Roro Kpahe Jesu Ozerẹ Okpehru Mai nọ O re Roro Kẹ Ohwo

1-2. (a) Fikieme Jihova o ro vi Ọmọ riẹ ziọ otọakpọ? (b) Eme ma te ta kpahe evaọ uzoẹme nana? (Ahwo Hibru 5:​7-9)

OWARE wọhọ ikpe idu ivẹ (2,000) nọ i kpemu, Jihova Ọghẹnẹ o vi Ọmọ ọghaghae riẹ nọ ọ mai ghare iẹe obọ ziọ otọakpọ. Re o ti ru eme? Re ọ ta omai no uzioraha gbe uwhu nọ ma reuku riẹ na, re ebẹbẹ nọ Setan ọ wha ze i notọ. (Jọn 3:16; 1 Jọn 3:8) Rekọ oye ọvo ho, u wo eware efa nọ Jihova o ro vi ei ze. Jihova ọ riẹ nọ Jesu ọ tẹ rria otọakpọ na, eware nọ e te via kẹe gbe enọ ọ te ruẹ e te lẹliẹe jọ emamọ Ozerẹ Okpehru nọ o re roro kẹ ohwo. Yọ o te lẹliẹe wo ohrọ-oriọ re. Jesu o zihe ruọ Ozerẹ Okpehru evaọ okenọ ọ họ-ame no evaọ 29 C.E.a

² Ma te jọ uzoẹme nana ta ẹme kpahe eware nọ Jesu ọ ruẹ okenọ ọ jọ otọakpọ nọ i fiobọhọ kẹe rrọ Ozerẹ Okpehru nọ o re roro kẹ omai. Nọ ma bi ti wuhrẹ kpahe oghẹrẹ nọ a ro “ru ei te gbagba” na, ma te ruẹ nọ u fo re ma hae lẹ se Jihova re o fiobọhọ kẹ omai nọ ma tẹ maki roro nọ izieraha hayo ethobọ mai i bu hrọ.—Se Ahwo Hibru 5:​7-9.

ỌMỌ ỌGHẸNẸ, ỌNỌ O YOU GAGA NA Ọ ZIỌ OTỌAKPỌ

3-4. Eme o dhesẹ nọ uzuazọ nọ Jesu ọ jọ evaọ obọ odhiwu u wo ohẹriẹ gaga no onọ ọ jọ evaọ obọ otọakpọ obonẹ?

³ Re ohwo ọ wariẹ mu akpọ họ hayo mu oware okpokpọ họ o lọhọ tere he. Mai itu mai jọ ma kwa kpohọ oria ofa no. Fikiere ma riẹ oghẹrẹ nọ o rẹ jọ re ohwo ọ kwa no uwou nọ u kiehọ iẹe oma, jẹ nyasiọ ahwo uwou riẹ gbe egbẹnyusu riẹ ba. Rekọ ohwo ọvo nọ uzuazọ riẹ u nwene te orọ Jesu no ọ riẹ hẹ. Nọ ọ jọ obọ odhiwu, ọ jọ ohwo ologbo evaọ usu emọ Jihova nọ i wo oma ẹzi na. Ọ jẹ ghọghọ ẹsikpobi evaọ “obọze” Ọghẹnẹ keme Jihova o you rie gaga. (Ol. 16:11; Itẹ 8:30) Rekọ obe Ahwo Filipai 2:7 o ta nọ “o siobọno eware kpobi,” koyehọ ọ nyasiọ ọkwa ologbo nọ ọ jọ evaọ obọ odhiwu na ba. Ọ tẹ nyaze te rria udevie ahwo-akpọ nọ e gba ha.

⁴ Roro kpahe oware nọ o via okenọ a yẹ Jesu gbe oghẹrẹ nọ eware e jọ kẹe okenọ ọ jọ ọmaha. Ọsẹgboni Jesu a wo ugho ho. Ma riẹ ere keme nọ a yẹ Jesu no, idhe nọ ọsẹgboni riẹ a dhe u dhesẹ nọ iyogbe a jọ. (Izerẹ 12:8; Luk 2:24) Nọ Herọd ovie na o yo nọ a yẹ Jesu no, ọ tẹ jẹ gwọlọ epanọ o re ro kpei no. Re a se iẹe ba ekpe, ọsẹgboni riẹ a tẹ wọe dhẹ kpobọ Ijipti. Yọ a rria obei omoke jọ. (Mat. 2:​13, 15) Uzuazọ riẹ u gine wo ohẹriẹ gaga no okenọ ọ jọ obọ odhiwu.

