Ọ Họre Ọgwara

DEVIDI o dikihẹ oria nọ o bi jo rri abọ obei ukiekpotọ Ilah. Ọzae jọ nọ a re se Goliat o dikihẹ obei. Ọzae na o theri te enwenọ irula izii gbe ubro (imita 2.9), yọ ọ goma gaga. Ohwo nọ ọ rẹ wha ekwakwa ẹmo riẹ nọ ọ jọ abotọ riẹ dede o tulo ho nọ whọ tẹ rehọ iẹe wawo iẹe. Fiki oghẹrẹ nọ Goliat ọ rro te, ahwo buobu a re nuhu nọ a tẹ ruẹ e riẹ, a ve bi rri omarai wọhọ ebaka gheghe. Rekọ Devidi o je rri Goliat ere he. Fikieme? U wo oware jọ nọ o jẹ kẹe udu.

Ẹzi Jihova ọ jọ Devidi oma. Keme evaọ oke nana nọ ma be ta ẹme na yọ Samuẹle ọruẹaro na o wholo Devidi no inọ ọye ọ te jọ ovie Izrẹl, u te no Sọl no. O make jọ nọ Devidi ọ maha vi ohwo nọ o re kuomagbe ogbaẹmo na, a riẹ Devidi fihọ “ọgbaẹmo ọgaga nọ ọ gudu.” Rekọ obọnana, oware ofa o lẹliẹ Devidi nyaziọ oria nọ a bi jo fi ẹmo na. Ọsẹ riẹ nọ a re se Jẹsi họ ọnọ o vi rie uwou re ọ nyae ruẹ epanọ eware e rrọ kẹ inievo riẹ evaọ usu egbaẹmo Izrẹl. Evaọ oke nana, o wọhọ nọ Devidi ọ gbẹ rrọ ikpe ikpegbọ.

Nọ ọ nyate Ukiekpotọ Ilah na, ọ tẹ ruẹ nọ egbaẹmo ahwo Izrẹl e rrọ abọjọ, yọ egbaẹmo ahwo Filistia e rrọ abọdekọ. U te eka bro no nọ egbaẹmo na e rọ rrọ etẹe ọvo bi rri ohwohwo, keme ozọ u bi mu egbaẹmo Izrẹl re a nyae họre ọgwara na gbe egbaẹmo Filistia nọ i kiọkọ. Nọ Devidi o bi rri na, Goliat ọ tẹ nya lahwe, o te bi do, bi ku eka họ ahwo Izrẹl oma. O kẹ Devidi uye gaga keme Jihova nọ ọ rrọ Ọghẹnẹ ahwo Izrẹl ọye ọgwara nana nọ ọ rrọ ọgẹdhọ gheghe na ọ be poviẹ na! Devidi ọ tẹ be nọ egbaẹmo ahwo Izrẹl na kpahe Goliat. Ọ tẹ jẹ nọ ae oware nọ Sọl ovie na o ti ru kẹ ohwo nọ ọ te sai kpe Goliat. Ẹlayab nọ ọ rrọ oniọvo ọkpako Devidi o te je doku ei, be ta kẹe nọ ọ nyaze re o ti rri ẹmo na. Rekọ Devidi ọ daezọ riẹ hẹ. O gbe je lele egbaẹmo na ta ẹme, be rọ ere tuduhọ ae awọ.

Nọ a vuẹ Sọl ovie na ẹme nọ Devidi ọ ta, ọ tẹ ta nọ a se Devidi ze. Devidi ọ tẹ jẹ daoma tuduhọ ovie na awọ. Ọ ta kẹe nọ: “Jọ udu u no ohwo ọvo awọ fiki [Goliat he].” Ọ tẹ jẹ ta nọ ọyọvo ọ te “nyae họre ohwo Filistia yena.” Sọl ọ jẹ kake rọwo ho, keme u mu rie ẹro nọ a te siọ Devidi ba ekpe no ho. Rekọ Devidi ọ tẹ vuẹ ovie na epanọ Jihova o ro fiobọhọ kẹe ru ikpeware no. O fiobọhọ kẹe kpe okpohrokpo avọ adaka nọ e jẹ gwọlọ re igodẹ ọsẹ riẹ. Sọl ọ tẹ tubẹ kẹe uvẹ. Ọ tẹ ta nọ a ku ewu ẹmo riẹ họ Devidi, re ọ jẹ wha ọgbọdọ riẹ lele oma. Rekọ Devidi ọ jẹ sae rehọ ae nya ha, keme ọ re wha ọgbọdọ hayo ku oghẹrẹ ewu otiọye họ ẹdẹvo ho. Ọ tẹ dhugbẹ ba ai no. Ọ tẹ tọlọ ọkpọ riẹ gbe udeme riẹ ọvo.

Devidi ọ tẹ be nyaruọ ukiekpotọ na. Ọ tẹ jọ akotọ unueri jọ tọlọ ibitho eriẹriẹ isoi fihọ ẹkpa. Nọ o ru ere no, o te muọ ọgbaẹmo ologbo na họ ẹnyabru. Nọ Goliat ọ kparo ruẹ ọmaha jọ gheghe nọ ọ be nyabru ei ze, ọ tẹ be rọ uvo ologbo riẹ na do. O te bi se Devidi ẹkoko inọ ọ be rọ “imire” gheghe nyaze te họre iẹe. O sae jọ nọ ọkpọ nọ Devidi o re ro su igodẹ na ọ jẹ ta kpahe na. Ẹsejọhọ Goliat ọ riẹ hẹ inọ Devidi ọ wha udeme nọ ọ sae rọ sae, o vẹ nwae oma. Goliat ọ tẹ jẹ “rehọ odẹ edhọ riẹ bọwo Devidi ehao.” Ọ tẹ jẹ ta kẹe nọ ọ te rehọ ori riẹ kẹ evra na gbe erao ẹwọ na.

