Kru Egagọ Jihova Ga nọ Who te bi Kpohọ Isukulu Efa

1-2. (a) Nọ whọ tẹ ta nọ who re kpohọ isukulu efa, eme whọ rẹ hai ru? (b) Eme u dhesẹ re ohwo ọ “gbẹ hae nyaharo kpatiẹ evaọ edhere ọvona”? (Ahwo Filipai 3:16)

U TE no isukulu nọ uzi egọmeti o ta nọ ọmọ kpobi ọ rẹ nya no, inievo jọ a rẹ gwọlọ kpohọ isukulu efa. A rri rie nọ a te kpohọ isukulu itieye na ẹsiẹe a te rọ ruẹ iruo nọ a sai ro wo ugho rẹrote omarai re a sae gọ Jihova. Whọ tẹ ta nọ who re kpohọ isukulu efa, eme who re ru re usu ra avọ Jihova o gbẹ ga ziezi nọ who bi kpohọ isukulu na? (Jem. 4:8a) Ma riẹ nọ edawọ jọ i te owhẹ okenọ whọ gbẹ jọ isukulu. Ghele na who ru oware nọ o rẹ were Jihova. Nọ who bi ti kpohọ isukulu efa na, daoma re whọ “gbẹ hae nyaharo kpatiẹ evaọ edhere ọvona.” Koyehọ whọ rẹ gbẹ hai ru oware nọ o rẹ were Jihova wọhọ epanọ who bi ru anwẹdẹ na.—Se Ahwo Filipai 3:16.

² Ẹme Griki nọ a fa “gbẹ hae nyaharo kpatiẹ evaọ edhere ọvona,” a jẹ hae rehọ iẹe dhesẹ isoja nọ e rrọ uhie ọvo mashe vrẹ. Fikiere nọ who te kpohọ isukulu efa, daoma gbẹ “mashe kpobọ aro” evaọ egagọ Jihova, who mudhe oria ọvo hayo zihe kpemu hu. Ma te jọ uzoẹme nana ta kpahe ehrẹ Ebaibol ene nọ i ti fiobọhọ kẹ owhẹ ru ere. Ehrẹ nana yọ ehrẹ ekpokpọ họ, eware nọ who bi ru anwẹdẹ ọvona. Yọ o gwọlọ nọ who re gbe ru ai nọ who bi kpohọ isukulu efa na gbe oke nọ who te nwrotọ no.

GBẸ HAI RU EWARE NỌ I RE RU USU RA AVỌ JIHOVA GA

3. Nọ who bi kpohọ isukulu efa na, eware jọ vẹ e rẹ sae whae ze nọ whọ gbẹ sai ru eware nọ i re ru usu ra avọ Jihova ga ha?

³ Oware nọ o sae rọ jọ bẹbẹ. Isukulu efa e sae lẹliẹ eware nọ whọ gwọlọ ru evaọ okpẹdoke jọ buobu. Ohwo kpobi nọ o bi kpohọ isukulu ọ rẹ gwọlọ rehọ oke riẹ se obe ziezi je ru eware nọ e rẹ lẹliẹe pase. Who gbe rri otọ mu hu, onana o sai ru nọ who gbe ro kru egagọ Jihova ga ha. O sai tube ru nọ iwuhrẹ gbe usi uwoma i re ro mu owhẹ họ evo, makọ ewuhrẹ omobọ ra gbe olẹ.—Evia. 2:4.

4. Re whọ sai “wo eware buobu nọ who re ru ẹsikpobi evaọ iruo Olori na,” ẹvẹ who re rri isukulu ra? (1 Ahwo Kọrint 15:58)

⁴ Se 1 Ahwo Kọrint 15:58. Nọ ohwo ọ tẹ keria ehru ebasikoro, nọ ọ gbẹ be dhẹe he, o re kie. Ere ọvona re, whọ gbẹ gwọlọ nọ who re kie no ukoko na ha, who re “wo eware buobu nọ who re ru ẹsikpobi evaọ iruo Olori na.” Orọnikọ thakpinọ who kpohọ ewuhrẹ hayo usi uwoma ẹsejọ ọvo ho. Rekọ egagọ Jihova họ oware nọ o rẹ mae jọ owhẹ oja. Fikiere nọ who bi kpohọ isukulu na, riẹ nọ egagọ Jihova e mai wuzou orọnọ isukulu na ha. (Mat. 22:37) Oniọvo-ọmọtẹ jọ nọ a re se Samantha ọ ta nọ, “Mẹ ta kẹ omamẹ nọ, isukulu na e tẹ be whaha omẹ eware jọ nọ u fo nọ odibo Jihova o re ru, me re no isukulu na no.”

