Wuhrẹ Epanọ A rẹ Jiroro nọ E Rọwokugbe Ehrẹ Ebaibol

1-2. (a) Emamọ uvẹ vẹ Ọghẹnẹ ọ kẹ Adamu avọ Ivi? (b) Kọ ẹvẹ a hai ro dhesẹ nọ oware nọ Ọghẹnẹ ọ kẹ rai na o were rai?

ARAO o re roro ho, onọ a ma riẹ nọ o ru na ọvo o re ru. Yọ a te ku ẹjini, oware nọ a ku rie nọ o ru ọvo o re ru. Rekọ ohwo-akpọ ọ rrọ ere he. Ọghẹnẹ ọ kẹ omai emamọ uvẹ jọ, uvẹ nọ ma rẹ rọ jiroro oware nọ ma gwọlọ ru. Yọ mai Ileleikristi uzẹme ma rọ uvẹ na zaharo vievie he. Ebaibol ọ vuẹ omai nọ uwoho Ọghẹnẹ a rọ ma Adamu. (Emu. 1:26, 27) Fikiere Adamu avọ Ivi a wo uvẹ nọ a rẹ rọ jiroro oware nọ a gwọlọ ru.

² Jihova o jie izi buobu kẹ Adamu avọ Ivi hi. Oware nọ ọ vuẹ rai ọvo họ, anọ a rẹrote otọakpọ na je yẹ emọ. A vẹ kẹnoma kẹ oware nọ Ọghẹnẹ ọ ta kẹ ae nọ a ru hu, keme ọye o wo udu nọ ọ rẹ rọ vuẹ ae oware nọ a re ru gbe onọ a re ru hu. (Emu. 1:28; 2:16, 17) Kọ ẹvẹ Adamu avọ Ivi a hai ro dhesẹ nọ a rri uvẹ nọ Ọghẹnẹ ọ kẹ rai na ruaro? O hae jọnọ a gine you Jihova, jẹ gwọlọ ru oware nọ o rẹ were iẹe, eware nọ o ru kẹ ae e tẹ jẹ da ae ẹro, a hai ti ru omoware olọlọhọ nọ ọ vuẹ rai na.—Itẹ 23:15.

3. Ẹvẹ Adamu avọ Ivi a ru emamọ uvẹ nọ Ọghẹnẹ ọ kẹ rai na?

³ Ebaibol ọ vuẹ omai nọ Adamu avọ Ivi a rọ uvẹ nọ Ọghẹnẹ ọ kẹ rai na ru ugberuo. A yoẹme kẹ Ọghẹnẹ hẹ. Oware nọ a ru na u dhesẹ nọ a you Jihova ha, yọ eware nọ o ru kẹ ae e da rai ẹro ho. Omobọ rai ọvo a je roro kpahe. (Emu. 3:1-7) Oware nọ u no rie ze ma gbẹ be ruẹ uye riẹ na.—Rom 5:12.

4. (a) Eme ohwo kpobi o re ru wọhọ epanọ obe Ahwo Galesha 6:5 ọ ta? (b) Eme ọfa Ọghẹnẹ ọ kẹ ohwo-akpọ nọ ma te ta ẹme te evaọ uzoẹme nana?

⁴ Kẹdẹ kẹdẹ ma rẹ jiroro eware buobu nọ ma re ru. Ẹsejọ iroro na e rẹ bẹ ẹjẹ. (Se Ahwo Galesha 6:5.) Kọ ẹvẹ ma sae rọ jiroro nọ e rẹ were Jihova? Ma rẹ kake riẹ kẹ omamai nọ ababọ Jihova ma sae jẹ emamọ iroro ho. (Itẹ 16:3; Jeri. 10:23) Jesu nọ ọ make jọ gbagba dede na ọ lẹ se Jihova re o fiobọhọ kẹe. Kabikọ mai nọ ma gba ha! (Hib. 5:7) Mai ma rẹ mai tubẹ lẹ se Jihova re o fiobọhọ kẹ omai. Obọnana ma te ta ẹme kpahe emamọ okẹ ọfa jọ nọ Jihova ọ kẹ omai nọ u ti fiobọhọ kẹ omai jẹ emamọ iroro. Oye họ obruoziẹ-iroro mai na.

EME HỌ OBRUOZIẸ-IRORO?

