2 NOA
O Dhesẹ nọ Akpọ na Ọ Reabe
NỌ ENỌK o whu te omoke jọ no, ikọ-odhiwu jọ evaọ obọ odhiwu a tẹ wọso Ọghẹnẹ. Ikọ-odhiwu jọ nọ i zihe ruọ ikọ imuomu a te mu ekpehre isiuru họ ewo kẹ eyae nọ e rrọ otọakpọ. Fikiere a tẹ nyaziọ otọakpọ, a te zihe oma ruọ ahwo-akpọ. A te mu eyae nọ e were rai kpobi họ ẹrehọ kẹ omarai. Emọ nọ a yẹ kẹ ae, a jọ ahwo-akpọ nọ a wo ogaga ikọ-odhiwu. Ebaibol na o se rai Nẹfilim, a jọ egba nọ e geva thesiwa, yọ a je ru ozighi gaga. Fiki ekpehre uruemu rai na, ahwo nọ a jọ otọakpọ na evaọ oke yena a tẹ geva vi utho. Evaọ aro Ọghẹnẹ, ahwo-akpọ nọ ọ ma wowoma na a te yoma vrẹta, otọakpọ na soso o tẹ raha no. Rekọ ọzae jọ ọ jariẹ nọ o wo ohẹriẹ, odẹ riẹ Noa, ọmọ-uruọmọ avọ ivẹ Enọk.
Noa ọ jọ ohwo okiẹrẹe wọhọ Enọk. Ebaibol na ọ ta nọ: “Noa o lele Ọghẹnẹ uzẹme na nya.” No oke jọ o vrẹ no, Noa o te wo aye. Yọ tei te aye riẹ a wuhrẹ emezae esa rai re a yoẹme kẹ Jihova re. O tẹ so ẹe ze nọ uviuwou rai u ro wo ohẹriẹ no erọ amọfa nọ e wariẹ e rai họ.
Ẹdẹ jọ, Jihova ọ tẹ ta kẹ Noa nọ ọ gwọlọ raha ahwo oyoma nọ a rrọ akpọ na kpobi no. Rekọ Jihova o ru Noa wo ẹruore. Ọ ta kẹ Noa nọ o ku okọ ologbo jọ re ọ sai siwi ahwo jọ. Noa ọ re ruẹ owhe nọ o ku otọakpọ na soso ẹdẹvo ho wọhọ epanọ Jihova ọ ta nọ o te via na. Yọ o ri ku okọ ulogbo utiọye na ẹdẹvo ho. Rekọ o fievahọ Jihova, o te mu okọ na họ eku.
Ewegrẹ nọ i re muozọ a mukpahe Noa avọ uviuwou riẹ fiki ovuẹ rai gbe iruo nọ a je ru
O gwọlọ nọ Noa avọ ahwo uviuwou riẹ a rẹ gudu re a sai ru iruo nana keme ahwo buobu a jẹ wọso ae. Amọfa a je se ai ẹkoko, yọ ejọ dede a jẹ gwọlọ whaha iruo na. Ikọ-odhiwu nọ i zihe oma ruọ ahwo na a jọ muomu, yọ a jẹ wha idudu họ ahwo oma. Emọ rai omarai a geva vi utho. Rekọ Noa avọ aye riẹ, gbe emezae esa rai avọ eyae rai, koyehọ imaree a gbe je ru iruo na vrẹ ọvo. Nọ a be jọ okọ na ru iruo kẹdẹ kẹdẹ na, yọ o be nyaharo. O sae jọ nọ o rehọ te ikpe udhuvẹ-gbikpe (50) hayo tubẹ vrẹ ere dede.
Evaọ oke yena kpobi na, Noa ọ faunu hu. Uwhremu na, a jọ Ebaibol na sei “ọtausiuwoma ẹrẹreokie.” Noa ọ rehọ iruo nọ ọ jẹ rọ vẹvẹ ahwo unu kpahe ẹdhoguo Jihova na zaharo vievie he. Nọ orọnọ ọye o wuzou uviuwou riẹ na, o fi emamọ oriruo hotọ kẹ ahwo uviuwou riẹ. Yọ a lele oriruo riẹ. Rekọ ohwo ọvo ọ gaviezọ họ. Makọ imoni Noa dede a rọwo gaviezọ kẹe he. Ahwo na a gwọlọ siobọno ikpehre eware nọ a je ru hu. Noa nọ o wo ẹrọwọ na o wo ohẹriẹ gaga no ahwo oke riẹ. Oyejabọ nọ Ebaibol ọ rọ ta kpahe Noa nọ: “Ọ rọ ẹkwoma ẹrọwọ nana dhesẹ nọ akpọ na ọ reabe.”
Ukuhọ riẹ, Noa avọ uviuwou riẹ a te ti ku okọ na re. U te ti te oke nọ a rẹ rọ wọ emu, ame, gbe eware efa fihọ okọ na. Eware nana e te jọ rọkẹ ae omarai gbe erao nọ e te jọ okọ na. Nọ u te oria jọ, oware jọ nọ u gbunu gaga o tẹ via. Oghoghẹrẹ erao kpobi, te erọ ezae te erọ eyae i te bi zurie ziọ obọ okọ na! Erao na ọvo “e tẹ ruọ eva okọ na bru Noa ivivẹ.”