5. Eme who re ru re whọ sai dikihẹ ga evaọ ukoko Jihova?

⁵ Oware nọ who re ru re who te ti mu isukulu efa họ. Riẹ eware nọ u fo nọ whọ rẹ rọ karo nọ who bi ti kpohọ isukulu na. Nọ omara nọ, ‘Kọ mẹ jiroro oware nọ me ti ru no re ewuhrẹ, usi uwoma, gbe uwuhrẹ omobọ mẹ i gbe vo omẹ hẹ?’ (Jos. 1:8; Mat. 28:19, 20; Hib. 10:25) Whọ vẹ jẹ nọ omara nọ, ‘Eme me je ru nọ o wha riẹ ze nọ eware yena i gbe je vo omẹ hẹ evaọ isukulu nọ mẹ nya no?’ Kọ otẹrọnọ whọ jẹ daoma te he, eme who ti ru re whọ sai kru eware yena ga? Sei gboja inọ, nọ who bi ti kpohọ isukulu efa na, who re kru oma ga evaọ egagọ Jihova. Ma riẹ nọ o roja re who fiẹrohotọ evaọ isukulu nọ whọ be nya na, rekọ who re fi egagọ Jihova họ akotọ tao ha.a—Mat. 6:24.

6. Enọ vẹ whọ rẹ hae nọ omara? (Rri uwoho na re.)

⁶ Nọ who bi kpohọ isukulu na, nọ who te gbe omoke họ oma, hae nọ omara sọ who gbe kruga. Evaọ amara kpobi hayo nọ emerae jọ e tẹ vrẹ no, whọ sae nọ omara nọ, ‘Kọ me gbe bi se egagọ Jihova gboja?’ Otẹrọnọ ewuhrẹ o mu owhẹ họ evo no hayo a re muhọ no re who te te obei, yọ whọ tẹ rrọ ewuhrẹ who re roro eware obọ isukulu, hayo obọ uwou ọvo whọ rẹ gwọlọ jo thuru kugbe ewuhrẹ na, riẹ nọ oware jọ u muhọ ẹthọ no. Otẹrọnọ olẹ o rẹ thọrọ owhẹ ẹro ẹsejọ, hayo whọ gbẹ be sai se Ebaibol kẹdẹ kẹdẹ hẹ, hayo thakpinọ who kpohọ usi uwoma whọ rẹ rọ nya, yọ whọ tẹ nya whọ rẹ gwọlọ epanọ who re ro kuhọ vẹrẹ, yọ eware i mu oghẹrẹ jọ họ ẹnya no. Ru oware jọ kpahe iẹe vẹrẹ. Whọ jọ isukulu na i ru owhẹ nọ who gbe kru egagọ Jihova ga ha ha.

“SẸRO IRORO RA”

7. Nọ who te mu isukulu efa họ ẹnya no, eme a sae jọ obei wuhrẹ nọ o sae raha iroro ra?

⁷ Oware nọ o sae rọ jọ bẹbẹ. Whọ tẹ nyai wuhrẹ eghẹrẹ eware jọ evaọ isukulu, a sae rehọ “eriariẹ akpọ na gbe eviẹhọ ifofe” raha iroro ra no. (Kọl. 2:8) Eware itieye jọ nọ a sae vuẹ owhẹ họ, Ọghẹnẹ ọ rrọ họ, eware kpobi i mu romavia. A sae jẹ lẹliẹ owhẹ roro nọ, whẹ ọvo ọ rẹ sai ru nọ eware i re ro woma kẹ owhẹ. Oniọvo-ọmọzae jọ ọ ta nọ: “Orọnọ iruo nọ ma nyai se kpahe na ọvo a je wuhrẹ omai hi. A je wuhrẹ omai oghẹrẹ nọ a re rri eware. Yọ oghẹrẹ nọ a je wuhrẹ omai nọ ma rri eware jọ na, ere Jihova o rri rai hi. A wuhrẹ omai nọ mai ọvo ma re ru nọ eware i re ro woma kẹ omai. Yọ who te bi rri eware ere, whọ rẹ gbẹ rẹroso Jihova ha. O wha riẹ ze nọ o jẹ rọ bẹ omẹ re mẹ rẹroso Jihova.”