5. (a) Eme họ obruoziẹ-iroro? (b) Ẹvẹ obruoziẹ-iroro mai ọ sai ro fiobọhọ kẹ omai? (Ahwo Rom 2:14, 15)

⁵ Obruoziẹ-iroro họ iroro nọ ohwo-akpọ o wo nọ u re fiobọhọ kẹe riẹ oware nọ u woma gbe onọ u yoma. Makọ ahwo nọ a riẹ izi Ọghẹnẹ hẹ a wo rie. (2 Kọr. 4:2) Obruoziẹ-iroro ọ wọhọ obruoziẹ nọ o re gu omai ẹdhọ nọ ma te ru thọ hayo nọ ma te bi roro iroro nọ i woma ha. Rekọ o re bru kẹ omai nọ ma te ru oware uwoma. (Se Ahwo Rom 2:14, 15.) Ohwo ọ tẹ gwọlọ ru oware nọ u woma ha, obruoziẹ-iroro na ọ rẹ vuẹe. (1 Sam. 26:8-11) O rẹ jẹ vuẹ omai re ma ru oware uwoma. Obruoziẹ-iroro na oye u bi fiobọhọ kẹ omai riẹ sọ oware nọ ma gwọlọ ru u woma hayo u woma ha. O gbẹ rrọ ọye he, uvẹ nọ Ọghẹnẹ ọ kẹ omai inọ ma jiroro kẹ omamai na, ma hae te sae rehọ iẹe jẹ emamọ iroro ho.

6. Fikieme obruoziẹ-iroro mai o gbe ru iruo ziezi ẹsejọ họ?

⁶ Obruoziẹ-iroro na o re fiobọhọ kẹ omai. Rekọ ẹsejọ o re ru iruo ziezi hi. Kọ eme o be whae ze na? Ma gba ha. Oghẹrẹ nọ a rọ yọrọ omai, ẹwho nọ ma no ze gbe ikpehre isiuru nọ ma reuku riẹ e sae lẹliẹ omai roro thọ. Ebaibol ọ ta ẹme te obruoziẹ-iroro nọ “ọ ga ha,” onọ u “gbeku no,” onọ u “whu-ikpi no wọhọ ohọroma nọ a rọ ayọno ọrrorro mahe” gbe “obruoziẹ-iroro omuomu.” (1 Kọr. 8:12; Tait. 1:15; 1 Tim. 4:2; Hib. 10:22) Nọ obruoziẹ-iroro ohwo o tẹ rrọ ere, ọ tẹ maki bi ru thọ, udu u re brukpei hi. Ọ rẹ jọ wọhọ iskeli nọ u bi ru iruo ziezi hi, nọ u fo nọ a rẹ ruẹrẹ. Fikiere, re obruoziẹ-iroro mai o sai ru iruo ziezi, ma re wuhrẹ iẹe. (1 Pita 3:16) Kọ ẹvẹ ma sai ro wuhrẹ iẹe?

EPANỌ MA SAI RO WUHRẸ OBRUOZIẸ-IRORO MAI

7-8. (a) Ẹvẹ ma sai ro wuhrẹ obruoziẹ-iroro mai na? (b) Ẹvẹ ehrẹ Ebaibol e sai ro fiobọhọ kẹ omai? Kẹ oriruo. (Rri uwoho na re.)

⁷ Ẹvẹ ma sai ro wuhrẹ obruoziẹ-iroro mai? Ma re se Ebaibol na kẹdẹ kẹdẹ ma vẹ jẹ daoma riẹ oware nọ o rẹ were Ọghẹnẹ gbe onọ o rẹ dhae eva. Nọ ma te bi roro didi kpahe izi Ọghẹnẹ, o rẹ lẹliẹ omai riẹ oghẹrẹ nọ Ọghẹnẹ o re rri eware. Rekọ wọhọ epanọ ma wuhrẹ evaọ uzoẹme nukpo na, orọnikọ izi na ọvo ma rẹ nwane tẹrovi hi, keme oware kpobi a jie uzi kpahe he. Fikiere ma rẹ daoma kiẹ gwọlọ ehrẹ nọ e rrọ Ebaibol na. Ehrẹ na i re fiobọhọ kẹ omai riẹ oware nọ o rẹ were Jihova nọ a gbẹ maki jie uzi ọvo kpahe oware jọ họ.—Aiz. 55:9.

