Rọ Aro Kele Jihova Wo Omaurokpotọ

1. Fikieme u ro gbe owhẹ unu inọ Jihova o wo omaurokpotọ?

WHO te rri ahwo nọ a bi su akpọ na nẹnẹ na, kọ whọ rẹ kake ruẹ ọnọ o wo omaurokpotọ evaọ usu rai? Ijo. Rekọ Jihova, epanọ ọ maki kpehru te na, o wo omaurokpotọ ghele. (Ol. 113:5-8) A re wo omaurokpotọ te Jihova kabikọ ewo vi hi. O re ru omorro vievie he. Ma te jọ uzoẹme nana ta ẹme kpahe eware ene nọ i dhesẹ nọ Jihova o wo omaurokpotọ, yọ o te lẹliẹ omai ruẹ epanọ o woma te. Ma te jẹ ta ẹme kpahe oghẹrẹ nọ Jesu ọ rọ rehọ aro kele Ọsẹ riẹ dhesẹ nọ o wo omaurokpotọ. Eware nọ ma ti wuhrẹ na e te lẹliẹ omai gwọlọ go kẹle Jihova gaga. Yọ ma te gwọlọ nọ ma re wo omaurokpotọ ziezi epanọ ọyomariẹ o wo omaurokpotọ na.

JIHOVA YỌ ỌGHẸNẸ NỌ MA RẸ SAI GO KẸLE

2. Eme ẹme nọ ọ rrọ Olezi 62:8 u wuhrẹ omai kpahe Jihova? (Rri uwoho nọ o rrọ uke Uwou-Eroro na re.)

² Ahwo nọ a re ru omorro, ahwo a rẹ gwọlọ go kẹle ae he keme a rẹ wọ oma yeghe yeghe, a re ru amọfa wọhọ ẹsenọ a riẹ oware ovo ho. Rekọ Jihova Ọsẹ obọ odhiwu mai na ọ rrọ ere he. O wo omaurokpotọ. Oyejabọ nọ ọ rọ vuẹ omai nọ ma lẹ sei re ma vuẹe oware kpobi nọ o be kẹ omai uye. (Se Olezi 62:8.) Ọsẹ nọ o you emọ riẹ ọ rẹ gaviezọ kẹ emọ na nọ a tẹ be vuẹe oware nọ o be kẹ ae uye, o re le ai hi. Jihova ọ wọhọ ọsẹ otiọye na. Ọ gwọlọ nọ idibo riẹ a hae lẹ sei. O ru nọ a ro kere elẹ buobu nọ idibo riẹ a lẹ sei fihọ Ebaibol. Ọ be rọ ere vuẹ omai nọ eva e rẹ were iẹe gaga nọ ma tẹ be lẹ sei. (Jos. 10:12-14; 1 Sam. 1:10-18) Rekọ ẹsejọ ma re rri omamai nọ ma woma te ahwo nọ a rẹ lẹ se Jihova ha. Kọ eme ma re ru nọ ma te bi roro ere?

