“Ọnọ Ọ Mai Wo Oghale Evaọ Usu Eyae Kpobi”

SISERA ọ dhẹ siọ ahwo riẹ nọ ọ wha kpohọ ẹmo ba ukiekpotọ Jezrẹl, re a whu kufiẹ evaọ obei. O roro ẹdẹvo ho inọ ahwo Izrẹl nọ a wo emamọ okwakwa ẹmo ọvuọvo ho a sai fi ogbaẹmo ọgaga riẹ kparobọ. Keme ae omarai a wo ekẹkẹ ẹmo ayọno egba izii (900) nọ a dhẹ, rekọ owotọ gheghe ahwo Izrẹl a ro kpohọ ẹmo na. Nọ ọ be dhẹ na yọ o bi roro oria nọ ọ rẹ sai dhere. Ọ tẹ dhẹ kpohọ uwou-udhu Hiba ohwo Kẹn.

Ahwo Kẹn buobu avọ ahwo Izrẹl a jẹ riẹ yerikugbe. Ugbanwọ oke Mosis nọ aye riẹ ọ jọ ohwo Kẹn usu na u ro muhọ. Evaọ oke nana yọ ahwo Kẹn a be rria ẹkwotọ Izrẹl. Rekọ Hiba ọ jọ wọhọ ahwo Kẹn efa ha. O mu usu kugbe ahwo Izrẹl he. Ukpoye kọ Jabin nọ ọ jọ ovie Kenan o mu usu kugbe. Nọ orọnọ Sisera họ oletu ogbaẹmo Jabin na, ọ rehọ e riẹ nọ ọ sae dhẹ nyai dhere uwou-udhu Hiba. O wọhọ nọ Sisera ọ riẹ hẹ inọ Jeẹl nọ ọ jọ aye Hiba ọ wọhọ ọzae riẹ hẹ, inọ o wo iroro riẹ sa.

Jeẹl ọ jọ uwou, rekọ ọzae riẹ ọ jariẹ hẹ. Nọ ọ ruẹ Sisera nọ ọ be dhẹ ze, ọ tẹ nwani mu oware nọ o ti ru họ eroro. Ọ riẹ ohwo nọ Sisera ọ rrọ. Ọ riẹ nọ ojihẹ ọ rrọ. Debora nọ ọ rrọ ọruẹaro Jihova ọ ta kpahe Sisera no vẹre inọ aye o ti kpei, orọnikọ ọzae he. O sae jọ nọ Jeẹl ọ riẹ kpahe onana ha. Ghele na, ẹsejọhọ Jeẹl ọ riẹ oware nọ Jihova ọ gwọlọ nọ o ru. Fikieme ma sae rọ ta ere?

Uwhremu na, ẹzi Ọghẹnẹ ọ wọ Debora kere ole jọ kpahe ẹmo nọ Berak ọ jọ fi Sisera kparobọ na. O kere nọ: “Jeẹl họ ọnọ ọ mai wo oghale evaọ usu eyae kpobi, aye Hiba ohwo Kẹn na; ọye ọ mai wo oghale evaọ usu eyae nọ e be rria iwou-udhu.” Fikiere, orọnikọ Jeẹl yọ aye omuomu nọ o wo ekpehre eva ha wọhọ epanọ egba-avro jọ a dhesẹ i rie. Ukpoye, aye nọ ọ gudu ọ jọ, nọ ọ họre evaọ emo Jihova. Jeẹl ọ salọ nọ ọ rẹ jọ abọ Jihova orọnọ abọ ewegrẹ riẹ hẹ, wọhọ epanọ Rehab o ru evaọ okenọ o vrẹ. Ọ riẹ nọ Sisera yọ ọwegrẹ ologbo Jihova. Yọ Jihova ọ gwọlọ nọ a re kpei no. Fikiere, ọ gwọlọ rọ uvẹ nana ru oware nọ Jihova ọ gwọlọ na. Kọ ẹvẹ o ti ro ru ei?

Jeẹl ọ riẹ nọ u wo oghẹrẹ ọvuọvo nọ ọ sai ro lele Sisera họre he. Ọgbaẹmo nọ ọ goma, nọ o fi ẹmo reria no Sisera ọ jọ. Fikiere, ọ tẹ ta kẹe nọ ọ ruọ uwou, re ọ re omoware je serihọ. Ọ tẹ rọ ohọ ehwa ruru ei. Nọ Sisera ọ vuẹe nọ ọ kẹe ame, Jeẹl ọ tẹ kẹe ame-ivie eruẹ. Sisera ọ tẹ ta kẹe nọ o dikihẹ unu uwou-udhu na re ọ hai rou. Otẹrọnọ ohwo jọ ọ tẹ nyaze te nọ sọ ọzae jọ ọ rrọ etẹe, o ve gu ọrue kẹe nọ ijo. Kẹsena Sisera o te kieruọ owezẹ udidi.

