Hai Se Ebaibol Kẹdẹ Kẹdẹ Evaọ Oke nọ Who Fihọ

Eware nọ ohwo o bi ru evaọ okpẹdoke i bu wo umuo ho. Kọ o rẹ bẹ owhẹ re who se Ẹme Ọghẹnẹ kẹdẹ kẹdẹ fikinọ eware e vọ otọ kẹ owhẹ? (Jos. 1:8) O tẹ rrọ ere, dao ọjọ evaọ usu eware nọ ma be te fodẹ na:

• Ru oware jọ nọ u re ru owhẹ kareghẹhọ. Ru ifonu ra họ oghẹrẹ nọ o rẹ rọ vuẹ owhẹ nọ oke nọ who re ro se Ebaibol o te no.

• Fi Ebaibol ra họ oria nọ whọ sae jọ ruẹ e riẹ oke kpobi. Otẹrọnọ Ebaibol nọ a printi who re se, fi ei họ oria nọ whọ rẹ jọ ruẹ e riẹ oke kpobi.—Izie. 11:18.

• Hae gaviezọ kẹ Ebaibol nọ a rekọdo. Hai kporo Ebaibol nọ a rekọdo na jẹ gaviezọ kẹe nọ who te bi ru iruo ra. Oniọvo nọ a re se Tara ọ dao oware nana no. Tara yọ ọkobaro oke-kpobi, o wo emọ re, yọ iruo aso o re ru. Ọ ta nọ, “Nọ me te bi ru iruo evaọ uwou, me re kporo irekọdo Ebaibol na. Onana u ru nọ Isase Ebaibol mẹ i gbe bi vo omẹ hẹ.”

• Jọ o bẹ owhẹ no ho. Otẹrọnọ oware jọ o tẹ via idudhe nọ u ru nọ whọ gbẹ sai se Ebaibol ho, taure who te ti kiẹzẹ, se emeria Ebaibol jọ. O tẹ make rọnọ oria nọ who se u tulo ho, u woma vi ẹsenọ who se vievievie he.—1 Pita 2:2.