Jihova O Wuhrẹ Omẹ Eware Buobu

Mẹ ruẹ eware buobu ẹdẹ yena. Rekọ oghẹrẹ nọ ahwo na a je ro ru iruo họ oware nọ o mai gbe omẹ unu. Keme iruo nọ a je ru na, otẹrọnọ ahwo jọ, iruo na e rẹ jarai oma oghẹrẹ jọ. Keme orọnọ ohwo kpobi ọ rẹ ruẹ e rai evaọ oria nọ a bi jo ru iruo na ha. Fikiere whọ rẹ kake ruẹ ohwo nọ o bi yere ai hi. Ghele na, a je ru iruo na avọ evawere. Oware yena nọ mẹ ruẹ na, u ru omẹ riẹ oware nọ u dhesẹ re ohwo o ru iruo kẹ Jihova no udu ze.

Anwọ ikpe buobu ze na, Jihova o bi wuhrẹ omẹ re mẹ sai ru iruo kẹe ziezi jẹ jọ emamọ ohwo nọ ọ rẹ gọe. Me bi ti gbiku na ze ziezi. Rekọ mẹ kaki gbiku epanọ me ro mu Jihova họ ẹgọ, keme egagọ Buddha mẹ jọ vẹre.

MẸ JẸ GWỌLỌ RIẸ ỌGHẸNẸ OKENỌ MẸ JỌ ỌMAHA

Ẹwho jọ nọ a re se Chicago, nọ ọ rrọ Illinois, evaọ U.S.A., a jọ yẹ omẹ. Emọ ene ọsẹgboni mẹ a yẹ. Mẹ họ ọmọ ọkpako. Obọ Japan ọsẹgboni mẹ a jẹ rria vẹre, taure a te ti kpohọ ukane obọ Chicago. A kwa nya re akpọ o woma kẹ ae, re ma je kpohọ emamọ isukulu re. Akpọ o ve je woma kẹ omai re.

Egagọ Buddha ọsẹgboni mẹ a jọ. A rọ egagọ na zaharo ho. Egagọ yena a yẹ oni mẹ fihọ. Etẹmpol Buddha ọ jọ uwou ọsẹ oni mẹ. Yọ ọsẹ oni mẹ avọ inievo ivẹ oni mẹ a jọ ahwo ologbo egagọ na. Fikiere notọ avọ otọ ze mẹ rọ egagọ Buddha na zaharo ho. Oke yena nọ me te no isukulu ze, oware nọ me re ru họ, mẹ rẹ mahe insẹnse, me ve je fi eraese avọ ame họ aro ẹmema nọ ọ rrọ uwou mai. Nọ u je te Ẹdoka, ma ve kpobọ etẹmpol Buddha na, ma vẹ be so ile kẹ ẹmema na. Igoru a rọ mae, yọ ọ rro vi ọnọ ọ jọ obọ uwou mai na.

Nọ me ti te oware wọhọ ikpe ihrẹ no, mẹ kareghẹhọ nọ mẹ jẹ hai rri ẹmema nọ a ma fihọ uwou mai na, mẹ vẹ be nọ omamẹ nọ, ‘Me te whu no ẹdẹfa, eme ọ te via kẹ omẹ?’ A wuhrẹ omẹ evaọ egagọ Buddha na nọ, me te whu no, ẹzi mẹ o re kpohọ obojọ. Oware na o jẹ kẹ omẹ uye gaga keme o jẹ da omẹ nọ ẹdẹ nọ me te whu no, ẹsejọhọ me ve ti zihe ruọ ẹzi no. Mẹ gbẹ te sae reakpọ kuoma ha. Oware na o da omẹ te epanọ me je ro roro nọ omẹ u re no.

Nọ me te oware wọhọ ikpe ikpegbisoi (15) no, eware nọ a je ru evaọ egagọ Buddha na e gbẹ jẹ ruọ omẹ oma ha. O jọ omẹ oma nọ me ri mu Ọghẹnẹ họ ẹgọ họ. (Mat. 5:3) Mẹ jọ udu mẹ je roro nọ Ọghẹnẹ jọ ọ te jọ oria jọ, nọ o wo ogaga kpobi. Mẹ gwọlọ nọ mẹ rẹ riẹe. Me je roro nọ ẹsejọhọ me te se Ebaibol, u ti fiobọhọ kẹ omẹ riẹ Ọghẹnẹ, yọ eware efa nọ me bi roro kpahe na i ti vẹ omẹ ẹro ziezi. Mẹ jẹ ruẹ Ebaibol dẹ, kọ oria nọ a bi jo ru ehaa Buddha. Ebaibol na ọrọ King James Version.