3. Eme o dhesẹ nọ Jihova ọ gwọlọ nọ whọ lẹ sei ẹsikpobi?

³ Ma tẹ maki bi rri omamai nọ ma gbe te ahwo nọ a rẹ lẹ se Jihova ha fiki oware jọ, joma lẹ sei ghele. Fikieme ma rọ ta ere? Nọ Jesu ọ jẹ kẹ oriruo ọmọ nọ ọ dhẹ siọ ọsẹ riẹ ba, ọ ta nọ okenọ aro ọmọ na o totọ no, ọ tẹ ta nọ o re zihe bru ọsẹ riẹ. O je rri omariẹ nọ o gbe te ohwo nọ a re se ọmọ ọsẹ na ha. Rekọ nọ o je zihe, nọ ọsẹ riẹ ọ nwane kparo ruẹ e riẹ, ọsẹ na “ọ tẹ dhẹ nya, ọ tẹ gbalọ iẹe, ọ tẹ nabe viọlọ iẹe.” (Luk 15:17-20) Ọsẹ na o wou kẹhẹ! Jihova ọ wọhọ ọsẹ yena. Nọ udu u te bi brukpe ohwo fiki oware jọ nọ o ruthọ hayo oware jọ o tẹ be kẹe uye evaọ udu riẹ, ọ tẹ lẹ se Jihova, Jihova ọ rẹ gaviezọ kẹ olẹ ohwo otiọye na ziezi. (Enu. 3:19, 20) Ohrọ ahwo otiọye na o rẹ re Jihova. Nwane wọhọ epanọ ọsẹ na ọ dhẹ bru ọmọ riẹ na, Jihova ọ rẹ dhẹ bru ahwo otiọye na re ọ jẹ ae riẹ nọ o you rai yọ ọ te re ohrọ rai. (Aiz. 57:15) Oghẹrẹ vẹ Jihova ọ rẹ rọ dhẹ bru ai? Ẹsibuobu ekpako ukoko na, ahwo uviuwou rai nọ e rrọ ukoko na, gbe inievo efa, ae Jihova ọ rẹ rọ tuduhọ ae awọ. (Jem. 5:14, 15) Jihova o bi ru eware yena kpobi kẹhẹ na, fikinọ ọ gwọlọ nọ ma kẹle iẹe.

4. Eme o dhesẹ nọ Jesu ọ jọ ohwo nọ a jẹ hai go kẹle?

⁴ Jesu ọ rọ aro kele Ọsẹ riẹ. Jesu o wo omaurokpotọ wọhọ Ọsẹ riẹ. Ma riẹ ere keme okenọ ọ jọ otọakpọ, ahwo a jẹ hae nyabru ei oke kpobi. Yọ a jẹ hae nọe enọ, ozọ riẹ u je mu ai hi. (Mak 4:10, 11) Otẹrọnọ ẹme jọ ọ rrọ otọ, Jesu ọ tẹ nọ ilele riẹ kpahe oghẹrẹ nọ a rri oware na, a jẹ hae ta oghẹrẹ nọ a gine rri oware na, a jẹ dhozọ họ. (Mat. 16:13-16) Yọ a te ruthọ, a jẹ hai nuhu zighi zighi hi inọ Jesu o ti doku ai keme a riẹ nọ Jesu ọ rrọ wowou, ọ rẹ re ohrọ ohwo, yọ o wo odiri. (Mat. 17:24-27) Jesu ọ rọ aro kele Ọsẹ riẹ evaọ oghẹrẹ nọ o je ro lele ahwo yeri. O tẹ whae ze nọ ilele riẹ a rọ riẹ oghẹrẹ ohwo nọ Jihova ọ rrọ ziezi. (Jọn 14:9) A tẹ te riẹ nọ Jihova o wo omaurokpotọ, yọ a rẹ sai go kẹle iẹe. Ọ wọhọ isu egagọ oke yena nọ a jẹ hae wọ oma ha, nọ a rẹ daezọ ahwo ho, yọ a rrọ eva gaga.

