26 NETAN
Ọ Whọku Ovie Na
NETAN ọruẹaro na ọ rrọ edhere bi kpobọ ọgwa uvie Devidi ovie na. Netan avọ Devidi yọ egbẹnyusu. Ẹsejọhọ nọ ọ be nya na yọ o bi roro nọ: ‘Ẹvẹ emamọ ọzae otiọye na o re ru oware uyoma otioye?’ Evaọ oke jọ nọ u kpemu, Jihova ọ ta kẹ Netan nọ ọ vuẹ Devidi emamọ oware jọ nọ o ti ru kẹe evaọ obaro. Inọ, Mesaya na o ti no uyẹ Devidi ze! (2 Sam. 7:4, 12, 13) Rekọ obọnana, Devidi ọ raha izi ilogbo no. Yọ Jihova o bi vi Netan bru ei re ọ kpọe họ.
Devidi o je roro nọ ohwo ọvo ọ te riẹ oware nọ o ru na ha. Rekọ Jihova ọ riẹ. Jihova ọ vuẹ Netan oware uyoma nọ Devidi o ru na. Eme Devidi o ru dede? Evaọ owọwọ ẹdẹ jọ nọ Devidi ọ jẹ nya evaọ obọ ehru uwou riẹ, ọ tẹ ruẹ aye jọ nọ a re se Bat-shiba nọ ọ be họ. Yọ aye na o “wo erru gaga.” O te vi ahwo nyai sei. Devidi ọ riẹ nọ Bat-shiba yọ aye Uraya ohwo Hit na. Uraya ọ jọ usu egbaẹmo ovie na nọ e jẹ họre kẹ ahwo Jihova. O make jọ ere na, nọ a se aye na ze, Devidi o te lele iei wezẹ. Nọ oke jọ o vrẹ no, aye na o te vi uwou se Devidi nọ o dihọ no. Devidi ọ tẹ jẹ gwọlọ epanọ ọ rẹ rọ ko oware uyoma nọ o ru na dhere. Fikiere, o te se Uraya no obọ ẹmo ze. Ọ tẹ ta kẹe nọ o kpobọ uwou re o lele aye riẹ wezẹ. (Rri 1 Samuẹle 21:5.) Rekọ nọ orọnọ egbaẹmo nọ i kiọkọ a rrọ obọ ẹmo na, Uraya o rri rie nọ u fo ho re ọyomariẹ o kpobọ uwou nyae re, da, je lele aye riẹ wezẹ. Fikiere, ọ rọwo kpo ho. Devidi ọ tẹ gba ẹgwae omuomu ọfa. Ọ ta nọ a fi Uraya họ obaro ẹmo na, re a rehọ oma siọ ẹe ba, a ve kpei no. Omaa umuomu riẹ na u gine ruiruo. Ere Uraya o ro whu evaọ ẹmo na. Nọ Uraya o whu no, Devidi ọ tẹ rehọ Bat-shiba re ọ jọ aye riẹ.
Ebaibol na ọ ta nọ: “Oware nọ Devidi o ru na o dha Jihova eva gaga.” Fikiere, Ọghẹnẹ o te vi Netan ọruẹaro riẹ bru Devidi. Ọ te vuẹe nọ ọ ruẹ oware uyoma nọ o ru na, ọ vẹ jẹ kpọe họ. Nọ Netan ọ jọ edhere jẹ nyabru Devidi, o sae jọ nọ ọ jẹ ruawa kpahe oghẹrẹ nọ Devidi ọ te rehọ ẹme na. Keme oware uyoma nọ o ru ọ be nyae vuẹe na, ọ vẹ jẹ kpọe họ. Otẹrọnọ Devidi ọ sai kpe Uraya nọ o ru oware ovo thọ họ, kọ o ti gbe kpe ọyomariẹ no re? Netan ọ gwọlọ nọ ọ rẹ ta ẹme na evaọ oghẹrẹ nọ Devidi ọ rẹ rọ riẹ nọ oware nọ o ru na u yoma gaga. Ma riẹ nọ Netan ọ te siọ ẹme na ba ẹlẹ kpahe he. Ukuhọ riẹ o te roro ku oriruo jọ nọ ọ sae rọ ta ẹme na kẹ ovie na. Ọ tẹ nyabru ovie na.
Netan o te gbiku ezae ivẹ jọ nọ e jẹ rria okpẹwho jọ kẹ Devidi. Ọjọ o fe gaga, yọ o wo igodẹ gbe iruẹ buobu. Ọnọ o kiọkọ na oyogbe, yọ omogodẹ ọvuọvo o wo. Omogodẹ na ọ were riẹ avọ uviuwou riẹ wumuo ho. A jẹ rẹrotei wọhọ ọmọ rai. Ẹdẹ jọ, ọrara jọ ọ tẹ kpahe ọdafe na nọ o rẹro riẹ hẹ. Ọdafe na ọ tẹ gwọlọ nọ o re kpe ogodẹ ro there emu kẹ ọrara na. Rekọ ọ jọ igodẹ ibuobu riẹ kpe ọvuọvo ho. Ukpoye, “ọ tẹ rehọ omogodẹ oyogbe na,” o te kpei ro there emu kẹ ọrara riẹ na. Nọ Netan ọ nwani gbiku na re no, eva e tẹ dha Devidi gaga. Devidi ọ tẹ ta nọ: “Nọ Jihova ọ rrọ uzuazọ na, ọzae nọ o ru oware nana o fo uwhu!” Oware na o dha Devidi eva keme o rri rie nọ ọdafe na “o ru oware nana ababọ ọdawẹ nọ o dhesẹ.”
