1 ENỌK
O Lele Ọghẹnẹ Nya
ENỌK ọ riẹ epanọ o rẹ jọ nọ ohwo ọ tẹ rrọ goli. Ọ jọ wọhọ ahwo oke riẹ hẹ. Ọye ọvo họ ohwo nọ Ebaibol ọ ta kpahe evaọ oke riẹ nọ: “Enọk ọ ruabọhọ lele Ọghẹnẹ uzẹme na nya.” Oghẹrẹ vẹ ohwo nọ ọ rrọ otọakpọ ọ sai je ro lele Ọghẹnẹ nya? Kọ eme ma sai wuhrẹ mi Enọk kpahe oghẹrẹ nọ ohwo ọ rẹ rọ gudu?
U wo idhere ivẹ jọ nọ Enọk o ro lele Ọghẹnẹ uzẹme na nya. Ọrọ ọsosuọ, ọ rọwo ru eware jọ họ. Orọ avọ ivẹ, ọ rọwo nọ o re ru eware jọ. Ọ rọwo ru eware nọ ikpehre ahwo a je ru evaọ akpọ na ha. Ọ jọ oge avọ ihrẹ evaọ usu emọ nọ Adamu avọ Ivi a yẹ. Evaọ oke yena Adamu ọ gbẹ jọ uzuazọ rekọ ọ who gaga no. (Rri oria oke nọ eware e rọ via “No Umuo Oke Esẹ-Ode na Rite Oke Ibruoziẹ Na.”) Enwenọ ahwo kpobi evaọ oke yena a je veghe uzou kẹ Ọghẹnẹ wọhọ epanọ Adamu avọ Ivi nọ a yẹ rai na a ru. Keni ọmọzae rai o kpe Ebẹle oniọvo obọriẹ ọnọ ọ jọ ohwo ọsosuọ nọ o wo ẹrọwọ. Emọ Keni jọ gbe iruọmọ riẹ jọ a geva wọhọ Keni ọsẹ rai, yọ a tubẹ geva vi ei dede. (Emu. 4:23, 24) Enọk ọ kuvẹ vievie he re ekpehre uruemu ahwo oke riẹ na ọ ruọ ẹe oma. Ọ rọwo ho re ọ jọ eva gaga hayo ru ozighi wọhọ ahwo yena. Ọ jọ ohwo nọ ọ jẹ hai ru udhedhẹ, yọ onana o were Ọghẹnẹ gaga.
Ikpe buobu taure a te ti yẹ Enọk, “ahwo a [ro] mu odẹ Jihova họ ese.” (Emu. 4:26) O wọhọ nọ a je se odẹ na avọ adhẹẹ hẹ, yọ o sae jọ nọ eghẹnẹ erue a jẹ rehọ iẹe se. Enọk ọ rọwo ru ere he. O wo adhẹẹ odidi kẹ odẹ Jihova nọ ọ rrọ ọrẹri na, fikiere ọ jọ wọhọ ahwo oke riẹ na vievie he.
Jihova ọ thọ Enọk evaọ okenọ ahwo a jẹ gwọlọ kpei no fikinọ ovuẹ riẹ o were rai hi
O gwọlọ nọ Enọk ọ rẹ tubẹ gudu vi epanọ ọ gudu te vẹre re ọ sai ru oware nọ Jihova ọ ta kẹe. Ọghẹnẹ ọ kẹ Enọk obọdẹ iruo jọ nọ o ru, koyehọ re ọ jọ ọruẹaro. Ọ vuẹ riẹ nọ o whowho ovuẹ jọ kẹ ahwo nọ a jọ yoyoma gaga. Ovuẹ na họ: “Rri! Jihova ọ nyaze avọ erẹri riẹ nọ e rrọ buobu gbidi gbidi, re o bruoziẹ ahwo kpobi, re o brukpe ahwo omuomu kpobi fiki iruẹru imuomu rai kpobi nọ a ru evaọ edhere omuomu, gbe fiki eme aghọ kpobi nọ erahaizi nọ e be gọ Ọghẹnẹ hẹ na a ta kpahe iẹe.”
Evaọ eruẹaruẹ nọ Enọk ọ ruẹ na, ọ ta eme na wọhọ oware nọ o via vrẹ no, wọhọ ẹsenọ Ọghẹnẹ o bruoziẹ kpe ahwo yena no. Oyena u dhesẹ nọ eme Enọk na i ti rugba hrọ. Ovuẹ Enọk na o jọ gaga. Keme o se ahwo na erahaizi gbe ahwo omuomu, ọ tẹ jẹ ta kẹ ae nọ a bi ru iruẹru imuomu evaọ edhere omuomu. U mu omai ẹro nọ eme yena i ru eva dha ahwo nọ Enọk o je whowho ovuẹ na kẹ na gaga. O make rrọ ere na, ọ gbaudu vuẹ ae oware nọ Jihova ọ gwọlọ nọ a yo.