⁸ Ma wọhọ ohwo nọ ọ be nya udhude kpohọ oria jọ. Rekọ a ru edhere ọvo fihọ udhude na ha. Yọ a ka oka fihọ oware ovo nọ whọ rẹ rọ riẹ obonọ whọ rẹ nya ha. Rekọ a tẹ drọ edhere nọ whọ rẹ nya fihọ obe kẹ owhẹ, whọ sae nya te obonọ whọ be nya, binikọ ere he? U re fiobọhọ kẹ owhẹ nọ who gbe vru hu. Nọ whọ tẹ be nya thọ, whọ rẹ riẹ, who ve zihe ziọ edhere na. Ebaibol na ọ wọhọ obe yena nọ a drọ edhere fihọ kẹ owhẹ na. O rẹ kpọ omai họ edhere. Ehrẹ Ebaibol i re fiobọhọ kẹ omai riẹ oware nọ o rẹ were Jihova. Ma te bi lele ehrẹ riẹ, ma ti vru hu.

9. Eme ọfa ọ rẹ sai fiobọhọ kẹ omai wuhrẹ obruoziẹ-iroro mai wọhọ epanọ obe Ahwo Rom 9:1 o ta?

⁹ Ọghẹnẹ ọ gbẹ rọ ẹzi ọfuafo riẹ fiobọhọ kẹ omai hi, ma sai wuhrẹ obruoziẹ-iroro mai ziezi hi. (Se Ahwo Rom 9:1.) Nọ ma tẹ gwọlọ ru oware jọ, ẹzi ọfuafo Jihova o re fiobọhọ kẹ omai riẹ oware nọ o rẹ were Jihova. O sai je ru nọ ma rẹ rọ gwọlọ ru oware nọ o rẹ were Jihova, jẹ kẹ omai ẹgba nọ ma re ro ru ei. (Fil. 2:13) Rekọ ẹvẹ ẹzi ọfuafo na ọ sai ro te omai obọ?

10. Eme ma re ru re ẹzi ọfuafo na ọ sai te omai obọ? (Luk 11:10, 13)

¹⁰ Lẹ se Jihova re ọ kẹ owhẹ ẹzi riẹ. (Se Luk 11:10, 13.) Ma riẹ nọ Jihova ọ rẹ keke obọ họ nọ ma tẹ yare iẹe nọ ọ kẹ omai ẹzi ọfuafo riẹ. (Jọn 3:34) Jihova ọ rẹ rọ ẹzi riẹ kẹ ahwo nọ a bi ru oware nọ o rẹ were iẹe. (Itẹ 1:23; Jem. 1:5) Kọ u te no ẹzi na nọ ma rẹ lẹ kẹ no, eme ọfa ọ sai fiobọhọ kẹ omai re ma wuhrẹ obruoziẹ-iroro mai?

11. (a) Eme ọ rẹ mae jọ omai oja evaọ uzuazọ mai? (b) Fikieme ma je wuhrẹ obruoziẹ-iroro mai ziezi?

¹¹ Evaọ oware kpobi, hae gwọlọ epanọ who re ro ru eva were Jihova. (Itẹ 8:34, 35) Oware nọ o rẹ mae jọ omai oja oye. Ma tẹ be hai roro epanọ ma re ro ru eva were Jihova evaọ oware kpobi nọ ma bi ru, yọ ewuhrẹ ma bi wuhrẹ obruoziẹ-iroro mai na. U ti ru nọ ma te rọ daoma rri eware epanọ Jihova o re rri eware, yọ ma te gwọlọ ru oware nọ o rẹ dhae eva ha. Ma te rri oghẹrẹ nọ akpọ ọ rrọ nẹnẹ, ma rẹ ruẹ nọ o ginẹ roja re ma wuhrẹ obruoziẹ-iroro mai ziezi. Keme u wo eware buobu nọ Ebaibol o jie uzi ovo kpahe he. Eware itieye jọ họ, oghẹrẹ erozaha hayo ifimu nọ ma re rri, oghẹrẹ iruo nọ ma re ru, oghẹrẹ nọ ma re kpohọ isukulu te gbe oghẹrẹ ahwo nọ ma rẹ jọ kugbe. Kinọ o rrọ ere na, ẹvẹ ma sae rọ riẹ oware nọ o rẹ were Jihova nọ ma tẹ be jiroro kpahe eware itienana?—2 Kọr. 1:12.

