29 ELAEJAH
“Jihova Họ Ọghẹnẹ Mẹ”
ELAEJAH! Ahwo jọ a ta nọ idudhe iku riẹ i ro muhọ evaọ Ebaibol na. O wọhọ epanọ egbrara e rẹ va idudhe, yọ ehru o bi hi. Fikieme a rọ ta ere? Ivie ezeza ọsosuọ nọ i su Izrẹl a jọ yoyoma gaga. Ehab họ ovie avọ ihrẹ. Yọ Jihova o rri rie nọ ọye ọ mai yoma evaọ usu ivie na kpobi. Ehab ọ rehọ Jezibẹl nọ ọ jọ ọmọtẹ ovie orẹwho ofa. Yọ Jezibẹl ọ geva wumuo ho. Ehab ọ jẹ gọ emedhọ. Rekọ orọ Jezibẹl aye riẹ o mai tube yoma. Keme ọ jẹ gọ ẹdhọ nọ a re se Bale, nọ o wọhọ nọ a jẹ hae mahe emọ ro dhe idhe kẹ. Yọ o je ru ọzae riẹ gbe ahwo Izrẹl gọ Bale re. Rekọ ẹdẹ jọ, Elaejah ọ tẹ nyabru Ehab ovie na. Jihova o vi rie nya re o bruoziẹ kpei. Ọ vẹ jẹ vuẹe kpahe ẹdhoguo riẹ.
Dae jọ iroro ra ruẹ Elaejah nọ ọ be nya otọ no ugbobọ Giliad nọ ọ rrọ igbigbehru kpobọ Sameria. Sameria yọ okpẹwho nọ a di ogba wariẹ họ. Yọ etẹe Ehab ọ bọ uwou uvie riẹ nọ o jọ ragha ragha fihọ. A tube sei “uwou nọ ọ rọ akọ-eni bọ,” ẹsejọhọ fiki oruaro riẹ. (1 Iv. 22:39) Ma sae jẹ jọ iroro mai ruẹ Elaejah nọ o ku emewu riẹ nọ a rọ eto arao ru họ. Yọ ọ rọ umueku ogbagbada oviẹ arao mu eku. Ọ be nya ruọ ighẹ ovie na nọ u re mu urirẹ na. Nọ o te obei no, o te dikihẹ aro ovie na. Ọ tẹ be ta kẹe nọ ọghẹnẹ riẹ nọ a re se Bale na o wo ogaga ọvuọvo ho! Kọ Jezibẹl ọ jọ etẹe kugbe ovie na? O tẹ rrọ ere, ẹvẹ o sae jọ nọ Ehab avọ aye ọgeva riẹ yena a rehọ ẹme nọ Elaejah ọ jẹ ta? Keme ẹme nọ ọruẹaro yena ọ jẹ ta kẹ ae ududu na họ, ọghẹnẹ rai nọ a roro nọ o re ru oso rrọ na o ti ru oma vuọ ae. Jihova o ti ru nọ oso ọ gbẹ te rrọ họ evaọ ẹkwotọ na. Yọ o te rehọ ikpe jọ. Bẹsenọ Elaejah ọruẹaro Jihova o ti ro whowho nọ, oso ọ te wariẹ muhọ ẹrrọ!
Eme ọ kẹ Elaejah udu sae ta ẹme ere? Ma rẹ jọ ẹme nọ Elaejah omariẹ ọ ta ruẹ uyo na. Nọ o je mu ovuẹ na họ, ọ ta nọ: “Nọ Jihova Ọghẹnẹ Izrẹl nọ mẹ be gọ ọ rrọ uzuazọ na.” Otofa ẹme Hibru nọ a rẹ ta nọ, ọnọ “mẹ be gọ” na họ, ọnọ “me dikihẹ aro riẹ.” Okenọ Elaejah o je whowho ovuẹ na, o dikihẹ aro ovie ohwo-akpọ nọ o wo ogaga. Rekọ ọ riẹ nọ ohwo jọ ọ riẹ nọ ọ rro vi ovie yena thethabọ nọ o dikihẹ aro riẹ. Ọye họ Jihova Ọghẹnẹ nọ ọ be gọ na. O sae jọ nọ ahwo a jẹ hae dhozọ Ehab avọ Jezibẹl, yọ ogaga o jọ e rai obọ. Rekọ a te oware ovo ho nọ whọ tẹ rehọ ae wawo Jihova. O wọhọ nọ oyena o kẹ Elaejah udu na!
