“Nyabru Fẹro”

IKPE buobu e vrẹ no anwẹnọ Mosis ọ rọ dhẹ no Ijipti na. Yọ o nwene no. Ọ kpako te oware wọhọ ikpe udhone (80) no, o te je wo aye gbe emọ ivẹ no. O wọhọ nọ iroro nọ o wo inọ ọye o ti siwi ahwo Izrẹl no Ijipti na i no rie eva no. Anwọ ikpe udhuvẹ (40) soso ọ be rọ rẹrote uthuru erao ọgọ riẹ evaọ ẹkwotọ Midian nọ ọ rẹ rrorro jẹ ya fia na. Onana u dhesẹ nọ o wo omaurokpotọ.

Jihova ọ ruẹ nọ Mosis o gine nwene no. Ẹdẹ jọ nọ Mosis ọ jọ kẹle Ugbehru Horẹb (koyehọ Saena), Jihova o te ru nọ ure inwe jọ o jẹ rọ ware erae nwenwenwe rekọ ọ jẹ to ho. Nọ Mosis o go kẹle iẹe, Jihova ọ tẹ rọ ukọ-odhiwu ologbo jọ ta ẹme kẹe no udevie erae na ze. Ọghẹnẹ ọ ta kẹe nọ o zihe kpobọ Ijipti re o su ahwo riẹ no igbo! Fikinọ Mosis ọ jẹ dina gu inoma, Ọghẹnẹ ọ tẹ tuduhọ iẹe awọ. Oghẹrẹ nọ o ro ru ei họ, o dhesẹ abọjọ otofa odẹ ọrẹri riẹ nọ a re se Jihova na kẹe: Ọ ta kẹe nọ: “Me ti Zihe Ro Oghẹrẹ Kpobi nọ Mẹ Gwọlọ Zihe Ro.” Onana u dhesẹ nọ Jihova ọ sai ru oware kpobi nọ u fo re o siwi ahwo riẹ nọ a bi kienyẹ na, o ve ru ai zihe ruọ orẹwho ulogbo.

Nọ Jihova ọ make ta ere no, o jẹ ruọ Mosis oma ghele he. O je rri omariẹ nọ o te he. Ọ jẹ ta nọ ọ te sae ta ẹme evaọ aro Fẹro ho. Rekọ Jihova ọ tẹ kpọe họ. O te je ru oware igbunu jọ ro ru ẹrọwọ riẹ ga. Jihova ọ kẹ Mosis ogaga nọ o ro ru eware igbunu. Yọ evaọ iku Ebaibol na, onana họ orọ ọsosuọ nọ Jihova ọ rọ kẹ ohwo-akpọ ogaga ru oware utioye. Ọ tẹ jẹ rọ Erọn nọ ọ rrọ oniọvo riẹ kẹe re o fiobọhọ kẹe jẹ jọ ọtota riẹ. Ukuhọ riẹ, Mosis ọ tẹ rọ udugaga rọwo nọ ọ rẹ nya. Ere o ro zihe ruọ mesaya, koyehọ ohwo nọ Jihova ọ salọ re o siwi ahwo riẹ.—Hib. 11:26.

Mosis o te zihe kpobọ Ijipti, yọ Erọn ọ rrọ kugbei. A tẹ nyabru Fẹro. Rekọ eware e riẹ nya ha. Ukpenọ Fẹro o re siobọno ahwo Izrẹl kpo, o te ru uye nọ a jẹ kẹ ae ga vi epanọ o jọ vẹre! Jihova ọ tẹ vuẹ Mosis nọ o zihe bru Fẹro re ọ vuẹe nọ ọ te rọ uye te Ijipti soso. Jihova o te ru ame Ethẹ Naele ologbo na zihe ruọ azẹ! Rekọ oware na u nuhu Fẹro ghele he. Fikiere, Jihova o vi Mosis bru Fẹro unuẹse buobu re ọ ta kẹe nọ ọ te rọ uye tehe iẹe. Yọ oke kpobi nọ ọ ta kẹe nọ ọ “nyabru Fẹro,” ọ jẹ hae nya ududu. Rekọ osu yena nọ o wo omorro na ọ jẹ kẹe uzou sokpọ họ. No uye ọsosuọ rite ọrọ avọ esa, uye na u je wholo ahwo Izrẹl re. Rekọ no uye avọ ene vrẹ, uye na u gbe je te ahwo Izrẹl he, kọ ahwo Ijipti ọvo u je te.