5. Ma te wo omaurokpotọ, ẹvẹ ma te jọ?

⁵ Ẹvẹ ma sae rọ rehọ aro kele Jihova? Ahwo a tẹ ruẹ nọ ma wo omaurokpotọ, a re gbe no akotọ mai hi. Ohwo nọ o wo omaurokpotọ họ ọ rẹ wọ oma, ọ rẹ gwọlọ rọvrẹ ohwo ho, yọ ọ rẹ re ihri. Ahwo a rẹ kẹnoma kẹ oghẹrẹ ohwo otiọye na. Rekọ ma te wo omaurokpotọ, ahwo a ti no akotọ mai hi keme ma ti lele ahwo riẹ yeri, ma ti wo odiri, yọ ma te rọvrẹ. (Kọl. 3:12-14) O roja gaga re ọkpako ukoko ọ jọ ohwo nọ a rẹ dhozọ riẹ hẹ, ọ rẹ jọ ohwo nọ amọfa a rẹ sae nyabru lọlọhọ. Rekọ nọ o gbe bi kpohọ ewuhrẹ re ahwo a ruẹ e riẹ hẹ, ẹvẹ inievo na a te sae rọ nyabru ei? Kọ oye u ro fo re ọkpako ọ hae daoma kpohọ ewuhrẹ evaọ obọ Ọgwa Uvie, orọnikọ ẹsikpobi ọ rẹ hae jọ obọ uwou kọnẹte kẹ ewuhrẹ hẹ ajokpanọ oware jọ o ginẹ gbae họ gaga. Yọ ọ rẹ daoma re ọ hai lele inievo na kpohọ usi uwoma. Enana kpobi e te whae ze nọ ekpako na a te rọ kẹle inievo na gaga. Fikiere ẹsenọ inievo na a te wo ẹbẹbẹ jọ, a te sae nyae ta kẹ ekpako na.

JIHOVA O RE SI EWARE KEKEKE HE

6-7. Gbiku ahwo jọ ze nọ u dhesẹ nọ Jihova o re si eware kekeke he.

⁶ Ahwo buobu nọ a wo omorro a rẹ gwọlọ nọ ọnọ a ta ze na ọvo ohwo kpobi ọ rẹ rọwo, a re si eware kekeke. Rekọ epanọ Jihova ọ maki kpehru te na, o re si eware kekeke he, ọ rẹ rọwo ẹme nọ amọfa a ta ze. Ẹvẹ ma rọ riẹ? U wo oke jọ nọ Miriam oniọvo Mosis, ọ jẹ ta ekpehre ẹme kpahe Mosis, yọ Erọn o je lele iei ta re. Nọ orọnọ Jihova ọye ọ rọ Mosis mu na, koyehọ Jihova Miriam ọ jẹ ta ekpehre ẹme kpahe na. Eva Miriam e dha Jihova, fikiere Jihova o te ru nọ ẹyao oti o ro tei oma. Uwhremu na, Erọn ọ tẹ lẹ Mosis re ọ ta kẹ Jihova nọ ivie jọ o si ẹyao na noi oma. Mosis ọ tẹ ginẹ lẹ Jihova. Kọ Jihova ọ ta nọ, ‘Ijo, onọ me ru, me ru no, a rẹ gbẹ ta ẹme fihọ iẹe he?’ O ru ere he. Fikinọ o wo omaurokpotọ, ọ rọwo ẹme nọ Mosis ọ ta kẹe na, o te si ẹyao na no Miriam oma.—Ik. 12:1-15.

⁷ Jihova o ru oware ofa jọ nọ u dhesẹ nọ o gine wo omaurokpotọ, o re si eware kekeke he. U wo oke jọ nọ Hẹzikaya ovie na ọ jẹ mọ gaga. Jihova o te vi ọruẹaro jọ nyae ta kẹ Hẹzikaya nọ ẹyao na o ti no whu. Hẹzikaya ọ tẹ lẹ Jihova gaga inọ o siwi ei. Kọ eme Jihova o ru? Jihova o siwi rie! O tube fi ikpe ikpegbisoi (15) họ ehru ikpe riẹ dede. (2 Iv. 20:1, 5, 6) Kọ Jihova o gbe wo omaurokpotọ họ, ọ hae te re ohrọ riẹ je ru oware nọ ọ lẹ riẹ na? Vievie.

