O Gwọlọ nọ Ọ rẹ Gudu re Ọ Sae Jọ Abọ Ohwo nọ O Fo

EZAE ivẹ jọ nọ e wha ekwakwa ẹmo a be gadiẹ ovovẹrẹ kpobọ ehru ugbehru jọ nọ o kuwhrẹrẹ gaga, o tẹ jẹ rrọ thokri thokri. A be nyae họre ogbaẹmo ahwo Filistia soso. Ọzae nọ ọ kobaro na họ Jonatan ọmọzae Sọl nọ ọ rrọ ovie ọsosuọ Izrẹl. Ọzae nọ ọ rrọ emu riẹ yọ ohwo nọ ọ rẹ wha ekwakwa ẹmo riẹ nọ ọ gudu ziezi. Ẹme nọ Jonatan ọ ta kẹe ọ kẹ riẹ udu nọ o bi ro lele iei na. Ọ ta kẹe nọ: “Oware ovo o rẹ za Jihova dhe he nọ ọ tẹ gwọlọ rọ ahwo buobu hayo umutho ahwo siwi.” Jihova o dhesẹ kẹ Jonatan nọ ẹme riẹ na ọ gba. O fiobọhọ kẹ aimava na nọ a ro kpe isoja udhe (20) soso! Jihova ọ tẹ jẹ rọ enẹ kẹ ahwo Izrẹl nọ i kiọkọ udu nọ a ro fi ahwo Filistia na kparobọ.

Oware yena nọ Jonatan o ru na u dhesẹ nọ ọ gudu ziezi. Rekọ orọnikọ oke yena ọvo Jonatan ọ rọ gudu hu. Ọ gudu evaọ oke ofa sa-sa re. Ọ tẹ jẹ jọ ohwo nọ ọ talamu Jihova nọ o je yoẹme kẹe. Yọ re ọ talamu Jihova, o gwọlọ nọ ọ rẹ gudu re. Wọhọ oriruo, Jonatan o je yoẹme kẹ Sọl ọsẹ riẹ. Rekọ u te oria jọ, Sọl o te nwene no. O gbe je yoẹme kẹ Jihova ha. Fikiere, o gwọlọ nọ Jonatan ọ rẹ gudu re ọ sae talamu Jihova je yoẹme kẹe vi Sọl ọsẹ riẹ.

Nọ ikpe buobu e vrẹ no, Jonatan o te mu usu kugbe Devidi. Oke nana yọ Jonatan ọ be joma te ikpe udhuvẹ-gbikpe (50) no, rekọ Devidi ọ gbẹ maha. Oke yena Devidi o ro kpe ọgwara Filistia nọ a re se Goliat. Yọ Sọl avọ ahwo na kpobi a te siọ edẹ ba ekuhọ Devidi hi. Kọ Jonatan ọ re Devidi ihri? O ru ere vievie he. Ukpoye, ọ kẹ Devidi uze riẹ gbe ekwakwa ẹmo riẹ efa. Okpoware ọ kẹ Devidi na, keme ọ jẹ hae rehọ uze riẹ na sa ose gaga. Dede nọ Jonatan ọ rọ oware wọhọ ikpe ọgba (30) ro vi Devidi, aimava a re ọvọ inọ a rẹ jọ egbẹnyusu, yọ a raha ọvọ na vievie he.

Evaọ oke ọsosuọ, Sọl o you Devidi re. Rekọ o te mu Devidi ihri họ ẹre gaga, fikiere o te mukpahe iẹe. Ọ gwọlọ nọ epọvo na Jonatan o re ru re, rekọ o ru ere he. Jonatan ọ talamu Devidi ogbẹnyusu riẹ, o make rọnọ ọ riẹ nọ Devidi họ ohwo nọ Jihova ọ salọ re ọ jọ ovie Izrẹl nọ u te no ọsẹ riẹ no. Oke jọ nọ Sọl ọ ta nọ o re kpe Devidi no, Jonatan ọ thothọ Devidi. Fikinọ ọ gudu ọ sai ro ru ere na. Fikieme ma rọ ta ere? Keme ọgbaẹmo ologbo Sọl ọ jọ dede nọ ọ be kpako no. U tube wo oke jọ dede nọ Sọl ọ rọ rehọ ozuẹ fi Jonatan ọmọ obọriẹ na fikinọ ọ jẹ thothọ Devidi! Rekọ ozuẹ na o te rie he. Oware nọ o via na o kẹ Jonatan uye gaga. Ọ tẹ nyabru Devidi. Ọ tẹ vuẹe nọ Sọl ọsẹ riẹ ọ gwọlọ kpe Devidi no. Jonatan ọ tẹ jẹ vuẹ Devidi nọ o fiobọhọ kẹe rẹrote uviuwou riẹ otẹrọnọ oware jọ o si uwhu kpei.

Fikinọ Sọl ovie na ọ jẹ gwọlọ nọ o re kpe Devidi no, Devidi ọ tẹ dhẹ kẹ uzuazọ riẹ. Sọl ọ jẹ tubẹ rọ ogbaẹmo riẹ le Devidi dede. U te ru nọ Devidi ọ jẹ rọ dhẹ no oria ruọ oria nyai dhere. Kọ Jonatan o kuomagbe ogbaẹmo Sọl je le Devidi? Ebaibol na ọ ta ere vievie he. Yọ ma riẹ nọ Jonatan ọ te dawo oware otioye he. U wo oke jọ dede nọ Jonatan o yo nọ Devidi o dhere oria jọ, ọ tẹ nyae ruẹ ogbẹnyusu riẹ na. Fikieme? Ebaibol na ọ ta nọ Jonatan ọ “tuduhọ iẹe awọ re o fievahọ Jihova.” Ọ ta kẹ Devidi nọ: “Jọ ozọ u mu owhẹ hẹ, keme Sọl ọsẹ mẹ ọ te ruẹ owhẹ hẹ; whọ te jọ ovie Izrẹl, mẹ vẹ te rọ kẹle owhẹ.” Egbẹnyusu ivẹ na a te kpohọ ọvuọ obo riẹ. Aimava a gbẹ ruẹ ohwohwo vrẹ ere he.