Nọ me te ikpe ikpegbihrẹ (17) no, ẹdẹjọ nọ mẹ avọ arakọ mẹ ma jẹ nyavrẹ evaọ edhere, oniọvo jọ nọ a re se Wilson Bashou ọ tẹ nya ku omẹ. Ọ tẹ nọ omẹ nọ, “Kọ whọ riẹ oware nọ Ọghẹnẹ ọ ta nọ o ti ru evaọ obaro?” Fiki onọ yena nọ ọ nọ omẹ na, ma ta ẹme kpahe Ebaibol gaga. O se obe Eviavia 17:1 kẹ omẹ, ọ tẹ nọ omẹ nọ: “Eme ‘ame buobu’ nọ ogberẹ na ọ keria ehru riẹ na o dikihẹ kẹ?” Whaọ, mẹ sae kẹ uyo na ha. Oniọvo na ọ tẹ jọ owọ avọ 15 dhesẹ uyo na kẹ omẹ, inọ ame na o dikihẹ kẹ ahwo. Eva e were omẹ gaga nọ mẹ rọ ruẹ nọ Isẹri Jihova a rẹ rọ oria Ebaibol jọ rọ fa otọ oria Ebaibol ọfa, orọnikọ uzou rai a rẹ fae no ze he. Taure Wilson ọ tẹ te nyavrẹ, ọ kẹ omẹ obe jọ nọ u wo ekọlọ iblu. Uzoẹme riẹ họ Uzẹme nọ U re Suohwo kpo Uzuazọ Ebẹdẹbẹdẹ. Obe yena u ru omẹ riẹ uzẹme na.

Me te mu ewuhrẹ họ ẹnya nọ edẹ ikpe e vrẹ no. Oghẹrẹ nọ inievo na a ro yere omẹ ẹdẹ ọsosuọ nọ me ro kpohọ ewuhrẹ, o rẹ thọrọ omẹ ẹro ho. Mẹ gbẹ siọ ewuhrẹ ba viere he. Brọda Wilson o te ti mu omẹ Ebaibol họ ewuhrẹ. Eware nọ o je wuhrẹ omẹ na e jẹ were omẹ gaga. Ẹsejọ dede ma rẹ rọ euwa eree soso wuhrẹ. Eva e jẹ dha ọsẹgboni mẹ gaga fikinọ me bi wuhrẹ Ebaibol. A te mu omẹ họ ekpokpo. Rekọ nọ a maki bi kpokpo omẹ na yọ me bi wuhrẹ vrẹ ọvo. Fikiere u te mu omẹ ẹro gaga inọ egagọ uzẹme na ọna. Mẹ tẹ te họ-ame evaọ ukpe 1983.

ME NO YUNIVASITI, ME TE MU ỌKOBARO HỌ

Me je kpohọ yunivasiti ilogbo jọ okenọ mẹ rọ họ-ame na. Me je wuhrẹ kpahe imu nọ a re ro siwi ohwo. Okolo ugho ọsẹgboni mẹ a raha fihọ isukulu mẹ na ha. Mẹ hae sae ta nọ me re gbe kpohọ isukulu na. Rekọ mẹ gwọlọ nọ me re mu ọkobaro oke-kpobi họ re mẹ rọ oke mẹ ru iruo kẹ Jihova ziezi.

Ọsẹ mẹ ọ ta kẹ omẹ vẹre no nọ mẹ tẹ zaro no isukulu na, o ti le omẹ no uwou riẹ no. Mẹ rọ ọsẹgboni mẹ zaro ho, yọ mẹ gwọlọ ru oware nọ o rẹ kẹ ae uye he. Fikiere iroro na e jẹ bẹ omẹ ẹjẹ. Evaọ aso, me re kpohọ oria jọ evaọ isukulu mai, me ve bi rri isi nọ e rrọ obọ ehru. Mẹ vẹ be lẹ se Jihova inọ, “O Jihova, mẹ riẹ oware nọ me re ru hu, ivie fiobọhọ kẹ omẹ.” Ukuhọ riẹ, mẹ tẹ ta nọ me re no yunivasiti na. Ọsẹ mẹ o te le omẹ no uwou na no. Me te se Brọda Wilson, mẹ tẹ vuẹe nọ a le omẹ no uwou no. Ọ tẹ ta nọ mẹ kwa bru ei. Mẹ tẹ tọlọ emeware mẹ fihọ ẹkpa jọ, mẹ tẹ ruọ omoto kpohọ obonọ ọ jọ. Nọ mẹ kwa bru ei no, udu u te dhẹ omẹ. Keme mẹ riẹ nọ mẹ jiroro na thọ họ.