Devidi ọ tẹ kpahe kẹe nọ: “Whọ be rọ ọgbọdọ, ozuẹ, gbe ehi ze te họre omẹ, rekọ odẹ Jihova olori egbaẹmo mẹ be rọ nyaze te họre owhẹ, Ọghẹnẹ nọ o wo egbaẹmo Izrẹl nọ whọ be poviẹ na.” Devidi ọ rọ ẹme yena dhesẹ ohwo nọ ọ be kẹe udu na. Ọ rọ omariẹ wawo Goliat he. Ukpoye, ọ rọ Goliat wawo Jihova Ọghẹnẹ! Fikiere u mu Devidi ẹro ziezi nọ ọ rẹ sai kpe Goliat. Yọ egbaẹmo Izrẹl a ti fi egbaẹmo Filistia kparobọ.

Devidi o te mu Goliat họ ẹdhẹ bru. O te dhobọ họ ẹkpa. Nọ ọ tọlọ ubiutho jọ, o te fi ei họ udeme riẹ na. O te mu ei họ eveghe. Ẹsejọhọ oke nana Goliat ọ rọ ruẹ udeme na, rekọ oke yena yọ ame ọ vrẹ ighilawọ no. Utho na o tẹ nya ovavo bru Goliat. U te ki ei aruezo, o tẹ nẹ ruọ eva. Ere ọgwara na o ro kie “vovao tuotọ.” Devidi ọ tẹ dhẹ bru ei. O te yolo ọgbọdọ Goliat, ọ tẹ rehọ iẹe bru uzou riẹ no evaọ oria nọ o kie fihọ na. Udu o te ruọ ogbaẹmo Izrẹl na awọ. A te muhọ ebo, a tẹ wọ bru ahwo Filistia na. Ahwo Ọghẹnẹ a tẹ rọ ere fi ẹmo na kparobọ evaọ ẹdẹ yena. Udu nọ Devidi o wo, oye o lẹliẹ ogbaẹmo Izrẹl gudu na. Yọ anwọ oke yena ze na, ere ọvona o be lẹliẹ ahwo nọ a wo ẹrọwọ gudu re.

Se iku Ebaibol na:

• 1 Samuẹle 16:13, 18, 19; 17:1-54

Onọ nọ a rẹ ta ẹme kpahe:

Eme gbe eme Devidi o ru ro dhesẹ nọ ọ gudu evaọ okenọ ọ jọ uzoge?

Gbẹ Kiẹ Kodo

1. 1. Ahwo jọ vẹ evaọ usu esẹ-ologbo Devidi a gudu? (Mat. 1:5, 6; Luk 3:31-38; w12 10/1 24 ¶3)

   Uyo ra

2. 2. Eme o dhesẹ nọ iku nana e ginẹ via? (wp16.5 13) Uwoho 1

   Uyo ra

   

   Collection of the Israel Antiquities Authority. Photo © The Israel Museum, by Meidad Suchowolski

3. 3. Dhesẹ oghẹrẹ nọ uzuazọ Devidi o jọ evaọ oke nọ ọ gbẹ maha nọ ọ jọ othuru-igodẹ. (w11 9/1 27 ¶1–28 ¶1) Uwoho avọ 2

   Uyo ra

   

   Todd Bolen/BiblePlaces.com

4. 4. Oghẹrẹ vẹ ahwo jọ a je rri Devidi? (w21.03 3 ¶6; it “Ẹlayab” Ọrọ avọ 4 ¶1)

   Uyo ra

Roro Kpahe Eware nọ Who Wuhrẹ Noi Ze

• Ẹvẹ whọ sae rọ rehọ aro kele Devidi nọ . . .

  • ozọ u te bi mu owhẹ? Uwoho avọ 3

    Uyo ra

    

  • ekpehre isiuru e tẹ ruọ owhẹ eva?

    Uyo ra

• Nọ whọ tẹ gudu, ẹvẹ oriruo ra o sai ro fiobọhọ kẹ amọfa? (1 Sam. 17:50-53)

  Uyo ra

• Oghẹrẹ ọfa vẹ whọ sae rọ rehọ aro kele Devidi gudu wọhọ epanọ ma ruẹ evaọ iku nana?

  Uyo ra

Roro Didi Kpahe Jihova avọ Oreva Riẹ

• Eme me wuhrẹ kpahe Jihova evaọ iku nana?

  Uyo ra

• Oghẹrẹ vẹ iku nana i ro dhesẹ oware nọ Jihova ọ gwọlọ ru via?

  Uyo ra

• Nọ a tẹ kpare Devidi ze no, enọ vẹ mẹ te nọe kpahe oke nana uzuazọ riẹ?

  Uyo ra

Gbe Wuhrẹ Eware Efa

Evaọ ole emaha nana, wuhrẹ kpahe oware nọ u fiobọhọ kẹ Devidi gudu ziezi.

Devidi O Fi Emamọ Oriruo Hotọ kẹ Izoge (2:35)

Eme inievo-emezae a re ru re amọfa a sai fievahọ ae, a vẹ jẹ kẹ ae adhẹẹ wọhọ epanọ o jọ kẹ Devidi na?

“Izoge Emezae​—Eme Wha re Ru re A Sai Fievahọ Owhai?” (w21.03 2-5 ¶1-11)