8. Fikieme o rọ roja gaga re whọ “sẹro iroro ra”? (Itẹ 5:1, 2)

⁸ Se Itẹ 5:1, 2. Ebaibol ọ vẹvẹ omai unu nọ ma “sẹro iroro” mai. A tẹ ta nọ whọ sẹro oware, u dhesẹ nọ oware na o rẹ raha whọ gbẹ sẹro riẹ hẹ. Ere ọvona re, ma gbẹ sẹro iroro mai hi, e sae raha. (1 Pita 5:8) A be jọ akpọ omuomu nana wuhrẹ eware nọ e sae lẹliẹ owhẹ rri ekpehre oware fihọ emamọ oware. A rẹ jẹ ta eme nọ e rẹ lẹliẹ owhẹ roro nọ eware nọ e rrọ uzuazọ na i mu lahwe, inọ Ọghẹnẹ ọ tubẹ rrọ dede he. A tẹ be ta eme yena, a rẹ ta ae wọhọ ẹsenọ a riẹ kpe no, rekọ a riẹ oware nọ a be ta ha. Ebaibol ọ tubẹ ta nọ eriariẹ rai na yọ “ugheghẹ evaọ obọ Ọghẹnẹ.”—1 Kọr. 3:18-20.

9. Ẹvẹ whọ sae rọ sẹro iroro ra?

⁹ Oware nọ who re ru re who te ti mu isukulu efa họ. Jọ eware nọ whọ jọ Ebaibol wuhrẹ i mu owhẹ ẹro gaga taure who te ti mu isukulu efa họ. Nọ omara nọ, ‘Eme o lẹliẹ omẹ rọwo nọ Ọghẹnẹ ọ rrọ? Eme u ru omẹ riẹ nọ Ebaibol na yọ Ẹme Ọghẹnẹ? Eme o lẹliẹ omẹ riẹ nọ me te bi ru oware nọ Ebaibol ọ ta oye o mai woma vi onọ ahwo a ta?’ Roro kpahe epanọ who dikihẹ ga te okenọ whọ gbẹ jọ isukulu. Whọ jẹ ruẹ ikpehre eware nọ ahwo a je ru, yọ who je yo eme nọ a jẹ ta. Kọ whọ jẹ dina wo avro evaọ udu ra fikinọ a jẹ ta nọ ẹma a ma eware he? Kọ o jẹ bẹ owhẹ re whọ gba oma ra re who gbe ru ikpehre eware nọ emọ isukulu ra a je ru hu, hayo kọ i je si owhẹ urru? Otẹrọnọ who je ti kie kẹ eware jọ no, eme who re ru enẹna re whọ sai dikihẹ ga ziezi? Whọ rẹ daoma re oware ovo o gbẹ raha iroro ra ha nọ who bi ti kpohọ isukulu efa na.—2 Tim. 2:16-18.b

10. Nọ who te mu isukulu efa họ no, ẹvẹ whọ sae gbẹ rọ sẹro iroro ra?

¹⁰ Nọ who te mu isukulu na họ no, hae nọ omara enọ wọhọ, ‘Kọ iruemu efafariẹ ahwo na i mu omẹ họ ẹwere no? Kọ me bi muẹrohọ nọ eware jọ nọ a bi wuhrẹ na e thọ? Kọ u mu omẹ ẹro ziezi nọ Uvie Ọghẹnẹ ọvo u ti ku ebẹbẹ akpọ na họ?’ Hae romatotọ wuhrẹ Ẹme Ọghẹnẹ re whọ sae sẹro iroro ra. Who te bi wuhrẹ Ebaibol na je roro kpahe ẹme Ọghẹnẹ kokodo, u ti mu owhẹ ẹro gaga nọ eware nọ whọ jọ Ebaibol wuhrẹ na họ uzẹme na.—1 Tim. 4:15.