Mẹ jọ wọhọ ọmọvra nọ a si no ikeji, keme uvẹ u rovie no nọ mẹ sae rọ ta usi uwoma ziezi. Me te mu ọkobaro họ evaọ ukpe 1984.

Nọ me je ru ọkobaro na, Jihova o wuhrẹ omẹ emamọ uruemu jọ nọ u fo nọ me re wo. Ọjọ họ, epanọ mẹ sae gbẹ rọ ruabọhọ iruo na nọ o tẹ make bẹ omẹ no. Eme mẹ rọ ta ere? Ẹdẹ jọ ọ jariẹ nọ eware buobu e jẹ te whaha omẹ usi uwoma. Ọjọ họ, ohwo ọvo ọ jariẹ nọ o re lele omẹ nya ẹdẹ yena ha. O jẹ ruọ omẹ oma ha, rekọ mẹ gba oma họ nya ghele. Nọ mẹ ta usi uwoma te euwa jọ no, u te kiọkọ uwou urere nọ mẹ te jọ ta usi uwoma. Oma o rrọ omẹ no oke yena, yọ mẹ ọvo usu, ehru o te je bi. Me je roro sọ me re dhugbe kpo. Rekọ mẹ tẹ jẹ gadiẹ istẹpo kpobọ uwou nọ mẹ te jọ ta usi uwoma. Mẹ tẹ ruẹ ọzae jọ nọ ọ jọ ohwo Philippines. Mẹ tẹ jọ udu mẹ ta nọ, ‘Ohwo nana o ti yo ho.’ Rekọ o yo. Me te mu ei Ebaibol họ ewuhrẹ, uwhremu na ọ tẹ họ-ame.

ME WUHRẸ EWARE JỌ OKENỌ MẸ JỌ EBẸTẸLE BROOKLYN

Nọ mẹ avọ Wilson ma rria uwou te ikpe ivẹ no, a te zizie omẹ kpobọ Ebẹtẹle Brooklyn evaọ ukpe 1985. Ofẹ nọ a re jo printi ebe me je jo ru iruo wọhọ epanọ mẹ ta evaọ obọ emuhọ na. Ẹdẹ jọ nọ mẹ jẹ rọ ẹjini nọ o re fi uzoẹme họ uke obe ru iruo, mẹ riẹ oware na ru tere he, fikiere enọ e raha i bu gaga. Inievo na a tẹ vuẹ omẹ nọ mẹ nyae vuẹ oniọvo nọ ọ be rẹrote iruo na oware nọ o via na. Mẹ tẹ nabe vuẹe nọ enẹ gbe enẹ o wha riẹ ze. Nọ mẹ ta kpobi no, oniọvo na ọ tẹ vuẹ omẹ nọ, “U woma, rekọ u fo re oware o tẹ thọ ohwo obọ, o wounu.” Kọ etẹe mẹ rọ ruẹ nọ u gine wuzou re mẹ rọwo nọ me ru thọ, me ve je wounu.

Me wuhrẹ eware efa mi inievo nọ i kri Ebẹtẹle no. Ẹdẹ jọ ọ jariẹ nọ Brọda Milton Henschel nọ ọ jọ omọvo Utu Ẹruorote na gbe omai ahwo jọ ma rọ keria wariẹ itebo ọvona họ evaọ oria nọ a rẹ jọ re emu. Ẹdẹ yena, ahwo nọ a jọ oria nọ a rẹ jọ re emu na a bu gaga. Inievo nọ e rẹ wọ emu ze a je ru iruo gaga, rekọ emu ọ jẹ kaki te ahwo obọ họ. Mẹ avọ izoge efa jọ ma tẹ be lẹlẹ ta nọ ahwo na a bi ru eware na vẹrẹ hẹ. Ma je ti rri hi, Brọda Henschel ọ kpama no, o mu ebrẹdi, ame, gbe ebọta họ ẹghale no. Ere o ro kuobọgbe inievo na ru iruo na. Oniọvo na o gine wo omaurokpotọ. Oware nọ o ru na o rẹ thọrọ omẹ ẹro ho. O lẹliẹ omẹ kareghẹhọ oware nọ Jesu o ru oke ẹdẹ nọ ọ rọ wozẹ awọ ikọ riẹ.—Jọn 13:3-5.