Uye na ọvuọvo u dhesẹ nọ eghẹnẹ ahwo Ijipti na i wo ogaga ọvo ho keme a sae whaha uye na ha. Izerẹ ahwo Ijipti nọ i re ru emajiki a sae rọ ogaga rai ru oware ovo ho. Yọ Fẹro omariẹ ọ sai ru oware ovo gbe he. Ghele na, Fẹro o gbe je ru udu riẹ gaga, ọ jẹ rọwo nọ o re siobọno erigbo riẹ kpo ho. Uye avọ izii na u ru nọ orẹwho Ijipti soso o rọ jọ ebi ọlala, rekọ ahwo Izrẹl a wo elo evaọ eria nọ a jẹ rria. Fẹro ọ tẹ te rọwo nọ o re siobọno ahwo Izrẹl kpo. Rekọ ọ tẹ wariẹ ru udu riẹ gaga, o te nwene iroro. Fẹro ọ tẹ vẹvẹ Mosis unu nọ ọ tẹ dawo iẹe zihe bru ei ze, o ti whu.

Rekọ nọ Jihova ọ wariẹ vi Mosis bru Fẹro ghele, Mosis ọ nya. Jihova ọ tẹ kẹ ae uye avọ ikpe nọ o jọ orọ urere. Onọ o wha uwhu se emọ ọsosuọ Ijipti kpobi, te ahwo te erao. Nọ Fẹro ọ ruẹ nọ ọmọ ọkpako riẹ o whu no, oma o tẹ lọhọ iẹe. Avọ omovuọ, o te se Mosis. Fẹro ọ tẹ ta nọ o siobọno ahwo Izrẹl no, ọ tẹ yare Mosis nọ ọ ghale iẹe. Ahwo Izrẹl a nwai no igbo no! No okenọ Abraham ọ rọ kake ruọ Ẹkwotọ Eyaa na rite okenọ a ro no igbo na, ikpe egba ene gbe ọgba (430) dẹẹ o rehọ. Okenọ ahwo Izrẹl a je no igbo na, “ogbotu ahwo sa-sa” o lele i rai. Yọ o wọhọ nọ ibuobu ahwo na yọ ahwo Ijipti. Fẹro ọ tẹ jẹ wariẹ nwene iroro. O te koko ogbaẹmo obuobu riẹ họ, o te mu ahwo Izrẹl họ ele!

Nọ Mosis avọ ahwo Izrẹl a te Abade Ọwawae na, o tẹ wọhọ nọ edhere ọvo ọ riẹ nọ a rẹ rọ dhẹ vabọ họ. Ozọ u te je mu ahwo Izrẹl na gaga. Mosis o te bo se Jihova re o fiobọhọ kẹ ae. Jihova o gine yo kẹe. O te ru oware jọ nọ u gbunu gaga evaọ usu eware nọ e mae gbunu evaọ ikuigbe ohwo-akpọ. Ọ hẹriẹ Abade Ọwawae na, ahwo Izrẹl a tẹ nya otọ oyaya ruọ abọ obei. Nọ Fẹro ọ ruẹ nọ ahwo Izrẹl na a be dhẹ vabọ no, tei te egbaẹmo riẹ a te mu ai họ ele. Rekọ nọ ahwo Izrẹl na kpobi a nya ruọ abọ obei no, Jihova o te ru nọ ame Abade Ọwawae na o ro whẹ ruru ahwo Ijipti, a tẹ da ame whu. Ere ogbaẹmo nọ o mae ga evaọ akpọ na oke yena o ro whu muotọ!