Kọ eme ahwo na a ru? Ebaibol na ọ ta dẹẹ hẹ, rekọ eme nọ Ebaibol na ọ ta i dhesẹ nọ oke jọ o jariẹ nọ uzuazọ Enọk o jọ ọza. Ẹvẹ ma rọ ta ere? Ebaibol na ọ ta nọ: “Kẹsena ọ gbẹ jọ họ, keme Ọghẹnẹ ọ rehọ e riẹ.” Oghẹrẹ vẹ o ro ru ei? O wọhọ nọ ahwo omuomu nọ a jariẹ evaọ oke Enọk na a mukpahe iẹe gaga, a te je kpokpo iei. Fikinọ Jihova o you Enọk ogbẹnyusu ọghaghae riẹ na, ọ gwọlọ nọ ahwo yena a nwae oma hayo kpei no ho. Fikiere o te ru ei nọ ọ rọ wezẹ dhedhẹ ruọ uwhu. Ere Jihova ọ rọ thọ Enọk no obọ ahwo omuomu na, rekọ Jihova ọ gbẹ be kareghẹhọ iẹe, fikiere ọ te kpare iẹe ze.
Rekọ u wo obọdẹ oware jọ nọ Jihova ọ kaki ru kẹ Enọk tao. Ebaibol na ọ ta nọ: “Taure a tẹ te rehọ iẹe vrẹ, a se isẹri kpahe iẹe nọ o ru Ọghẹnẹ eva were ziezi.” O sae jọ nọ Jihova o ru rie wezẹ ewezẹ kpahe okenọ otọakpọ na o te rọ jọ aparadase. Akpọ nọ ọyomariẹ ọ te jọ rria uzuazọ dhedhẹ! Taure Enọk o te ti whu, ọ riẹ vevẹ nọ Jihova o you rie, yọ ọ ghale riẹ fikinọ o wo ẹrọwọ ọgaga je dhesẹ nọ ọ gudu!
Se iku Ebaibol na:
Onọ nọ a rẹ ta ẹme kpahe:
Eme gbe eme Enọk o ru ro dhesẹ nọ ọ gudu?
Gbẹ Kiẹ Kodo
1. Oghẹrẹ vẹ o sae jọ nọ “ahwo a [ro] mu odẹ Jihova họ ese”? (Emu. 4:26; w01 9/15 29 ¶3)
2. Iruo vẹ Ọghẹnẹ ọ kẹ Enọk nọ ohwo ọvo o ri ru evaọ oke yena ha? Kọ ẹvẹ o ru iruo na? (w01 9/15 31 ¶5)
3. Fikieme ma sae rọ ta nọ taure Enọk o te ti mu aro họ ẹruẹ, ọ riẹ nọ o gwọlọ nọ ọ rẹ gudu? (w06 10/1 19 ¶13-14) Uwoho 1
Uwoho 1
4. Eme whọ rẹ sae ta ro dhesẹ nọ a rehọ Enọk kpohọ odhiwu hu wọhọ epanọ ahwo jọ a rọwo na? (Jọn 3:13; Hib. 11:5, 13)
Roro Kpahe Eware nọ Who Wuhrẹ Noi Ze
Oke vẹ o sae rọ gwọlọ nọ ma rẹ gudu ziezi re ma sae ta usi uwoma na? Wọhọ epanọ ma ruẹ evaọ oriruo Enọk na, eme ọ rẹ sai fiobọhọ kẹ omai? Uwoho avọ 2
Uwoho 2
Nọ ma te bi lele Jihova nya ududu, ẹvẹ o rẹ jariẹ oma? (Itẹ 27:11; Hib. 11:5)
Ẹvẹ whọ sae rọ rehọ aro kele Enọk gudu evaọ uzuazọ ra?
Roro Didi Kpahe Jihova avọ Oreva Riẹ
Eme me wuhrẹ kpahe Jihova evaọ iku nana?
Oghẹrẹ vẹ iku nana i ro dhesẹ oware nọ Jihova ọ gwọlọ ru via?
Enọ vẹ mẹ te nọ Enọk nọ a tẹ kpare iẹe ze no?
Gbe Wuhrẹ Eware Efa
Otẹrọnọ whọ be rria oria nọ a rẹ jọ ru ozighi, ẹvẹ oriruo Enọk na ọ sai ro fiobọhọ kẹ owhẹ?
Rọ Aro Kele Ahwo nọ A Wo Ẹrọwọ, Orọnọ Enọ I Wo Ẹrọwọ Họ Họ—Enọk, Orọnọ Lemẹk He (2:53)
Wuhrẹ kpahe oware nọ u fiobọhọ kẹ Enọk wo ẹrọwọ.