5. Eme Jesu ọ ruẹ okenọ ọ jọ otọakpọ, kọ ẹvẹ eware yena i ro fiobọhọ kẹe rrọ emamọ Ozerẹ Okpehru? (Rri uwoho na re.)

⁵ Nọ Jesu ọ jọ otọakpọ, ọ ruẹ ahwo nọ uye o jẹ bẹ evaọ oria kpobi. Ẹsejọhọ ahwo riẹ jọ a whu. O wọhọ nọ ọsẹ riẹ Josẹf o whu se iẹe ba re. Okenọ Jesu ọ jẹ ta usi uwoma, ọ jẹ hae ruẹ emoti, ahwo nọ a tuaro, enọ okie o kie, gbe ahwo nọ emọ rai i whu, yọ ohrọ rai o jẹ re iẹe. (Mat. 9:​2, 6; 15:30; 20:34; Mak 1:​40, 41; Luk 7:13) Ma riẹ nọ okenọ ọ jọ obọ odhiwu, ọ jẹ ruẹ nọ ahwo a be ginẹ ruẹ uye. Rekọ okenọ ọ jọ ohwo-akpọ eware nana e mae rọ dae. (Aiz. 53:4) Oware nọ Jesu ọ rọ ẹro ruẹ evaọ otọakpọ na o lẹliẹ e riẹ riẹ epanọ ebẹbẹ nọ e rrọ akpọ na e be kẹ ahwo uye te. Ẹsejọ ọyomariẹ ọ jẹ hae rova, je weri. Yọ oma o jẹ hae whọlọ iẹe wọhọ amọfa re.

JESUS Ọ JẸ RE OHRỌ AHWO

6. Oghẹrẹ vẹ Aizaya ọruẹaro na o dhesẹ ahwo nọ Jesu ọ te re ohrọ, kọ eme oyena u wuhrẹ omai? (Aizaya 42:3)

⁶ Nọ Jesu ọ jọ otọakpọ ọ jẹ re ohrọ ahwo gaga. Ọ jẹ re ohrọ enọ uye o be bẹ gbe enọ a rri vo. A ruẹaro kpahe iẹe no vẹre inọ ere o ti ru. Evaọ eria jọ Ikereakere Hibru na, a dhesẹ ahwo nọ eware i woma kẹ gbe enọ e rrọ gaga wọhọ emamọ ọgbọ hayo ikpire. (Ol. 92:12; Aiz. 61:3; Jeri. 31:12) A te dhesẹ iyogbe gbe enọ a bi gboja kẹ wọhọ ukpoko nọ u wiri rẹrẹ gbe uwhiki ukpẹ nọ u muhọ efu no. (Se Aizaya 42:3; Mat. 12:20) Ẹzi Ọghẹnẹ ọ wọ Aizaya rehọ eware yena ta ẹme okenọ ọ jẹ ruẹaro kpahe oghẹrẹ nọ Jesu o ti ro you ahwo nọ a rri vo jẹ re ohrọ rai.

7-8. Ẹvẹ Jesu o ro ru eruẹaruẹ Aizaya gba?

⁷ Nọ Matiu o je kere iku Jesu ọ ta nọ Jesu o ru eruẹaruẹ Aizaya na gba. O kere nọ: “O ti wiri ukpoko nọ u wiri rẹrẹ no ho, yọ o ti furie uwhiki nọ u bi kuye iwiri hi.” Jesu o ru eware igbunu kẹ ahwo jọ nọ a rri vo. Ẹsejọhọ ahwo otiọye na a je rri omarai wọhọ ukpoko nọ u wiri rẹrẹ no. O sae jọ nọ a gbe wo ẹruore he, wọhọ uwhiki nọ o joma fu no nọ u bi kuye iwiri. Ohwo otiọye jọ họ ọzae jọ nọ ọ jẹ mọ oti. O sae jọ nọ o roro nọ ẹyao na o ti kpei, a sai ti siwi ei re ọ wariẹ jọ kugbe ahwo uviuwou riẹ gbe egbẹnyusu riẹ hẹ. (Luk 5:​12, 13) Ọzae ọfa jọ ọ jariẹ nọ o diezọ yọ ọ jẹ sae ta ẹme ziezi hi. Dai roro epanọ o jẹ kẹe uye te nọ ọ tẹ ruẹ ahwo nọ a bi gbiku yọ a be hwẹ jẹ rọ abọ gbe oma rai kpobi dhesẹ oware nọ a be ta na, rekọ ọ riẹ oware nọ a be ta ha. (Mak 7:​32, 33) O jọ etẹe kuhọ họ.

