A Fi Imava Efa Họ Utu Ẹruorote na No

A WHOWHO obọdẹ usi jọ kẹ omai kpobi evaọ ẹgwae ẹgbukpe mai evaọ edẹ 5 amara Akpe, 2024, anọ: A rọ Brọda Jody Jedele avọ Jacob Rumph ro mu no re a jọ Utu Ẹruorote Iruẹru Isẹri Jihova. Aimava na a gọ Jihova kri no, yọ a be rọ eva rai kpobi ru iruo kẹ Jihova.

Obọ Missouri orọ U.S.A. a jo yẹ Brọda Jedele. Evaọ ukoko na a jo yẹe jẹ yọrọ iẹe. Isẹri Jihova nọ e jọ ẹwho nọ uviuwou riẹ a jẹ rria a bu hu. Fikiere ọ riẹ inievo buobu nọ i no ewho sa-sa ze nọ e jẹ ziọ ẹwho na jẹ ta usi uwoma. Yọ o muẹrohọ nọ inievo na a rọ yoyou, yọ a je ru kugbe ziezi. Oware yena nọ ọ ruẹ na u fiobọhọ kẹe gaga. Brọda Jedele ọ họ-ame evaọ edẹ 15 amara Akpe, 1983. Ikpe ikpegbọ ọ jọ nọ ọ rọ họ-ame. Usi uwoma o rẹ were iẹe gaga. Nọ o nwrotọ no ekọleji no, o te mu ọkobaro oke-kpobi họ evaọ amara Azie 1989.

Okenọ Brọda Jedele ọ jọ ọmaha, ọsẹgboni riẹ a jẹ hae whae avọ oniọvo riẹ ọmọtẹ kpobọ Ebẹtẹle. O tẹ whae ze nọ avọ oniọvo riẹ a rọ gbaemu nọ a rẹ jọ obọ Ebẹtẹle ru iruo nọ a te te ahwo no. Yọ ere o ginẹ via. Brọda Jedele o kpohọ Ebẹtẹle nọ ọ rrọ Wallkill evaọ Azie 1990. Ahwo nọ a re ru iwou Ebẹtẹle fo, ae ọ jẹ kaki lele ru iruo. A tẹ te rehọ iẹe kpohọ ofẹ imu.

Evaọ oke yena, ikoko ẹvẹrẹ Spanish nọ e kẹle Ebẹtẹle i je vi gaga. Fikiere o gwọlọ nọ inievo-emezae e rẹ jariẹ nọ i re ru iruo evaọ ikoko na. Brọda Jedele o te kpohọ ọjọ, o te mu ẹvẹrẹ Spanish họ ewuhrẹ. U kri hi, ọ tẹ ruẹ oniọvo-ọmọtẹ jọ nọ a re se Damaris nọ ọ rrọ ọkobaro evaọ okogho yena. Nọ omoke jọ o vrẹ no, ọ tẹ rehọ iẹe. Aimava a te je ru iruo evaọ Ebẹtẹle.

Evaọ 2005 a te no Ebẹtẹle kpo re a nyae rẹrote oni Brọda Jedele avọ ọsẹgboni aye riẹ. Oni Brọda Jedele avọ ọsẹgboni aye riẹ a jọ ukoko na re. Oke yena ọkobaro Brọda Jedele avọ aye riẹ a jọ. Brọda Jedele ọ jẹ hai wuhrẹ Isukulu Ekobaro, ọ tẹ jẹ jọ Ogbẹgwae Ẹmeọta-Kugbe Ahwo Iwou-Imu nọ o jọ oborai, yọ ọ jọ Ogbẹgwae Ebabọ Ubrotọ re.

Evaọ 2013, a te zizie Brọda Jedele avọ aye riẹ kpohọ iruo ebabọ Ebẹtẹle obọ Warwick. A jọ Patterson gbe Wallkill ru iruo no re. Brọda Jedele o te je ru iruo evaọ Utu Iruo Ebabọ Evaọ Uwou Ogha gbe Ẹko-Iruo Evuẹ Kpahe Usiwo Obọ Ọspito. Evaọ Asa 2023, a tẹ rehọ iẹe mu ofiobọhọ kẹ Ogbẹgwae Iruo Ukoko. Nọ o rri iruo nana kpobi nọ o ru na, ọ tẹ ta nọ: “Ẹsejọ nọ a tẹ kẹ owhẹ iruo nọ who ri ru ẹdẹvo ho, udu u re bru owhẹ. Rekọ oke yena o jọ fo nọ whọ rẹ kareghẹhọ nọ Jihova o ti fiobọhọ kẹ owhẹ keme ọ rẹ sai ru oware kpobi.”