Elaejah ọ ta ẹme ududu kẹ ovie jọ avọ aye riẹ nọ a jọ muomu. Ọ whọku orẹwho nọ o jẹ wọso Ọghẹnẹ. Ọ tẹ jẹ rẹroso Jihova evaọ okenọ ozọ u je mu ei
Elaejah o dhesẹ nọ ọ gudu evaọ eware efa re nọ ọ jẹ gọ Jihova na. O yoẹme kẹ Jihova nọ ọ rọ nyae rria ukiekpotọ jọ nọ ahwo a rrọ họ, evaọ oke nọ oso ọ jẹ rọ rrọ họ na, yọ ohọo u bi mu. Uto jọ gheghe ọ jẹ jọ da ame, yọ evra nọ a re se ekọlọbe e jẹ wọ emu sei. O dhesẹ nọ ọ gudu re evaọ okenọ Jihova o vi ei kpobọ Saedọn nyai fiobọhọ kẹ aye-uku oyogbe jọ nọ o wo ẹrọwọ ọgaga. Oware nọ o rọ gwọlọ nọ ọ rẹ gudu họ, ọsẹ Jezibẹl o je su Saedọn. O te je dhesẹ nọ ọ gudu evaọ okenọ ọ jọ Ugbehru Kamẹl kugbe eruẹaro Bale nọ i bu te egba ene gbe udhuvẹ-gbikpe (450). Ọ jọ etẹe dhesẹ nọ Jihova ọvo họ Ọghẹnẹ uzẹme na. Unuẹse buobu Elaejah o ru otofa odẹ riẹ na gba inọ, “Jihova họ Ọghẹnẹ mẹ.”
O make jọ ere na, Elaejah ọ jọ “ohwo wọhọ omai na.” (Jem. 5:17) U wo oke jọ nọ ozọ u ro mu ei. Nọ Ehab ọ make ruẹ eware igbunu nọ e via evaọ Ugbehru Kamẹl na no, ọ rọwo nwene ghele he. Jezibẹl o te je duwu iyei nọ o re kpe Elaejah no. O tẹ lẹliẹ ozọ je mu Elaejah. Ọ tẹ dhẹ kẹ uzuazọ riẹ. Fikinọ udu u no rie awọ no, ọ tubẹ ta kẹ Jihova nọ ọ gwọlọ whu. O je rri omariẹ nọ o fioka ohwo ho. Yọ o woma vi esẹ-esẹ riẹ nọ i whu no ho. Ghele na, Jihova ọ romatotọ gaviezọ kẹe. Evaọ oke ofa, isiava soso Elaejah ọ ta kẹ Ọghẹnẹ riẹ nọ oma o rrọ e riẹ goli. Yọ ozọ u bi mu ei. Ọ tẹ jẹ ta nọ u mu rie ẹro nọ iruo nọ o bi ru na kpobi ivrẹvru. Rekọ Jihova ọ tẹ ta kẹ Elaejah nọ ọyọvo ọ rrọ vievie he. O rri iruo nọ o bi ru na ghaghae. O te je rri ọyomariẹ ghaghae re. Jihova ọ tubẹ salọ ohwo jọ dede re o fiobọhọ kẹ Elaejah. Ọ vuẹ riẹ nọ o re wuhrẹ iẹe re ọ sai ru iruo ọruẹaro nọ o bi ru na.
