“Mẹ te Siọ Owhẹ Ba Elele He”

EWARE e jọ yoyoma evaọ Izrẹl fikinọ ahwo na a je yoẹme kẹ Jihova ha. Jihova ọ tẹ kẹ ewegrẹ rai uvẹ re a kienyẹ ae wọhọ epanọ ọ vẹvẹ e rai unu. Evaọ oke yena, Jabin ọ jọ ovie Kenan. Sisera ọ tẹ jọ oletu ogbaẹmo riẹ, yọ ọ geva gaga. O je su ogbaẹmo ologbo. O te je wo ekẹkẹ ẹmo egba izii (900) nọ a rọ ayọno ru.

Evaọ ikpe udhe (20) soso ogbaẹmo Sisera o je gboja kẹ ahwo Izrẹl. O wọhọ nọ oke kpobi nọ a te fi ẹmo evaọ ẹwho hayo okpẹwho jọ, a re mu emetẹ kpo, a vẹ jẹ gba ae du. Fiki oware uyoma nana nọ o jẹ via na, idhere e jẹ hae jọ fọfọ. Ahwo a gbẹ jẹ rria iwhre he. Yọ umutho ezae Izrẹl ọvo a wo ekwakwa ẹmo nọ a sae rọ họre hayo thọ omarai.

Evaọ oke yena, aye jọ nọ ọ gudu nọ a re se Debora ọ jọ ọruẹaro Jihova. Yọ o je bruoziẹ ahwo Jihova evaọ okenọ a tẹ wọ ẹdhọ sei, makọ enọ e rrọ gaga dede. Evaọ okenọ Jihova ọ rehọ Berak mu re ọ jọ obruoziẹ je siwi ahwo riẹ, Debora họ ohwo nọ Jihova o vi re ọ vuẹ Berak oware nọ o re ru. U gbe Berak unu gaga okenọ Debora ọ vuẹe oware nọ Jihova ọ ta. Ọ vuẹ riẹ nọ o koko ezae idu ikpe (10,000) họ re a kpobọ Ugbehru Tebọ. Jihova o ti ru ei fi Sisera avọ ogbaẹmo riẹ kparobọ!

Kọ Berak yọ ohwo nọ o wo omorro? Kọ ofu o mu rie fikinọ aye Jihova ọ rọ ta ẹme kẹe? O jọ ere vievie he. Ọ rọwo nọ ọ rẹ nya wọhọ epanọ o yo na. Rekọ ọ ta nọ ọ rẹ nya otẹrọnọ Debora o re lele iei. Kọ oyena u dhesẹ nọ o wo ẹrọwọ họ? Ijo! Pọl ukọ na ọ fodẹ Berak evaọ usu ezae gbe eyae nọ i wo ẹrọwọ ọgaga nọ o kere kpahe uwhremu na. (Hib. 11:1, 2, 32) Ẹrọwọ nọ Berak o wo o lẹliẹ e riẹ ta kẹ Debora nọ jọ o lele ọyomariẹ avọ ogbaẹmo riẹ kpohọ ẹmo na. Fikieme? Keme ọ riẹ nọ Jihova ọ jẹ rọ Debora ruiruo. Yọ o te lele iei ọ te sae rọ vuẹe oware ofa kpobi nọ Jihova ọ te ta. Debora ọ tẹ ta kẹe ududu nọ: “Mẹ te siọ owhẹ ba elele he.” Ọ tẹ jẹ vuẹ Berak nọ, o make rọnọ ọyomariẹ o ti fi ẹmo na kparobọ na, orọnọ ọzae jọ hayo Berak omariẹ dede o ti kpe Sisera ha, rekọ aye o ti kpei. Ọghẹnẹ o ti ru re aye o wo orro na.

Berak ọ tẹ nyai ru epanọ Jihova ọ ta kẹe. O te koko ezae idu ikpe (10,000) nọ e gudu họ. Ọ tẹ kẹ ae umutho ekwakwa ẹmo kpobi nọ ọ sae kẹ ae. O te koko ae họ ehru Ugbehru Tebọ. Ugbehru yena nọ ọ rrọ otọ opraprara Jezrẹl na u kpehru te imita egba isoi gbe udhosa-gbivẹ (562), koyehọ irula odu ọvo gbe egba eree gbe udhuvẹ-gbene (1,844). Ugbehru na o tẹ jẹ wọhọ epaọ omodhe nọ a vẹtu. Nọ Debora gbe Berak avọ ogbaẹmo riẹ a dikihẹ ehru ugbehru na, a tẹ be kparo ruẹ Sisera avọ ogbaẹmo riẹ nọ a be dhẹ ekẹkẹ ẹmo ze.