⁸ Evaọ oke yena, ahwo Ju buobu a roro nọ ohwo nọ o wo oghẹrẹ ebẹbẹ itieye, yọ izieraha riẹ hayo erọ ọsẹgboni riẹ e wha riẹ ze. (Jọn 9:2) Oware nana o wha riẹ ze nọ a je ro rri ahwo nọ a be reoja wọhọ ahwo nọ a wotọ họ. Rekọ Jesu o siwi enọ e jẹ reoja, je ru nọ a ro wo ẹruore, u te ru eruẹaruẹ Aizaya gba. Kọ eme onana o lẹliẹ omai riẹ?

9. Ẹvẹ obe Ahwo Hibru 4:​15, 16 o ro dhesẹ nọ Ozerẹ Okpehru mai na o bi gine roro kẹ omai ahwo-akpọ nọ e gba ha?

⁹ Se Ahwo Hibru 4:​15, 16. Ma riẹ nọ Jesu o bi roro kẹ omai re. Eme u dhesẹ re a roro kẹ ohwo? Ohwo nọ o re roro kẹ ohwo ọ tẹ ruẹ ohwo nọ ọ be ruẹ uye hayo nọ eva e be were he, o rẹ dae gaga. Ẹme Griki nọ a fa “roro kẹ” na o dhesẹ epanọ oware nọ o be kẹ omọfa uye o rẹ kẹ owhẹ uye. (Rri obe Ahwo Hibru 10:34 re. Pọl ọ jọ etẹe rọ ẹme Griki ọvona ta ẹme.) Iruo igbunu nọ Jesu o ru na i dhesẹ nọ o jẹ hae kẹ Jesu uye gaga nọ ọ tẹ ruẹ ahwo nọ uye o be bẹ. Orọnikọ o je siwi ahwo fikinọ u fo re o siwi ahwo ọvo ho. Rekọ fikinọ ohrọ ahwo na o jẹ re iẹe, yọ ọ gwọlọ fiobọhọ kẹ ae. Wọhọ oriruo, okenọ o siwi ọmoti na, ọ hae sai siwi ei evaọ ugbo rekọ ohrọ riẹ o re riẹ te epanọ ọ rọ rehọ obọ tei. Ẹsejọhọ u te ikpe buobu no nọ ohwo ọ rọ obọ tei. Yọ okenọ Jesu o siwi ọzae nọ o diezọ na, ọ kake rehọ iẹe no udevie ogbotu nọ o je ru edo jogho jogho na, ọ tẹ jọ omoria jọ sa siwi ei. Yọ okenọ aye jọ ọ nyabru Jesu ze ti kigwẹ fihọ aro riẹ be viẹ fihọ awọ riẹ jẹ be rehọ eto riẹ ririe irui-oviẹ na no, ohwo Farisi jọ o te bi rri aye na tọtọtọ. Rekọ Jesu ọ ta ẹme kẹ ohwo Farisi na. (Mat. 8:3; Mak 7:33; Luk 7:44) Jesu ọ jẹ hai le ahwo nọ e be mọ no oma ha. Enọ e raha izi ilogbo dede, ọ jẹ kẹ ae uvẹ re a go kẹle iẹe. Ọ jẹ hae re ohrọ rai jẹ ta eme nọ e rẹ lẹliẹ ai wo ẹruore. Ma riẹ nọ ere ọvona ọ be re ohrọ mai re.