NABE MA OMAA EWARE NỌ WHỌ RẸ RỌ OKE RA RU

11. Nọ who te mu isukulu efa họ ẹnya no, eware jọ vẹ e sae rehọ oke ra?

¹¹ Oware nọ o sae rọ jọ bẹbẹ. Who te bi kpohọ isukulu efa, eware buobu e rẹ sae rehọ oke ra. Whọ tẹ be ruẹrẹ oma kpahe kẹ ẹdawọ, hayo nọ oke nọ a fihọ inọ who ro ru oware jọ nọ a kẹ owhẹ evaọ obọ isukulu u te bi te no, who re gbe wo uvẹ hẹ. Fikiere fi oke họ nọ who re ro ru oware ọvuọvo, re whọ jẹ hae kaki mu ai họ, re eware na kpobi i gbe kie fihọ oke ọvo kẹ owhẹ hẹ. Keme u re ru nọ whọ rẹ rọ kwa eware vọ abọ. O vẹ te whae ze nọ oma o te rọ rrọ owhẹ gaga. Kareghẹhọ nọ o roja re whọ rẹrote omara re oma o gbẹ rrọ owhẹ ga hrọ họ.

12. Eware jọ vẹ who re ru nọ u re dhesẹ nọ whọ be ‘rehọ oke ra ruiruo evaọ edhere nọ ọ mai woma’? (Ahwo Ẹfisọs 5:15, 16)

¹² Se Ahwo Ẹfisọs 5:15, 16. O te lọhọ tere he re whọ “rehọ oke [ra] ruiruo evaọ edhere nọ ọ mai woma.” Keme eware buobu e vọ riẹ nọ who bi ru. Rekọ u fo re whọ daoma kuomagbe inievo ukoko na je lele ahwo uviuwou ra ta ẹme. Onana u wuzou vi isukulu nọ whọ be nya na. (Ol. 133:1; Itẹ 18:1) U te no ere no, who re je ru eware nọ i re si owhẹ kẹle Jihova keme eware nọ e mai wuzou eye. (Mat. 6:33) Yọ ẹsejọhọ eware jọ e riẹ nọ u fo nọ who re ru kẹ ahwo uviuwou ra, hayo who wo iruo jọ nọ who bi ru nọ whọ be maki kpohọ isukulu na. Ere ọvo ho, whọ rẹ jẹ wezẹ doma je ru eware nọ i re ru oma ra jaja. (Ọtausi. 4:6; 1 Tim. 4:8) Who gbe fi oke họ nọ who re ro ru eware jọ họ, whọ sai ru eware nana kpobi hi.

13. Eme who re ru re whọ sae rọ oke ra ru eware nọ u fo nọ who re ru?

¹³ Oware nọ who re ru re who te ti mu isukulu efa họ. Ebaibol ọ ta nọ u re woma kẹ ohwo nọ ọ rẹ ma omaa ziezi. (Itẹ 21:5) Fikiere ma omaa eware nọ who ti ru fihotọ no taure who te ti mu isukulu efa họ. Oware jọ nọ u ti fiobọhọ kẹ owhẹ họ, nọ omara nọ, ‘Oke ẹdẹ nọ mẹ gbẹ jọ isukulu, kọ mẹ jẹ sae ginẹ rọ oke mẹ ru eware nọ u fo nọ me re ru?’ Whọ tẹ ruẹ nọ whọ jẹ daoma tere he, roro oware nọ whọ rẹ sai ru enẹna re whọ sae rọ oke ra ru eware nọ u fo, nọ who ti kpohọ isukulu efa na. Ma omaa eware nọ who re ru, re whọ jẹ gba oma họ ru ai, whọ raha oke ra kufiẹ hẹ.c

14. Enọ jọ vẹ whọ rẹ sae nọ omara?

¹⁴ Who te mu isukulu efa họ no, hae nọ omara enọ ẹsejọ. Nọ omara nọ: ‘Kọ mẹ be sai ru eware nọ i re ru oma mẹ jaja? Kọ mẹ be wezẹ doma? Kọ mẹ be sai wo uvẹ jọ kugbe inievo ukoko na? Kọ eware nọ a jọ obọ isukulu kẹ omẹ inọ me ru evaọ obọ uwou, mẹ be sai ru ai no evaọ ẹruoke? Otẹrọnọ mẹ be sai ru ai hi, eme o be whae ze? Kọ fikinọ eware na i bu omẹ abọ hrọ binikọ fikinọ me bi ru meti meti? Kọ mẹ tẹ ta nọ eware isukulu na i bu hrọ jabọ mẹ gbẹ be sai ro ru eware jọ họ, ahwo uviuwou mẹ gbe amọfa a te rọwo nọ ere o ginẹ rrọ?’ Whọ tẹ ruẹ nọ eware na i gine bu hrọ, hayo who bi mu oke raha kufiẹ, daoma ru oware jọ kpahe iẹe vẹrẹ. Whọ sae ta ẹme na kẹ ahwo nọ a wo eware buobu nọ a bi ru rekọ a be sai ru ai ghele.—Itẹ 11:14.