8. Eme Jesu ọ jẹ hai ru nọ u dhesẹ nọ o je si eware kekeke he? (Mak 3:1-6)

⁸ Jesu ọ rọ aro kele Ọsẹ riẹ. Okenọ Jesu ọ jọ otọakpọ, ọ tẹ ruẹ ohwo nọ u fo nọ a re fiobọhọ kẹ, ọ jẹ hai fiobọhọ kẹe. Makinọ evaọ Ẹdijala dede, ọ jẹ hai siwi ahwo, ọ jẹ hai si eware kekeke he inọ a re ru oware ovo evaọ ẹdẹ yena ha. O make rọnọ eva riẹ e jẹ dha isu egagọ nọ e rẹ re ohrọ ohwo ho na, o je fiobọhọ kẹ ahwo ghele. (Se Mak 3:1-6.) Nẹnẹ na, oghẹrẹ nọ Jesu Kristi ọ be rọ kpọ eware evaọ ukoko na u dhesẹ nọ o re si eware kekeke he. Ohwo jọ ọ tẹ raha uzi ulogbo jọ evaọ ukoko na, Jesu ọ rẹ nwani lei no ukoko na ha. Rekọ o re gbe fiobọhọ kẹe sọ ọ sai kurẹriẹ.—Evia. 2:2-5.

9. Ẹvẹ ma sai ro dhesẹ nọ mai yọ ahwo nọ a re si eware kekeke he? (Rri iwoho na re.)

⁹ Ẹvẹ ma sae rọ rehọ aro kele Jihova? Ma wuhrẹ no nọ Jihova o re si eware kekeke he. U fo nọ ma rẹ daoma rọ aro kele iei. (Jem. 3:17, ẹme-obotọ) Ẹvẹ esẹgbini a sae rọ rehọ aro kele iei? A re rẹro oware nọ emọ rai a rẹ sai ru hu mi ai hi, a re roro kẹ ae. Orọnikọ oyena u dhesẹ nọ a rẹ nwane kẹ emọ na uvẹ re a ru epanọ u je rai hi. Ma te rri obe Emuhọ 33:12-14, ma rẹ ruẹ nọ Jekọp o roro kẹ emọ riẹ, yọ ere u fo nọ ọsẹgboni a re ru. Edhere ọfa nọ esẹgbini a sai ro dhesẹ nọ a wo omaurokpotọ je bi roro kẹ emọ rai họ, a re kele ọmọ jọ dhe ọmọ ọfa ha kpakiyọ a riẹ nọ ọmọ na ọ riẹ te ọnọ o kiọkọ họ hayo o wo ẹgba tei hi. Ekpako ukoko omarai a rẹ jọ ahwo nọ a re si eware kekeke he. Nọ ekpako a tẹ rrọ ẹgwae, ibuobu rai a tẹ rọwo fihọ oware jọ, nọ Ebaibol ọ gbẹ ta ẹme ọvo nọ u dhesẹ nọ o thọ họ, enọ i kiọkọ a rẹ rọwo fihọ iẹe. (1 Tim. 3:2, 3) U fo nọ mai kpobi ma rẹ daoma re ma gbẹ jọ ahwo nọ a re si eware kekeke he. Wọhọ oriruo, ohwo o gbe rri oware jọ oghẹrẹ nọ ma rri rie he, ma rẹ rehọ iẹe nọ ọnọ ọ rẹ were ohwo na ọye. (Rom 14:1) Jọ mai kpobi evaọ ukoko na ma daoma “ru re ahwo kpobi a ruẹ nọ [mai] yọ enọ i re si eware kekeke he.”—Fil. 4:5, ẹme-obotọ.

