27 MẸFIBOSHẸT
Ọ Kuvẹ re Ofu Akpọ O Dhei Hi
MẸFIBOSHẸT yọ ọmọ uruọmọ Sọl, ovie nọ ọ goma ziezi. Yọ ọsẹ riẹ họ Jonatan, ọzae nọ ọ gudu ziezi nọ o je yoẹme kẹ Jihova. Rekọ okenọ ọ jọ ikpe isoi, eware iyoma jọ e via kẹe nọ i nwene uzuazọ riẹ idudhe. Eme ọ via kẹe? A nwa Sọl ọsẹ-ologbo riẹ oma evaọ ẹmo, kẹsena ọyọvo o te kpe omariẹ no. Yọ evaọ ẹmo ọvo yena a jọ kpe Jonatan ọsẹ riẹ re. Nọ aye nọ ọ jẹ rẹrote Mẹfiboshẹt o yo oware nọ o via na, ozọ u te mu ei gaga. Ọ tẹ wọ Mẹfiboshẹt, o te muhọ ẹdhẹ. Rekọ epanọ ọ jẹ rọ dhẹ na, ọmọ na o te kie. Ọ tẹ nwoma gaga evaọ awọ. Ere ọ rọ ko awọ evaọ edẹ uzuazọ riẹ kpobi.
Ghelọ eware iyoma nọ e via kẹ Mẹfiboshẹt na, o wọhọ nọ ofu akpọ o je dhei hi. O gbe je yeri umuzuazọ riẹ vrẹ ghele. Ọzae Izrẹl jọ nọ a re se Meka o fi rie họ uwou. Nọ oke jọ o vrẹ no, Devidi ovie na ọ tẹ kareghẹhọ eyaa nọ ọ ya kẹ Jonatan ogbẹnyusu riẹ. Ọ ta kẹe nọ ọ te rẹrote ahwo uviuwou riẹ. (1 Sam. 20:14-17) Fikiere ovie na o te vi ahwo nyae rehọ Mẹfiboshẹt ze.
Ozọ u je mu Mẹfiboshẹt re ọ nyabru ovie na. O sae jọ nọ o je roro nọ Devidi ọ gwọlọ kpei no, keme uviuwou Sọl ovie ọgeva na ọyomariẹ o no ze. O make jọ ere na, o yoẹme ovie na, ọ tẹ nyabru ei. Devidi ọ nabe ta ẹme kẹe wowolẹ. O te zihe eware Sọl kpobi kẹe. Ọ tẹ jẹ ta kẹe nọ: “Whọ te hae jọ emẹjẹ mẹ re emu ẹsikpobi.” Oware na u gbe Mẹfiboshẹt unu. O rri omariẹ nọ o te ohwo nọ Devidi o re ru eware yena kpobi kẹ hẹ. Ọ tubẹ ta dede nọ ọ wọhọ arakọ nọ o whu no. Oware nọ Devidi o ru kẹe na o da riẹ ẹro fia!
No oke emaha ze Mẹfiboshẹt ọ rọ ko awọ, yọ ọsẹ riẹ o whu ku ei. Uwhremu na, a vivie i rie, a te je kienyẹe
Rekọ nọ oke jọ o vrẹ no, oware uyoma ofa jọ o via kẹ Mẹfiboshẹt. Absalọm ọmọ Devidi ọ jẹ gwọlọ nọ o re kpe Devidi no re ọ jọ ovie. Onana o tẹ lẹliẹ Devidi dhẹ no Jerusalẹm. Zaeba nọ ọ rrọ odibo Mẹfiboshẹt ọ nyai fiobọhọ kẹ Devidi. Rekọ ọ nyasiọ Mẹfiboshẹt ba Jerusalẹm. Fikinọ Mẹfiboshẹt ọ sae nya ha na, o te ru oware jọ ro dhesẹ nọ abọ Devidi ọ rrọ. Ọ gbẹ jẹ nware etuagba gbe eto-enu riẹ hẹ. Onana yọ oghẹrẹ nọ ezae a jẹ hai ro dhesẹ nọ a rrọ uweri. Ukuhọ riẹ, omaa Absalọm na u kiekpei. Nọ otọ o fọ no, Devidi o te zihe ziọ Jerusalẹm dhedhẹ. Rekọ eva Mẹfiboshẹt e jẹ were iẹe he. Eme o jẹ jọ ere?