GBẸ HAI ‘LELE AHWO NỌ I WO AREGHẸ NYA USU’

15. Odawọ vẹ o sai te owhẹ evaọ isukulu nọ whọ be nya na?

¹⁵ Oware nọ o sae rọ jọ bẹbẹ. Who te kpohọ isukulu efa no, emọ isukulu ra a te gwọlọ nọ whọ hai lele ai ru eware jọ nọ a re ru nọ i wobọ kugbe isukulu na ha. Ẹsejọhọ whọ te gwọlọ lele ai ru eware itieye na jọ. Otẹrọnọ wha rẹ jọ eklase euwa buobu, who ti rri rai nọ enwene oghẹrẹ ovona whai kpobi wha rrọ. Ẹsejọ dede who ti rri rai nọ wha bi ru ọkpọ eware evona vi inievo ukoko na jọ. Rekọ yọroma, wha make rrọ eklase ọvona, ẹrọwọ ọvona wha wo ho, yọ uzuazọ ovona wha bi yeri hi. Epanọ whọ nya usu kugbe ai te, ere whọ te gwọlọ rọ aro kele ai te. (1 Kọr. 15:33) Oniọvo jọ nọ a re se Michael nọ ọ nyai wuhrẹ ẹlẹtrishane evaọ ikpe ene ọ ruẹ nọ ere o ginẹ rrọ. Ọ ta nọ, “Koka koka mẹ avọ ahwo nọ ma gbe je wuhrẹ na ma rẹ rehọ euwa nọ i bu vi udhuvẹ (40) ru iruo kugbe. Ẹmẹrera na, oghẹrẹ nọ a rri usu ọmọtẹ avọ ọmọzae, oghẹrẹ ile nọ a jẹ hai kporo, gbe eme etọtọ nọ a jẹ hae ta i te mu omẹ họ ẹwere.”

16. Amono họ “iwareghẹ” na nọ u fo nọ who re lele “nya usu”? (Itẹ 13:20)

¹⁶ Se Itẹ 13:20. Ebaibol e vẹvẹ omai unu inọ ma tẹ nya ekpehre usu, ma ti kie ruọ ẹbẹbẹ. Rekọ ohwo nọ o bi “lele iwareghẹ nya usu o re wo areghẹ.” Ẹme o re gbe vẹ viere he, usu o rẹ sai fiobọhọ kẹ omai, yọ o rẹ sae raha omai re. Gbẹ hai lele ahwo nọ a gwọlọ nọ whọ jọ ogbẹnyusu Ọghẹnẹ nya usu. Ahwo nana họ enọ e be rọ eva rai kpobi gọ Jihova wọhọ epanọ who bi ru na.—Ol. 101:6, 7; 119:63

17. Eme who re ru re whọ gbẹ nya usu nọ o rẹ raha owhẹ hẹ?

¹⁷ Oware nọ who re ru re who te ti mu isukulu efa họ. Riẹ epanọ who ti lele emọ isukulu ra ru eware te. Oniọvo jọ nọ a re se Trenton ọ ta nọ: “Me bi lele emọ isukulu mai riẹ yeri, rekọ nọ isukulu e tẹ fa no, me re lele ai ru oware ovo ho. Mẹ ta kẹ omamẹ nọ, emọ isukulu mẹ a rrọ orọnikọ egbẹnyusu mẹ hẹ.” Kọ whẹ omara, ẹvẹ usu ra avọ emọ eklase ra o te jọ? Re whọ sae kuyo onọ yena, roro oware nọ who ru okenọ whọ jọ ekọleji. Eme u fiobọhọ kẹ owhẹ nọ whọ gbẹ rọ nya ekpehre usu hu? Otẹrọnọ whọ jẹ nya usu jọ nọ u woma tere he, eme who re ru obọnana re o gbẹ jọ ere he? Ta kẹ omara nọ, who re lele “iwareghẹ nya usu,” whọ vẹ kẹnoma kẹ ahwo nọ a you Jihova ha.d