Nọ oke yena o vrẹ no, u gbe kri hi, Jonatan o te lele Sọl ọsẹ riẹ kpohọ ẹmo nọ a jẹ jọ họre ogbaẹmo ahwo Filistia. Yọ ae họ ewegrẹ Jihova nọ u fo nọ a re lele họre, orọnikọ Devidi hi. Rekọ evaọ oke nana yọ Sọl ọ nyasiọ Jihova ba no. Ọ jẹ tubẹ nyabru ahwo nọ a re ru iruẹru-imizi dede. Fikiere, Jihova ọ gbẹ jọ kugbei hi. Nọ a je fi ẹmo na, a tẹ nwa ovie na oma gaga, fikiere o te kpe omobọ riẹ no. Emezae esa riẹ i te je whu evaọ ẹmo na, yọ Jonatan ọ jọ usu rai.

Uwhu amọ Jonatan na o da Devidi gaga. O tẹ lẹliẹe je weri. Fikiere o te kere ole uweri jọ ro dhesẹ epanọ o you Jonatan ogbẹnyusu ezi riẹ na te. O se ole na “Uze Na.” O sae jọ nọ o se rie ere fiki uze nọ Jonatan o ro ru ei ọghọ evaọ ikpe jọ nọ e vrẹ. Devidi ọ jọ ole na kere nọ: “O Jonatan oniọvo mẹ, whọ be da omẹ gaga; whọ jọ ghaghae kẹ omẹ gaga.” Oware ofa jọ họ, Devidi o koko eyaa nọ ọ ya kẹ Jonatan ogbẹnyusu riẹ. Nọ a rehọ Devidi mu ovie no, ọ tẹ nọ sọ ọ sae ruẹ ohwo jọ evaọ uviuwou Jonatan. Ọ tẹ ruẹ ọmọzae riẹ nọ ọ ko awọ nọ a re se Mẹfiboshẹt. Devidi ọ tẹ rehọ iẹe ze te rria kẹle Jerusalẹm. Ọ tẹ jẹ rẹrotei no umuo oke yena vrẹ.

Se iku Ebaibol na:

• 1 Samuẹle 13:2, 19-23; 14:1-15; 16:21; 18:1-9; 19:4-6; 20:1-42; 23:16-18; 28:6-8; 31:1-6

• 2 Samuẹle 1:17-27; 9:1-7

Onọ nọ a rẹ ta ẹme kpahe:

Eme gbe eme Jonatan o ru ro dhesẹ nọ ọ gudu?

Gbẹ Kiẹ Kodo

1. 1. Amono ahwo Filistia a jọ? (w95 2/1 31)

   Uyo ra

2. 2. A jọ iku Ebaibol nana fodẹ “pim.” Ẹvẹ oyena u ro dhesẹ nọ iku na e rrọ gbagba? (w05 3/15 29) Uwoho 1

   Uyo ra

   

Todd Bolen/BiblePlaces.com

1. 4. Devidi ọ ya eyaa kẹ Jonatan inọ ọ te rẹrote uviuwou riẹ. Ẹvẹ ọ daoma te re ọ sai koko eyaa riẹ na? (it “Mẹfiboshẹt” Ọrọ avọ 2 ¶1)

   Uyo ra

Roro Kpahe Eware nọ Who Wuhrẹ Noi Ze

• Jonatan o yoẹme kẹ Jihova jẹ talamu ei, viukpọ Sọl ọsẹ riẹ. Oke vẹ o sae rọ gwọlọ nọ ma yoẹme kẹ Jihova vi omọfa jọ kpobi? Uwoho avọ 3

  Uyo ra

  

• Eme iku Jonatan avọ Devidi na e rẹ sai wuhrẹ omai kpahe . . .

  • usu?

    Uyo ra

  • omaurokpotọ?

    Uyo ra

  • epanọ ma rẹ rọ talamu Jihova gbe amọfa?

    Uyo ra

• Oghẹrẹ ọfa vẹ whọ sae rọ rehọ aro kele Jonatan gudu?

  Uyo ra

Roro Didi Kpahe Jihova avọ Oreva Riẹ

• Eme me wuhrẹ kpahe Jihova evaọ iku nana?

  Uyo ra

• Oghẹrẹ vẹ iku nana i ro dhesẹ oware nọ Jihova ọ gwọlọ ru via?

  Uyo ra

• Enọ vẹ mẹ te nọ Jonatan nọ a tẹ kpare iẹe ze no?

  Uyo ra

Gbe Wuhrẹ Eware Efa

Eme o fiobọhọ kẹ Jonatan avọ Devidi jọ egbẹnyusu ekpekpe? Kọ ẹvẹ ma sai ro wo egbẹnyusu ekpekpe nẹnẹ?

“Gbẹ Hai Dhesẹ Uyoyou-Inievo” (w21.01 20-25)

Fiobọhọ kẹ emọ ra riẹ otọ eware nọ e via evaọ uzuazọ Jonatan, gbe eware nọ a rẹ sai wuhrẹ no iku uzuazọ riẹ ze.

“Jonatan” (Ekade Ebaibol evaọ itanẹte)