A yẹ Brọda Rumph evaọ obọ California, evaọ U.S.A. Nọ ọ jọ ọmaha oni riẹ ọ rọ siọ ewuhrẹ gbe usi uwoma ba, rekọ ọ jẹ daoma wuhrẹ iẹe oware nọ Ebaibol ọ ta. Yọ kukpe kukpe Rumph ọ jẹ hae nyae ruẹ oni riẹ ologbo. Oni riẹ ologbo ọ jọ ukoko na, yọ ẹme gbe uruemu riẹ o wha riẹ ze nọ Rumph ọ rọ gwọlọ nọ o re gbe wuhrẹ kpahe Jihova. Nọ ọ jọ ikpe ikpegbọ, ọ tẹ ta nọ ọ gwọlọ nọ a wuhrẹ iẹe Ebaibol na. Evaọ Azie 27, 1992, ọ tẹ họ-ame, yọ oke yena o ri te ikpe ikpegberee he. Nọ oke o be nya na, oni riẹ ọ tẹ wariẹ mu ewuhrẹ họ, tei te ahwo nọ a kiọkọ kpobi evaọ uwou na a tẹ jẹ nyaharo ziezi evaọ ukoko na. Enọ e re họ-ame he kpobi a tẹ họ-ame.

Nọ Brọda Rumph ọ jọ uzoge, ọ ruẹ nọ eva e be were ekobaro gaga. Fikiere nọ o nwrotọ no ekọleji no, evaọ amara Azie 1995, o te mu ọkobaro họ. Evaọ ukpe 2000, ọ tẹ kwa kpohọ oria nọ a mae jọ gwọlọ etausiuwoma evaọ obọ Ecuador. Ọ tẹ jọ obei ruẹ Sista Inga, ọkobaro nọ o no obọ Canada ze. Ọ tẹ rehọ iẹe, aimava a tẹ jọ usu inievo jọ nọ e jẹ hae ta usi uwoma evaọ ẹwho Ecuador jọ. Ma be ta ẹme na, ukoko jọ o rrọ ẹwho yena no gidigba.

Nọ u te oria jọ, a tẹ rọ Brọda Rumph avọ Sista Rumph mu ekobaro obọdẹ. Nọ a ru oyena te oria jọ no, a tẹ rehọ Brọda Rumph mu ọsẹro okogho. Evaọ 2011 a te zizie ai kpohọ isukulu Giliad. Oyena o jọ eklase avọ 132. Nọ a nwrotọ no, a vi rai kpohọ eria buobu evaọ akpọ na, yọ a ru oghoghẹrẹ iruo evaọ ukoko na. A jọ Ebẹtẹle ru iruo, a ru iruo imishọnare, a te je ru iruo ọsẹro okogho no. Yọ Brọda Rumph o je wuhrẹ inievo nọ e ziọ Isukulu Rọkẹ Etausiuwoma Uvie Na okejọ.

Fiki ẹyao COVID-19 nọ o je vo gaga na, Brọda Rumph avọ aye riẹ a te zihe kpobọ United States. A te zizie ae ziọ Ebẹtẹle nọ ọ rrọ Wallkill. A te fi Brọda Rumph họ Ẹko-Iruo Ẹruorote Iruẹru Ikoko re a wuhrẹ iẹe iruo nọ a rrọ etẹe ru. Nọ u te oria jọ a te je vi ai kpohọ uwou ogha obọ Ecuador. A te fi Brọda Rumph họ Ogbẹgwae Uwou Ogha. Evaọ 2023 a tẹ ta kẹ ae nọ a ziọ obọ Warwick. Evaọ Ọvo 2024, a tẹ rọ Brọda Rumph mu ofiobọhọ kẹ Ogbẹgwae Iruo Ukoko. Nọ o rri egheghẹrẹ iruo nọ o ru na, ọ ta nọ, “Orọnọ oria nọ who bi jo ru iruo o rẹ lẹliẹ iruo na were owhẹ oma ha, rekọ ahwo nọ who bi lele ru iruo na.”

Inievo nana a bi ru iruo gaga, yọ ma te “gbẹ hai rri inievo itieye na ghaghae.”—Fil. 2:29.