12. Ẹvẹ ma rẹ rọ riẹ sọ oware nọ obruoziẹ-iroro mai ọ be vuẹ omai o gba? (Ahwo Ẹfisọs 5:10)

¹² Hai roro didi kpahe eware nọ whọ be jọ Ebaibol se. (Ol. 49:3) Who te bi se Ebaibol, hai muẹrohọ ehrẹ nọ e rrọ eva riẹ nọ e sae lẹliẹ owhẹ riẹ oghẹrẹ nọ Jihova o re rri eware. (Se Ahwo Ẹfisọs 5:10.) Ebẹbẹ buobu i bi te omai nẹnẹ. Ma te rri ehrẹ Ebaibol, ma te riẹ sọ oware nọ udu mai o be vuẹ omai nọ ma ru kpahe ebẹbẹ na, o te were Jihova. (Itẹ 2:4-9, 11-13) Nọ ma tẹ rọ ehrẹ Ebaibol wuhrẹ omamai no, kọ eye e te kpọ omai họ re ma hai ru oware nọ Jihova ọ gwọlọ.—Hib. 5:14.

13. Eme ma re ru hu? Kẹ oriruo jọ.

¹³ Who du ta nọ enẹ me ti ru no re whọ gwọlọ ehrẹ Ebaibol jọ rọ foma ru ei hi. Ma te ru ere, ma te wọhọ ahwo Izrẹl nọ i kiọkọ ẹkwotọ Juda okenọ a raha Jerusalẹm no evaọ 607 B.C.E. A ta kẹ Jerimaya ọruẹaro na nọ: “Jọ Jihova Ọghẹnẹ ra ọ vuẹ omai edhere nọ u fo nọ ma rẹ nya gbe oware nọ u fo nọ ma re ru.” (Jeri. 42:3-6) A make ta ere kẹ Jerimaya na, yọ onọ a gwọlọ ru o rrọ ae eva. Fikiere nọ Jerimaya ọ vuẹ ae oware nọ Jihova ọ ta, o were rai hi keme oware nọ a gwọlọ oye he. Yọ o wha uye se ae. (Jeri. 42:19-22; 43:1, 2, 4) Ma jọ etẹe wuhrẹ nọ, taure ma tẹ te jiroro jọ kpobi, ma rẹ kake gwọlọ ehrẹ Ebaibol nọ i ti fiobọhọ kẹ omai riẹ oware nọ Jihova ọ gwọlọ, ma ve ru ei.

14. Ma tẹ gwọlọ ru oware jọ, fikieme ma re ro lele ehrẹ Ebaibol?

¹⁴ Hai lele ehrẹ Ebaibol nọ whọ tẹ gwọlọ ru oware jọ. (Mat. 7:24-29; Jem. 1:23-25) Nọ ma te bi lele ehrẹ Ebaibol evaọ oware kpobi nọ ma bi ru, kiyọ ma bi ru oware nọ ẹzi ọfuafo na ọ be kpọ omai nọ ma ru. Yọ ma te bi ru ere, Jihova ọ te hae gbẹ kẹ omai ẹzi riẹ. (Iruẹru 5:32) Rekọ ma gbe bi ru oware nọ ẹzi Ọghẹnẹ ọ be kpọ omai nọ ma ru hu, o sai ru nọ ma re ro “ru eva dha” ẹzi ọfuafo Ọghẹnẹ. Koyehọ ma be wọso ẹzi na. (Ẹf. 4:30; Aiz. 63:10; Iruẹru 7:51) O sae whae ze nọ Jihova ọ gbẹ kẹ omai ẹzi ọfuafo riẹ hẹ. (Ol. 51:11; 1 Tẹs. 5:19) Oware riẹ u yoma kẹhẹ keme ababọ ẹzi Ọghẹnẹ, ma sai wo ẹgba nọ ma re ro ru oware ovo ho.—Ẹf. 3:16.

EPANỌ MA SAE RỌ RUẸ EHRẸ EBAIBOL NỌ I RE FIOBỌHỌ KẸ OMAI

15-16. (a) Ẹvẹ ma sae rọ ruẹ ehrẹ Ebaibol nọ i re fiobọhọ kẹ omai? (b) Ehrẹ Ebaibol vẹ e sai fiobọhọ kẹ ohwo nọ who bi wuhrẹ Ebaibol re ọ siọ ivovavovo ba?