Ọghẹnẹ ọ vuẹ Noa nọ jọ ọ rehọ uviuwou riẹ re a ruọ eva okọ na, keme oso na o ti muhọ ẹrọ evaọ oware edẹ ihrẹ. Dai roro epanọ iruo e te vọ uviuwou nana obọ te evaọ oke nana! A te gwọlọ nọ a rẹ kwa eware nọ i kiọkọ kpobi nọ a te rọ rẹrote omarai fihọ eva okọ na. A vẹ jẹ ruẹrẹ eware nọ a kwa fihọ eva riẹ no họ. O sae jọ nọ oke nana ahwo a jẹ mai ro se ai ẹkoko dede. Rekọ nọ a kwa eware na kpobi fihọ eva okọ na no, a jẹ ruọ eva riẹ no, Jihova ọvo ọ tẹ kare ẹthẹ na. Ẹsejọhọ evaọ oke nana, igbakọ nọ ahwo na a jẹ viẹ fihọ na i te muhọ eruru. Ere oso na o ro muhọ ẹrọ ze. Ame owhe na o te bi kpehru ọvo! Edẹ udhuvẹ (40) soso oso na ọ rrọ, bẹsenọ ame owhe na o re le igbehru kpobi no. Kọ enẹ Jihova o ro si ahwo omuomu kpobi no otọakpọ na.
Noa avọ ahwo uviuwou riẹ a jọ eva okọ na vrẹ ẹgbukpe soso. Evaọ oke yena, ame owhe na ọ tẹ jẹ rọ ẹmẹrera kpọ. Ukuhọ riẹ, okọ na ọ tẹ kpahe erru ugbehru jọ. Nọ oke jọ o vrẹ no, Jihova ọ tẹ vuẹ Noa nọ a rẹ sai no eva okọ na ze. Nọ Noa avọ ahwo uviuwou riẹ a no eva okọ na ze no, eva e were rai gaga nọ Jihova o siwi uzuazọ rai, fikiere a te dhe idhe ro yere Jihova. Jihova ọ ya eyaa nọ ọ rẹ gbẹ rọ owhe otiọye raha akpọ na ofa ha. O te fi usi-ame (koyehọ irembo) họ ehru re o jọ oka eyaa nana nọ ọ ya kẹ ahwo-akpọ na.
Uviuwou Noa ahwo nọ a rrọ akpọ na kpobi obọnana a no ze. Eva e were omai gaga nọ a gudu, a tẹ jẹ gbaemu nọ a re wo ohẹriẹ no ahwo omuomu oke rai!
Se iku Ebaibol na:
Onọ nọ a rẹ ta ẹme kpahe:
Eme gbe eme Noa o ru ro dhesẹ nọ ọ gudu?
Gbẹ Kiẹ Kodo
1. Ẹvẹ akpọ na ọ jọ taure Owhe na o te ti ku? (w02 3/1 5 ¶3–6 ¶4)
2. Oke vẹ Ọghẹnẹ ọ rọ ta kẹ Noa nọ o ku okọ? Oke vẹ Noa ọ rọ riẹ uzedhe oke nọ Owhe na o ti ro ku? (w12 4/15 23 ¶5-8)
3. Fikieme ma sae rọ rọwo nọ Owhe na o gine ku? (ijwbq uzoẹme avọ 156 ¶2-5, ẹkpẹti) Uwoho 1
Historic Collection/Alamy Stock Photo
Uwoho 1: Ahwo Hindu a re gbe iku jọ inọ ọzae jọ o ku okọ re ọ sae zọ evaọ oke nọ owhe o ku akpọ na soso. Nọ owhe na ọ kpọ no o te dhe idhe, kẹsena o te zihe ruọ ọsẹ-ode ahwo-akpọ nọ a kiọkọ kpobi
4. Nọ owhe na o ku vrẹ no, eme ọ via evaọ oware ikpe udhusoi (100) soso? Kọ ẹvẹ o sae jọ nọ u kpomahọ Noa nọ ọ kpako no evaọ oke yena? (it “Noa” Ọrọ 1 ¶12) Uwoho avọ 2
Uwoho 2
Roro Kpahe Eware nọ Who Wuhrẹ Noi Ze
Oghẹrẹ vẹ oke mai nana o rọ wọhọ oke Noa? (Mat. 24:36-39)
Eme who wuhrẹ mi Noa kpahe epanọ u wuzou te re ohwo ọ jọ ọnọ . . .
ọ rẹ riẹ eware kokohọ? Uwoho avọ 3
Uwoho 3
o re kru oma ga evaọ iruo? Uwoho avọ 4
Uwoho 4
o re wo odiri? Uwoho avọ 5
Uwoho 5
Ẹvẹ whọ sae rọ rehọ aro kele Noa gudu evaọ uzuazọ ra?
Roro Didi Kpahe Jihova avọ Oreva Riẹ
Eme me wuhrẹ kpahe Jihova evaọ iku nana?
Oghẹrẹ vẹ iku nana i ro dhesẹ oware nọ Jihova ọ gwọlọ ru via?
Enọ vẹ mẹ te nọ Noa nọ a tẹ kpare iẹe ze no?
Gbe Wuhrẹ Eware Efa
Rri epanọ ọsẹ jọ ọ rọ daoma gaga re ọ rọ aro kele oriruo Noa.
Rọ Aro Kele Ahwo nọ A Wo Ẹrọwọ, Orọnọ Enọ I Wo Ẹrọwọ Họ Họ—Noa, Orọnọ Ahwo Okegbe Riẹ Hẹ (2:57)
Fiobọhọ kẹ emọ ra re a wuhrẹ mi Noa.