U kri hi, Elaejah ọ tẹ ruẹ ohwo na. Odẹ riẹ Elaesha. Aimava a tẹ gbẹ jẹ gọ Jihova, yọ a bi whowho ovuẹ riẹ kẹ ahwo evaọ oke obẹbẹ yena. Elaesha o je fiobọhọ kẹ Elaejah nọ ọ kpako vi ei na, yọ o bi wuhrẹ mi ei re. Ere Jihova o ro fiobọhọ kẹ Elaejah wariẹ gudu. Yọ ọ gbẹ gudu bẹsenọ o ro whu.
Se iku Ebaibol na:
Onọ nọ a rẹ ta ẹme kpahe:
Eme gbe eme Elaejah o ru ro dhesẹ nọ ọ gudu?
Gbẹ Kiẹ Kodo
1. Fikieme u ro woma nọ ekọlọbe Ọghẹnẹ ọ jẹ rọ wọ emu se Elaejah? (it “Ọkọlọbe” ¶5) Uwoho 1
Lior Kislev
Uwoho 1
2. Eware igbunu vẹ Elaejah o ru? (it “Elaejah” Ọrọ 1 ¶11)
3. Evaọ okenọ Elaejah avọ eruẹaro Bale a jọ Ugbehru Kamẹl na, Elaejah ọ ta kẹ ezae jọ nọ a vo ame vọ ọgọdọ ologbo jọ. Nọ orọnọ oso ọ re rrọ họ evaọ oke krẹkri na, diẹse o sae jọ nọ a jọ ruẹ ame? (ba 17 ¶3) Uwoho avọ 2
Todd Bolen/BiblePlaces.com
Uwoho 2: Ugbehru Kamẹl avọ Abade Mediterenia
4. Eme ewu Elaejah o dikihẹ kẹ? Kọ fikieme o ro gbolo iei fihọ Elaesha ikoko? (w14 2/1 12 ¶3)
Roro Kpahe Eware nọ Who Wuhrẹ Noi Ze
Ma te rri oghẹrẹ nọ Jihova o ru Elaejah, eme ma rẹ sai ru re inievo mai a rovie eva kẹ omai nọ oware jọ o tẹ be kẹ ae uye hayo nọ oma o tẹ lọhọ ae no? (1 Iv. 19:1-18) Uwoho avọ 3
Uwoho 3
O were Elaejah nọ o re wuhrẹ Elaesha re ọ sai ru iruo nọ ọyomariẹ o je ru na. Ẹvẹ ma sai ro ru epọvo na nọ ma te bi wuhrẹ amọfa, gbe okenọ ma te siobọno iruo mai jọ kẹ ae?
Oghẹrẹ ọfa vẹ whọ sae rọ rehọ aro kele Elaejah gudu evaọ uzuazọ ra?
Roro Didi Kpahe Jihova avọ Oreva Riẹ
Eme me wuhrẹ kpahe Jihova evaọ iku nana?
Oghẹrẹ vẹ iku na i ro dhesẹ oware nọ Jihova ọ gwọlọ ru via?
Enọ vẹ mẹ te nọ Elaejah nọ a tẹ kpare iẹe ze no?
Gbe Wuhrẹ Eware Efa
Rri ividio nana re whọ ruẹ epanọ Jihova ọ rọ bọ Elaejah ga re ọ sai ru iruo nọ ọ kẹ riẹ.
Ahwo nọ A Wo Odiri nọ Ma rẹ Rọ Aro Kele—Eruẹaro Na—Elaejah (1:19)
Elaejah o dhesẹ nọ ọ gudu evaọ Ugbehru Kamẹl. Kọ eme izoge a rẹ sai wuhrẹ mi ei?
“Thọ Egagọ Uzẹme!” (Izoẹme sa-sa evaọ itanẹte “Ikuigbe Ebaibol”)