RỌ ARO KELE OZERẸ OKPEHRU MAI NA

10. Idhere vẹ ma bi ro fiobọhọ kẹ enọ i diezọ gbe enọ i tuaro si kẹle Jihova? (Rri iwoho na re.)

¹⁰ Nọ orọnọ mai yọ ilele Jesu na, ma rẹ daoma ru eware nọ i dhesẹ nọ ma you amọfa, ma te je wo ororokẹ gbe ohrọ-oriọ. (1 Pita 2:21; 3:8) Dede nọ ma rẹ sai siwi enọ i diezọ gbe enọ i tuaro ho, ma rẹ sai fiobọhọ kẹ ae riẹ Ọghẹnẹ. Edhere jọ nọ ma bi ro ru ei họ, ebe nọ a re ro wuhrẹ Ebaibol nọ ma ru fihọ evẹrẹ obọ rọ t’ẹme nọ i bu vi udhusoi no (100). Ma te je wo ebe nọ ahwo nọ i tuaro gbe enọ e be ruẹ ude ziezi hi a rẹ sai se evaọ evẹrẹ nọ i bu vi udhosa (60). Oye ọvo gbe he, ma wo ividio nọ a rẹ jọ ta oware nọ o be jọ ividio na via rọ kẹ ahwo nọ a be ruẹ ude he. Ma wo rai evaọ evẹrẹ nọ i bu vi udhusoi (100). Ebe gbe ividio nana i bi fiobọhọ kẹ enọ i diezọ gbe enọ i tuaro si kẹle Jihova avọ Ọmọ riẹ.

11. Eme ukoko Jihova o bi ru nọ u dhesẹ nọ a be re ohrọ ahwo kpobi wọhọ epanọ Jesu ọ jẹ re ohrọ ahwo? (Iruẹru Ikọ 2:​5-7, 33) (Rri iwoho na re.)

¹¹ Ukoko Jihova u bi fiobọhọ kẹ oghẹrẹ ahwo kpobi re a sae gọ Ọghẹnẹ. Kareghẹhọ nọ, nọ a kpare Jesu no uki ze no, u gbe kri hi, o te ku ẹzi ọfuafo ku ilele riẹ re a sae ta usi uwoma kẹ ahwo evẹrẹ sa-sa nọ e nyaze ti ru ehaa Pẹntikọst. Ere aikpobi a ro yo usi uwoma na evaọ ọvuọ “ẹvẹrẹ riẹ.” (Se Iruẹru Ikọ 2:​5-7, 33.) Jesu ọ be kpọ ukoko na nẹnẹ re. O ru rie lọhọ nọ ma rọ fa ebe nọ a re ro wuhrẹ Ebaibol fihọ evẹrẹ nọ i bu vi odu ọvo (1,000) no. Evẹrẹ nana jọ, ahwo nọ a be jẹ ae a bu hu. Evẹrẹ itieye jọ họ evẹrẹ ahwo Amerindian nọ amahwo jọ a be jẹ evaọ obọ America. Ghele na a fa ebe mai fihọ evẹrẹ rai nọ i bu vi udhoree no (160) re a sai yo usi uwoma na. A fa ebe mai fihọ evẹrẹ ahwo Romany nọ i bu vi udhe no re. Idu ahwo buobu nọ e be ta evẹrẹ nana nọ ma dhunu te na a kurẹriẹ no.

12. Idhere efa vẹ ukoko Jihova o bi ro fiobọhọ kẹ ahwo?

¹² U te no oma nọ ukoko na o be dawo no re ahwo kpobi a sai yo usi uwoma na, a be dhogbo bru ahwo nọ eware okpẹtu e via kẹ. Inievo idu buobu a be nya lahwe re a fiobọhọ kẹ inievo rai nọ uye u te oma. Ukoko na o tẹ be jẹ bọ emamọ eria nọ e rro ga hrọ họ nọ ahwo a re kokohọ jọ wuhrẹ kpahe epanọ Ọghẹnẹ o you rai te.