18. Enọ vẹ whọ rẹ nọ omara nọ i ti fiobọhọ kẹ owhẹ? (Rri uwoho na re.)

¹⁸ Hai dhe omara ẹnẹnọ inọ: ‘Kọ usu mẹ avọ emọ eklase mẹ na o gbẹ be ga hrọ no? Kọ uruemu rai u mu omẹ họ ewholo no, hayo kọ me mu rai họ ẹrarokele no evaọ oghẹrẹ nọ a rẹ ta ẹme gbe oghẹrẹ nọ a re rri eware? Kọ Jihova o rri omẹ nọ me mu ekpehre usu họ ẹnya no dede nọ me roro nọ u ri yoma tere he?’ (Ol. 1:1) Whọ tẹ ruẹ nọ usu jọ nọ whọ be nya u wo irekọ, siọ usu yena ba vẹrẹ vẹrẹ. Lele ahwo nọ a you Jihova wọhọ epanọ who you rie na nya usu. Oware ofa nọ u ti fiobọhọ kẹ owhẹ họ, mu usi uwoma họ ẹta kẹ emọ eklase ra vẹrẹ vẹrẹ. Who wo obọdẹ uvẹ nọ whọ sai ro wuhrẹ ai kpahe Ọghẹnẹ.

RUẸRẸ OMA KPAHE

19. Oghẹrẹ vẹ whọ sae rọ ruẹrẹ oma kpahe kẹ edawọ nọ i ti te owhẹ nọ who te mu isukulu efa họ no? Kẹ oriruo.

¹⁹ Ohwo nọ ọ be te nya owhawho vrẹ, ọ rẹ ruẹrẹ oma kpahe re o te ti kpohọ ẹwọ na. Ọ sae nwane riẹ oware kpobi nọ ọ te nyaku evaọ owhawho na ha. Fikiere ọ rẹ gbamu. O re ku iwu gbe eviẹ họ re eware e gbẹ bẹre iẹe oma ha. Yọ ọ rẹ tẹrovi obonọ ọ gwọlọ nya na. Epọvo na re, re who te ti kpohọ isukulu na, whọ rẹ gbamu kekeke. Gbẹ hai ru eware nọ i re ru ẹrọwọ ra ga. “Whẹ ẹgọ-ẹmo ọsoso nọ o no obọ Ọghẹnẹ ze na họ oma.” Whọ vẹ jẹ tẹrovi oware nọ whọ gwọlọ ru, koyehọ re who ru oware nọ o rẹ wha orro se Ọghẹnẹ ẹsikpobi.—Ẹf. 6:11-13; 1 Kọr. 9:26, 27; 10:31.

20. Ẹvẹ whọ sae ‘hae rọ dawo sọ whọ gbẹ rrọ ẹrọwọ na’?

²⁰ Ebaibol ọ ta nọ: “Wha hae dawo sọ wha gbẹ rrọ ẹrọwọ na; wha hai dhesẹ oghẹrẹ ohwo nọ wha rrọ via.” (2 Kọr. 13:5) Nọ oware nọ u fo nọ who re ru nọ who te kpohọ isukulu efa no. Hae rọ eware nọ ma ta kpahe evaọ uzoẹme nana kiẹ omara riwi sọ whọ gbẹ rrọ ẹrọwọ na. Kọ who gbe bi ru eware nọ e rẹ lẹliẹ usu ra kugbe Jihova ga? Kọ whọ be sẹro iroro ra re eriariẹ akpọ na e gbẹ raha owhẹ hẹ? Kọ who fi oke họ kẹ eware nọ whọ gwọlọ ru re whọ gbẹ raha oke jọ kufiẹ hẹ? Kọ who bi lele inievo nọ i kruga nya usu, jẹ be kẹnoma kẹ ahwo nọ a rẹ sae raha owhẹ? Nọ enọ nọ u fo nọ mai kpobi ma rẹ nọ omamai, te ma rrọ isukulu te ma rrọ isukulu hu. Oghẹrẹ kpobi nọ eware e rrọ kẹhẹ, kru egagọ Jihova ga. Whọ tẹ be daoma ru oware nọ Jihova ọ gwọlọ, o ti fiobọhọ kẹ owhẹ kru ẹrọwọ ra.—Itẹ 3:5, 6.