Zaeba o gu ọrue fihọ Mẹfiboshẹt olori riẹ uzou. Evaọ okenọ ọ nyai fiobọhọ kẹ Devidi na, ọ ta kẹ Devidi nọ Mẹfiboshẹt o vivie i rie no. Ọ ta nọ Mẹfiboshẹt ọ daji obọ Jerusalẹm keme ọ gwọlọ nọ ọyomariẹ ọ rẹ jọ ovie. Dai roro epanọ oware na o te da Devidi te! U ri kri hi nọ Absalọm ọmọ obọriẹ o ro viviei. Ahitofẹl ogbẹnyusu riẹ nọ o fievahọ, nọ ọ rrọ ọkohrẹ riẹ re o te je viviei re. Fikiere, o jọ lọlọhọ kẹ Devidi re ọ rọwo nọ omọfa jọ kpobi, makọ Mẹfiboshẹt ọ sai viviei re. Devidi ọ tẹ ta nọ eware Sọl nọ Mẹfiboshẹt ọ rọ reuku na, jọ a rehọ ae kẹ Zaeba.
Nọ Mẹfiboshẹt o yo kpahe ọrue nọ Zaeba o gu fihọ iẹe uzou na, ọ tẹ nyae ruẹ ovie na re ọ vuẹe oware nọ o ginẹ via dẹẹ. Oke yena eva e jẹ dha ovie na. Ọ tẹ nọ Mẹfiboshẹt oware nọ o gbe lele iei hi evaọ okenọ ọ dhẹ no Jerusalẹm. Mẹfiboshẹt ọ tẹ kareghẹhọ ovie na nọ ọyomariẹ yọ “ọmo.” Ọ tẹ vuẹe nọ Zaeba ọ viẹ riẹ họ, ọ tẹ dhẹ siọ ẹe ba. O wọhọ nọ Devidi o muẹrohọ nọ Mẹfiboshẹt ọ nware eto-enu gbe etuagba riẹ hẹ. Kọ oyena o gbẹ hai dhesẹ kẹe nọ o je gine weri kẹ ovie na, orọnikọ ọ jẹ gba ẹgwae omuomu kpahe iẹe he? O make jọ ere na, fikinọ eva e gbẹ jẹ dha Devidi, ọ tẹ nọ Mẹfiboshẹt oware nọ ọ gbẹ be rọ ta ẹme ere. Ọ tẹ jiroro nọ o ti zihe otọ na jọ kẹ Mẹfiboshẹt. Ọ tẹ ta nọ jọ Mẹfiboshẹt avọ Zaeba a nyae ghale otọ Sọl na.
Nọ ovie na ọ ta kẹ Mẹfiboshẹt nọ avọ Zaeba a nyae ghale otọ Sọl, Mẹfiboshẹt ọ hae sai muofu keme Zaeba ọ wọ eku fihọ iẹe uzou. Nọ a te kienyẹ ohwo, o sae jọ lọlọhọ re o muofu hayo tube fi ọgo họ eva dede. (Izie. 19:18, 19) O gwọlọ nọ ohwo ọ rẹ gudu re ọ gbẹ tẹrovi iruthọ amọfa ha, hayo bruenu hu inọ akpọ o ku rie no. Rekọ oware nọ o mai wuzou ọ rẹ tẹrovi, koyehọ epanọ o re ro ru udhedhẹ. Kọ ovẹ Mẹfiboshẹt o ti ru na?
Ọ rọ unu uwowolẹ kpahe kẹ Devidi nọ: “Jọ [Zaeba] ọvo ọ rehọ iẹe kpobi no, nọ orọnọ olori mẹ ovie na o zihe ziọ uwou riẹ dhedhẹ no na.” Ọzae nana nọ o wo omaurokpotọ na o dhesẹ nọ oware nọ o mae jariẹ oja họ, epanọ eware i re ro woma kẹ ovie nọ Jihova ọ salọ na. O make rọnọ a wọ eku fihọ iẹe uzou, yọ a mi rie otọ riẹ, ọ kuvẹ re ofu akpọ o dhei hi. Ọ gbẹ jẹ gọ Jihova vrẹ dhedhẹ. Ginọ uzẹme nọ Mẹfiboshẹt o kpohọ ẹmo ẹdẹvo ho, rekọ ọ rọ eware nọ o ru dhesẹ nọ ọ gudu vi isoja buobu nọ e nyae họre evaọ ẹmo!