OZERẸ OKPEHRU MAI NA Ọ SAI FIOBỌHỌ KẸ OWHẸ

13. Oghẹrẹ vẹ Jesu o bi ro fiobọhọ kẹ omai?

¹³ Jesu yọ emamọ othuru-igodẹ nọ o bi fiobọhọ kẹ omai re ma sae gọ Ọghẹnẹ ziezi. (Jọn 10:14; Ẹf. 4:7) Ẹsejọ ebẹbẹ nọ ma wo e rẹ lẹliẹ omai rri omamai wọhọ uwhiki nọ u muhọ efu no hayo ukpoko nọ u wiri rẹrẹ no. Ẹsejọ eva e rẹ were omai vievie he fiki okpẹyao nọ o kru omai, fiki oware nọ ma ru thọ, hayo fiki ẹbẹbẹ nọ ma wo kugbe oniọvo jọ. Oke yena kọ ẹbẹbẹ na ọvo ma re roro kpahe, ma rẹ gbẹ kareghẹhọ ẹruore nọ ma wo ho. Rekọ kareghẹhọ nọ Jesu ọ be ruẹ ẹbẹbẹ nọ who wo na, yọ ọ riẹ epanọ o be kẹ owhẹ uye te. Ohrọ ohwo o rẹ re Jesu gaga fikiere o ti fiobọhọ kẹ owhẹ. Nọ ọ tẹ ruẹ nọ oma o lọhọ owhẹ no, ẹsejọhọ ọ vẹ te rọ ẹzi ọfuafo na kẹ owhẹ ẹgba. (Jọn 16:7; Tait. 3:6) Ọ sae jẹ rehọ ekpako na nọ a jọ Ebaibol se ezae nọ a rọ kẹ ekẹ na fiobọhọ kẹ owhẹ. Te ai te inievo efa a te tuduhọ owhẹ awọ je fiobọhọ kẹ owhẹ.—Ẹf. 4:8.

14. Eme ma re ru nọ oma u te mu omai họ ẹlọhọ no?

¹⁴ Otẹrọnọ uwhiki ra u muhọ efu no, koyehọ nọ oma u te mu owhẹ họ ẹlọhọ no, roro kpahe Jesu Ozerẹ Okpehru mai na. Kareghẹhọ nọ orọnikọ Jihova o vi ei ze te ta omai no igbo ọvo ho, rekọ re ọ riẹ oghẹrẹ nọ akpọ ọ be bẹ omai te. Nọ eva e gbẹ be were omai hi fiki izieraha mai hayo uruemu jọ nọ u woma tere he nọ ma wo, Jesu o ti fiobọhọ kẹ omai “evaọ ẹruoke.”—Hib. 4:​15, 16.

15. Gbiku jọ nọ i dhesẹ epanọ ma sai ro fiobọhọ kẹ ohwo nọ o ghoro no uthuru Jihova no re o zihe ze.

¹⁵ Oware ofa nọ Jesu o bi ru họ, ọ be kpọ ahwo bru igodẹ nọ i ghoro no uthuru Jihova no re a fiobọhọ kẹ ae zihe ze. (Mat. 18:​12, 13) Joma kẹ oriruo oniọvo jọ nọ a re se Stefano.b Nọ a si ei no ukoko na no, u te ikpe ikpegbivẹ re ọ tẹ te wariẹ mu ewuhrẹ họ. Ọ ta nọ: “Oma o jẹ vuọ omẹ, rekọ mẹ gwọlọ zihe ziọ uviuwou Jihova nọ uyoyou o rrọ na. Ekpako nọ e nyaze te tuduhọ omẹ awọ a vuẹ omẹ nọ me du daezọ họ, jọ mẹ hae nyaze. Nọ u te oria jọ, me te je rri omamẹ nọ me wotọ ohwo ho fikiere mẹ rẹ nwane seba. Rekọ ekpako na a tẹ kareghẹhọ omẹ nọ Jihova avọ Jesu a gwọlọ nọ mẹ gbẹ daoma. Nọ a rehọ omẹ zihe ze no, inievo na a dede omẹ rehọ ziezi. Uwhremu na aye mẹ ọ tẹ ta nọ a wuhrẹ iẹe Ebaibol. Ma be ta ẹme na, mẹ avọ iẹe be gọ Jihova.” Eva e rẹ were Ozerẹ Okpehru mai na gaga nọ ọ tẹ ruẹ nọ ma bi fiobọhọ kẹ ahwo nọ a no ukoko na no re a zihe ziọ ukoko na.

16. Fikieme Jesu nọ a ro mu Ozerẹ Okpehru mai na o be rọ lẹliẹ owhẹ yere Jihova?

¹⁶ Okenọ Jesu ọ jọ otọakpọ, o fiobọhọ kẹ ahwo buobu evaọ ẹruoke. Ma riẹ nọ epọvo na o ti ru kẹ omai nẹnẹ re. Yọ nọ ma tẹ ruọ akpọ ọkpokpọ na no, o ti si ahwo kpobi nọ i yoẹme no igbo uzioraha gbe ebẹbẹ kpobi nọ uzioraha o wha ze. Ma vẹ te jọ ahwo ọgbagba. Ma be ruẹ unu yere Jihova ha nọ ọ rọ re ohrọ mai, je you omai te epanọ ọ rọ rehọ Ọmọ riẹ mu Ozerẹ Okpehru nọ o re roro kẹ omai!