Netan ọ whọku ovie jọ nọ o you gaga je wo adhẹẹ kẹ, ọ tẹ jẹ kẹe ohrẹ
Oriruo nana nọ Netan ọ kẹ Devidi na o kiehọ gaga. Devidi ọ jọ othuru-igodẹ vẹre, yọ okienyẹ ọ rẹ dhae eva. Fikiere, Netan ọ tẹ ta kẹe ududu nọ: “Whẹ họ ọzae na!” Devidi o te guegue. Netan ọ tẹ rọ unu kotọ vuẹ Devidi eware iyoma kpobi nọ o ru, nọ Jihova ọ ruẹ na. Kẹsena Netan ọruẹaro na ọ tẹ vuẹ Devidi oware nọ Jihova ọ ta inọ o te via kẹe. Ọ ta kẹe nọ, ozighi gbe okpẹtu e te jọ uviuwou riẹ evaọ ikpe buobu. Kọ eme Devidi o ru?
Ovie na ọ tẹ ta nọ: “Mẹ raha uzi Jihova no.” Oware na o da Devidi wumuo ho, o te kurẹriẹ. Yọ ma riẹ nọ eva e te were Netan gaga evaọ okenọ ọ jẹ vuẹ Devidi nọ Jihova ọ te re ohrọ riẹ. Netan ọ ta kẹe nọ: “Jihova ọ rehọ uzioraha ra rọvrẹ owhẹ no re. Who ti whu hu.” O make jọ ere na, uye o bẹ Devidi gaga fiki oware uyoma nọ o ru kugbe Bat-shiba na. Yọ evaọ ikpe buobu, ozighi ọ jọ uwou riẹ, ahwo a te je vivie iei. Emọ riẹ e wọso ẹe, a jẹ tubẹ gwọlọ mi ei uvie na no dede.
Ghelọ eware yena kpobi nọ e via kẹ Devidi na, ọ gbẹ jẹ gọ Jihova vrẹ ghele. Jihova ọ kẹ riẹ ẹzi riẹ nọ o ro kere emamọ ilezi nọ e ta kpahe epanọ Ọghẹnẹ ọ rẹ rọvrẹ ahwo nọ a kurẹriẹ no eva ze. (Olezi avọ 32 gbe 51) Ovie na o wo erere no ohrẹ Netan na ze. Keme u ru nọ ọ rọ wariẹ wo emamọ usu kugbe Jihova. Yọ ohrẹ na o thọrọ e riẹ ẹro ho evaọ edẹ uzuazọ riẹ kpobi. Ọ rọ udu riẹ kpobi gọ Jihova bọo ẹdẹ uwhu riẹ. (1 Iv. 9:4) Eva e te siọ Netan ba ẹwere he inọ ọ sae gbaudu vuẹ ovie na eware iyoma nọ o ru, ọ tẹ jẹ kẹe ohrẹ!
Se iku Ebaibol na:
Onọ nọ a rẹ ta ẹme kpahe:
Eme gbe eme Netan o ru ro dhesẹ nọ ọ gudu?
Gbẹ Kiẹ Kodo
1. Netan o kere ebe Ebaibol jọ. Rekọ ma riẹ oware ovo kpahe uviuwou riẹ hayo uzuazọ riẹ hẹ. Eme onana o sai dhesẹ kpahe oghẹrẹ ohwo nọ ọ jọ? (w12 2/15 25 ¶2-3)
2. Ohwo Hit Uraya ọ jọ. Kọ ẹvẹ ọ sae rọ jọ usu egbaẹmo Devidi? (w24.04 31)
3. Netan ọruẹaro na ọ ta kẹ Devidi nọ uye u ti te uviuwou riẹ. Ẹvẹ ẹme riẹ na o ro rugba? (it “Devidi” ¶29)
4. Ẹvẹ Netan o ro dhesẹ nọ ọ gudu evaọ okenọ Devidi ovie na ọ who no? (w12 2/15 25 ¶1) Uwoho 1
Uwoho 1
Roro Kpahe Eware nọ Who Wuhrẹ Noi Ze
Eme oriruo Netan o wuhrẹ omai kpahe oghẹrẹ nọ ma re ro fiobọhọ kẹ ogbẹnyusu mai nọ ọ raha uzi ulogbo?
Ma tẹ gwọlọ ta ẹme nọ o re te ohwo udu, eme Netan o ru nọ ma rẹ sai ru re? Uwoho avọ 2
Uwoho 2
Oghẹrẹ ọfa vẹ whọ sae rọ rehọ aro kele Netan gudu?
Roro Didi Kpahe Jihova avọ Oreva Riẹ
Eme me wuhrẹ kpahe Jihova evaọ iku nana?
Oghẹrẹ vẹ iku na i ro dhesẹ oware nọ Jihova ọ gwọlọ ru via?
Enọ vẹ mẹ te nọ Netan nọ a tẹ kpare iẹe ze no?
Gbe Wuhrẹ Eware Efa
Eme oware uyoma nọ Devidi o ru na o wha se ọyomariẹ, egbẹnyusu riẹ, uviuwou riẹ, gbe Jihova Ọghẹnẹ?
Kareghẹhọ Oghẹrẹ nọ Uyoyou U re Ru—O rẹ Gwọlọ Ewoma Obọriẹ Hẹ (1:14)
Se kpahe oware nọ o lẹliẹ ohrẹ Netan ruiruo ziezi.
“Romakpotọ Jẹ Ọwhọkuo Rehọ” (Izoẹme Itanẹte “Ikuigbe Ebaibol”)