Jeẹl ọ riẹ nọ uvẹ na u rovie fihọ kẹe no. Ọ tẹ tọlọ eware nọ ọ be hai ro ru iruo anwẹdẹ vẹre. Ọ tọlọ ogbokọ avọ ughele nọ a rẹ rọ tehe uwou-udhu nyaotọ. Yọ o sae jọ nọ ure a ro ru eware ivẹ nana. Ọ tẹ nabe kuẹlẹ kpohọ oria nọ ọgbaẹmo na ọ be jọ wezẹ na. O te ruwẹ kẹle uzou riẹ, o te bi ru epanọ o re ro kpei no. Omoware jọ o hae thọ Jeẹl obọ evaọ oke nana, a hẹ sae ruẹ unu gbiku oghẹrẹ nọ Sisera ọ hai ro kpei no ho. Rekọ oware ovo o thọ riẹ obọ họ. O raha oke he, ọ tẹ tehe ughele na fihọ abovao riẹ lafi. Ere Sisera o ro whu fihọ etẹe!

U gbe lehie he, Berak ọ tẹ dhẹ ze be gwọlọ Sisera. Jeẹl ọ tẹ nwane ruọ otafe bru ei. Ọ tẹ ta kẹe nọ, “Nyaze re me dhesẹ ọzae nọ whọ be gwọlọ na kẹ owhẹ.” Nọ Berak ọ ruọ eva uwou-udhu na, ọ tẹ ruẹ nọ eruẹaruẹ nọ Debora ọ ruẹ na i rugba no, inọ: “Jihova ọ te rehọ Sisera họ obọ aye.”

Berak avọ Debora a tẹ so ole obokparọ. Yọ a jọ ole na jiri Jeẹl. No oke yena vrẹ, a gbẹ jọ Ebaibol na fodẹ Jeẹl he. Rekọ o make rọnọ ikpe idu esa gbe egba ivẹ (3,200) e ruọ emu no na, ma gbe bi wuhrẹ emamọ eware no iku riẹ na ze. Nẹnẹ, mai ahwo Ọghẹnẹ ma gbẹ be rọ ekwakwa ẹmo họre he. Rekọ ma be họre wọso Ẹdhọ, idhivẹri riẹ, gbe akpọ omuomu nana. Yọ enẹna o tubẹ mae gwọlọ nọ ma rẹ gudu wọhọ Jeẹl.

Se iku Ebaibol na:

• Ibruoziẹ 4:9, 11, 17-22; 5:24-31

Onọ nọ a rẹ ta ẹme kpahe:

Eme gbe eme Jeẹl o ru ro dhesẹ nọ ọ gudu?

Roro Kpahe Eware nọ Who Wuhrẹ Noi Ze

• Wọhọ epanọ Jeẹl ọ gudu na, oke vẹ o sae rọ gwọlọ nọ oniọvo-ọmọtẹ nọ ọzae riẹ ọ rrọ ukoko na ha ọ rẹ rọ gudu?

  Uyo ra

• Jeẹl ọ jọ ọruẹaro wọhọ Debora ha, yọ ọ jọ ọgbaẹmo wọhọ Berak gbe he. Ghele na, o ru utho nọ ọ rẹ sai ru. Eme ma sai wuhrẹ mi ei otẹrọnọ oware jọ o be whaha omai nọ ma gbe bi ru te epanọ ma gwọlọ họ? Uwoho avọ 2

  Uyo ra

  

• Oghẹrẹ ọfa vẹ whọ sae rọ rehọ aro kele Jeẹl gudu?

  Uyo ra

Roro Didi Kpahe Jihova avọ Oreva Riẹ

• Eme me wuhrẹ kpahe Jihova evaọ iku nana?

  Uyo ra

• Oghẹrẹ vẹ iku nana i ro dhesẹ oware nọ Jihova ọ gwọlọ ru via?

  Uyo ra

• Enọ vẹ mẹ te nọ Jeẹl nọ a tẹ kpare iẹe ze no?

  Uyo ra

Gbe Wuhrẹ Eware Efa

Evaọ ividio nana, rri epanọ oriruo Jeẹl o ro fiobọhọ kẹ oniọvo-ọmọtẹ jọ nọ ọ gbẹ rrọ uzoge ta usi uwoma.

Rọ Aro Kele Enọ I Wo Udu, Orọnikọ Edhozọ Họ!—Jael, Orọnọ Ahwo Ẹwho Mẹrọz Ho (1:40)

Jeẹl yọ omọvo jọ evaọ usu eyae buobu nọ ma rẹ sai wuhrẹ emamọ eware mi. Se kpahe eyae nana jọ.

“Eme Ma rẹ Sai Wuhrẹ Mi Eyae nọ A Gbiku Rai Fihọ Ebaibol Na?” (ijwbq uzoẹme avọ 161)