JIHOVA O WO ODIRI

10. Eme Jihova o ru nọ u dhesẹ nọ o wo odiri?

¹⁰ Ahwo nọ a wo omorro a rẹ gwọlọ hẹrẹ hẹ, a rẹ gwọlọ nọ a ru oware kpobi kẹ ae ababọ oke oraha. A wo odiri hi. Rekọ Jihova o wo odiri gaga. Evaọ oke Noa, nọ Jihova ọ ta nọ ọ te raha ahwo oyoma na, ikpe udhozeza (120) soso o fihọ inọ ọ te hẹrẹ te re ọ tẹ te raha ae. (Emu. 6:3) Odiri Ọghẹnẹ u ru nọ Noa o ro yẹ emọ jẹ yọrọ emọ na te ahwo, a te lele iei ku okọ. Uwhremu na nọ Jihova o vi ukọ-odhiwu riẹ ze te vuẹ Abraham nọ ọ be te raha Sọdọm avọ Gomora, Abraham ọ tẹ jẹ nọe enọ. Ukọ-odhiwu na ọ romatotọ kẹ iyo enọ riẹ kpobi. O gbe wo omaurokpotọ gbe odiri hi, ọ hae ta kẹ Abraham nọ, ‘Ono ọ kẹ owhẹ unu nọ whọ be rọ nọ omẹ enọ itieye na?’ Rekọ ukọ-odhiwu na ọ ta ere he fikinọ o wo odiri wọhọ epanọ Jihova o wo odiri na.—Emu. 18:20-33.

11. Ma te rri obe 2 Pita 3:9, fikieme Jihova ọ gbẹ re raha akpọ na ha?

¹¹ Jihova o wo odiri kẹ omai. O fi oke họ no nọ ọ te rọ raha akpọ na. Ọ gwọlọ raha akpọ na no re oke na u te ti te he. Fikieme? “Keme ọ gwọlọ nọ a raha ohwo ọvo ho rekọ ọ gwọlọ nọ ahwo kpobi a wo uvẹ nọ a re ro kurẹriẹ.” (Se 2 Pita 3:9.) Kọ ẹhẹrẹ nọ Jihova ọ be hẹrẹ na o wha erere jọ ze no? Ee! U ru nọ ahwo buobu nọ a ginẹ gwọlọ gọ Ọghẹnẹ a ro kurẹriẹ bru Jihova ze no. Yọ ma be lẹ nọ jọ amọfa buobu a gbe kurẹriẹ ze. Rekọ u wo oria nọ Jihova o ti thihakọ kẹ ohwo-akpọ ba. Keme dede nọ ọ gwọlọ nọ a raha ohwo ọvo ho na, ọ te kẹ ahwo omuomu uvẹ re a họre umuomu rifihọ họ.—Hab. 2:3.

12. Eme o dhesẹ nọ Jesu o wo odiri wọhọ epanọ Jihova o wo odiri na?

¹² Jesu ọ rọ aro kele Ọsẹ riẹ. Jesu o wo odiri gaga wọhọ Ọsẹ riẹ. U kri akpọ no nọ Setan ọ be rọ raha odẹ Jihova je bi gu erue fihọ idibo Jihova uzou. Jesu ọ be ruẹ eware nana kpobi, rekọ o bi thihakọ. (Emu. 3:4, 5; Job 1:11; Evia. 12:10) Yọ ọ be ruẹ epanọ uye o be bẹ ahwo-akpọ te. Ma riẹ nọ Jesu ọ gwọlọ nọ oke u te vẹrẹ “re ọ raha iruo Ẹdhọ,” re uye na u je kuhọ. (1 Jọn 3:8) Rekọ ọ be hẹrẹ oke nọ Jihova ọ te ta kẹe nọ ọ raha iruo Ẹdhọ kpobi no. Kọ ẹvẹ Jesu ọ be sai ro thihakọ hẹrẹ? O wo omaurokpotọ, ọ riẹ nọ Jihova ọye ọ riẹ oke nọ u fo nọ a rẹ rọ raha akpọ Ẹdhọ.—Iruẹru 1:7.

13. Eme o dhesẹ nọ Jesu o wo odiri kẹ ilele riẹ, kọ eme Jesu ọ riẹ nọ a ti ru?

¹³ Okenọ Jesu ọ jọ otọakpọ, o wo odiri gaga, ọ jẹ hai thihakọ kẹ ikọ riẹ. Kareghẹhọ nọ ikọ na a jẹ hae vro avro gaga kpahe ohwo nọ ọ mae rro evaọ usu rai. Rekọ Jesu o je thihakọ kẹ ae. (Luk 9:46; 22:24-27) Ọ riẹ nọ oke o be nya na, a ti nwene. Ẹsejọhọ oware jọ o thọ owhẹ obọ te ibrẹse no, hayo who kie kẹ odawọ jọ te isia bro no. Rekọ whọ tẹ kareghẹhọ nọ Jesu Kristi nọ ọ rrọ Ovie ra na o bi thihakọ kẹ owhẹ yọ o wo omaurokpotọ, udu u re te owhẹ otọ, binikọ ere he?