“DAOMA WUHRẸ JAPANESE”

Evaọ ukpe 1987, me te kpobọ Japan. Oma inievo obei o jẹ were omẹ keme ọwhọ ọ da rai oma fia, yọ a wo omaurokpotọ gaga. Mẹ jẹ gwọlọ nọ mẹ rẹ nwane jọ obei re me fiobọhọ evaọ ukoko na. Rekọ mẹ riẹ epanọ a rẹ ta Japanese hi. Oniọvo-ọmọtẹ jọ nọ a re se Michiko Oda nọ ọ jọ Ebẹtẹle ọ tẹ ta kẹ omẹ nọ, “Daoma wuhrẹ Japanese!” Me te gine mu ei họ ewuhrẹ. Oke yena mẹ riẹ hẹ sọ ẹvẹrẹ na nọ me bi wuhrẹ na u ti fiobọhọ kẹ omẹ gaga.

Nọ emerae jọ e vrẹ no, me te kpohọ ukoko ẹvẹrẹ Japanese evaọ New York. Ẹvẹrẹ na nọ me wuhrẹ na u fiobọhọ kẹ omẹ ru eware efa buobu kẹ Jihova. Evaọ ukpe 1989, me te kpohọ okokohọ ologbo nọ a rọ Japanese ru evaọ Los Angeles nọ ọ rrọ California. Oyena o jọ orọ ọsosuọ nọ me ro kpohọ okokohọ ẹvẹrẹ Japanese. A ru edrama evaọ okokohọ na. Evaọ usu inievo nọ i ru edrama na, ọjọ nọ a re se Miwako Onami nọ ọ jọ ọkobaro ọ dhẹ ruọ omẹ oma.

Mẹ tẹ rehọ Sista Miwako evaọ ukpe 1992. O te kuomagbe omẹ evaọ Ebẹtẹle Brooklyn. Aye mẹ na o re roro kẹ ohwo gaga. Yọ o re fiobọhọ kẹ amọfa re. Uruemu nana nọ o wo na o were omẹ gaga. Mẹ be rọ aro kele iei ru epọvo na re. Jihova ọ rehọ aye mẹ na ghale omẹ na. Ọ be lẹliẹ eva were omẹ ẹsikpobi.

MA KPOHỌ UWOU OGHA JAPAN, MA TE TI NO EBẸTẸLE

Nọ oke jọ o vrẹ no, ọsẹgboni aye mẹ nọ a rrọ obọ Japan, a te muhọ ẹmọ gaga. Fikiere a tẹ vuẹ omai nọ ma kpohọ uwou ogha Japan, re ma jọ obei ru iruo, re ma sae kẹle ae jẹ hai rẹrote ai. Ma kwa kpobọ Japan evaọ 1999.

Inievo na a dede omai rehọ ziezi. Ẹmẹrera na obei o tẹ te reria omai oma. Me wuhrẹ eware buobu mi inievo mai nọ e rrọ Japan. A rẹ kẹ okẹ gaga, yọ a riẹ oghẹrẹ nọ a re dede ọrara. A se iruo Jihova gboja gaga. A te bi ru iruo a rẹ kuvẹ re oware ofa u si iroro rai no iruo na ha. Yọ a te bi ru oware jọ kugbe, a re lele ohwohwo ru oware na dhedhẹ avọ evawere. U gbe omẹ unu hu, keme ere ahwo Japan a rrọ vẹre. A rẹ gwọlọ ru eware kugbe. Ohwo ọvo ọ rẹ gwọlọ nọ ọye ọvo o re ru oware na re a riẹe odẹ inọ ọye o ru rie he. Emamọ oriruo rai u bi fiobọhọ kẹ omẹ romakpotọ nọ me bi lele inievo na ru iruo na. O tẹ jẹ lẹliẹ omẹ ruẹ nọ umutho nọ me bi ru na o be lẹliẹ iruo Jihova nyaharo.

Ghele na, fikinọ oghẹrẹ nọ a re ru eware evaọ obonọ me no ze o dina wo ohẹriẹ, eware nọ a re ru ẹsejọ e rẹ jọ omẹ oma oghẹrẹ jọ. Fikiere mẹ daoma re me wo odiri jẹ siọ ofu ba emu. Ẹmẹrera na uruemu mẹ gbe oghẹrẹ nọ me re rri eware u te muhọ enwene. Me te ti vuhumu nọ ma te ru oware nọ ukoko na o ta, o gbẹ maki kiehọ omai oma ha, Jihova ọ sai ru nọ eware e rẹ rọ riẹ nya ghele. Ọye o bi ru nọ eware i bi ro woma kẹ omai evaọ ukoko na orọnọ ẹgba mai hi.