¹⁵ Jọ ebe ukoko na kiẹ gwọlọ ehrẹ Ebaibol. Re ma sai lele ehrẹ Ebaibol, ma rẹ kake kiẹ gwọlọ ae evaọ Ebaibol na. Dae rehọ iẹe nọ ohwo jọ nọ who bi wuhrẹ Ebaibol ọ gwọlọ siọ ivovavovo ba ha. Ẹsejọhọ ọ be ta nọ: ‘Oria Ebaibol ovo nọ o ta nọ who re vovo ho o riẹ hẹ. Kọ ẹvẹ ma rọ riẹ nọ o thọ?’ Ẹvẹ whọ sai ro fiobọhọ kẹe re ọ ruẹ ehrẹ Ebaibol nọ i ti fiobọhọ kẹe o ve roro kpahe ae? Whọ sae rọ Uwou-Ebe Itanẹte nọ o rrọ jw.org na ro fiobọhọ kẹe. Nọ who te rovie jw.org, who je rovie oria Ebe gbe Eware Efa na, whọ vẹ jọ otọ riẹ rovie Uwou-Ebe Itanẹte na. Whọ sai kere Ivovavovo fihọ oria nọ a rẹ jọ gwọlọ ẹme na. O te rehọ uzoẹme jọ ze nọ o ta nọ “Kọ Isigareti Ivovo yọ Uzioraha?” Nọ o te se uzoẹme na, ehrẹ Ebaibol vẹ ọ te ruẹ?

¹⁶ Joma dhunu te ehrẹ Ebaibol esa jọ nọ a ta ẹme te evaọ uzoẹme yena. Ọrọ ọsosuọ, ma re wo adhẹẹ kẹ uzuazọ. Ma re ru oware nọ o rẹ raha uzuazọ mai hi. (Iruẹru 17:24, 25) Ọrọ avọ ivẹ, ma re you ọrivẹ mai. (Mat. 22:39) Ma te you erivẹ mai, ma re ru oware nọ o rẹ wha ẹbẹbẹ se ai hi. Ọrọ avọ esa, u fo nọ ma rẹ jọ fuafo. Fikiere ma rẹ kẹnoma kẹ oware kpobi nọ u re gbe oma mai ku. (Rom 12:1) Enana kpobi i dhesẹ nọ dede nọ a jọ oria Ebaibol ọvo fodẹ ivovavovo ho na, ehrẹ jọ e rrọ eva riẹ nọ i re fiobọhọ kẹ ohwo nọ who bi wuhrẹ Ebaibol riẹ nọ ivovavovo e rẹ dha Jihova eva.

17. Ẹvẹ oniọvo-ọmọzae avọ oniọvo-ọmọtẹ nọ a be ma omaa ehaa orọo rai a sae rọ ruẹ ehrẹ nọ i re fiobọhọ kẹ ae?

¹⁷ Ẹvẹ oniọvo-ọmọzae avọ oniọvo-ọmọtẹ nọ a be ma omaa ehaa orọo rai, a sae rọ ruẹ ehrẹ Ebaibol nọ i re fiobọhọ kẹ ae jiroro nọ i fo? Obe Ekiakiẹ na o sai fiobọhọ re. Who te rri otọ uzoẹme nọ o ta nọ “Uzuazọ Uviuwou,” jariẹ rri uzoẹme osese nọ o ta nọ “Ehaa-Orọo,” whọ te ruẹ izoẹme jọ nọ e ta ẹme te ehrẹ Ebaibol nọ i re fiobọhọ kẹ owhẹ. Joma ta ẹme te ehrẹ ezeza jọ nọ e sai fiobọhọ. Ọrọ ọsosuọ, jọ eware nọ wha ti ru evaọ ẹdẹ ehaa-orọo na kpobi e wha ujiro se Jihova. (1 Kọr. 10:31, 32) Ọrọ avọ ivẹ, ẹgọ mai ọ rẹ jọ kpatiẹ, ọ rẹ jọ owowa, yọ ọ rẹ jọ onọ o rẹ kẹ ahwo uye he. (1 Tim. 2:9; 1 Pita 3:3, 4) Ọrọ avọ esa, ma rẹ whaha eware nọ a re ro dhesẹ oma nọ ahwo a bi ru evaọ akpọ Ẹdhọ nana. (Jọn 17:14; Jem. 1:27; 1 Jọn 2:15, 16) Ọrọ avọ ene, jọ eware na kpobi i koko oma họ jẹ nya kpatiẹ. (1 Kọr. 14:40) Ọrọ avọ isoi, ehaa nọ a ti ru ẹdẹ yena e rẹ jọ ehaa izizighi hi, enọ a rẹ jọ da idi vrẹ oma. (Gal. 5:21) Ọrọ avọ ezeza, wha re fi ohwo jọ họ nọ o re ru epanọ eware kpobi e rẹ rọ nya kpatiẹ ẹdẹ yena.—Jọn 2:8, 9.