Kọ ẹvẹ Berak o ti ru na? O hae jọ iletu ẹmo efa, oware nọ a hai ru họ, a hae te hẹrẹ bẹsenọ Sisera ọ rẹ wha ogbaẹmo riẹ kẹle Ugbehru Tebọ na taure a tẹ te wọ bru ai. Keme evaọ okenọ a te rọ gadiẹ ugbehru na bru ai na, ẹsiẹe o te mae rọ lọhọ kẹ ahwo Berak re a họre ae ziezi. Rekọ Berak ọ riẹ nọ Jihova họ ọnọ o wo ẹmo na orọnikọ ọyomariẹ hẹ. Fikiere ọ tẹ kezọ kẹ Debora. Jihova ọ rehọ Debora vuẹe nọ ọ kpama re ọ wọ bru ai. Ere Berak avọ ahwo riẹ a ro mu obotọ ugbehru na nọ ọ rrọ praprarapra na họ ẹdhẹ kpohọ re a rẹriẹ ovao dhe ekẹkẹ ẹmo idudu yena nọ e be họrọ bru ai ze na.

Ohwo ọ tẹ rọ ubiẹro oghẹrẹ nọ a re ro fi ẹmo rri rie, o sae wọhọ nọ a ti fi kparobọ họ. Rekọ Jihova ọ ruẹ nọ a gudu, o te fiobọhọ kẹ ae. Ọ whẹ ozighi họ ogbaẹmo ahwo Kenan na oma. Evaọ oghẹrẹ vẹ? Jihova o ru re okposo ọ rrọ. O raha oke he, ukiekpotọ Jezrẹl na soso o tẹ wọhọ oria nọ ame o ku. Fikiere ekẹkẹ ẹmo idudu yena e gbẹ jẹ sae dhẹ hẹ. Ọloho o te kru rai fihọ oria ọvo. Ere isoja Sisera a ro no ekẹkẹ ẹmo rai re a họre egbaẹmo Izrẹl ovao dhe ovao. Ekẹkẹ ẹmo na i gbe wiruo kẹ ogbaẹmo Sisera ha. Ahwo Izrẹl a te kpe ogbaẹmo Sisera na soso. Makọ osoja ọvo dede ọ zọ họ. Kọ eme ọ via kẹ Sisera omariẹ?

Sisera ọ rọ udugaga rọ owotọ dhẹ. O te zue ọloho ukiekpotọ na fa vrẹ ruọ oria okpekpehru. Ẹsejọhọ o je roro nọ ọ vabọ no. Ere ọ rọ dhẹ siọ ahwo riẹ ba re a whu kufiẹ. Rekọ Berak o te mu ei họ ele. Evaọ oke yena, Jihova o je rri ọvo. O wo oware jọ nọ ọ gwọlọ ru Sisera.

Se iku Ebaibol na:

• Ibruoziẹ 4:1-16, 23, 24; 5:1-23

Onọ nọ a rẹ ta ẹme kpahe:

Eme gbe eme Berak avọ Debora a ru ro dhesẹ nọ a gudu?

Gbẹ Kiẹ Kodo

1. 1. Ẹvẹ akpọ ọ jọ kẹ ahwo Izrẹl evaọ okenọ Sisera o je kienyẹ ae? (w15 8/1 13 ¶1)

   Uyo ra

2. 2. Evaọ ẹsibuobu, fikieme a gbe ro kele Debora fihọ usu ibruoziẹ 12 nọ i bruoziẹ evaọ Izrẹl he taure Samuẹle o te ti zihe ruọ ọruẹaro? (w86 6/1 31 ¶6-8)

   Uyo ra

1. 4. Debora avọ Berak a so ole inọ “isi na i fi” Sisera ẹmo. Kọ eme họ otọ ẹme rai na? (Ibr. 5:20; w05 3/1 28 ¶5)

   Uyo ra

Roro Kpahe Eware nọ Who Wuhrẹ Noi Ze

• Oke vẹ o sae rọ gwọlọ nọ oniọvo-ọmọzae ọ rọ aro kele oghẹrẹ nọ Berak ọ rọ romakpotọ rọwo nọ aye nọ ọ be gọ Jihova o fiobọhọ kẹe? Uwoho avọ 2

  Uyo ra

  

• Fikieme o rọ gwọlọ nọ Debora ọ rẹ gudu re ọ sai lele Berak? Oke vẹ o rọ gwọlọ nọ ma rẹ gudu re wọhọ Debora?

  Uyo ra

• Oghẹrẹ ọfa vẹ whọ sae rọ rehọ aro kele Berak avọ Debora gudu?

  Uyo ra

Roro Didi Kpahe Jihova avọ Oreva Riẹ

• Eme me wuhrẹ kpahe Jihova evaọ iku nana?

  Uyo ra

• Oghẹrẹ vẹ iku nana i ro dhesẹ oware nọ Jihova ọ gwọlọ ru via?

  Uyo ra

• Enọ vẹ mẹ te nọ Berak avọ Debora nọ a tẹ kpare ae ze no?

  Uyo ra

Gbe Wuhrẹ Eware Efa

Se kpahe epanọ iku nana i ro wuhrẹ omai nọ Jihova o bi rri eware nọ ma bi ru kẹe ghaghae.

“Jọ Ẹzi Unevaze Ra O Wha Ujiro Se Jihova!” (w17.04 28-32)

Eme ma jọ iku Berak avọ Debora wuhrẹ kpahe eva nọ a re fihọ ohwo, ọnyaba mai nọ ma rẹ riẹ, gbe ẹmeoyo?

“Fiki Ẹrọwọ, Berak O Fi Ogbaẹmo Ọgaga Kparobọ” (w03 11/15 28-31)