Me rri oghẹrẹ nọ Jihova o ro wuhrẹ omẹ evaọ Ebẹtẹle wọhọ epanọ o ro wuhrẹ Mosis oke ẹdẹ. Jihova o wuhrẹ Mosis omaurokpotọ evaọ ikpe udhuvẹ (40) nọ ọ jọ othuru-igodẹ na. Epanọ Mosis o kpohọ isukulu gaga na, ere me kpohọ isukulu re. Isukulu na e lẹliẹ omẹ wo omorro je fievahọ omamẹ ga hrọ. Rekọ Ebẹtẹle nọ mẹ nya na u wuhrẹ omẹ omaurokpotọ gbe epanọ a rẹ rẹroso Jihova. Epanọ Jihova o fiobọhọ kẹ Mosis ikpe buobu nọ o ro nwene na, ere o fiobọhọ kẹ omẹ re na.

Oware wọhọ ikpe udhegbene (24) soso ma rẹrote ọsẹgboni aye mẹ re a te ti whu. Ikpe yena kpobi, esese ma jẹ hae rọ ifonu se ai. Ma jẹ hae ruawa rai, yọ ma jẹ hae nyae ruẹ e rai evaọ obọ ọspito. Ẹyao oni aye mẹ Masako ọ ga te epanọ ọ gbẹ jẹ sae nya sasasa ha. O lọhọ kẹe re o kpohọ ewuhrẹ hayo kpohọ usi uwoma ha. Taure o te ti whu, akaba-ọmo nọ a re ghelie ọ jẹ hai ro no oria ruọ oria. Avọ ere ghele na, whọ rẹ ruẹ nọ o gbe you Jihova gaga. Oke kpobi nọ ọ tẹ be ta ẹme kpahe Jihova, eva e rẹ were iẹe. Oni aye mẹ o wo edẹro, eva e jẹ hae were iẹe ghelọ ẹbẹbẹ nọ o wo na, yọ ọ ruabọhọ jẹ gọ Jihova. Mẹ ruẹ nọ u fo re mẹ rọ aro kele oriruo riẹ.

Nọ u te ukpe 2024, enwene ologbo ọfa jọ ọ tẹ romavia. Ukoko o ta nọ ma no Ebẹtẹle no re ma nyae ta usi uwoma. Oke yena yọ ma rria Ebẹtẹle vrẹ ikpe ọgba (30) no. Ọkobaro obọdẹ ma rrọ obọnana evaọ ẹwho jọ nọ abade ọ wariẹ họ nọ a re se Okinawa. Ma rẹ ta usi uwoma kẹ ahwo nọ a be rria ogba isoja jọ nọ o kẹle omai. Ma jọ Ebẹtẹle wuhrẹ eware buobu nọ i bi fiobọhọ kẹ omai rria oria nana. Ma wo edẹ nọ ma re ro kpohọ usi uwoma je ru eware efa, yọ ma be daoma re ma ta usi uwoma ziezi. Jihova ọ ghale omai gaga no, keme ma wo ahwo nọ ma bi wuhrẹ Ebaibol. Yọ ahwo nana a wọhọ ahwo uviuwou mai. Enẹna ma be mae ruẹ epanọ u wuzou te re ma you ahwo. Mẹ avọ aye mẹ ma bi yere Jihova kẹdẹ kẹdẹ kẹ emamọ iruo nana nọ ọ kẹ omai na.

MẸ GWỌLỌ NỌ JIHOVA O GBE WUHRẸ OMẸ

Ahwo uwou mẹ a ri kurẹriẹ hẹ. Rekọ a gbe bi kpokpo omẹ hẹ. O make rrọ ere na, mẹ wọhọ ohwo nọ o wo imoni hi hi, keme Jesu ọ ta nọ ahwo nọ a kurẹriẹ siọ ahwo uwou rai ba a ti wo imoni nọ a nyaseba na isia udhusoi (100) evaọ ukoko na. (Mak 10:29, 30) Ere o ginẹ rrọ, keme eria kpobi nọ me kpohọ no evaọ akpọ na, inievo ukoko na a fiobọhọ kẹ omẹ. A you omẹ wọhọ ohwo uwou rai. Inievo nọ me wo, a rẹ sai kele ai mu hu.

Obe Uzẹme nọ U re Suohwo kpo Uzuazọ Ebẹdẹbẹdẹ nọ Brọda Wilson ọ kẹ omẹ na ọ gbẹ rrọ omẹ obọ. Ẹsikpobi mẹ tẹ ruẹ e riẹ, o rẹ kareghẹhọ omẹ epanọ Jihova o ro se omẹ ziọ ukoko na. (1 Irv. 28:9) Mẹ gwọlọ nọ Jihova o gbe wuhrẹ omẹ jẹ rehọ omẹ fiobọhọ kẹ ahwo wuhrẹ uzẹme na re a sai wo uzuazọ ebẹdẹ bẹdẹ.