14. Eme ma re ru re ma sai wo odiri?

¹⁴ Ẹvẹ ma sae rọ rehọ aro kele Jihova? Ma rẹ daoma wo “iroro Kristi.” (1 Kọr. 2:16) Ma te ru ere, ẹsiẹe ma te sai gine rri eware epanọ Jihova o re rri eware. Ma ve ti je wo ọkpọ uruemu riẹ. Kọ ẹvẹ ma te sai ro wo iroro Kristi na? Ma rẹ nyai se obe Matiu rite obe Jọn. Nọ ma bi ti se na, ma rẹ romatotọ roro kpahe iku na re ma riẹ oghẹrẹ nọ Jesu ọ jẹ hai rri eware. Ma vẹ jẹ lẹ se Jihova re o fiobọhọ kẹ omai rọ aro kele Jesu wo omaurokpotọ gbe odiri. Ma tẹ be daoma wo iroro Kristi, ma ti wo oghẹrẹ uruemu nọ Jihova o wo. O te so ẹe ze nọ ma ti ro thihakọ kẹ inievo mai nọ a te ru omai thọ. Yọ ma ti rẹro nọ asohẹrioke ma re ro siobọno oghẹrẹ uruemu jọ nọ ma wo ho.—Mat. 18:26-30, 35.

JIHOVA O RE MUẸROHỌ ENỌ E BE ROMAKPOTỌ

15. Ẹvẹ Jihova o ro dhesẹ nọ o re muẹrohọ enọ e be romakpotọ wọhọ epanọ Olezi 138:6 o ta?

¹⁵ Se Olezi 138:6. Epanọ Jihova o kpehru te na, o re muẹrohọ ahwo nọ a be romakpotọ. Kọ oware riẹ o gbẹ rro? Evaọ oke anwae, u wo ahwo jọ nọ a jẹ romakpotọ nọ o sae jọ nọ ahwo a je muẹrohọ họ. Rekọ Jihova o muẹrohọ ae, o te ru nọ a rọ riẹ ae. Ahwo otiọye na jọ, iroro mai e rẹ kaki kpohọ ai hi. Rekọ Jihova o ru nọ a ro kere odẹ rai fihọ Ebaibol na. Ọ rọ Mosis kere odẹ aye jọ nọ a re se Debora fihọ Ebaibol. Aye na yọ aye nọ Aiziki avọ aye riẹ a rehọ ze nọ ọ jẹ hae rẹrote emọ rai. Yọ uwhremu na ọ jẹ rẹrote emọ Jekọp re. Oware wọhọ ikpe udhozeza-gbisoi (125) aye na ọ romakpotọ ru iruo nana. A jọ Ebaibol kere eme buobu kpahe iẹe he. Rekọ Jihova o ru nọ a ro kere eme jọ kpahe iẹe nọ o lẹliẹ omai riẹ nọ ọ ginẹ daoma gaga. (Emu. 24:59; 35:8, ẹme-obotọ) Nọ ikpe buobu e vrẹ no, Jihova o muẹrohọ ọmọ jọ nọ o je su igodẹ evaọ obọ ẹwọ. Odẹ riẹ Devidi. Jihova o te ru nọ a rọ rehọ iẹe mu ovie Izrẹl soso. (2 Sam. 22:1, 36) Uwhremu na, nọ a nwani yẹ Jesu no, ithuru-igodẹ họ ahwo nọ Jihova ọ kaki vi ukọ-odhiwu riẹ nyae ta kẹ nọ a yẹ ọmọ nọ ọ te jọ Mesaya na no evaọ Bẹtlẹhẹm. (Luk 2:8-11) Amọfa jọ nọ Jihova o muẹrohọ họ Simiọn gbe Anna. Aimava na a kpako no. Okenọ Josẹf avọ Meri a wọ Jesu kpobọ etẹmpol, Jihova o ru nọ Simiọn gbe Anna a rọ riẹ nọ Jesu họ ohwo nọ ọ te jọ osiwi na. (Luk 2:25-30, 36-38) Eware nọ Jihova o ru na i dhesẹ nọ “dede nọ Jihova o kpehru, o re muẹrohọ enọ e be romakpotọ.”