Se iku Ebaibol na:
Onọ nọ a rẹ ta ẹme kpahe:
Eme gbe eme Mẹfiboshẹt o ru ro dhesẹ nọ ọ gudu?
Gbẹ Kiẹ Kodo
1. Taure a tẹ te rehọ Mẹfiboshẹt se Devidi, “uwou Meka” ọ jẹ rria. Eme ọfa o dhesẹ nọ Meka ọ jọ emamọ ohwo, ọ tẹ jẹ jọ ohwo nọ o re ru ọghọ? (2 Sam. 9:3, 4; it “Meka” Ọrọ avọ 2)
2. Fikieme Mẹfiboshẹt ọ jẹ rehọ omariẹ dhesẹ “arakọ nọ o whu no”? (2 Sam. 9:8; it “Arakọ” ¶5) Uwoho 1
PhotoStock-Israel/Photodisc via Getty Images
Uwoho 1: Evaọ Izrẹl oke anwae, a jẹ hai rri erakọ fihọ erao nọ e fo ho, nọ e rẹ re ugbẹre
3. Ẹvẹ ma rọ riẹ nọ Mẹfiboshẹt ọ rọ oghẹrẹ ohwo nọ ọ hae te gwọlọ mi Devidi uvie na vievie he? (w02 3/1 4 ¶11, ẹme-obotọ) Uwoho avọ 2
Uwoho 2: Eme o sae jọ nọ Jonatan o wuhrẹ ọmọzae riẹ kpahe ohwo nọ Jihova ọ salọ re ọ jọ ovie?
4. Nọ eware nọ ma gbiku rai na e via vrẹ no, ẹvẹ Jihova ọ rọ ghale Mẹfiboshẹt? (it “Mẹfiboshẹt” Ọrọ avọ 2 ¶3)
Roro Kpahe Eware nọ Who Wuhrẹ Noi Ze
Inievo buobu nẹnẹ a wo ẹyao ọkora hayo ebẹbẹ efa nọ inievo ukoko na a sae nwane riẹ epanọ o rrọ e rai oma dẹẹ hẹ. Emamọ eware vẹ inievo itieye na a rẹ sai wuhrẹ mi Mẹfiboshẹt?
Devidi ọ rọ ẹme omọvo bruoziẹ, ọ tẹ rehọ eware Mẹfiboshẹt kẹ Zaeba no. Fikieme ma gbẹ rọ okpakpa bruoziẹ hẹ, rekọ ma rẹ daoma riẹ otọ ẹme vevẹ tao? Uwoho avọ 3
Uwoho 3
Ẹvẹ whọ sae rọ rehọ aro kele Mẹfiboshẹt gudu evaọ uzuazọ ra?
Roro Didi Kpahe Jihova avọ Oreva Riẹ
Eme me wuhrẹ kpahe Jihova evaọ iku nana?
Oghẹrẹ vẹ iku nana i ro dhesẹ oware nọ Jihova ọ gwọlọ ru via?
Enọ vẹ mẹ te nọ Mẹfiboshẹt nọ a tẹ kpare iẹe ze no?
Gbe Wuhrẹ Eware Efa
Rri epanọ ma sae rọ rehọ aro kele Mẹfiboshẹt nọ ma te roro nọ a kienyẹ omai.
Nọ ọmọ jọ o te bi roro nọ ohwo ọvuọvo ọ gwọlọ jọ ogbẹnyusu riẹ hẹ, ẹvẹ ọsẹgboni riẹ a sae rọ rehọ iku Mẹfiboshẹt na fiobọhọ kẹe?
“Kọ O be Hae Jọ Owhẹ Oma nọ A Se Owhẹ Gbe Ohwo Ho?” (w11 6/1 26-27)