Eware igbunu yena e sae thọrọ Mosis ẹro vievie he! Ẹrọwọ riẹ ọ tẹ te ga vi epanọ ọ jọ vẹre. Ikpe udhuvẹ (40) nọ i lele i rie, Mosis o su ahwo Ọghẹnẹ jẹ rẹrote ai. Yọ o dhesẹ nọ o wo ẹrọwọ gbe uyoyou, ọ tẹ jẹ gudu. Mosis o te ti whu nọ ọ jọ ikpe udhozeza (120).

Se iku Ebaibol na:

• Ọnyano 2:15–5:23; 7:1–11:10; 12:29-41; 13:17–14:31

• Iziewariẹ 29:2, 3; 34:5-7

Onọ nọ a rẹ ta ẹme kpahe:

Eme gbe eme Mosis o ru ro dhesẹ nọ ọ gudu evaọ uzuazọ riẹ evaọ oke nana?

Gbẹ Kiẹ Kodo

1. 1. A fodẹ odẹ Fẹro nọ o je su evaọ oke yena ha, yọ a re jọ ikuigbe Ijipti ruẹ oware ovo nọ o ta kpahe okenọ ahwo Izrẹl a ro no igbo ho. O make rrọ ere na, fikieme ma sae rọ rọwo iku Ebaibol nana? (g04 4/8 7 ¶4–9 ¶1)

   Uyo ra

2. 2. Fikieme ahwo a jẹ rọ dhozọ Fẹro? (w14 4/15 8 ¶1) Uwoho 1

   Uyo ra

   

   PRISMA ARCHIVO/Alamy Stock Photo

3. 3. Ẹvẹ Iye Ikpe na i ro kpomovuọ họ eghẹnẹ Ijipti oma? (it “Eghẹnẹ-Ezae gbe Eghẹnẹ-Eyae” ¶24-26)

   Uyo ra

4. 4. Okenọ Jihova ọ hẹriẹ Abade Ọwawae na, eme u dhesẹ nọ oria nọ u rovie fihọ o jọ kẹkẹe? Kọ bro ahwo Izrẹl o sae jọ nọ a fa riẹ vrẹ? (it “Ọnyano” ¶46-51) Uwoho avọ 2

   Uyo ra

   

Roro Kpahe Eware nọ Who Wuhrẹ Noi Ze

• Ma te bi roro nọ ma te ohwo nọ o re ru iruo jọ nọ Jihova ọ kẹ omai hi, ẹvẹ oriruo Mosis ọ sae rọ tuduhọ omai awọ? (Ọny. 4:10; 7:6, 7)

  Uyo ra

• Wọhọ epanọ Erọn o fiobọhọ kẹ Mosis ru iruo nọ a kẹ riẹ ududu na, ẹvẹ ma sai ro ru epọvo na kẹ inievo mai evaọ ukoko na nẹnẹ? (Ọny. 4:14-16) Uwoho avọ 3

  Uyo ra

  

• Ẹvẹ whọ sae rọ rehọ aro kele Mosis gudu wọhọ epanọ ma ruẹ evaọ iku nana?

  Uyo ra

Roro Didi Kpahe Jihova avọ Oreva Riẹ

• Eme me wuhrẹ kpahe Jihova evaọ iku nana?

  Uyo ra

• Oghẹrẹ vẹ iku nana i ro dhesẹ oware nọ Jihova ọ gwọlọ ru via?

  Uyo ra

• Nọ a tẹ kpare Mosis ze no, enọ vẹ mẹ te nọe kpahe epanọ eware e jọ kẹe evaọ abọ nana uzuazọ riẹ?

  Uyo ra

Gbe Wuhrẹ Eware Efa

Wuhrẹ epanọ otofa odẹ na Jihova o sai ro fiobọhọ kẹ emaha gudu.

Odẹ na Jihova (1:54)

Eme eware nọ e via kẹ Mosis i wuhrẹ i rie kpahe oghẹrẹ ohwo nọ Jihova ọ rrọ?

“Ewuhrẹ Kpahe Idhere Jihova” (w05 6/1 6-10)