọ izieraha ra ha.” (Aiz. 43:25) Nọ ẹme nọ ọ rẹ lẹliẹ udu te ohwo otọ. Kọ otẹrọnọ Jihova, obruoziẹ nọ ọ mai kpehru na ọ rẹ gbẹ rọ izieraha mai nọ e vrẹ no hwa omai osa ha, kọ u fo re ma gbe brukpe omamai?

11. Ma tẹ make raha izi jọ evaọ okenọ u kpemu, eme Jihova o bi rri enẹna? (Rri uwoho na re.)

¹¹ Nọ udu o tẹ be wariẹ brukpe omai, joma kareghẹhọ oghẹrẹ nọ Jihova o dhesẹ erọvrẹ riẹ na. Jihova ọ rẹ ginẹ rọvrẹ, yọ ọ tẹ rọvrẹ no yọ ọ rọvrẹ no. Oma mai o rẹ vuọ ẹe he fiki eware nọ e thọ omai obọ okejọ. Ọ wọhọ omai ahwo-akpọ nọ a gba ha nọ a re fi ẹme họ eva ha. (Aiz. 57:16) Orọnikọ eware nọ ma ru thọ okejọ Jihova o re rri hi, rekọ oghẹrẹ nọ ma be daoma te enẹna gbe eware nọ ma ti ru evaọ obaro. (Aiz. 55:7) Ọghẹnẹ mai na o wou kẹhẹ! O wo erọvrẹ gaga. Nọ ma riẹ ere no na, joma gbẹ rọ eware nọ ma ru okejọ kpokpo udu mai hi. Joma rọ fiki rai zihe kpemu hu, re ma sai wo eghale nọ Jihova ọ te kẹ omai evaọ obaro.

NỌ OHWO MAI O TE WHU

12. Ẹvẹ o rẹ jọ nọ ohwo mai o te whu?

¹² Otẹrọnọ ohwo mai jọ o te whu, o rẹ da omai gaga. Ọ rẹ kaki no omai ẹro ho. Ẹsejọ ma sai roro nọ, ‘Fikieme Jihova ọ rọ kuvẹ nọ o whu?’ U wo oniọvo jọ nọ a re se Michael nọ ọsẹgboni riẹ a whu. Erae e mahe rai kpe. Oniọvo na ọ ta nọ: “Oware na o da omẹ gaga. U te epanọ me je ro mu ofu kẹ Jihova inọ, ‘Fikieme ọ rọ kuvẹ nọ a whu?’ Mẹ riẹ nọ Jihova ọ wha riẹ ze he, rekọ eva e jẹ dha omẹ inọ ọ kuvẹ nọ oware utioye na o rọ via.” Ẹsejọhọ nọ oware utioye na o via kẹ owhẹ, who je roro ere re. Kinọ ma te bi roro ere, eme Jihova ọ ta, nọ o sai fiobọhọ kẹ omai?

13. Eyaa vẹ Jihova ọ ya kẹ omai evaọ obe Aizaya 25:8?

¹³ Se Aizaya 25:8. Jihova ọ ya eyaa nọ ọ te “lọ uwhu no bẹdẹ bẹdẹ.” Dai roro epanọ akpọ ọ te were te nọ Ọghẹnẹ o te si uwhu no. Oke yena who ti gbe weri fikinọ ohwo jọ o whu hu. (Aiz. 35:10) Whọ te gbẹ ruẹ uki hayo oware jọ nọ o rẹ kareghẹhọ owhẹ ohwo ra nọ o whu hu. Whọ te hae ruẹ ahwo ra kpobi nọ eva e be were, nọ a rrọ sasasa, nọ a rrọ kugbe owhẹ. Eyaa nana i mu omai ẹro, keme ma riẹ nọ orọnọ ohwo-akpọ jọ ọ ta ẹme na ha, rekọ Ọghẹnẹ nọ ọ rẹ sai ru oware kpobi na ọ ta riẹ.—Evia. 21:4, 5.

14. Ẹvẹ obeva ra o rẹ jọ nọ who te bi roro kpahe oghẹrẹ nọ ẹkparomatha ọ te jọ? (Aizaya 26:19) (Rri uwoho na re.)

¹⁴ Se Aizaya 26:19. Orọnikọ uwhu na ọvo Jihova ọ te lọ no ho, rekọ ọ te kpare ahwo mai nọ i whu no ze. Nọ Jihova ọ jẹ ta kpahe ẹkparomatha na ọ ta nọ: “Iri ahwo mẹ e te kparoma.” Jihova o se ahwo mai na ahwo riẹ. Ọ be kareghẹhọ ae ẹsikpobi, yọ ọ te kpare ai ze nọ oke u te te. Nọ igrigri i te kie fihọ ẹbe, otẹrọnọ ẹbe na o lo no vẹre, ẹbe na o re dhidhi aro vi. Ere ọvona Jihova nọ ọ rẹ kẹ uzuazọ na o ti fi uzuazọ họ ahwo nọ a whu no oma, a vẹ te kpama. Ma ve ti dede ai rehọ. Oware riẹ u ti woma kẹhẹ!—Je rri Mak 5:42.

15. Ẹvẹ eyaa ẹkparomatha na e sai ro fiobọhọ kẹ omai nọ ohwo mai jọ o te whu?

¹⁵ Fikinọ Ọghẹnẹ ọ ya eyaa nọ ọ te kpare ahwo nọ a whu no ze, u dhesẹ nọ ohwo mai o te whu ọ rẹ gbẹ da omai hi hi. Rekọ ma tẹ kareghẹhọ nọ Jihova ọ gbẹ be kareghẹhọ ahwo mai na, eva e rẹ were omai. Oware nọ u fiobọhọ kẹ Michael nọ ma fodẹ ẹsiẹe na ọye. Ọ ta nọ: “Ẹme nọ ọ rrọ obe Aizaya 26:19 na o lẹliẹ omẹ riẹ nọ Jihova o rri ọsẹgboni mẹ nọ a whu no na fihọ ahwo riẹ nọ ọ gwọlọ kpare ze. Ọ be kareghẹhọ ae, yọ oke u te te, ọ te kpare ai ze. Oware nana nọ mẹ be kareghẹhọ na u bi fiobọhọ kẹ omẹ thihakọ.” Jọ mai omamai ma hai roro kpahe okenọ ma te rọ wariẹ ruẹ ahwo mai nọ a whu no. U ti ru nọ ma te sai ro thihakọ je kru udu ga.

16. Oria Ebaibol vẹ o rẹ sasa owhẹ oma nọ ẹbẹbẹ o te te owhẹ?

¹⁶ Ma dhunu te eme jọ nọ e rrọ obe Aizaya no, nọ e rẹ sai fiobọhọ kẹ omai kru udu ga nọ eware i te nwene kẹ omai idudhe, nọ udu u te bi brukpe omai, gbe okenọ ohwo o te whu ku omai. Eva e were omai gaga inọ Jihova ọ be rọ eme riẹ nọ e rrọ Ebaibol na sasa omai oma. (Ol. 94:19) Kọ oria Ebaibol jọ o riẹ nọ o rẹ sasa owhẹ oma nọ ẹbẹbẹ o te te owhẹ? Daoma riẹe fihọ uzou hayo kere iei fihọ obe jọ. Whọ sai fi ei họ oria nọ whọ sae jọ ruẹ e riẹ ẹsikpobi. Ajọ eme Ọsẹ oyoyou obọ odhiwu mai na e hae gbẹ sasa owhẹ oma.