18-19. (a) Obe ọfa vẹ o sai fiobọhọ kẹ omai? (b) Ehrẹ vẹ whọ rẹ jọ obe na ruẹ nọ i ti fiobọhọ kẹ owhẹ nọ a te zizie owhẹ kẹ ehaa jọ? (Rri ẹkpẹti na “Kọ Whọ Sae Jariẹ Muẹrohọ Eware nọ I re Fiobọhọ kẹ Owhẹ?”)

¹⁸ Obe ofa nọ u bi fiobọhọ kẹ ahwo buobu họ Eria Ebaibol nọ I re Fiobọhọ kẹ Omai Gọ Jihova. Whọ rẹ jọ obe na ruẹ izoẹme buobu nọ e ta kpahe eware nọ e be via nẹnẹ na. Evaọ otọ uzoẹme kpobi evaọ obe na, whọ rẹ ruẹ enọ gbe eria Ebaibol nọ e sai fiobọhọ kẹ owhẹ riẹ oware nọ who re ru. Ma rehọ iẹe nọ a zizie owhẹ kẹ ehaa jọ, who te bi roro sọ who re kpohọ ehaa na hayo whọ rẹ nya ha. Kpohọ obe na, re who rri otọ uzoẹme na “Ehaa,” whọ te jọ otọ riẹ ruẹ uzoẹme osese na “Ehaa nọ Ileleikristi a re ru hu.”

¹⁹ Onọ jọ nọ o rrọ etẹe họ, “Fikieme o rọ thọ re ma ru ehaa nọ i wobọ kugbe egagọ erue? (1 Kọr. 10:21; 2 Kọr. 6:14-18; Ẹf. 5:10, 11).” A jọ etẹe kẹ iriruo ehaa jọ nọ i wobọ kugbe egagọ erue. Who te rri otọ uzoẹme na “Ehaa orẹwho,” whọ rẹ ruẹ eria Ebaibol nọ e sai fiobọhọ kẹ owhẹ riẹ sọ who re kuomagbe ahwo ẹwho ra ru ehaa jọ. Wọhọ oriruo, ehaa nọ egọmeti a gwọlọ nọ a hai ru evaọ orẹwho na fiki oware jọ nọ o via evaọ oke nọ o vrẹ, hayo ehaa nọ a re ru re a rọ kareghẹhọ ẹmo jọ nọ a fi oke nọ u kpemu. Yọ o sae jẹ jọ ehaa nọ a re ru ro bru ọghọ họ ohwo ologbo jọ oma fiki oware jọ nọ o ru. Ma yere Jihova gaga nọ ọ rọ rehọ ukoko riẹ kẹ omai ebe itienana nọ ma re ro wuhrẹ obruoziẹ-iroro mai ziezi.

RU EWARE NỌ I DHESẸ NỌ WHO WUHRẸ OBRUOZIẸ-IRORO RA ZIEZI NO

20. Eme u re dhesẹ nọ ma wuhrẹ obruoziẹ-iroro mai ziezi no?

²⁰ Ma yere Jihova inọ ọ kẹ omai uvẹ nọ ma sai ro roro oware kẹ omamai. Rekọ ma riẹ nọ re ma sae rọ uvẹ nọ ọ kẹ omai na ru iruo ziezi, ma re wuhrẹ obruoziẹ-iroro mai na ziezi. Nọ ma te wuhrẹ iẹe ziezi, u re fiobọhọ kẹ omai ru oware nọ Jihova ọ gwọlọ. O vẹ jẹ wha ujiro se Jihova. Yọ re ma sai wuhrẹ iẹe ziezi, ma rẹ lẹ se Jihova re ọ rehọ ẹzi ọfuafo riẹ kẹ omai. Fikiere, joma gbẹ hae lẹ se Jihova re ọ kẹ omai ẹzi na. Ma vẹ daoma ru oware nọ ẹzi na ọ be kpọ omai nọ ma ru. Ehrẹ nọ e rrọ Ebaibol na i re je fiobọhọ kẹ omai riẹ oware nọ ma re ru. Fikiere ajọ ma rri eware nana nọ Jihova ọ kẹ omai na jeve jeve he. Ma gbe rri rai ere he, ma te ruẹ epanọ Ebaibol na o ti fiobọhọ kẹ omai te evaọ iroro nọ ma be jẹ.—2 Tim. 3:16, 17; Hib. 4:12.