16. Ẹvẹ Jesu o ro dhesẹ nọ o je muẹrohọ ahwo nọ a be romakpotọ wọhọ epanọ Ọsẹ riẹ o re ru na?

¹⁶ Jesu ọ rọ aro kele Ọsẹ riẹ. Epanọ Jihova o re muẹrohọ ahwo nọ a be romakpotọ na, ere Jesu o ru re. O wuhrẹ ahwo nọ “a kpohọ isukulu hu” nọ “a viodẹ hẹ.” O wuhrẹ i rai kpahe Uvie Ọghẹnẹ. (Iruẹru 4:13; Mat. 11:25) Yọ Jesu o te bi siwi ahwo, orọnikọ thakpinọ o siwi rai ọvo ho. Ọ jẹ hai ru ai oghẹrẹ nọ oma o gbẹ rọ vuọ ae he. (Luk 5:13) Evaọ aso nọ a ro mu Jesu na, ọ wozẹ awọ ikọ riẹ. Oware nọ odibo o re ru o ru na. (Jọn 13:5) Taure Jesu o te ti zihe kpobọ odhiwu, o ru oware jọ nọ u dhesẹ nọ o se ilele riẹ gbe ahwo. Ọ kẹ rai iruo nọ e mai wuzou kpobi evaọ akpọ na. Iruo na i te omai nẹnẹ re. Iruo na họ re a wuhrẹ ahwo re a sai wo uzuazọ ebẹdẹ bẹdẹ.—Mat. 28:19, 20.

17. Ẹvẹ ma sai ro dhesẹ nọ ma bi rri ohwo ọvo vo ho? (Rri uwoho na re.)

¹⁷ Ẹvẹ ma sae rọ rehọ aro kele Jihova? Nọ ma be ta usi uwoma na, ma re rri ohwo ọvo vo ho. Ma rẹ ta usi uwoma kẹ oghẹrẹ ohwo kpobi, makọ oghẹrẹ ovioma nọ o wo kẹhẹ, te ọ riẹ obe te ọ riẹ obe he. Ma rẹ jẹ kẹ inievo mai adhẹẹ re. Ma re rri rai nọ a rro vi omai o tẹ make rọnọ ma wo obọdẹ iruo jọ evaọ ukoko na nọ a wo ho, hayo ma riẹ eware jọ eru vi ai. (Fil. 2:3) Ma te wo omaurokpotọ, ma re ru eware nana gbe efa. Ma te bi ru ai, kiyọ ma be “kobaro” evaọ ọghọ nọ ma rẹ kẹ ohwohwo. Yọ eva mai e te were Jihova.—Rom 12:10; Zẹf. 3:12.

18. Fikieme whọ rọ gwọlọ rọ aro kele Jihova wo omaurokpotọ?

¹⁸ Joma rọ aro kele Jihova Ọsẹ obọ odhiwu mai na wo omaurokpotọ. Ma te ru ere, ma te jọ ohwo nọ ahwo a rẹ sai go kẹle, ma ti si eware kekeke he, ma ti wo odiri, yọ ma ti rri ohwo ọvo vo ho. Ma te bi ru ere, ma te kẹle Ọghẹnẹ mai nọ o wo omaurokpotọ na gaga, yọ o ti rri omai kpobi na ghaghae.—Aiz. 43:4.