Wo Ozodhẹ Jihova Wọhọ Obedaya

Obedaya ọye ọ jẹ rẹrote ahwo uwou ovie ọgeva nọ a re se Ehab. Ovie na ọ kuvẹ nọ ahwo Izrẹl buobu a jẹ rọ gọ Bale evaọ oria kpobi. Rekọ avọ ere ghele na, Obedaya o wo ozodhẹ Jihova gaga no “anwọ oke uzoge riẹ ze.” (1 Iv. 18:1-13) Fikiere nọ Jezibẹl nọ ọ rrọ aye-ovie na ọ kẹ udu inọ a kpe eruẹaro Jihova kpobi no, Obedaya ọ tẹ ruẹ nọ u fo re o ru oware jọ re ọ sae thọ ae. Rekọ re ọ sai ru ei, ọ rẹ gudu. Keme re o si ọruẹaro ọvo no dede, o lọhọ họ. Rekọ o si eruẹaro udhusoi (100) soso no. Ọ tẹ jẹ rọ emu se ai. Oke yena ahwo a jẹ ruẹ emu re he. Oware nọ Obedaya o je ru na o lọhọ họ keme eruẹaro Bale buobu a jẹ gbodibo kẹ ovie na avọ aye riẹ. Fikiere Obedaya ọ gbẹ riẹ ru hu, a re kru ei.—1 Iv. 18:19.

Kọ eme ma wuhrẹ mi ọzae nana nọ o wo ozodhẹ Jihova na? Ozọ Ehab u je mu Obedaya, rekọ ọ jẹ dhozọ riẹ vi Jihova ha. Oye o kẹ riẹ udu nọ ọ sai ro si eruẹaro Ọghẹnẹ no dede nọ ọ riẹ nọ a te kru rie, yọ oriẹ u re no. Nẹnẹ na, egọmeti ọ tẹ ta nọ ma gbe kpohọ ewuhrẹ hayo ta usi uwoma ha, joma ru oware nọ u dhesẹ nọ ma be dhozọ Ọghẹnẹ. O te so ẹe ze nọ ma te sai ro fiobọhọ kẹ inievo mai nọ uye o be bẹ.